Kwagh u Yange Ve Lu a Mi Kpishi la Wase sha Ibanave I Mbagenev

KEN inyom i 49 la, Peteru man Yakobu kua Yohane, “mba i nenge ve ér ka mtuunummbaiorom” la, wa apostoli Paulu vea ikyartom na, Barnaba, tom ugen. Ve kaa a ve ér vea pasen kwagh ken akuraior yô, ve de hungur kwagh u Mbakristu mba ve gbe ican la ga. (Gal. 2:9, 10) Yange lu u Paulu man Barnaba vea er kwagh ne nena?

Uwashika mba Paulu nger la pase er yange ver ishima sha ikyaa ne zulee yô. U tesen ikyav yô, yange nger Mbakristu mba ken Korinte washika ér: “Sha kwagh u inyaregh ki kohol sha ci u uicighanmbaiorov la yô, ne kpaa, er nen er lu m wa nongo u Kristu u ken Galatia la kwagh nahan. Hanma lahadi, sha iyange i lahadi la je, hanmô wen nana̱ ver kwagh sha agee a nan, nana̱ koson un her sha er zum u me va la, i̱ de gbe kohol kwagh ken shighe la ga yô. Zum u me va nyôr yô, mba ne nenge ve kom la, me tindi ve a uwashika, ve̱ tôô iwua yen la, ve̱ yem a mi ken Yerusalem.”—1 Kor. 16:1-3.

Ken washika u sha uhar u icighan jijingi mgbegha Paulu nger hen Mbakorinte la kpa, a kimbir pasen ityôkyaa i í na ve gba u a kohol inyaregh yô. Ityôkyaa shon yô, lu sha ci u “kwagh u ne lu a mi kpishi la ngu wasen sha ibanave i mbara ken shighe ne.”—2 Kor. 8:12-15.

Shighe u Paulu nger Mbakristu mba ken Roma washika ken inyom i 56 la nahan, í kohol inyaregh nôngo u been kera kpaa. A kaa ér: “M ngu zan sha Yerusalem sha kwagh u iwasen i sha ci u uicighanmbaiorov la, gadia doo Masedonia man Akaia u nan iwasen sha ci u mbaatsanev mba ken uicighanmbaiorov mba ken Yerusalem la.” (Rom. 15:25, 26) Ica kera gba ga je maa, Paulu kure tom u i wa un ne, sha ci u yange mba ker un, shighe u hide yem ken Yerusalem la yô, a kaa a Feliku, Orromanu u lu Gomna la ér: “M mough sha u me va nongo wam a uiyua man sha u va nan iniav kpaa.”—Aer. 24:17.

Kwagh u Paulu ôr sha kwagh u Mbakristu mba ken Masedonia la pase ieren i Mbakristu mba sha ayange a mbaapostoli la lu a mi la. A kaa ér Mbakristu mba ken Masedonia “zamber a [ve] ngeelee er i̱ na ve ian, ve kpaa vea lu ave sha iwasen i i lu nan” la. Apostoli ne maa taver Mbakristu mba ken Korinte ishima ér ve dondo ikyav la. A kaa ér: “Hanma or nana̱ na er nan we ken ishima i nan la nahan, i̱ de lu zunguluu ga, i̱ de lu sha apera kpaa ga, gadia ka or u nan ne kwagh sar sar la je nan doo Aôndo ishima ye.” Lu nyi i mgbegha Mbakristu mbara ve ve na kwagh wuee nahana? Yange ve lu eren tom ne sha “u wasen sha ugbayol mba uicighanmbaiorov tseegh ga, [kpa lu sha u] nan ér i wuese Aôndo kpishi kpaa.” (2 Kor. 8:4; 9:7, 12) Se kpa aluer se na kwagh wuee yô, kwagh a fatyô u lun nahan. Yehova Aôndo una ver ieren yase i dedoo, i soon ayol a ase tseegh ga la kpee je. Shi iveren na kpa ngi ve a inyaregh.—Anz. 10:22.

