Yehova Ka Ijiir Yase i Teman
“TERE, ka We je, U lu ijiir yase i teman, sha ikyov ikyov ye.”—PS. 90:1.
1, 2. Ior mba Aôndo mba nengen tar ne nena, man ka sha nyi gbenda nahan ve lu a ya?
U NGU ken botar ne nahan ishima tema u shimi, er or ka nana lu hen ya u nan ve ishima i tema nan shimi nahanaa? Aluer ka nahan ga yô, u ngu kwaghmôm vea mbacivir Aôndo mbagenev. Hii sha ayange a tsuaa la je, mba Yehova a doo ve ishima sha mimi la, ndera nengen ayol a ve ér ve mba mbavannya ken tar ne. U tesen ikyav yô, shighe u mbacivir Aôndo sha jighjigh lu haan afo ken tar u Kanaan ningir la, “ve pase gbar gbar er ve lu mbavannya man ushirmbaiorov” yô.—Heb. 11:13.
2 Mbakristu mba i shigh ve mkurem, mba ‘tar ve u lu sha’ la kpa, mba nengen ayol a ve ér ve mba “mbavannya man ushirmbaiorov” ken tar ne. (Fil. 3:20; 1 Pet. 2:11) “Iyôngo igen” i Kristu la ngi ‘ior i tar ne ga, er Yesu kpa lu or u tar ne ga nahan.’ (Yoh. 10:16; 17:16) Nahan kpa u ngu wer ior mba Aôndo ban a ban a ya ga. Se mba a ya u i hembe kundun se iyol ker shi se hembe zuan a mkor ker a hanma ijiir igen sha won cii yô; man ka mbananjighjigh tseegh ve fe un ye. Mose yange nger ér: ‘TERE, ka We je, U lu ijiir yase i teman, sha ikyov ikyov ye.’ (Ps. 90:1) Yehova yange lu ‘ijiir i teman’ i mbacivir un sha ayange a tsuaa la nena? Ngu ‘ijiir i teman’ sha ci u ior nav nyian nena? Man una va lu ijiir i yeren sha ci u ior nav ken hemen nena?
YEHOVA LU ‘IJIIR I TEMAN’ I MBACIVIR UN MBA TSUAA MBARA
3. Pasalmi 90:1 tôô Yehova kar sha nyi, man ka sha ci u nyi?
3 Ashighe agen Bibilo ka i tôô Yehova i kar sha akaa a se nengen a mi la sha er se hemba kaven or u Yehova a lu yô. U tesen ikyav yô, Pasalmi 90:1 kar Yehova sha ‘ijiir i teman’ shin ya. Ka a ter ishember i ya la yô, ka i lu ijiir i dooshima man bem man mkpeyol ve lu her la ka i va se ken ishima ye. Kpa er nan ve i kar Yehova sha ya? Bibilo kaa ér Yehova ka dooshima. (1 Yoh. 4:8) Shi i̱ kaa ér un ka Aôndo u bem, u a ne mbacivir un mkpeyol yô. (Ps. 4:8) U tesen ikyav i kwagh ne yô, de se nenge nen er Yehova yange lu er ka ya nahan hen mbacivir un mba jighjigh, Aberaham man Isaka man Yakob yô.
4, 5. Aôndo yange lu ‘ijiir i teman’ i Aberaham nena?
4 Se fatyô u fan er yange a lu Aberaham ken ishima, zum u Yehova kaa ér a due a undu tar na la ga. I yilan un shighe ne ér Aberam. Yehova kaa a na ér: “Due ken tar wou man ken ityô you . . . yem ken tar u Me tese u la.” Aluer ishima yange i nyian Aberaham yô, a̱ shi nan kpa yange ishima ia pever un sha mkaanem ma Yehova shi ôr a na ne. A kaa ér: “Me er u, ú hingir ikyurior i vesen, Me ver u doo doo, Me er iti you i̱ za gwa . . . Mba vea ver u doo doo yô, Mo kpaa Me ver ve doo doo; or u nana wa u ifan la, Mo kpaa Me wa nan ifan.”—Gen. 12:1-3.
5 Mkaanem man lu ibumun i Aôndo bum ér una hingir ijiir i teman i Aberaham man vor na yô. (Gen. 26:1-6) Man Yehova yange kure ityendezwa na ne kpaa. U tesen ikyav yô, a yange Farao, tor u Igipiti man Abimeleki tor u Gerar ér ve de benden a Sara ga, shi ve de woo Aberaham ga. Yehova shi kura Isaka man Rebeka kpa sha imba gbenda ne. (Gen. 12:14-20; 20:1-14; 26:6-11) Bibilo kaa ér: “[Yehova] lumun ma or nzughul a ve ga, A zôhô a utor sha ci ve kpaa, lu kaan er: De bende nen mba M shigh ve mkurem la ave ga, mbaprofeti Av kpaa de eren nen ve kwagh u vihin ga.”—Ps. 105:14, 15.
