“Á Na Ne Injar sha Tom Wen”

TOR ASA yange hemen ikyumutya na, ve mough sha agungu a ken tar Yuda ve hungwa shin pev ugen u zan kweng. Mba za nôô hen ape pev la hemba gbanger la yô, Asa maa tile. Kwagh u a nenge a mi la ta un ishima kwe. Yange nenge a ikyumutya i vesen i Mbakushi! Ikyumutya ne yange ia kuma iorov miliôn môm jimin, kpa ikyumutya i Asa yô, i̱ yina sha ikyumutya i Mbakushi la kuma kwa har.

Er lu u Asa una tagher vanger a ityav yô, ka nyi yange hii erene? Yange na ukurmbautyaav nav wadaa? Yange taver ikyumutya na ishimaa? Yange tindi a uwashika hen tsombor naa? Mayange ga cii! Kwagh u Asa er shighe u tagher a mtaver ne yô lu msen.

Cii ve se time sha msen u Asa yange er, man kwagh u za hemen la yô, de se hii timen sha imbaor i Asa lu yô. Ka nyi yange i na ve Asa ker iwasen hen Aôndo? Yange ver ishima ér Aôndo a wase un nahan lu sha mi kpa? Kwagh u Asa ne wase se u fan er Yehova a veren ior nav shighe u ve er kwagh u vough la nena?

IMBAOR I ASA LU YÔ

Yange i pav Iserael ker hingir ityartor ihiar, lu Yuda man Iserael, anyom kar kuma ikyundu nahan. Sha shighe ne tartor u Yuda hôngor sha mcivir u aiegh. Shighe u Asa tema tor ken inyom i 977 C.S.Y. (Cii man Shighe u Yesu) la, uityombaiorov mba ken tartor la je kpa ve civir mbaaôndo mba Mbakanaan mba doon iyiav mbara. Kpa Bibilo kaa ér Asa yange “er kwagh u doon u jighilii sha ashe a TER, Aôndo na.” Asa yange “vihi atse a nanden nagh sha mi agen, a a lu a ve ga la, kera, kua ajiir a taven sha la kpaa, a hembe mtôm ma awenem shi a gber Asherim kera.” (2 Kron. 14:2, 3) Shi Asa dugh “mba lun inja er Mbasodom nahan” la ken tar u Yuda kera, ka mba ve yaven a nomso mbagenev ér ka môm ken igbenda i civir mbaaôndo vev la. Kpa Asa dugh ambaaior la kera maa de ga. Yange na zwa ér ior “ve̱ ker TER, Aôndo u uter vev, ve̱ wa atindiakaa ikyo kua uiniezwa kpaa.”—1 Utor 15:12, 13; 2 Kron. 14:4.

Gbashima u Asa lu a mi sha kwagh u mcivir u mimi la na yô, doo Yehova a na, nahan bem gba ken Yuda anyom kpishi. Tor iyol na kaa wener: “Se ker TER Aôndo wase; se ker Un, nahan A na se mmem sha hanma ian.” Nahan ior seer maan ugir mba agar a ken Yuda taver, shighe u tartor u Yuda lu ken bem ne. Bibilo kaa ér: “Nahan ve za hemen u maan doo doo.”—2 Kron. 14:1, 6, 7.

ASA NÔNGO ITYAV

Asa yange eren kwagh u dedoo sha ishigh ki Yehova, ka nahan ve yange er msen hen Yehova shighe u gba u una nôngo ityav a ikyumutya i hemban kehen cii i í er kwagh u i ken Bibilo la ye. Asa yange fa er Aôndo a ne mba ve eren akaa a tesen ér ve na un jighjigh la injar yô. Nahan a sôn Yehova er a wase un. Asa na jighjigh ér aluer un suur sha Aôndo man a sue un ken ityav mbira yô, mbaihyomov mbara vea ngee nan shin vea taver iyol nan kpa, una hemba ve. Asa yange fa er aluer i hemba ve ityav mbin yô, kwagh la una hee iti i Yehova yô. Nahan a sôn Yehova a kaa ér: “Wase se TERE, Aôndo wase, gadia se mba suur sha a We, man ka ken iti You kpaa se ve ityav hen ikpelaior ne ye. TERE, ka We U lu Aôndo wase ye; or a̱ de  hembe ga, saa We tseegh.” (2 Kron. 14:11) Lu inja er lu kaan a Yehova ér: ‘Ka we je Mbakushi mban ve ve u va nôngon ityav a we ye, Yehova. De den wer uumace mba kaka mban ve hemba mba ve yer sha iti you ityav, ve lahan iti you ga’ nahan. “Tsô TER na Asa man Yuda ve hemba Mbakushi, nahan Mbakushi yevese.”—2 Kron. 14:12.

