Mbampin Mba Mbaôron Takerada Ne Ve Pin la

Cii man mo vea kwase wam se̱ fa mimi yô, yange sa̱r se u maren wan kpishi, kpa kwase wam lu wan iyav ga. Nahan m na mbatwerev mnyandem am ma wan kwase iyav la, kwase wam di na ve aji a kwase a ka a nungwa sha mnyandem ma nomsoor ve kwase nan wa iyav la, ve za nungwa, hingir azenawambe a jiren ônov, maa ve haa agen ken sagh u kwase wam, agen la di ve haa ken ikpe ve koso ken firiiji. Nahan i̱ koso azenawambe la heree, shin i̱ haa a kera?

▪ Ka mtaver u nom man kwase ka vea soo u zuan a wan sha imba gbenda ne ve ve tagher a mi je ne. Kpa gba u vea tsua kwagh u vea er ve una va Yehova a icivir yô. Kpa aluer se fa igbenda i tweregh i wasen kasev u wan iyav la yô, alaghga kwagh ne una fatyô u wanger se.

Ken inyom i 1987 la, kwase ugen ken tar u Ingila wa iyav sha imba gbenda ne, mar wan. Lu un lu kwase u hiihii sha tar u wan iyav sha imba gbenda ne maren ye. Yange kanshio u wan iyav sha gbaaôndo, sha ci u sagh na kondo aan a mnyandem ma nomsoor ka ma kar ma nyôr ve, ma za jire wan la. Mbatwerev maa pav kwase ne dugh aji a kwase ka nan lu a mi la, shi ve ngohol mnyandem ma wan kwase iyav hen nom na, ve gema akaa ne cii ve haa ijiir i môm, nahan akaa ne nungwa vese hingir ijenawambe i jiren wan. Mbatwerev tamber ijenawambe ne vesen yô, ve gema ve wa ken sagh u kwase ne, ijenawambe ne za mase vesen hingir wan. Iwer ngi kar yô, kwase ne mar wan u kwase. Maa i gema yilan gbenda u wan iyav, maren wan ne ér in vitro fertilization.

Alaghga gbenda u eren kwagh ne ua wa kahan ken ityar igen, kpa kwagh u i fe wuee yô, ka un ne: Ka i na kwase icigh ki bughun nan sagh ukasua imôngo, sha er sagh u nan la una lu a aji kpishi yô. Nom u nan di, í kaa a nan ér nana za ngirigh ilyeegh ki nan ki yaven a kwase, nahan nana va a mnyandem ma nomsoor ma wan kwase iyav la. Mbatwerev ka vea ngohol aji hen kwase la kua mnyandem ma nomsoor ma wan kwase iyav la hen nom u nan yô, ve kire akaa ne, maa ve nungwa a cii ijiir i môm. Akaa ne ka a nungwan yô, aji ne a vese, maa a gba paven hingir azenawambe, a jiren wan. Shighe ka una karen kpuaa, er iyange i môm nahan yô, mbatwerev ve kar azenawambe ne tsembelee, sha er vea fa a dedoo, a a haa kwase la ken sagh kpa aa vese tsembelee, shi a doon ga aa lu kpa vea fa yô. Ka a kuman er ayange atar nahan yô, maa i hide a azenawambe a jiren wan, a a hembe doon la, ahar shin atar nahan i haa kwase la ken sagh sha er nana fatyô u wan iyav yô. Aluer ijenawambe ne i môm shin ahar zua sha sagh u nan, shi za hemen u vesen yô, tese ér nan ngu iyav, nahan á ver ishima ér shighe a karen yô, nana mar wan.

