Mkaanem ma Taver Or Ishima Due “ken Zwa u Anikyundanev”

Ken uwer u Disemba inyom i 2009 la, Atejir u Vesen u Tar u Russia lumun a ijir i i vande kuren ér, i cir mzough u kwaghaôndo u Mbashiada mba Yehova u sha tindi, u ken gar u Taganrog, ken tar u Russia la. Kwagh ne na yô, i ngohol Iyou i Tartor i Mbashiada mba Yehova, shi i yôô ér ityakerada yase 34 cii ka i bo. Yange i due a ibaver sha kwagh ne hen ijiir i Mbashiada mba Yehova i sha Intanet la, shi i ver ufoto mba Mbashiada mba kwagh ne bende a ve la, kua mbayev mba kiriki kpaa.

Iwer ngi kar kpuaa yô, afishi a branci a Mbashiada mba Yehova, a ken Tar u Russia la zua a akwati man washika u tsombor u Orshiada ugen ken kpentar u Queensland, ken tar u Australia, tindi a mi yô. Tsombor ne yange u ôr abaver a i due a mi hen ijiir yase i sha Intanet sha kwagh u ijir i Atejir u Vesen kure la. Washika la kaa ér: “Hen anmgbianev, ican i anmgbianev asev mba ken tar u Russia ve tagher a mi la, kua jighjigh u nan u ve tese la kôr ônov asev ken ishima tsung. Ati ve ér Cody man Larissa. Nahan ve nger uwashika, shi se wa uiyua kpuaa ken akwati ne, se mba tindin mbayev mba ken gar u Taganrog mbara a mi. Se soo tsô ser ve̱ fa ér mbayev mbagenev mba ve civir Yehova sha mimi ken tar ugen kpa mba henen kwagh ve ken ishima, shin er ve gbe ica a ve hiinii nahan kpaa. Ônov asev mban mba sughun ve kigh kigh, shi mba pasen ve kpaa ér ve doo ve ishima tsung.”

Er mbayev mba ken Taganrog mbara zua a uiyua mbara yô, ve kpa ve nger tsombor u ken Australia la uwashika shi ve kpela ufoto sha mi, sha u sughun ve kigh kigh. Kwagh u Cody man Larissa er ne doo anmgbian ugen u eren tom shin afishi a branci a ken tar u Russia la kpishi, nahan a nger ve washika, a kaa ér: “Mbayev man mbaganden cii ka a̱ tsaha ve sha kwagh u ve er ga nahan, i vihi ve kpishi je. Anmgbianev asev mba ken gar u Taganrog er kwagh u bo môm ga, kpa i ngohol ve Iyou i Tartor. Kwagh ne vihi ve kpen kpen. Kpa er ve fe ér mbagenev ken veghertar ugen mba henen kwagh ve ken ishima yô, ishima taver ve kpishi. M sugh ne kpishi sha ieren yen i dedoo man i nan kwagh wuee la.”—Ps. 8:2.

Sha kpôô yô, se mba anmgbianev sha tar cii, man mdoo u se doo ayol a ase la ngu wasen se cii u nôngon a mbamtaver man atsan a se lu tagher a mi la. I wa Mbashiada mba Yehova kwagh iyol ér, mba taver ior asema ér ve kôr mbagenev ihyom. Nahan kpa, mbayev asev mba ve dugh ken ityar kposo kposo shi aeren ve a ityôô kpa a lu kposo la di gema mba tesen ér mba a dooshima man ikyo i wan her atô ve. Ieren ve ne tese ér mkaanem ma Yesu yange ôr man ka ma mimi. Yange kaa ér: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.”—Yoh. 13:35.

[Ufoto mba sha peeji 32 la]

Mbayev mba ken tar u Russia (ken imese) mba yange ve ngohol uiyua mba mbayev mba ken tar u Australia (ken iyan) tindi ve a mi la