Ior mba Yehova tagher a mbaahendanev kpishi nyian mba ve lu a tahav kpishi yô. Gba u se nôngo ityav a ve sha ityumugh ki sha iyol ga, kpa se na jighjigh ser Yehova una na mbacivir un mba ve nôngon ityav mbi ken jijingi ken iti na la mhembe. Alaghga a gba u hanmô wase nana nôngo ityav a mnenge u kpeegh u tar u lu a mi la, shin akaa a nan se iyolkpen shin ma kwagh u una fatyô u vihin tsombor wase a Aôndo cii. Sea tagher a nyityô imeen je kpa, msen u Asa yange er la una fatyô u taver se ishima. Lu Yehova na Asa mhembe ye. Kwagh ne tese ér mba ve suur sha Aôndo cii vea fatyô u hemban nyityô mtev u sha ican u ve tagher a mi cii. Ma tahav mbu hemban Yehova mbu sha won ga.

ISHIMATAVER MAN ICINTAN

Asa ngur hiden ken ya yô, profeti Asaria za kegh un gbenda. Profeti ne wa un kwagh shi ta un icin kpaa. A kaa a na ér: “Ungwam nen, we, Asa, kua Yuda cii man Benyamin; TER ngu a ven, er ne lu a Na yô; aluer né ker Un yô, né zua a Na je; kpa aluer né undu Un yô, Un kpaa Una undu ne. . . . Taver nen ayol, ave a̱ de kpeen ne ga, gadia á na ne injar sha tom wen.”—2 Kron. 15:1, 2, 7.

Mkaanem man ma a fatyô u taver jighjigh wase u nan. Ma tese ér aluer se za hemen u civir Yehova sha jighjigh yô, una undu se ga. Shighe u se vaa se ve her a na yô, se lu a vangertiôr ser una ungwa se. Asaria yange kaa ér: “Taver nen ayol.” Ashighe kpishi ka i gba u se taver ishima ve se er kwagh u vough ye, kpa se fa tsô ser Yehova una wase se se er kwagh u vough.

Maaka u lu ngôtamen u Asa la, yange er “eev mbu ndôhôr ishima sha ci u Ashera,” nahan Asa dugh un “nagbaa” kera, shin er adooga kwagh ne yange una taver un u eren nahan kpaa. Yange nande eev mbura kera. (1 Utor 15:13) Yehova yange ver Asa doo doo sha ishimataver na la. Gba u se kpa se var a Yehova kôôsôô, shi se kuran atindi na a perapera la, aluer mba hen tsombor wase tile sha mimi sha ishigh ki Aôndo shin ve tile ga je kpaa. Se er nahan yô, Yehova una ver se doo doo sha ieren yase i mimi la.

Môm ken averen a Asa zua a mi yô, a nenge er Mbaiserael kpishi due ken tartor u Iserael u u tile sha mimi ga la, ve va ken Yuda sha ci u ve nenge ér Yehova ngu a Asa yô. Yange ve soo mcivir u mimi kpishi, nahan ve tsua u undun uya vev, va lun vea mbacivir Yehova imôngo. Nahan Asa man mba ken Yuda cii “ya ikyur er vea ker TER, Aôndo u uter vev, a ishima ve cii kua uma ve cii.” Nahan lu nyi i ere? Aôndo bugh gbenda “nahan ve zua a Na; TER kpaa na ve mmem hen ningir la cii.” (2 Kron. 15:9-15) Nyian kpa mbaasemaamimi ka vea tsua u civir Yehova yô, se ember kpishi.

Shighe u profeti Asaria lu taver tor Asa ishima la, yange ta un icin taveraa kpaa. A kaa a Asa ér: ‘Aluer u undu Yehova yô, Yehova kpa una undu u.’ Mayange imbakwagh ne i de eren se ga, sha ci u  ia er se yô, a vihi ato kpishi! (2 Pet. 2:20-22) Bibilo pase se er i hii ve Yehova yange ta Asa icin ne ga, kpa kwagh u se fe yô, Asa yange wa icintan ne ikyo ga.