“Me undu u ga”
6. Yakob yange kaa a Isaka ér a er nyi, man adooga Yakob yange una lu henen ken ishima ér nyi?
6 Yakob, u Aberaham lu ter na u tamen la kpa lu ken uprofeti mban. Ka va kom Yakob u eren kwase yô, ter na Isaka kaa a na ér: “De eren kwase ken ônkasev mba Kanaan ga. Mough yem ken Padan-aram hen ya u Betuel, ter u ngôu, za er kwase ken ônov mba Laban.” (Gen. 28:1, 2) Yakob ungwa imo i Isaka a atimbir shio. Yakob undu mkpeyol u hen tsombor na, u ú lu ken tar u Kanaan la, a er zende u kuman ukilomita uderi imôngo, a yem hen haregh u Haran. (Gen. 28:10) Adooga yange una lu henen ken ishima na ér: ‘Man me za zende ne me tsa a kuma nena-o? Anngô u ngôm una ngohol mo doo doo, shi una nam kwase u cian Aôndo je-o?’ Aluer yange ishima lu nyian Yakob sha akaa ne yô, ikyav tese ér ishimanyian ne yange i bee, zum u a nyôr hen gar u Lushi, u gba ica a gar u Beersheba kuma ukilomita 100 la. Lu nyi i er hen gar u Lushi?
7. Aôndo yange taver Yakob ishima ken mnyam ma cier nena?
7 Shighe u Yakob lu hen gar u Lushi la, Yehova ande hen a na ken mnya, kaa a na ér: ‘Nenge, M ngu a we, Me kuran we henpe ú za cii, Me shi Me hide a we ken tar ne kpaa; gadia Me undu u ga, saa Me kure kwagh u M kaa u ne ve.’ (Gen. 28:15) Mkaanem man yange ma a taver Yakob ishima shi ma a sur un ishima kpen kpen! A̱ shi nan kpa, yange a torough Yakob iyol u nengen er Mkaanem man ma a kure sha mi la. Aluer u undu ya wou, man alaghga u ngu pasen kwagh ken tar ugen yô, adooga we kpa ishima nyian we er Yakob nahan. Nahan cii kpa, u nenge a ikyav i tesen ér Yehova nenge sha a we doo doo je ka u tunan ga.
8, 9. Yehova yange lu ‘ijiir i teman’ i Yakob sha nyi igbenda, man kwagh la tese se nyi?
8 Yakob za nyer ken Haran yô, Laban, anngô u ngô na ngohol un doo doo, shi shighe kar yô, a na un Lea man Rahel, ve hingir kasev nav. Nahan kpa, shighe karen yô, Laban nôngo ér una ya mtsera sha Yakob, je a musan Yakob injar kwa pue. (Gen. 31:41, 42) Er Laban nzughul a Yakob nahan kpa, Yakob wa ishima, sha ci u a na jighjigh ér Yehova una za hemen u nengen sha a na, man lu kwagh u er vough je la. Sha nahan yô, shighe u Yehova kaa a Yakob ér a hide ken Kanaan la, Yakob “zua a akumauile a tamen man ikpan i ukase man ikpan i nomso man urakumi kua ujaki kpishi kpaa.” (Gen. 30:43) Kwagh ne doo Yakob tsung, nahan a er msen u wuese Aôndo, a kaa ér: “Mo m kuma sha erdoo ne cii, man sha mimi ne cii, u U er a wanakiriki wou ne ga; gadia iyange m peren Yordan ne yô, m lu a aga tseegh, man hegen yô, hingir akum ahar je.”—Gen. 32:10.
9 Ka nahan ve mkaanem ma Mose va ôr ken msen man ma lu ma mimi ye. A kaa ér: “TERE, ka We je, U lu ijiir yase i teman, sha ikyov ikyov ye.” (Ps. 90:1) Nyian kpa, mkaanem man ma a iwasen her, sha ci u Yehova, u a lu a “mure u mgem tsô kpaa ga” la, ngu kuran mba ve civir un sha mimi la her, shi ngu ijiir ve i teman kpaa. (Yak. 1:17) De se time se fa er a lu ijiir i teman i ior nav la.
