Hen Ishimawan Hen Yehova Man Yesu

“Fa nen er shima i wan i Ter wase la i lu myom yô.”​—2 PET. 3:15.

Ú NA MLUMUN WER NYI?

Yehova tese ér un we ishima nena?

Er nan ve yange gba u Yesu una wa ishima shighe gôgônana?

Ka nyi akaa se fatyô u eren sha er se hemba lun a ishimawan er Aôndo nahana?

1. Ka nyi mbajighjigh mbagenev ka ve tômô?

 A NMGBIAN u kwase ugen u a we ishima a mbamtaver anyom kpishi yô, yange pine ér, “Me nenge a mkur cii ve me kpe je kpa?” Mbagenev mba ve civir Yehova ica i gbe kpa kape ka ve pine je la. Se mba keghen iyange i Aôndo una gema akaa cii aa hingir a he, shi una kar a uzayol mba se lu tagher a mi nyian ne cii kera la. (Mpa. 21:5) Shin er se lu a atôakyaa a dedoo a nan jighjigh ser mkur u tar u Satan ne mgbôghom nahan kpa, ka zange u wan ishima keghen iyange la ga.

2. Ka mbampin mba sha kwagh u ishimawan mba nyi se lu timen sha mini?

² Nahan kpa Bibilo tese ér gba u se waan ishima. Se kpa aluer se wa ishima se kegh shighe u Aôndo una kure uityendezwa nav la, er mbacivir Aôndo mba ngise mbara nahan yô, se ngohol kwagh u a tende zwa u nan se la. (Ôr Mbaheberu 6:11, 12.) Yehova iyol na kpa ngu wan ishima a uumace. Una soo yô, ma a bee a iferkwagh kera ica ma i gbe hegen, kpa ngu keghen shighe u vough. (Rom. 9:20-24) Er nan ve Yehova a we ishima yum nahana? Yesu ngu a ishimawan vough er Ter na nahan nena, man a ver se ikyav sha kwagh ne nena? Aluer se mba wan ishima er Yehova nahan yô, a lu se a inja nena? Mbamlumun mba sha mbampin mban vea wase se u lun a ishimawan shi lun a jighjigh u nan taveraa, aluer ka se inja er Yehova ngu eren zôzô je kpaa.

YEHOVA WE ISHIMA SHA CI U NYI?

3, 4. (a) Hii nan ve Yehova a we ishima sha er una kure awashima na sha kwagh u tar nee? (b) Yehova yange er nena sha kwagh u ihyembeato i ken sule u Eden laa?

³ Yehova ngu a ityôkyaa i dedoo i i ne ve a we ishima yô. Yehova hemba tahav sha won cii, shi ngu a ian i eren kwagh u a doo un hanma shighe cii. Nahan kpa,  ihyembeato i ken sule u Eden la i due a ikyaa i yange gba u a nenge sha mi sha ci u iwasen i uumace man mbatyomov cii yô. Yehova wa ishima zan zan hegen sha ci u a fa ér saa shighe a kar ve a kure ikyaa ne vough ye. Er a fe kwagh u mbatyomov man uumace cii vindi vindi yô, hanma kwagh u a eren cii ka sha ci u mkpeyol wase tseegh.—Heb. 4:13.

⁴ Yehova yange wa ishima ér tar ne u iv a tsombor u Adam man Ifa. Shighe u Satan mee Ifa shi Adam kpa va hemba Aôndo ato la Aôndo ta awashima na la kera ga. Yange ishima nyian un, er kwagh gaegh ga, shi vihi ishima kar ikyaa inya shin yina ishima sha kwagh u uumace ga. Kpa gema due a gbenda ugen u kuren awashima na sha ci u uumace man tar ne. (Yes. 55:11) Yehova kôr iyol tsaha shi wa ishima kpishi sha er una kure awashima na shi una tese er i lu un tseegh un kom u hemen sha won cii yô. Nahan a kegh anyom udubu udubu je, sha er akaa agen a un we ishima la aa kure sha mi sha gbenda u hemban doon cii yô.