“U ER IBUMEKWAGH”

Ken inyom i sha 36 i Asa tema tor la, Baasha tor u Iserael za sha u za nôngon ityav a Yuda. Tor Baasha maa girgar u Rama, gar u lu hen harga u Iserael man Yuda, u gba ica a gar u Yerusalem kuma ukilomita anigheni tseegh la. Alaghga yange maa gar ne sha ci u a soo ér ior mba ken tartor na ve yem ken Yuda ve za er Asa tom shi ve civir Yehova ga. Asa yange kera pine Yehova iwasen er vande pinen un shighe u Mbakushi ta ityav sha a na la nahan ga. Kpa gema ker iwasen hen uumace. Yange tindi tor u Shiria a uiyua ér a za nôngo ityav a Iserael sha ci na. Mbashiria mba za te ityav sha Iserael yô, Baasha maa de u maan girgar u Rama.—2 Kron. 16:1-5.

Kwagh u Asa er ne doo Yehova ga, nahan a tindi profeti Hanani ér a za pase un nahan. Er Asa vande nengen er Yehova wase un u hemban Mbakushi ityav yô, yange ma fa je ér “ashe a TER nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.” Alaghga Asa yange kegh ato a kwaghwan u injaa ga, shin nenge ér Baasha vea ikyumutya na cii kuma u eren un kwagh ga, nahan un tseegh kpa una ker gbenda u been a ve. A lu nyi je yange i na ve Asa er nahan kpa, yange kera suur sha Yehova ga, gema suur sha uumace. Nahan Hanani kaa a na ér: “Sha kwagh ne yô, u er ibumekwagh; gadia hii hegen je ityav mbia za u iyol.”—2 Kron. 16:7-9.

Asa ongo mkaanem man yô, ishima vihi un a profeti Hanani kpishi, nahan a gbihi un ken gaadi. (2 Kron. 16:10) Asa yange hen ér, ‘M civir Yehova sha jighjigh anyom kpishi hegen, nahan m gande mkôôm’ shinii? Shin iyolbeen yange na yô, kera lu henen kwagh tsembelee ga? Bibilo pase se ga.

Ken inyom i sha 39 i Asa tema tor la, angev kôr un shin angahar. Bibilo kaa ér: “Nahan kpaa ken angev nav a ker iwasen hen TER ga, kpa a gema a lu keren iwasen hen mbaucimbiv.” Ka inja ér ikyar i Asa ya vea Yehova la kera taver hen shighe la er tsuaa la ga nahan, shi ikyav tese ér ikyaryan na vea Yehova la doo ga zan zan kar kpen ken inyom i sha 41 i mtemtor la.—2 Kron. 16:12-14.

Nahan kpa, ikyav tese ér Yehova yange umbur aeren a dedoo a Asa man gbashima u lu a mi sha kwagh u mcivir u mimi la, lu asorabo a na ga. Asa yange de u civir Yehova ga. (1 Utor 15:14) Nahan ka nyi se hen sha kwagh u uma u Asaa? A wase se u fan ser aluer se mba umbur igbenda i Yehova yange vande wasen se ken ijime la yô, kwagh ne una mgbegha se u keren iwasen her a na, shighe u se tagher a ameen agen kpaa yô. Nahan kpa, doo u se hen ser se gande kwaghwan sha ci u se civir Aôndo sha jighjigh anyom kpishi yum ga. Sea civir Yehova shighe gôgônan je kpa, aluer se er kwaghbo yô, una kôôm se. Doo u se ngohol mkôôm la a iyol i hiden a mi ijime, sha er una lu se a iwasen yô. Kwagh u vesen u se hen yô, aluer se mba civir Ter wase u sha la sha mimi yô, mayange una gbihi se ga. Ashe a Yehova nga jingen sha tar cii, keren mba ve lu civir un sha mimi la. Ngu a yima ve sha tahav nav. Yehova yange yima Asa, se kpa una yima se.

[Mkaanem ma sha peeji 9 la]

Yehova ne mbacivir un mba jighjigh mba ve nenge ityav mbi ken jijingi la injar

[Mkaanem ma sha peeji 10 la]

Saa se taver ishima ve se er kwagh u vough sha ishigh ki Yehova ye