Mbampin Mba Mbaôron Takerada Ne Ve Pin La
Mbampin Mba Mbaôron Takerada Ne Ve Pin La
Ka hanma shighe Tahav mbu Tar cii mbu Amerika vea Ingila la yange mbu hingir tahav mbu tar cii mbu sha utaankaruhar mbu Bibilo tsengaôron kwagh u mbu laa?
▪ Zegeuee u Tor Nebukadinesar yange nenge a mi la tile sha ityough ki ityartor kposo kposo. Kpa eev mbun tile sha ityough ki hanma tartor u yange u vande lun cii ga. (Dan. 2:31-45) Eev mbun tese ityartor itian i yange i hemen sha tar, i i ta num sha ior mba Aôndo, hii sha shighe u Daniel yem ken hemen la tseegh.
Mpase u Daniel na sha kwagh u eev mbun ne tese ér Tahav mbu Tar cii mbu Amerika vea Ingila la mbua due ken Roma, a tese ér mbua hemba a hemba Roma ityav ga. Daniel nenge a iyôgh, hii shin ahambeangahar zan zan nyôr shin akevangahar man ahôangahar. (Shin akevangahar man ahôangahar la, iyôgh kira nungwa sha inyatyuu.) * Kwagh ne tese ér Tahav mbu Tar cii mbu Amerika vea Ingila la mbua due ken angahar a iyôô la. Yiase tese ér kwagh lu nahan vough. Ken mbee u kwavanyom u 1700 la, tar u Ingila, u u vande lun ken Tartor u Roma la hii u lun a tahav. Shighe kar yô, tar u Amerika kpa va hingir tar u lun a tahav. Nahan kpa, tartor u sha utaankaruhar u Bibilo tsengaôron kwagh u ú la lu a lu ve ga. Sha ci u nyi? Sha ci u tar u Ingila man u Amerika lu a er kwagh imôngo sha gbenda u vesen ga. Kpa shighe u i lu nôngon Ityav Mbi Tar Cii Mbi Hiihii la, ityar ne er kwagh imôngo sha gbenda u vesen.
Hen shighe la, “ônov mba tartor” lu eren tom kpoghuloo, hemban cii je yô, ken tar u Amerika, ape ijiir ve i shin itine i lu ken Kpentar u Brooklyn, ken gar u New York la. (Mat. 13:36-43) Mba i ishigh ve mkurem mbara yange ve lu pasen kwagh yughur yughur ken ityar i Tartor u Ingila lu hemen i la. Shighe u i lu nôngon Ityav Mbi Tar Cii Mbi sha Môm la, tar u Ingila man u Amerika ya ikyar kôôsôô sha u nôngon a mbaihyomov vev. Ityav mbira na yô, mbahemenev mba tar u Ingila man u Amerika hingir u soon ityar ve kpishi, shi ve ta num sha mba ve lu vegher u vor u “kwase” u Aôndo la, ve wa tindi ér i de u ôron ityakerada ve igen, shi ve wuhe mba ve lu hemen tom ve la ken purusu.—Mpa. 12:17.
Nahan sha kwagh u Bibilo i tsengeôron la yô, shighe u tar u Ingila hii u lun a tahav ken mbee u kwavanyom u 1700 la, tartor u sha utaankaruhar la lu a lu ga. Kpa gema lu sha mhii u iyange i Ter la, tartor ne hingir u lun ye. *
[Ngeren mba shin kpe]
^ Inyatyuu i i nongo sha iyô la tile sha ityough ki ior mba ve lu sha ajiir a tartor u Ingila man Amerika u hemen la. Ken anyom a karen ne,inyatyuu ne na yô, taver Tahav mbu Tar cii mbu Amerika vea Ingila mbun u eren kwagh sha utaha er mbu soo la.
^ Mpase ne ka u he. A gema kwagh u se vande pasen ken takerada u ken zwa Buter u i yer ér Daniel’s Prophecy, sha peeji 57, ikyumhiange i sha 24, man kwaghkperan u sha peeji 56 man peeji 139 la.
[Foto u sha peeji 19 la]
Yange i wuhe Anmgbianev anigheni mba ve lu hemen tom wase shin ijiir yase i shin itine la ken uwer u Jun, 1918