Kpa azenawambe a i hee kwase la ken sagh ga la, kua  a á lu inja er a doo kuma ga, shin nga a ihyogholough la di, á er a mi nena? Aluer i gba kenden azenawambe a á neer la tsô yô, aa saa ishe. Sha nahan yô, ka i gba u a koso azenawambe ne ken firiiji. Ka i er nahan sha ci u nyi? Sha ci u aluer kwase la wa iyav mbura ga yô, a tôô azenawambe a i koso la a kimbir eren kwagh ne a mi, a kera za gba ityô i he ga. Nahan kpa, mbagenev nenge ér kwagh ne doo ga. Sha ityôkyaa ne yô, ior kpishi fa kwagh u vea er a azenawambe a i koso her la jighilii ga, er or u a pin mpin sha heen vea kwase na ne nahan. Alaghga ve soo u maren mbayev kpishi ga. Shin ve kera soo u seer maren ga sha ci u ve bee iyol, gayô kera mba a inyaregh ki shi eren kwagh ne ga, shin mba a inyaregh ki nengen sha wan ga. Heela tseegh ga, adooga vea lu cian mbamzeyol mba ka ve va shighe u ônov ve jir ken uya i hembe môm la. * Shin alaghga kwase la gayô nom u nan kpe, shin mô ve, gayô ve uhar cii ve hide ve vôso ior mbagenev, nahan kwagh ne va a mbamtaver kpishi. Er mbamzeyol ve ngee sha kwagh ne yum yô, ka i koso azenawambe ne her, nahan nom man kwase ve zer kimbin mbakoson mbara inyaregh sha mi anyom anyom.

Ken inyom i 2008 la, ortwer ugen u a hen kwagh u azenawambe kua mvese u a yô, kaa ken ipipaabaver igen i ken tar u Amerika ér, taver ior kpishi u tsuan kwagh u vea eren a azenawambe a neer her la kpen kpen. Ngeren la yange kaa ér: “Í koso azenawambe a kuman iyenge 400,000 nahan sha ayouacii a ken tar wase, shi mba koson a seer a seer sha hanma sev . . . Ka a koso azenawambe ne ken firiiji tsembelee yô, a fatyô u tsan kuman anyom pue shin a hemba nahala je kpaa, nahan kpa ka a dugh a kera yô, agen ker a saa ishe.” Mkaanem ma a kur kwaghôron na a mi la tese ér, gba u Mbakristu vea gbidye kwar vea nenge sha kwagh ne tsembelee. Sha ci u nyi?

Mbakristu mba ve vese ayol a ve, mba ve tagher a mbamzeyol mba ka ve due ken kwagh u tôôn ijenawambe i i jir ken won za wan ken iyav mbu kwase la yô, ve gbidye kwar tsembelee ve nenge sha mbamzeyol mba ve lu ken igbenda i sôron twer igen la kpaa. U tesen  ikyav yô, a gba u Orkristu nana tsua kwagh u nan soo u eren yô, zum u angev mbu ker or u nan, mbu a fatyô u sôron ga, shi nan lu ôôn sha ikyekye shin i lu ikyekye i lu wasen nan ve nan lu uma her la. Mbakristu mba mimi fa kwagh u i nger ken Ekesodu 20:13 kua Pasalmi 36:9 la, nahan mba we uma ikyo kpishi; mba nengen angev beelee ga. Awake! u Mei 8, 1974, kaa ér: “Er Mbakristu mba mimi ve lu a mnenge u Aôndo, ér uma ka icighankwagh, shi ve we imo ve i ken ishima la ikyo, shi ve dondon atindi a gomoti yô, mayange vea wua uma u or u nan lu yan ican a icôronuange la ga,” gadia kwagh ne ka u wuan oruange la sha apera. Ashighe agen yô, alaghga a lu ma ikyekye keng ia wase or la ve nana lu uma ye. Zum u kwagh a lu nahan yô, ka mba hen tsombor u nan vea tsua ér i wa nan sha ikyekye la, shin i de we nan ga ye.

Nahan kpa, kwagh u nom man kwase u ve mar wan sha u wan azenawambe ken iyav mbu kwase, ve azenawambe agen a neer, ve koso her la kaha kposo. Kpa kwagh u a fatyô u kaan a ve ér ve er yô, ka u dughun azenawambe la ken firiiji kera, sha er aa sough kera yô. Aluer i dugh azenawambe ne ken firiiji kera yô, a saa ishe. Nahan aluer nom man kwase soo yô, vea na ian ér i er nahala.—Luka 2:36-38; Gal. 6:7.