5. Ishimawan i Yehova la ia va se a averen a nyi?

⁵ Ityôkyaa igen i Yehova a we ishima a lu keghen zan zan yô, ka sha u ior ve zua a uma u tsôron yô. Hegen je, ngu kohol iyol sha er una va yima “zegeikpelaior” yô. (Mpa. 7:9, 14; 14:6) Yehova ngu lôhôn ior ér ve va hen kwagh u Tartor na man atindi na a perapera la, man ka sha tom wase u pasen kwagh la, a lu lôhôn ve ye. Loho u Tartor la ka loho u ú hembe doon u uumace vea ungwa yô, ka “loho u dedoo” jim jim. (Mat. 24:14) Hanma or u Yehova a urugh nan cii yô, nan hingir u lun ken nongo na u sha tar cii la. Mba ve lu ken nongo ne cii mba azende a mimi shi ve soo kwagh u vough. (Yoh. 6:44-47) Aôndo wase u se doo un ishima la ngu a wase mba a urugh ve la ve hingir ior mba i doo un a ve yô. Shi ngu tsuan ior ken uumace ér va za lu ken gomoti na u sha la. Uumace mba a tsough ve la vea yemen sha yô, vea wase uumace mba ve ongo imo i Aôndo la cii, vea hingir ior mba lun vough shi vea zua a uma u tsôron kpaa. Kwagh ne tese wang ér, er Yehova a lu wan ishima keghen ne, ngu kohol iyol sha er uityendezwa nav vea kure sha mi, sha ci u mkpeyol wase yô.

6. (a) Yehova yange wa ishima sha ayange a Noa la sha nyi gbenda? (b) Yehova ngu wan ishima sha ayange a ase ne nena?

⁶ Ka a̱ er kwagh u vihin tsung, u lahan Yehova je kpa, a wa ishima. Se nenge a mimi u kwagh ne sha gbenda u Yehova yange er kwagh shighe u ifer dumbur sha tar, sha ayange a mngerem ma deemee lu a va ga la. Tar yange u iv a ijimba i eren man ipila, nahan “vihi [Yehova] ken ishima” sha mvihi u orumace vihi kpishi la. (Gen. 6:2-8) Yange lu u una de ér ifer la i za hemen gbem ga, nahan a kaa ér una va a mngerem ma deemee ma tim uumace mba hemban ato. Shighe u “Aôndo lu wan ishima sha ayange a Noa” la, a ker gbenda u waren Noa man tsombor na. (1 Pet. 3:20) Shighe va kom vough yô, Aôndo pase Noa awashima na ne, shi na un tom u gban tso. (Gen. 6:14-22) Shi Noa lu “yôôn kwagh u perapera,” lu tan mbawanndor a na icin sha mtim u lu van la. (2 Pet. 2:5) Yesu lu kaa ér shighe wase ne una lu er shighe u Noa la nahan. Yehova ver shighe u una tim bo tar ne yô. Orumace môm kpa nan fa “iyange la man shighe la” ga. (Mat. 24:36) Hegen kpa, Aôndo na se tom u tan ior icin shi pasen ve kwagh u vea er ve vea war yô.

7. Yehova ngu eren nev nev sha kwagh u uityendezwa navaa? Ta iwanger.

⁷ Kwagh ne tese wang ér Yehova gbe wan ishima tsô ér shighe a kar ga. Doo u mayange se nenge ishimawan na la ser, a ban a ikyo i wan shin kwagh gba un sha kwagh wase ga ze! Nahan kpa, jighilii yô, ka i taver se u umbur kwagh ne, er se lu tsan seer shi se lu yan ican ken tar u bo ne  la. Se kôr ityough ga yô, iyol ia kpe se, se hingir u henen ser Aôndo ngu eren nev nev sha kwagh u uityendezwa nav. (Heb. 10:36) Mayange i de hungur se er Yehova a lu a atôakyaa a dedoo a wan ishima nahan ga, shi se umbur ser ngu eren tom a shighe ne sha ci u iwasen i mba ve civir un sha jighjigh la. (2 Pet. 2:3; 3:9) Nenge ase er Yesu kpa a we ishima er Yehova nahan yô.