 [Ngeren u kiriki u a lu sha peeji 9 la]

IGBENDA I MBAGENEV KA VE ER IYUA I SUEN TOM U PASEN KWAGH U I LU EREN TAR SHA WON CII NE YÔ

Er lu sha ayange a apostoli Paulu la nahan, ior kpishi nyian ka ve za a ‘kwagh u ve ver’ her shin inyaregh ki ve soo u eren iyua a mi la, ve za kende shin akwati u eren iyua, u i nger sha mi ér “Worldwide Work” la. (1 Kor. 16:2) Hanma uwer yô, atôônanongo ka a tindi a uiyua mban hen afishi a Mbashiada mba Yehova, a ken tar u ve lu la. Shi u fatyô u tindin a uiyua jighilii hen ma mzough u sha tindi, u Mbashiada mba Yehova ve lu a mi ken tar wou la. Aluer u soo u fan iti i mzough u sha tindi, u Mbashiada mba Yehova ve lu a mi hen tar wou la yô, pine afishi a branci, a ken tar wou la. U fatyô u zuan a adereshi u afishi a branci la sha Intanet hen www.pr418.com. Ka uiyua kposo kposo mba u fatyô u tindin a mi jighilii je i tese shin heen ne:

UIYUA MBA A FATYÔ U TINDIN A MI JIGHILII YÔ

• Or nana fatyô u eren iyua sha inyar shin sha akaa a hweev gayô akaa a injaa a nan agen.

• Nger washika pase wer inyaregh shin akaa a u ne la ka iyua i u er yô.

UIYUA MBA A FATYÔ U HIDEN SE A MI YÔ

• Or nana fatyô u eren iyua sha inyar, i a fatyô u hiden nan a mi, shighe u nan soo ér i hide nan a mi yô.

• Nger washika pase wer iyua you la ka iyua i a va kuma u yô, a hide u a mi yô.

IGBENDA I EREN IYUA

Dugh u eren iyua sha inyar man akaa a injaa agen kera kpa, igbenda igen ngi i or a fatyô u suen tom u Tartor u i lu eren tar sha won cii ne yô. Ka igbenda shon je i ter shin heen ne. Hanma gbenda shin igbenda i eren iyua sha inyar i u tsough u eren iyua sha u suen tom u Tartor cii kpa, vande pinen afishi a branci a hen tar wou la sha er u fa igbenda i eren iyua sha inyar i i lu hen tar wou la yô. Er atindi a lu kwagh môm ga yô, gba hange hange u ú vande lamen a loya u nan fe atindi a sha kwagh u iyua i eren la tsembelee cii ve u mase tsuan gbenda u u hembe doon u ú er iyua la ye.

Ishiôlansi: Or nana fatyô u ngeren ér i na Watch Tower inyaregh ki ishiôlansi shin penshen u nan.

Inyaregh Ki ken Banke: Or nana fatyô u ngeren ér shighe u nan kpe yô, i na Watch Tower inyaregh ki nan koso ken banke shin jindinyar i nan we ken banke nan zough a mtsera sha mi la, gayô inyaregh ki penshen ki nan ver ken banke la, er atindi a banke a tese la.

Shia man Mtsera: Or nana fatyô u nan Watch Tower iyua sha shia i nan yam vea banke shin kômpeni shin mtsera u nana zua a mi sha anzô a ior ve ngohol hen a nan la, shin nana fatyô u kaan ér shighe u nan kpe yô, i gema akaa ne i nan Watch Tower.

Inya Shin Ya: Or nana fatyô u nan Watch Tower iyua sha inya shin ya u a fatyô u teen yô. Kpa aluer ka ya u or u eren iyua la a lu tsan her yô, nana fatyô u kaan ér nana tsa her zan zan nana kpeen yô, Watch Tower a tee ya shon.

Ngeren u Tesen Kwagh u U Soo Wer i Er Shighe u U Kpe yô, kua Ngeren u Nan Orgen Shin ma Nongo Inyaregh Wer Ve Koso: Or nana fatyô u ngeren ér shighe u nan kpe yô, i na Watch Tower akaa a nan lu a mi cii shin inyaregh ki nan. Shin nana fatyô u ngeren ér inyaregh ki nan ne Watch Tower ér a lu nan a mi la a saa a mi shighe u nan kpe yô.

Ishember i “igbenda i eren iyua” ne tese ér, aluer gba u or nana er imba iyua ne yô, gba u nana fa igbenda ne vough, nana wa iyol cii ve nana er iyua ne ye.

Aluer u soo u fan seer yô, nger Afishi a Branci a Mbashiada mba Yehova a ken tar u Najeria la sha adereshi u a lu shin heen ne gayô gbidye waya. U fatyô u pinen afishi a branci a a nengen sha tar u ú lu ker la kpaa.

JEHOVAH’S WITNESSES

P.M.B. 1090,

Benin City 300001,

Edo State, Nigeria.

Telefon: 07080662020