YEHOVA KA “IJIIR YASE I TEMAN” NYIAN
10. Se fatyô u kaan ser Yehova za hemen u lun ijiir yase i teman sha ci u nyi?
10 Tôô wer u ngu ken atejir, u ngu eren shiada ponon nongo ugen u eren ifer, u ú lu sha tar cii yô. Orhemen u nongo ne ngu a kwaghfan, shi ngu a tahav kpishi, a wa aie dedoo shi ka or u wuan ior, u mhôônom ma ker un a or ga yô. Atejir ne una hembe sha iyange la, ú due nahan ú lu zenden kera gbar gbaraa? Taver tsô! Sha kpôô yô, u ker ior mba kuran we. Kwagh ne tese mlu u mbacivir Yehova ve lu ker la. Mba eren shiada vangertiôr sha kwagh u Yehova, shi mba ponon aeren a ifer a Satan, orihyom u hemban cii la! (Ôr Mpase 12:17.) Kpa Satan fatyô u cirin ior mba Aôndo zwa je he? Ei! Kwagh gema er yô, se mba hemban zan hemen ken jijingi cii. Ityôkyaa ngi i môm tseegh, i i ne ve kwagh a lu nahan yô. Ka sha ci u Yehova za hemen u lun “ijiir yase i teman,” hemban cii je yô, ken ayange a masejime ne. (Ôr Yesaia 54:14, 17.) Nahan cii kpa, aluer se de Satan mee se due a vese ken ijiir yase i teman ne kera yô, Yehova una kera lu ijiir yase i teman ga.
Mbatyomov mba Aôndo mba kor ior nav shi mba wasen ve
11. Uter asev mba tamen, Aberaham man Isaka man Yakob tese se nyi?
11 De shi se hen nen kwagh ugen kpaa hen Aberaham man Isaka man Yakob. Shin er ve lu ken tar u Kanaan her nahan kpa, ve lu kposo a ior i tar la. Ve kôr ifer man idya, i ior i tar la eren la ihyom. (Gen. 27:46) Ve kegh ér i na ve atindi kpuun, a kaan a ve ér er nahan shin de eren nahan ga ze. Kwagh u ve fa sha kwagh u Yehova la wase ve u fan kwagh u a soo man u a soo ga yô. Er Yehova lu ijiir ve i teman yô, ve ker ér vea lu a tar kôôsôô ga. Ve gema ve gba ica a tar er ve fatyô la cii. Kwagh u ve er ne ka ikyav i dedoo i se dondo yô. Azende ou man iemberyolough i u tsough u eren la, tese ér u ngu nôngon wer u dondo ikyav i uter mba tamen mban kpa? Kwagh er vihi yô, mbagenev ken tiônnongo tese ér ve tema ken tar u Satan ne doo ve. Aluer war kan we ken ishima nahan tsô kpa, er msen sha ikyaa ne. Umbur wer tar ne ka u Satan. Tar ne ngu a dooshima ga, shi ngu keren mkpeyol u u tseegh.—2 Kor. 4:4; Ef. 2:1, 2.
12. (a) Yehova koson ior nav ken jijingi nena? (b) U nenge akaa a Yehova a ne sha u wasen se ken jijingi la nena?
12 A gba u se zuan a mtsera ken akaa a ken jijingi a Yehova a ne mbacivir un, mba á lu ijiir ve i teman la cii, ve se fatyô u palegh ayom a diabolo ye. Akaa a ken jijingi ne ka mbamkombo man mcivir u hen tsombor man mbatamen mba ken tiônnongo, mba Aôndo a tsough ve sha u ve suen se shi ve surun se asema sha er se za hemen u wan ishima a mbamtaver mba uma la. (Ef. 4:8-12) Anmgbian George Gangas, u lu môm ken Mbahemenev mba Shin Itine anyom kpishi la yange nger ér: “Ka mea lu vea [Ior mba Aôndo] yô, i lum er m ngu hen ya wam vea tsombor wam, shi m ngu ken paradiso nahan.” We kpa kape ka i lu u laa?
13. Se hen nyi ken Mbaheberu 11:13?
13 Ieren igen i uter asev mba tamen mban lu a mi, i i doo u se kav ve a mi yô, ka er yange ve kegh iyol u lun kposo a ior mba ve kase ve la. Er se pase ken ikyumhiange i hiihii la nahan, yange ‘ve pase gbar gbar er ve lu mbavannya man ushirmbaiorov’ yô. (Heb. 11:13) U kange ishima wer u lu kposo a ior i tar ne kpa? Mimi yô, ashighe agen ka i taver u eren kwagh ne. Kpa sha iwasen i Aôndo man i Mbakristu mbagenev yô, u fatyô u eren nahan. Umbur wer u ngu tswen ga. Hanma or u nan soo u civir Yehova cii, a gba u nana nôngo ityav. (Ef. 6:12) Kpa aluer se suur sha Yehova shi se de ser a lu ijiir yase i teman yô, se fatyô u hemban mbi.
