Mgber u Iyoukura i ken Zwa Buter Ú Taver Ga Er i Hii Ve Yange I Due a Mgber u Iyoukura Ngura Yô

IOR mba sha tar cii zua a mtsera ken ngeren mba i gberen ken Iyoukura la anyom ngee hegen. Ken uwer u Julai, inyom i 2011 la, i due a mgber u Iyoukura u he, u hiihii, ken zwa buter u taver ga. Mgber la yange pase ér: ‘Se kar mgber u he ne inyom i môm se nenge, aluer a wase yô, se za hemen u gberen.’

Nahan saan se iyol u yôôn hegen ser, gba u a za hemen u gberen Iyoukura la. Shi shighe a karen yô, a gema gberen Iyoukura ne ken zwa French, man zwa Porchoges, kua zwa Ishpania.

ITYÔKYAA I IOR VE SOO IYOUKURA NE YÔ

Zum u ior mba hen ningirtar, u i yer ér South Pacific la zua a Iyoukura ne yô, ve kpishi ve nger ér: “Hegen anmgbianev ka ve hemba kaven kwagh u i nger ken Iyoukura la tsembelee.” Shi anmgbian u kwase ugen nger washika kaa ér: “Shighe u yange se vihi u keren inja i asemberatii ken dikishenali shi pasen asember a kwaghôron, a ken ngeren u Iyoukura la, ka se tôô u gbidyen kwar sha avur a Bibilo shi nengen er avur shon a zough sha ngeren u i lu henen la hegen.”

Anmgbian ugen ken tar u Amerika u a bee yunivasiti yô, kaa ér: “Yange m lam shi m nger kwagh sha gbenda u a lu ior mba ve ze yunivasiti tseegh vea kav yô. Gbenda u m lamen shi m henen kwagh la yange u taver gande, man ityôkyaa i injaa kpa lu i i na ve m lu eren nahan ga. M va mase kaven mer gba u me gema gbenda u m henen kwagh shi m lamen la tsembelee.” Er Iyoukura ne i wase anmgbian ne a hembe fan  u tesen mbagenev Bibilo hegen yô, a nger wener: “Iyoukura i i nger i sha gbenda u taver ga ne wasem kpishi. I tesem er me ôr kwagh sha gbenda u a taver mbagenev u kaven ga yô.”

Anmgbian u kwase ugen ken tar u Ingila u yange er batisema ken inyom i 1972 yô, nger kwagh sha kwagh u Iyoukura ne kaa ér: “Zum u m ôr mgber u Iyoukura ne u hiihii la, lum ér Yehova tema ikyua a mo, kamber mo uwegh sha mon, se mba ôron i imôngo nahan. Yange lum inja ér ter tema a wan na sha gambe, ngu tan un kwaghalôm, wan la di ngu ungwan nahan.”

Anmgbian u kwase ugen u eren tom shin Betel ken tar u Amerika, u yange er batisema i hembe anyom 40 hegen yô, kaa ér Iyoukura ne wase un, un seer kaven Bibilo. U tesen ikyav yô, ngeren u kiriki u a lu a itinekwagh ér “Some Expressions Explained” (I Pase Asember Agen), u ken Iyoukura ne i Setemba 15, 2011 la, yange pase kwagh u “ikpela i mbashiada i vesen” i ken Mbaheberu 12:1 la nahan ér: “Ve lu mba ve ngee iyenge gande u ôron yô.” A kaa ér: “Iwanger ne nam m hemba kaven ivur la.” Sha kwagh u mkombo u Iyoukura u ken hanma kasua la di anmgbian u kwase ne kaa ér: “Aluer wanye nan ôr mkaanem ma i nger ken Iyoukura i ken zwa Buter u taver ga la jighilii, shighe u nan lu nan mlumun la je kpa, mkaanem mara ma a lu kwaghmôm a ma i nger ken Iyoukura i i gberen kera keke, i ior kpishi ve lu a mi la ga. Nahan mlumun u nan ne la a doo ior u ungwan.”