Er nom man kwase ve er kwagh ne a ishima ve sha er kwase la nan wa iyav a mar wan yô, vea fatyô u kimbin inyaregh ér i̱ koso azenawambe a neer la her, sha er vea va er tom a mi ken hemen shighe u ve soo u seer wan yô. Nahan kpa, alaghga mbagenev vea tsua ér vea kera za hemen u koson azenawambe a neer la her ga, sha ci u gbenda u koson a her la ka u sha gbaaôndo ga yum. Mbakristu mba ve tagher a kwagh ne yô, vea fatyô u tsuan kwagh u ve soo la, nahan kpa ve fa ér Yehova una pine ve kwagh sha mi. Isharen ve yô, ka u vea lu a imoshima i wang, shi vea na mbagenev gbev mbu nôngon ga.—1 Tim. 1:19.

Ortwer ugen u a fe kwagh u mar tsema tsema yô, kaa ér “kwagh u azenawambe a noov man kasev kpishi ve koso la za ve iyol tsung, kpa mba fan kwagh u vea er a mi jighilii ga.” A mase kuren nahan wener: “Noov man kasev mbagenev yô nenge ér, kwagh u or a er sha ikyaa ne ve a lu shami je kpa ngu ga.”

Sha nahan yô, Mbakristu mba mimi mba ve soo u maren wan sha u tôôn ijenawambe i í jir ken inya wan ken yav mbu kwase cii, ve vande gbidyen kwar sha mbamtaver mba ve lu ker la. Bibilo wa se kwagh nahan ér: “Orfankwagh ka nan nenge a kwaghbo, nan yer, kpa mbalanenkwagh yô, ka ve kar, ve za ya ican.”—Anz. 22:3.

Nomsoor man kwase ugen u ve lu tsan imôngo, kpa ve vese ayol a ve ga yô, mba henen Bibilo shi ve soo u eren batisema, kpa ve fatyô u zuan ivaa sha tindi ga, sha ci u nomsoor la ngu ken tar la sha tindi ga. Gomoti u tar la ne ambaaior la ian i eren ivaa ga. Vea fatyô u ngeren Takerada u Tesen Ér Ve Tôndo Zwa u Eren Kwagh a Ayol a Ve sha Mimi, nahan eren batisema?

▪ Alaghga a lu inja er ka gbenda u sôron zayol ne je la nahan, kpa kape Bibilo i tese ér ve sôr zayol ve ne ga. Cii man se̱ fa er i hii ve kwagh a lu nahan yô, de se hii fan kwagh u a lu Takerada u Tesen Ér Nomsoor vea Kwase Tôndo Zwa u Eren Kwagh a Ayol a Ve sha Mimi la, kua ityôkyaa i ka i na ve i gba u a nger u la, man er ka i nger u la, kua tar u a gba u a nger takerada shon ker la kpaa.

Nomsoor man kwase u ve soo u vôson ayol a ve, kpa tindi a yange ve la ka ve wa ave shin takerada ne sha ishigh ki mbashiadav, sha ci u ityôkyaa i i ter shin heen ne. Ka ve wa uwegh shin takerada la u tesen ér vea eren kwagh ayol a ve sha mimi, shi aluer gomoti va na ve ian ken hemen yô, vea nger ivaa ve sha tindi kpaa. Ka vea eren nahan yô, tiônnongo a nenge ve vough er ior mba ve er ivaa sha tindi nahan.

