Wankwase ugen, iti na ér Maria Isabel, ngu hen gar u San Bernardo, ken tar u Chile, veghertar u South America. Un vea tsombor na cii mba marnya u tar u Chile, ve due ken kweior u i yer ér Mapuche la. Tsombor ne cii ngu suen iniôngon i i lu nôngon ér a ver tiônnongo u he ken zwa u Mapuche la sha gbashima. Mba yer zwa ne kpaa ér Mapudungun.

Zum u i yôô ér a lu eren Mkombo u Umbur Ku u Yesu ken zwa u Mapudungun, shi i gber ikyatakerada i lôhôn ior M-umbur ken zwa shon kuma 2,000, sha u za lôhôn ior M-umbur ne a mi yô, kwagh ne na Maria Isabel gba henen sha kwagh u una er yô. Ka nyi una er sha u wasen tom u samber a ikyatakerada nee? A umbur kwagh u agumaior a Mbashiada agen a yange pase atica a ve kua mbayev mba ve zaan makeranta vea ve imôngo la kwagh ve, kwagh u dedoo due ker yô. Nahan a lam a mbamaren nav sha kwagh shon, tsô ve cii ve kaa ér a̱ hen ase er una er ve una na ior ikyatakerada i lôhôn ior M-umbur la sha makeranta na yô. Nahan a due a mhen ér nyi?

Hiihii yô, Maria Isabel pine atica a ken makeranta na ian i varen kwatakerada ne sha hunda u vesen u nyôron ken makeranta la. Ve lumun, shi ve wuese un er a lu a mfe u eren kwagh nahan yô. Iyange igen mba ngur yilan ati a mba ve za makeranta la pepe yô, prinsipa u makeranta shon yôô kwagh u kwatakerada shon gbungur gbungur sha lôôspika.

Maria Isabel shi pine ér i na un ian una za sha hanma klase cii. Atica na nga ne un ian yô, a gba zenden pinen sha hanma klase u una nyôr her cii ér una fa mbayevmakeranta mba ve lu marnya u Mapuche yô. A kaa wener: “Yange m hen mer ken makeranta la cii alaghga me zua a mbayevmakeranta 10 shin 15 tseegh, mba ve lu marnya u Mapuche yô. Kpa ve ngee kpishi, nahan m na ikyatakerada je kuma 150!”

Kwase ugen u nenge a kwatakerada ne sha hunda makeranta yô, pine ér una fa or u nan var u la, una lam a nan sha kwagh u M-umbur shon. Er i tese un wankwase u lun anyom pue ne yô, kwagh ne kpiligh un iyol kpishi! Maria Isabel se mugh mugh, maa kaa ér: “Yange hen ér a lu or u kaven ishigh.” Maria Isabel na kwase ne kwatakerada la shi ta un iwanger sha mi kpuaa, maa kaa a na ér a̱ na un adereshi na sha er un vea mbamaren nav vea za un inya vea za seer ôron un kwagh u Tartor u Aôndo yô. Sha iyange M-umbur la, kwase ne kpa va kua iorov mbagenev 26 mba ve lu marnya u Mapuche yô. Er mbapasenkwagh mba hen haregh u i lamen zwa u Mapudungun, mba ve kom iorov 20 mban nenge a ve yô, kwagh ne doo ve tsung je. Annongo la hingir zege tiônnongo hegen!

Er anyom a ou a lu cii kpa, u fatyô u eren imbakwagh ne sha u lôhôn mba ken makeranta wou shin mba ve eren tom a we imôngo la M-umbur shin kwaghôron u ken igbar gayô mkohol u vesen. Time ken ityakerada yase fa igbenda igen i mbagenev kpa yange ve er imbakwagh ne yô, sha er ia wase u u fa er u er kwagh ne ve, u za ikyura yô. Shi sôn Yehova a na u icighan jijingi na sha er una wase u u pase kwagh na sha ishimataver yô. (Luka 11:13) U er nahan yô, we kpa a doo u tsung shi ishima ia taver we kpaa, zum u u nenge er ago a u we tsembelee la a um atam yô.