YESU VER SE IKYAV I DEDOO SHA GBAA U ISHIMAWAN NENA?

8. Yesu yange wa ishima sha ashighe kposo kposo nena?

⁸ Yesu ngu eren ishima i Aôndo, man a ndera eren nahan sha ikyov ikyov. Satan yange hembe ato yô, Yehova nenge ér doo u una tindi Wan na u môm môm la shin tar sha u a va yima uumace yô. Hen ase sha kwagh u ishimawan i Yesu, er lu keghen anyom udubu imôngo ér iyange la i va la. (Ôr Mbagalatia 4:4.) Yange tema shir ave gbedaa lu keghen ér shighe la a kuma ga, kpa lu eren tom u Ter na na un la yughur yughur. Shighe la va kom, ve shin tar yô, a fa er lu u Satan una na a wua un, er i tsengaôron nahan yô. (Gen. 3:15; Mat. 16:21) Yange wa ishima er kwagh u sha ishima i Aôndo, shin er gba u una ya ican tsusee nahan kpaa. Yange tile sha mimi a mshi shio. Yesu yange hemba veren ishima sha kwagh na man ian i lu sha mi la ga, nahan doo u se dondo ieren na la.—Heb. 5:8, 9.

9, 10. (a) Ka nyi Yesu a lu eren, shighe u a lu wan ishima keghen Yehova ne? (b) Doo u se nengen shighe u Aôndo a ver u eren akaa a a we ishima la nena?

⁹ Yesu yange nderen shin ku yô, i na un tahav mbu sha man mbu sha won cii. (Mat. 28:18) Ngu eren tom a tahav mbura sha u kuren awashima u Yehova, er Yehova a tese la. Yesu yange za tema ken uwegh ku yanegh ku Aôndo lu keghen zan zan inyom i 1914 la, ér i̱ gema mbaihyomov nav cii ve hingir un kwagh u pendan angahar sha mi. (Ps. 110:1, 2; Heb. 10:12, 13) Ica ia gba ga tsô, una tim tar u Satan ne. Er a lu keghen shighe u una tim tar u Satan ne, ngu wan ishima wasen ior sha u zan a ve hen “mngerem ma umam.”—Mpa. 7:17.

¹⁰ Ikyav i Yesu la wase u u̱ fan gbenda u i doo u ú nengen shighe u Aôndo a ver u eren akaa a a we ishima la kpa? Hanma kwagh u Ter na yange una kaa ér a̱ er cii yô, i torough un iyol u eren, nahan kpa, yange a lumun u keghen shighe u Aôndo a ver u eren kwagh shon la. Er se lu keghen mkur u tar u Satan ne, se cii gba u se lu a ishimawan er Aôndo nahan. Doo u se wa ishima se dondo iniezwa i Aôndo, shi se yina ishima sha ci u iyol kpe se yum ga. Kpa se er nan ve se lu a ishimawan er Aôndo nahana?

ME HEN U WAN ISHIMA ER AÔNDO NAHAN NENA?

11. (a) Jighjigh u nan gba zua vea ishima i wan nena? (b) Ka nyi i ne ve se ne jighjigh a akperan shio?

¹¹ Cii man Yesu va shin tar ne yô, uprofeti man mbajighjigh mbagenev ver ikyav i dedoo, i tesen ér uumace mba ve yen ne je kpa vea fatyô u wan ishima keghen kwagh. Yange ve fatyô u wan ishima sha ci u ve lu a jighjigh u nan. (Ôr Yakobu 5:10, 11.) Yange vea ne kwagh u Yehova ôr ve la jighjigh ga nahan, ma ve wa ishima ma ve kegh mkur u uityendezwa nav kpa? Ashighe kpishi yange ve tagher a akaa a karen jighjigh ve u nan, kpa ve na jighjigh ér Aôndo una kure uityendezwa nav kpee a bunde ga. (Heb. 11:13, 35-40) Se hemba mban a ityôkyaa i nan jighjigh a akperan shio cii, sha ci u Yesu ngu “Orkuren u jighjigh wase u nan” hegen. (Heb. 12:2) Akaaôron a profeti yange kure sha Yesu, shi a pase se mbaawashima mba Aôndo sha gbenda u ú mgbegh se u nan jighjigh yô.

