IOR kpishi yange ve kaa ér tser u “Creation Drama” (Iniumbe I sha Kwagh u Igbetar) la ka “kwagh u a hungur a mi ga.” Yange i er u sha shighe vough, shi mba ve nenge u cii, lu kwagh u hungur ve ga. Tser ne yange u er shiada u vesen, shi u va Yehova a icivir, ica gba ga maa Adolf Hitler hii u tôvon ior mba Yehova mba ken veghertar u Yuropa la a ican kpoghuloo. Kpa tser u “Creation Drama” ne lu nyi?

Ken inyom i 1914 la, afishi a shin itine a Mbashiada mba Yehova a ken gar u Brooklyn, ken kpentar u New York, ken tar u Amerika la, due a tser u i yilan ér “Photo Drama of Creation” (Foto u Iniumbe I sha Kwagh u Igbetar) la. Lu tser u duen a ufoto mba tenger man mba tenger ga, mba lun a kala, shi duen a ikyenge kua iov, ú kuman ahwa anigheni. Yange ior nenge tser ne sha tar cii, kuma umiliôn imôngo. Shi ken inyom i 1914 shon i môm, i er tser ne u asav asav, i due a mi, i yilan u ér “Eureka Drama.” Mba ker ken kwavanyom u 1920 la yô, ufoto man ufiim kua an injin u tesen tser ne a mi la ya tsegh kpishi. Kpa ior kpishi soo u shi nengen tser u “Photo-Drama” la. U tesen ikyav yô, orgen ken tar u Jamani yange pine ér, “Ka hanma shighe jim shi a tese tser u ‘Photo-Drama’ nee?” Yange gba u a er nyi?

Er ior kpishi soo u nengen tser ne hen shighe ne yô, i tsua anmgbianev mbagen shin Betel u ken gar u Magdeburg, ken tar u Jamani la, i tindi ve ve za yam ufiim hen kômpeni ugen ken gar u Paris, ken tar u France, shi ve yam ufoto mba tenger ga, ken tar u Jamani, hen kômpeni ugen hen gar u Leipzig man gar u Dresden. Ve tôô akaa ne ve zua imôngo vea ufoto mba tenger ga, mba tser u “Photo-Drama” mba ve lu a saa ishe ga la.

Anmgbian ugen u fa atsam a dughun yô, i yilan un ér Erich Frost, yange dugh atsam a i wa ken tser ne yô. Yange i zua a mkaanem ma i pase tser ne a mi la ken takerada wase u Creation la. Ka nahan ve, yange i hide i na tser u “Photo-Drama” la iti i he ér “Creation Drama” ye.

Tser u i hide i er ne kpa yange u lihe kuma ahwa anigheni, nahan i lu tese u atôôn atôôn, hanma aikighe. Tser ne yange u pase kwagh u igbetar vighe vighe, shi u pase yiase i Bibilo man i tar, shi u tese er kwaghaôndo u aiegh a kanshio u wasen uumace yô. Yange i tese tser u “Creation Drama” la ken tar u Austria man u Jamani man u Luxemburg man u Switzerland, kua sha ajiir agen a ior lamen zwa Jamani yô.

Anmgbian u dughun atsam la kaa ér: “Shighe u se lu tesen tser ne la, yange m kaa a anmgbianev mba se lu eren tom ne imôngo mbara mer, shighe u se ze ahumbe yô, ve mough ve na ior ityakerada yase kua antyakeradav mba doon tsung mbara, sha hanma igbur cii. Kwagh ne na yô, se na ior ityakerada je hemba er yange sea dugh sha  uya uya ve ma se ne la.” Anmgbian Johannes Rauthe, u yange nengen sha tom u tesen tser ne ken tar u Poland, man tar u i yer hegen ér Czech Republic la kaa ér, ior kpishi yange ve na mbaadereshi vev ér i za ve inya. Kwagh ne na yô, se hide se za hen Bibilo a ior kpishi.

Ken kwavanyom u 1930 la, yange a tesen tser u “Creation Drama” la ken ajiir a tesen senema la yô, ior ve nyôr poo sha u za nengen, nahan kwagh ne na yô, ior gema ôron kwagh u Mbashiada mba Yehova hanma ijiir cii ken geri. Ken inyom i 1933 la, ior mba afishi a branci a ken tar u Jamani sôr ian i tesen tser ne ve ve va u nengen u la zulum miliôn môm. Anmgbian u kwase Käthe Krauss kaa ér: “Ken ayange a ataan a i lu tesen tser ne cii, yange se zende ukilomita 10 se za nenge tser ne, shi se zende ukilomita 10 se hide. Se kar ken ikyô, se unde agungu shi se hungwa apev.” Anmgbian u kwase Else Billharz di kaa ér: “Ka tser u ‘Creation Drama’ la yange u na m hingir u soon mimi ye.”

Anmgbian Alfred Almendinger pase ér yange ngô na va nengen tser la yô, “maa un iyol je gande, nahan a yam Bibilo, a ker iti i pugatori la ker.” Zough a mi ga yô, a de adua u zaan ken côôci na la, nahan i er un batisema, hingir Orshiada u Yehova. Anmgbian u fan atsam a dughun la di kaa ér: “Tser u ‘Creation Drama’ la yange u wase ior kpishi hingir u fan mimi.”—3 Yoh. 1-3.

Hen shighe u ikpelaior lu nengen tser ne la, ior mba ken veghertar u Yuropa lu hemban suen pati u Mbanazi la cii, nahan pati ne lu van a ayôôso. Ken mhii u inyom i 1933 la, i cir tom u Mbashiada mba Yehova ken tar u Jamani. Hii hen shighe la je zan zan va ar shighe u ityav mbi tar cii mbi sha uhar, bee ken inyom i 1945 la, i tôv mbacivir Yehova mba ken Yuropa a ican tsung. Anmgbian u dughun atsam la yange tsa ken purusu zulum anyom anigheni. Kpa kwagh er un ga, nahan shighe kar yô, a za er tom shin Betel u ken gar u Wiesbaden, ken tar u Jamani la. Kwagh er doo yô, yange i er tser u a hungur a mi ga ne sha shighe vough, u u taver jighjigh u nan u Mbakristu kpishi, mba lu u ica a gba ga tsô, a kar jighjigh ve u nan hen shighe u Ityav Mbi Tar Cii Mbi sha Uhar la.—Ngeren u pasen yiase yase, u ken tar u Jamani.