Ka i gba u a nger takerada ne sha ci u nyi, man ka hanma shighe ka i nger u? Ka Yehova yange hii zuan uumace ivese ye, shi ivese ka un kwagh u icivirigh kpaa. Yesu kaa ér: “Kwagh u Aôndo je zua yô, or a̱ de kera paven un ga.” (Mat. 19:5, 6; Gen. 2:22-24) Shi a kaa ér: ‘Hanma or u nana pav a kwase u nan, kpa a lu sha ci u idya ga man nana gema á er kwase ugen yô, ka idya je nan er ye.’ (Mat. 19:9) Sha nahan yô, ka “Idya,” tseegh i  lu ityôkyaa i paven ivaa, í Bibilo kpa i lumun a mi ye. U tesen ikyav yô, aluer nom za yav a kwase ugen yô, kwase u nan una fatyô u paven a nan shin den nan kwaghbo la. Aluer kwase la pav a nom u nan la yô, kwase la nana fatyô u eren nom ugen.

Nahan kpa, ken ityar igen yô, hemban je yô ngise la, ucôôci mba ve lu a tahav kpishi mbara venda kwagh u Bibilo i tese wang ne. Yange ve tese ér ityôkyaa i môm ngi i ia na vea pav ivaa ga. Sha nahan yô, sha ajiir a ucôôci mban lu a tahav kpishi la, gomoti wa tindi sha kwagh u ivaapaven ga, aluer nom shin kwase nan er idya er Yesu ôr nahan je kpaa. Ken ityar igen yô, tindi u paven ivaa ngu, kpa u zuan a takerada u paven ivaa la, ka i tôô shighe gôgônan shi i lu kwagh u ican kpaa. Alaghga a tôô anyom kpishi je ve u fatyô u zuan a takerada u paven ivaa ye. Ka inja er côôci shin gomoti ‘hendan a kwagh’ u Aôndo a lumun nahan.—Aer. 11:17.

U tesen ikyav yô, alaghga nom vea kwase vea lu ken tar u u ne or ian i paven ivaa ga, shin u ka i lu ican kpishi u zuan a takerada u paven ivaa, shin ka i tôô anyom imôngo u zuan a takerada u paven ivaa yô. Nahan aluer nom shin kwase u nan lu a ishô la nôngo ér nana pav ivaa i nan vande eren sha tindi a or u nan er idya la, sha er nana vôso orgen, shi nan nenge ér nana er nahan kpa nana lu peren tindi u Aôndo ga yô, nana fatyô u wan uwegh shin Takerada u Tesen Ér Nomsoor vea Kwase Tôndo Zwa u Eren Kwagh a Ayol a Ve sha Mimi la, vea or u nan soo u vôson la. Ka nongo u Yehova u ne ian ne sha ci u anmgbianev mba ve lu ken ityar i ngila nahan ye. Nahan kpa, ken ityar kpishi i a fatyô u paven ivaa yô, gba u a er kwagh ne ga, gba u a dondo gbenda u paven ivaa er tindi a tese la, aluer ka u a vihi inyaregh kpishi shin ka ican u eren nahan je kpaa.

Mbagenev kpishi mba ken ityar i vea fatyô u paven ivaa yô, kpa er ve kav awashima u Takerada u Tesen Ér Nomsoor vea kwase Tôndo Zwa u Eren Kwagh a Ayol a Ve sha Mimi la jighilii ga yô, ve pine mbampin sha kwagh u wan uwegh shin takerada ne, sha er vea palegh ican kua mbamtaver mba za zuan a takerada u paven ivaa sha tindi la yô.

Kpa ikyaa i se lu lamen sha mi ne yô, nomsoor man kwase u ve lu imôngo sha tindi ga la, soo u eren ivaa sha tindi hegen. Shi sha kwagh u Bibilo i tese yô, vea fatyô u vôson ayol a ve, er nomsoor la a vande vôson kwase ugen ga, shi kwase la kpa a vande vôson nom ugen ga yô. Nahan kpa, nomsoor la ngu ken tar la sha tindi ga, shi gomoti u tar la kpa una na or u nan lu marnya ga la ian ér nana er ivaa ga. (Ken ityar igen yô, gomoti ngu a na ambaaior la ian ér ve vôso ayol a ve, aluer mô ve shin ve uhar cii vea lu marnya ga, shi vea lu ken tar shon sha tindi ga je kpaa.) Kpa ior mba se lu ôron kwagh ve ne yô, tar u ve lu ker la na ian i or a fatyô u paven ivaa sha tindi yô. Sha nahan yô, gba u or a wa uwegh shin Takerada u Tesen Ér Nomsoor vea Kwase Tôndo Zwa u Eren Kwagh Ayol a Ve sha Mimi la ken tar la ga. Fa wer, gba u ior mban vea za ngohol takerada u paven ivaa ve, i vende u nan ve ga. Ve cii mba a ian i eren ivaa. Kpa er or ne a lu ken tar la sha tindi ga yô, vea er nena? Alaghga a gba u vea yem ken tar ugen ape gomoti una yange ve u eren ivaa sha tindi ga yô. Shin nomsoor la una fatyô u keren gbenda u eren takerada u tesen ér un ngu ken tar la sha tindi, sha ér vea fatyô u eren ivaa ker yô.

