Ngeren U Pasen Yiase Yase

‘Loho u Hemban Doon Cii u Or Lu a Vande Ungwan Ga Yô’

ORGEN u i yilan un ér George Naish yô, yange za hen gar u Sasikaton (Saskatoon), ken kpentar u Sasikachewan (Saskatchewan), tar u Kanada, ape i veren ikyav mbi uityaav yô. Yange nengen a tihi u ikyon i lihen kuman angahar 60 yô, maa a hôn uwegh sha mi, a pine ér: “Ka nyi í eren a agbur a ikyon laa?” Nahan i kaa a na ér yange i tim udaar mba taven tsung a ikyon ne, shighe u Ityav mbi Tar cii Mbi Hiihii la sha er a ungwan abaver yô. Anmgbian Naish pase wener: “Kwagh ne na yô, m hii u henen mer se fatyô u timin mtôm ma redio a agbur a ikyon ne. Man lu hiin je mhen va se ken ishima u lun a ityôgh ki redio ki se pasen kwagh her je la.” Inyom i kar yô, se tim ityôgh ki redio ki i yilan ér CHUC la, se hii u lamen sha mi ken inyom i 1924 la. Ityôgh ki redio kin lu môm ken mtôm ma redio ma i hii timin ken tar u Kanada, ma nan abaver sha akaa a kwaghaôndo.

Er tar u Kanada kehe kpishi yô, lu ijiir i injaa i pasen kwagh sha redio. Anmgbian u kwase ugen u yange eren tom hen ityôgh yasegh ki redio ki ken gar u Sasikaton, u i yilan un ér Florence Johnson la, kaa ér: “Luun er yange sea pase kwaghaôndo sha redio nahan ga yô, mimi ne ma ar a ior kpishi mba se fatyô u zuan a vega la ga. Shi er redio lu kwagh u sember duen yô, yange i maa ior iyol u ungwan hanma kwagh u i lu ôron sha mi cii.” Er ken inyom i 1926 la nahan, Mbahenen Bibilo (kape i yilan Mbashiada mba Yehova hen shighe la je la), lu a mtôm ma redio vem sha ugeri mba vesen ken tar u Kanada kuma mnyiin. *

Yange wea lu hen shighe la, man wea bugh tashan wase sha redio wou nahan, ma lu loho u nyi ma u ungwaa? Ashighe kpishi mbaatsamev mba ken ma tiônnongo u a lu ikyua yô yange ve wa atsam i kuhwa ityogholough sha mi. Heela tseegh ga, anmgbianev shi yange ve na akaaôron shi ve hen kwagh a ior ken Bibilo kpaa. Anmgbian wase u kwase, u i yilan un ér Amy Jones, u un kpa henen kwagh a ior ken Bibilo sha redio la, kaa ér: “Yange mea due kwaghpasen, mea za pase orya iti yam yô, ashighe agen nan kaa ér, ‘Okee, ka we yange m ungwa u lu lamen sha redio ye zee?’”

Mbahenen Bibilo mba ken geri u Halifas (Halifax), kpentar u Nova Sikotia (Scotia), yange ve lam a ior sha redio sha gbenda u i lu a vande lamen a ior sha redio ga yô. Yange vea timen sha ma itinekwagh vea been yô, ve kaa a mbaungwan ér ve yila ityôgh ki redio kin, ve pine  mbampin sha akaa a ken Bibilo. Anmgbian ugen nger wener: “Ior yange ve yila se i kpiligh iyol. Er ior ve yilan se kpishi yum yô, se faan ityô u lamen a ve cii ga.”

Er ior mba sha ayange a apostoli Paulu kpa er nahan, mbagenev ve ungwa loho u Mbahenen Bibilo la, kpa mbagenev yô, ungwa ga. (Aer. 17:1-5) Mbagenev soo loho u ve ungwa la tsung. U tesen ikyav yô, shighe u orgen u i yilan un ér Hector Marshall ungwa Mbahenen Bibilo ôr kwagh ter takerada u i yer ér Studies in the Scriptures la yô, a sôn ér i tindi un a avegher ataratar a takerada la cii. Shighe kar yô, Hector nger ér: “Yange m hen mer ityakerada la ia wasem u tesen makeranta u iyange i memen la.” Nahan kpa, Hector er vegher u hiihii u takerada la been yô, a undu côôci na. Maa a hingir orivangeli u tseen ishima, shi a civir Yehova sha mimi zan zan ku na ken inyom i 1998 la. Yange mba ne kwaghôron u lu a itinekwagh ér, “Ka Tartor u Aôndo Tseegh Ua Va Tar Ne a Mpeveryol Ye” la sha ityôgh ki redio ken kpentar u Nova Sikotia, vegher u sha ityoughkitaregh la mba been yô, kpernan orshoja ugen u i yilan un ér Kônee J. A. MacDonald la, kaa a anmgbian ugen hen ijiir ér: “Nyen ior mba ken icile i Cape Breton ungwa loho u hemban doon cii, u i gbe je i lu a ungwa u veghertar ne ga yô.”

Kpa kwagh ne doo mbahemen mbaadua cuku ga. Mbakatoliko mbagenev hen geri u Halifas sue ér vea nande ityôgh ki redio ki Mbahenen Bibilo pasen kwaghaôndo sha mi la keng keng. Er mbahemenev mba kwaghaôndo tuur gomoti ken ityô yô, ken inyom i 1928 la gomoti yôô ér a kera na Mbahenen Bibilo laasen u lamen sha mtôm ma redio vem ga. Kwagh ne na yô, anmgbianev mba nomso man mba kasev samber a ankwatakerada u lu a itinekwagh ér Who Owns the Air? (Ka An Nan Lu a Ahumbe?). Yange ve er nahan sha u tesen ior cii ér ve lumun a gbenda u i er kwagh a ve caveraa la ga. Nahan cii kpa, mbatomov mba gomoti lumun u hiden nan Mbahenen Bibilo laasen u lamen sha redio ga.

Kwagh ne yange pande ishimatseen i Mbashiada mba Yehova mba ken Kanada mba ve vese iyenge ga laa? Anmgbian u kwase ugen, u i yer un ér Isabel Wainwright yô, kaa ér: “Sha hiihii la, lu inja er mbaihyomov hemba se nahan. Kpa m fa mer Yehova yange una soo ér se za hemen u pasen kwagh sha redio her yô, ma de ér gomoti a yange se ga. Nahan kwagh ne tese ér, gba u se ker gbenda ugen u pasen kwagh, u ú hembe doon cii yô, sha er se samber a loho u dedoo u Tartor yô.” Mbahenen Bibilo mba ken tar u Kanada hii u veren ishima ve cii sha u za pasen ior kwagh sha uya vev, ve kera har ishima u pasen ior kwagh sha redio ga. Nahan kpa, shighe u se pasen kwagh sha redio la, kwagh ne wase se kpishi u yôôn ‘loho u hemban doon cii u ior lu a vande ungwan ga la.’—I zua a ngeren u pasen yiase yase ne ken tar u Kanada.

[Ngeren u shin kpe]

[Mkaanem ma sha peeji 32 la]

“Er ior ve yilan se kpishi yum yô, se faan ityô u lamen a ve cii ga”

[Ufoto mba sha peeji 32 la]

(1) Ityôgh ki redio ki hen gar u Edmonton, kpentar u Alberta (2) Anmgbian ugen ngu eren tom a anar u samber a iliam sha redio, hen gar u Toronto, kpentar u Ontario (3) Iyou i nan abaver hen ityôgh ki redio ki i yilan ér CHUC la, hen geri u Sasikaton, kpentar u Sasikachewan