“Wea Lumun yô Tôô Se Foto!”

Zum u i bee mkohol u vesen ugen sha iyange i sha uhar yô, anmgbian ugen u a eren tom shin Betel ken tar u Mexico, i yer un ér Josué yô, lu zenden nengen ajiir ken gar u Querétaro. Orgen u i yer un ér Javier, vea kwase na Maru, mba ve lu marnya u tar u Colombia yô, va u va nengen ajiir hen gar ne. Mba nengen a Josué yô, ve kaa a na ér a tôô ve foto. Er Josué man azende a na a a lu Mbashiada la wuha iyol tsembelee shi ve wa ubaaji vev mba mkohol yô, or la vea kwase na pine ve ér ve za er iniongo i been makeranta shin ve za ka ma ikyumen iniongo igene? Josué pase ve ér ve za mkohol u vesen u Mbashiada mba Yehova, shi lôhô or ne vea kwase na ér ve za mkohol ne sha iyange i Lahadi.

Or ne vea kwase na ve nenge ér ve mba a akondo a injaa a huan zan imba mkohol la ga, nahan vea va za hee. Er lu inja er ve venda u zan mkohol ne nahan kpa, Josué na ve iti na kua namba u telefon u afishi a branci, ape lu eren tom la.

Kwagh er u kpiligh Josué iyol yô, iwer ngi kar inyiin yô, Javier lam a na. Un vea kwase na ve pase Josué er yange ve za mkohol u vesen shon yô, shi ve kaa ér ve soo ér Mbashiada mba Yehova ve zaan ve inya ken gar u Mexico City, ape ve lu hen shighe la la. Ica kera gba ga tsô, i hii u henen Bibilo a Javier man kwase na Maru, shi ve ngôôr ga je maa ve hii u zan mbamkombo. Iwer ngi kar pue yô, ve hii u pasen kwagh. Shin er or ne vea kwase na ve mough ve yem ken gar u Toronto, ken tar u Canada nahan kpa, ve za hemen u vesen ken jijingi zan zan i kar eren ve batisema.

Shighe kar yô, Javier nger Josué washika, pase un kwagh u yange na ve un ngohol mimi yô. A kaa ér: “Shighe u se lu a za mkohol la ga la, mo vea kwase wam se vande lamen kaan ser se ker iwasen hen Aôndo. Er se nenge a we kua azende a ou ne wuha iyol tsembelee yô, se hen ser a̱ shi nan kpa ne za mkombo u injaa mape. Se mba ze mkohol la yô, gbenda u i tese se ikyagh ki teman sha icivir, shi i lu wasen se u bughun Bibilo dondon kwagh u i lu ôron la doo se kpishi, kua ieren i dedoo i mba ve za mkohol la kpaa. Shin er se wuha iyol sha inja i man ahumbe nahan kpa, kwagh gba ior sha mi ga.”

Mkaanem ma Tor Solomon yange ôr man kure sha Josué vough. Ma kaa ér: “Lôô ivor you pepe, man aikighe kpaa de hiden a uwegh ou ga; gadia u fa i ia doo la ga, shin ka ngin shin ka ngira, shin ihiar cii ia doo u.” (Orpa. 11:6) U fatyô u lôôn ivor you sha u lôhôn ior ma mkohol shin ma kwaghôron u ken igbar shighe u ian i dugh kpa? Alaghga Yehova una urugh mba i sar ve u fan mimi, er Javier man Maru nahan sha iniôngon you la.—Yes. 55:1.

[Foto u sha peeji 32 la]

Hii ken imese yem ken iyan: Alejandro Voeguelin man Maru Pineda man Alejandro Pineda man Javier Pineda kua Josué Ramírez, mba hen afishi a branci a ken tar u Mexico