12. Ka nyi alaghga se er ve se lu a jighjigh u nana?

 ¹² Ka igbenda i injaa i nyi se dondo ve jighjigh u nan wase una hemba taver shi se lu a ishima i wana? Ka hange hange u se dondo kwaghwan u Aôndo. U tesen ikyav yô, hen sha atôakyaa a a ne ve i gbe u ú vande keren Tartor u Aôndo la. U fatyô u seer nôngon kwagh sha er u dondo kwaghwan u a lu ken Mateu 6:33 la kpa? Alaghga a gba u ú de u eren akaa agen ken uma wou, shin u hemban vihin shighe wou ken tom u pasen kwagh la. De kenger gbenda u Yehova a lu veren iniôngon you zan zan hegen ne ashe ashe ga. Alaghga Yehova wase u u̱ zuan a or u he, u henen Bibilo a nan, shin a na u “bem u Aôndo u a gande hanma mfe wase cii” la. (Ôr Mbafilipi 4:7.) Aluer u ver ishima sha iwasen i u zough a mi sha ci u ú ngu dondon akaawan a Yehova la yô, u hemba kaven er i doo u ú waan ishima yô.—Ps. 34:8.

13. Ka nyi se fatyô u tôôn karen sha gbenda u jighjigh u nan ka a wase se se hemba wan ishima laa?

¹³ Kwagh ne ngu er ka tom sule nahan. Orsule ka nan kaha sule, nan hura u, nahan nan va sunda iyiav. Hanma shighe u orsule nan sondo iyiav mgbeghaa cii, ka nan hemba lun a vangertiôr ér fam u sha kpa nana kaha sule yô, kape nana sunda iyiav je la. Er ka i gba u nana wa ishima nana kegh nahan kpa, kwagh ne yangen nan u lôôn iyiav ga. Alaghga je yô, nana hemba lôôn iyiav fam u sha cii, sha ci u nan na jighjigh ér nana sunda mgbeghaa. Se kpa ka sea fa akaawan a Yehova, sea dondo a, shi sea zua a injar yô, se hemba nan Yehova jighjigh cii. Jighjigh u nan wase kpa ka a seer vesen, nahan i hemba lun se zange u keghen averen a se va zua a mi ken hemen la.—Ôr Yakobu 5:7, 8.

14, 15. Doo u se nenge ican i i tser uumace la nena?

¹⁴ Kwagh ugen u se er ve se hemba wan ishima yô, ka u nengen tar ne kua mbamlu  asev er Yehova kpa a nengen akaa ne la. U tesen ikyav yô, hen ase er Yehova a nengen ican i uumace ve ye la. Yehova ndera nengen a ican i uumace ve ye la ica gba hegen, man kwagh ne ne un ishimavihin. Kpa a de ér ishimavihin la i yange un u eren kwagh u dedoo ga. Yange tindi Wan na u môm môm la “sha u vihin aeren a diabolo kera,” shi been a ican i Satan a ve uumace a mi la. (1 Yoh. 3:8) Jighilii yô, ican i uumace ne ia lu sha anshighe kpuaa, kpa mpeveryol u Aôndo una va se a mi la una lu gbem sha won. Nahan se de ser ifer i i lu zan hemen ken tar u Satan a hemen u ne, i̱ na se iyolkpen, shin se yina ishima ser mkur ngôôr yum ga. Kpa se na jighjigh a akaa a se lu a nenge a mi ga, a lun gbem sha won la. Yehova ver shighe u una kar a ifer kera yô, man una er kwagh ne sha shighe vough.—Yes. 46:13; Nah. 1:9.