14. Mbacivir Yehova yange ve kegh hanma ‘gara’?
14 Kwagh ugen u a lu hange hange yô, gba u u ver ishima sha iyua i ú va zua a mi la, er Aberaham nahan. (2 Kor. 4:18) Apostoli Paulu yange nger ér Aberaham “lu keghen gar u a lu a imagh, u Aôndo A lu Orkaren man Ormaan un la.” (Heb. 11:10) “Gar” la ka Tartor u Mesiya la. Yange gba u Aberaham una kegh “gar” shon. Kpa se yô, ka nahan kpeegh ga. Tartor la ngu hemen sha hegen. Man ikyav tese wang ér ica a gba ga tsô, ua va hemen tar ne cii. Uma wou tese ér u nenge wer Tartor la ngu kpôô kpôô kpa? U ngu vanden keren u ken uma wou, shi u tile paleghaa a tar ne kpa?—Ôr 2 Peteru 3:11, 12.
“IJIIR YASE I TEMAN” HEN SHIGHE U MKUR A MGBÔGHOM NE
15. Ka nyi i lu keghen mba ve suur sha tar u hegen nee?
15 Er mkur u tar u Satan a zulum ne, ikyav tese ér “ican” ia lu seer a seer. (Mat. 24:7, 8) Sha shighe u zegecan la je yô, a va hemba vihin cii. Akaa a uumace ve er sha ci u mkpeyol ve la cii aa saa ishe, nahan ior vea hingir u cian ku gighir gighir. (Hab. 3:16, 17) Vea hingir tengemee, nahan vea “yer ken ubar man ken awen a sha iwo.” (Mpa. 6:15-17) Kpa ubar vea fatyô u yeren ve ga, shi mbapatii man mbakpengav kpa vea fatyô ga.
16. Doo u ú nenge tiônnongo nena, man ka sha ci u nyi?
16 Kpa ior mba Yehova yô, vea za hemen u lun ken mkpeyol ken ‘ijiir ve i yeren;’ ijiir ne ka Yehova Aôndo. Vea ‘ember ken TER, vea ember ken Aôndo u myom ve,’ er profeti Habaku nahan. (Hab. 3:18) Yehova una lu ‘ijiir i teman’ hen shighe u taver la nena? A gba u se kegh zan zan shighe la man se fa ye. Kpa kwagh u se fe yô, “zegeikpelaior” ia za hemen u lun ken mzough shi ia dondo gbenda u Aôndo una tese la, er shighe u Mbaiserael lu duen ken Igipiti la kpa lu nahan. (Mpa. 7:9; ôr Ekesodu 13:18.) A̱ shi nan kpa, Yehova una tese se kwagh u se er hen shighe la sha ikyev i tiônnongo. Sha kpôô yô, atôônanongo a a lu sha tar udubu imôngo la aa lu er “ayou” a i er kwagh u a ken Yesaia 26:20 la nahan. (Ôr.) Mbamkombo mba tiônnongo gba u kwagh kpa? Yehova ka una pase se kwagh u se̱ er la, sha ikyev i tiônnongo nahan, u dondo kwagh shon a atimbir shio kpa?—Heb. 13:17.
17. Yehova ngu ‘ijiir i teman’ i mbacivir un sha mimi mba ve kpe la nena?
17 Mba vea kpe cii ve zegecan la una hii la kpa, Yehova una za hemen u lun ‘ijiir ve i teman.’ Sha nyi gbenda? Yange Aberaham man Isaka man Yakob kpe ica i gba je kpa Yehova va kaa a Mose ér: “Ka Mo, Aôndo u . . . Aberaham man Aôndo u Isaka man Aôndo u Yakob.” (Eks. 3:6) Yesu yange va ôr kwagh ter mkaanem man, been yô, a kaa ér: “Wen yô, ka Aôndo u mbakpenev ga, ka u mbaumav je, gadia ka sha a Na man ve cii ve lu uma ye.” (Luka 20:38) Yehova tôô ér, mbacivir un sha jighjigh mba ve kpe la mba uma; una va nder ve shin ku je akperan nga ga.—Orpa. 7:1.
18. Ken tar u he la, Yehova una lu ‘ijiir i teman’ i ior nav sha gbenda u vesen nena?
18 Ken tar u he, u ica a gba ga tsô ua va la, Yehova shi una hingir ‘ijiir i teman’ i ior nav sha gbenda ugen kpaa. Mpase 21:3 kaa ér: “Nenge, tenti u Aôndo ngu hen ior, Una tema a ve.” Hiihii la, Yehova una tema a ior nav mba shin tar ne, sha ikyev i Yesu Kristu. Anyom dubu la aa been yô, Yesu una hide a Tartor una na Ter na, shighe u una kure awashima u Aôndo sha tar vindi vindi la. (1 Kor. 15:28) A been heela yô, á kera gba u uumace vea kar hen Yesu man vea za hen Aôndo ga, gadia Aôndo iyol na una lu a ve. Nenge imba er kwagh u doon tsung a lu keghen se ken hemen sha wono! Kpa cii man shighe la yô, de se nôngo se dondo ieren i kov u tsuaa la, sha u den ser Yehova a lu “ijiir yase i teman” hegen.
