Palegh Ieren i Eren Tom a Bibilo Er Ka Kwagh u Ahir La

PAULU yange pase er mkaanem ma Aôndo, ma lu a tahav mbu benden a asema a ior shi geman uuma vev kpaa yô, a kaa ér: “Mkaanem ma Aôndo ma uma je, ma tem gbilin ga.” (Heb. 4:12)

Zum u mbaapostoli kpe kera la, mbatesen mbaaiev mba i tsengaôron kwagh ve la due a atesen a aiegh, nahan ior hii u lun a mnenge u kpeegh sha kwagh u tahav mbu loho u Bibilo u lu a mi la. (2 Pet. 2:1-3) Shighe kar yô, mbahemenev mba ukwaghaôndo hii u tesen ér Mkaanem ma Aôndo ma a tahav mbu ahiriv. Profesô ugen nger takerada ôr kwagh u igbenda i eren ahir a Ruamabera u Mbakristu. A kaa ér, Yesu yange va shin tar, anyom nga kar er 200 nahan yô, orgen u ngeren akaa a kwaghaôndo, u i yilan un ér Origen la kaa wener aluer or ungwa i yila ati a ken Bibilo tseegh kpa, kwagh ne una wase nan. Shi a kaa ér aluer asember a mbaerenahir ve eren tom a mi la nga a tahav yô, asemberatii a ken Bibilo, a i lu icighan jijingi yange na i nger la, aa hemba lun a tahav cii.” Orgen u lu uma shighe u Yesu va shin tar, anyom kar er 400 nahan yô, nger ér, “mayange Satan a cihi a za ikyua a iyou i Bibilo i lu ker ga.” Shi yange kaa ér mbagenev ka ve tsua avur a Bibilo agen ve kor ikpagher a mi ve har sha mon. Profesô u se vande ôron kwagh na sha heen ne shi kaa ér orgen u tôvon sha akaa a kwaghaôndo u fada, u i yilan un ér Agôsutin la kpa yange lumun ér “aluer ityough nande or yô, nana fatyô u tôôn mkaanem ma ivangeli i Yohane, wan ken pilo, yaven veren ityough sha mi, nahan ityough kira kia bee!” Kwagh ne na yô, ior hii u eren tom a Bibilo er ka kwagh u ahir nahan. We kpa u eren tom a Bibilo inja ér ka kuraiyol shin kwagh u nan ikyôr laghen nahanaa?

Ior mbagenev kpishi ka ve er tom a Bibilo sha gbenda ugen kpaa, u ú lu vough ga yô. Ve na jighjigh ér aluer ve bugh Bibilo yô, ivur i ashe a hii gberen ve sha mi ken peeji u ve bugh la cii, ia tese ve kwagh u vea er yô. U tesen ikyav yô, Profesô u se ter kwagh na sha heen ne kaa ér kwagen la, or u i yilan un ér Agôsutin la ungwa imo i wanye hen ya ugen ikyua a na lu kaan ér, “tôô i̱ ôr, tôô i̱ ôr” yô, Augustine kure ikyaa ér ka Aôndo a lu kaan a na ér una tôô Bibilo, una ôr ivur i una bugh ve, una hii nengen a mi la ye.

I lu nahan u ungwa kwagh u ior mba ka vea lu a zayol ve, ve er msen hen Aôndo, maa ve bugh Bibilo, nahan ivur i ve hii nengen a mi la ve na jighjigh ér ia wase ve u sôron zayol la vee? Er alaghga awashima ve la una lu u dedoo, sha ci u ve soo u zuan a iwasen ken Bibilo nahan kpa, kape i gbe u Orkristu nana ker iwasen ken Bibilo la ga.

Yesu yange tôndo zwa a mbahenen nav ér una tindi ve a “Orsurunshima, ka Icighan Jijingi je la.” Shi a kaa a ve ér: ‘Una tese ne akaa cii, man shi Una umbur ne akaa a M er ne cii kpaa ye.’ (Yoh. 14:26) Sha nahan yô, se fatyô u zuan a iwasen ken Bibilo sha u eren sha kwagh u se hen ken i la, ka sha u bughun hanma peeji cii, maa ôron ivur i ashe a hii gberen se sha mi la ga.

Ieren i eren tom a Bibilo er ka kwagh u ahir la samber hegen wuee. Nahan kpa, Bibilo venda ahir a eren. (Lev. 19:26; Dut. 18:9-12; Aer. 19:19) “Mkaanem ma Aôndo ma uma je, ma tem gbilin ga,” nahan kpa, gba u se fa u eren tom a ma sha inja. Aluer se zua a mfe u Bibilo sha gbenda u vough, se tôô i inja ér ka kwagh u ahir ga yô, mfe la una wase se. Mbagenev kpishi zua a mfe u Bibilo u mimi la, nahan kwagh ne na ve de aeren a ve a bo la, shi tsombor ve hemba ngun saan saan hegen shi ve ya ikyar a Yehova, Aôndo u a ne i nger Bibilo la.