¹⁵ Er se lu ken ayange a masejime a tar ne, a a ngee a ican ne yô, se fatyô u tagher a akaa a karen jighjigh wase u nan. Aluer i er kwagh a vese sha ipila shin or wase nan kpe yô, se er kwagh sha ishimanyoon ga, kpa doo u se suur sha Yehova a ishima yase cii. Er se yen yô, ka zange u eren nahan ga. Kpa se umbur nen kwagh u Yesu yange er, u i nger ken Mateu 26:39 la.—Ôr.

16. Ka nyi i doo u se palegh u eren ken shighe u a mase shin her nee?

¹⁶ Kwagh môm u a yangen se u wan ishima yô, ka ieren i kaan ér, ‘i̱ zaan tsô a nengen la.’ Inja i kwagh ne ér nyi? Or u nan ne jighjigh ér mkur mgbôghom ga yô, alaghga nana hii u eren akaa a nan, kaan ér Yehova una va kera kure uityendezwa nav ga kpa or fa ga. Inja na yô, nana lu kaan ken ishima i nan ér, ‘i zaan tsô a nengen, aluer Yehova una kure uityendezwa nav mimi yô.’ Nahan adooga nana de u vanden keren Tartor u Aôndo, nana lu keren u duen iti ken tar ne, shin zendan inyaregh, shin nan jighjigh ér makeranta u henen yemen sha azenger ua na nan uma u yôugh yôugh hegen. Kpa jighilii yô, kwagh ne una lu tesen ér nan ban a jighjigh u nan ga he? Umbur wer Paulu wa se kwagh ér se hingir mba kaven mba yange ve ya dyako u uityendezwa “sha jighjigh u nan man sha ishima i wan” la. (Heb. 6:12) Yehova una de ér tar u ifer ne u lu her i kar shighe u un ver u timin u la ga, sha er awashima na una kure yô. (Hab. 2:3) Nahan hegen u se lu keghen shighe u mtim ne la, se palegh u eren Yehova tom sha ayom. Se gema se lu nen per, shi se er nen tom u pasen kwagh la sha afatyô wase cii. Kwagh ne una na se iember i vesen hegen je kpaa.—Luka 21:36.

ISHIMA I WAN I VE A AVEREN A NYI?

17, 18. (a) Ka ian i eren nyi se lu a mi, er se lu wan ishima keghen nee? (b) Aluer se mba a ishima i wan hegen yô, ka averen a nyi se va zua a mini?

¹⁷ Sea hira civir Yehova iwer kpuaa tseegh, shin sea civir un hegen anyom kpishi kpa, se soo u civir un gbem sha won. Ishimawan ia wase se u taver ishima zan zan se kar zuan a myom, aluer gba u se kegh nan je kpaa. Hegen ne Yehova ngu nan se ian i tesen ser se na akaa a a tsough u eren la cii jighjigh, shi se kegh iyol u yan ican sha ci u iti na je kpaa. (1 Pet. 4:13, 14) Shi Aôndo ngu tsaase se ér se lu a ishimawan zan zan mkur, sha er se va war yô.—1 Pet. 5:10.

¹⁸ Yesu ngu a tahav mbu sha man mbu sha won cii, nahan ma kwagh môm kpa una fatyô u tsuen we sha ikyev na kera ga, saa wea soo u kera lun sha ikyev na ga di je. (Yoh. 10:28, 29) Ityôkyaa ngi i se cia kwagh u ken hemen shin ku je kpaa ga. Ka mba vea taver ishima zan zan mkur la a yima ve ye. Nahan gba u se de ser tar ne u mee se se de u suur sha Yehova ga. Kpa se gema se kange nen ishima u eren akaa a seer taver jighjigh wase u nan shi se er tom a shighe u Aôndo a lu wan ishima ne sha kwaghfan.—Mat. 24:13; ôr 2 Peteru 3:17, 18.

[Mbampin Mba Ngeren u Henen]

[Ufoto mba sha peeji 21 la]

Aluer u ngu a ishimawan er Aôndo nahan yô, ia wase u u vande keren Tartor u Aôndo, nahan u zua a averen!