Anmgbian u kwase ugen u un kpa a lu shin Betel yô, nger wener: “Hegen ka i lum toon toon u za ungwan mbamlumun mba mbayev mbakiriki mba ken tiônnongo kpen kpen. Iyoukura ne i wase ve u nan mbamlumun vev vangertiôr. Mbamlumun vev mbara ka ve taver mo ishima kpishi.”

 Anmgbian u kwase ugen u yange er batisema ken inyom i 1984 yô, wuese Iyoukura ne nahan ér: “Kam er i gber Iyoukura ne jighilii sha ci wam nahan. Ka i na yô, m kav kwagh u m lu ôron la wang, a iyolnyoon shio. Hegen m ngu a vangertiôr mer, mo kpa me fatyô u nan mlumun shighe u i lu henen Iyoukura yô.”

I̱ WASE MBAMAREN KPISHI

Kwase ugen u wan na u nomso a lu anyom a 7 yô, kaa ér: “Yange mea waan ago iyol sha Iyoukura i Henen ken Tiônnongo vea wan wam yô, i gba u me pase un ihiange kwaghôron kpishi, nahan kwagh ne a tôô se shighe gôgônan shi i vôr se iyol kpaa.” Kpa mgber u ken zwa Buter u taver ga ne wase un nena? A nger wener: “Kpiligh mo iyol er wan wam ka a ôr akumaihiange iyol na shi a kav kwagh u a lu ôron la hegen nahan. Er asember a ken mgber ne a taver ga, shi ihiange-kwaghôron kpa i lihe ga yô, ka i lu un ican u kaven kwagh u a lu ôron la ga, shi ka i doo un u ôron kwagh shon kpaa. A hii u wan ago iyol sha mbamkombo a u mo wasen un hegen shio, shi ngu a kenger ken Iyoukura na shighe u i lu henen i la, zan zan i kar been kwaghhenen.”

Kwase ugen u wan na u kwase a lu anyom 9 yô, kaa ér: “Ngise la yô, yange i gba u se wase un ve una na mlumun ye. Kpa hegen ka a wa ago iyol iyol na. Ka i lagh a lagh ve, i gba u se tôô shighe se pase un kwagh vindi vindi ye, sha ci u ngu a kav tsembelee. Sha nahan yô, mkombo u Iyoukura seer doon un hegen.”

AKAA A MBAYEV VE ÔR SHA IYOUKURA NE YÔ

Mbayev kpishi nenge ér i gber Iyoukura ne sha ci ve jighilii. Wankwase ugen u lun ayom 12, mba yer un ér Rebeka, a kaa ér: “Nea lumun yô, za nen hemen u gberen Iyoukura i he ne her! Ngeren u kiriki u a lu a itinekwagh ér ‘Ngeren u Pasen Asember Agen’ la doom kpishi. Er Iyoukura ne i taver ga yô, i doo sha ci u mbayev.”

Wannomso u lun anyom 7 ugen, mba yer un ér Nicolette, a kaa ér: “Yange i taver mo u kaven Iyoukura. Kpa hegen yô, ka m na mbamlumun kpishi iyol yam.” Wannomso u lun anyom 9 ugen di, mba yer un ér Emma, a kaa ér: “Iyoukura ne i wasem kua anmgbian wam u a lu anyom 6 la kpishi. Ka se hemba kaven akaa kpishi hegen! Se sugh ne sha kwagh ne!”

Sha kpôô yô, Iyoukura i i nger i sha asember a a taver u kaven ga, shi ihiange kpa i lihi ga la, ngi wasen ior kpishi. Ngi wasen ior kpishi u seer kaven Bibilo, nahan se za hemen u gberen i vea i í henen ken tiônnongo kera keke, i yange i hii u gberen ken inyom i 1879 la.

[Mkaanem ma sha peeji 30]

“Shighe u yange se vihi u keren inja i asemberatii ken dikishenali shi pasen asember a kwaghôron, a ken ngeren u Iyoukura la, ka se tôô u gbidyen kwar sha avur a Bibilo shi nengen er avur shon a zough sha ngeren u i lu henen la hegen”

[Mkaanem ma sha peeji 31]

“Kpiligh mo iyol er wan wam ka a ôr akumaihiange iyol na shi a kav kwagh u a lu ôr la hegen nahan”