Aluer ve er nahan yô, vea lu wan atindi a Aôndo ikyo, kua a gomoti kpaa. (Mar. 12:17; Rom. 13:1) Se mba a ishimaveren ser vea er kwagh ne. Vea eren nahan yô, vea kuma u eren batisema.—Heb. 13:4.

[Ngeren u shin kpe]

[Mkaanem ma sha peeji 14]

Mbakristu mba ve tagher a kwagh ne yô, vea fatyô u tsuan kwagh u ve soo la, nahan kpa ve fa ér Yehova una pine ve kwagh sha mi

[Ngeren u pasen foto u sha peeji 15]

IGBENDA IGEN I WAN KWASE IJENAWAMBE KEN SAGH ÉR NANA MAR

Er i zough a mzeikyura sha gbenda u wan kwase ijenawambe ken sagh ér nana mar ne kpishi yô, kwagh ne gema va a akaa agen a a hendan a mnenge u Aôndo u i tese ken Bibilo la yô. Ikyav i tesen yô, a fatyô u tôôn aji a kwase nungwan sha mnyandem ma nomsoor u nan lu nom u kwase la ga yô. Kwase la maa nana lumun ér i haa nan kwagh u i nongo a hingir ijenawambe ne ken sagh. (Ashighe agen kasev mba yaven a kasev ka ve er kwagh ne.) Shin alaghga a nungwa mnyandem ma nom u nan sha aji a kwase u a lu kwase na ga yô. Maa kwase u nan nana lumun ér i haa kwagh u i nongo a hingir ijenawambe la ken sagh u nan.

Gbenda ugen kpa ngu, u ka i tôô aji a kwase kua mnyandem ma nomsoor i nungwa, kwagh ne una hingir azenawambe yô, i tôô i haa ken sagh u kwase ugen u vôson nom, u aji la i lu a nan ga, shi mnyandem mara kpa i lu ma nom u nan ga yô. Shi gbenda ugen di yô, nom man kwase ka ve na aji man mnyandem vem nahan i nungwa, ma a hingir azenawambe yô, i tôô azenawambe ne i za haa kwase ugen kposo ken sagh, nahan kwase la nan mase wan iyav maren wan la nan ve. *

Gba u Mbacivir Aôndo vea palegh igbenda i wan iyav maren ingin ne nahan cii, sha ci u tindi u Aôndo a we yô, kaa ér: “De ne kwase u or u nan we ndor a we mnyandem ou ga, sha er ú hôngor iyol you a nan ga” yô. (Lev. 18:20, 29, NW; Anz. 6:29) Zum u i tee aji a kwase i nongo sha mnyandem ma or u i lu nom u nan ga, shin i tee mnyandem ma nomsoor i nongo sha aji a kwase u i lu kwase u nan ga, shin zum u aji man mnyandem cii ma lu ma orgen yô, kwagh ne ka ieren i Bibilo i yer ken zwa Grika ér por·neiʹa la, ka idya je la. Akaa ne ka igbenda i eren tom a alegh a yaven a or la sha inja ga.—Mat. 5:32; 1 Kor. 5:11; 6:9, 18; Heb. 13:4.

[Ngeren u shin kpe]