SAAN se iyol er agumaior kpishi a a lu Mbashiada ve lu eren akaa ken uma ve akuma akuma, sha er vea seer eren tom u pasen la nahan. (Mat. 6:22) Ka nyi ka i gba u vea de ia kar ve? Ka mbamtaver mba nyi ka ve tagher a mini? De se time sha kwagh u agumaior agen a a lu eren tom ken tar u Mexico hegen ne, tsô se zua a mbamlumun sha mbampin mban.

Anmgbian ugen ken tar u Amerika yange er kwase ken uwer u Janawari, 2007. Mba yer un ér Dustin, iti i kwase na ér Jassa. Cii man shighe ne yô, vande lun awashima ve u yamen tso, tsan shimi inyom jimin. Mba eren ivese shighe kar kpuaa yô, ve kure awashima ve ne. Yange ve zer tso ne ikyua a gar u Astoria, ken kpentar u Oregon, tar u Amerika. Lu gar u doonashe, u a agungu a lun a akô civirii man iwo i lun a senou sha mi kase un yô. Gar ne gba ica a Ityeku i Pacific la kpishi ga. Dustin kaa ér: “Ape yange sea gema cii, i doo u kenger!” Dustin vea kwase na Jassa lu henen ér ve mba eren akaa ken uma ve akuma akuma, shi ve mba suur sha Yehova kpaa. Ve lu henen ér, ‘er ve lu tsan shin tso u kuman angahar 26, shi ve lu eren tom u uke ashighe ashighe, shi ve lu zan mbamkombo vea tiônnongo ugen u a eren mbamkombo ken zwa u ken tar u ken won, shi ve tôôn ishuen pania ashighe ashighe je kuma.’ Kpa shighe kar yô, ve kav er ve lu tsughun ayol a ve yô. Dustin kaa ér: “Yange se vihi shighe kpishi u sôron akaa sha tso wase ne, nahan se kera faantyô u suen tiônnongo wase ga. Se kav ser aluer se  soo u veren Yehova hiihii ken uma wase yô, a gba u se de akaa agen aa kar se.”

Jassa di kaa ér: “Cii man m vôso nom yô, m lu ken tar u Mexico, m zaan mbamkombo ken tiônnongo u eren mkombo ken zwa Buter. Shighe u m lu ken tar u Mexico la, yange i doom u zan mbamkombo vea tiônnongo la, shi sarem tsung u hiden yemen her kpaa.” Er Dustin man Jassa soo u taver isharen i ve lu a mi u za eren tom ken tar u ken won la yô, ve hii u ôron ngeren mba pasen kwagh u anmgbianev mba nomso man mba kasev, mba ve undu ityar ve ve mough ve yem ken ityar igen, sha ajiir a sunda via kuma u sundan la. (Yoh. 4:35) Ve ôron ngeren mban shighe u vea eren mcivir u hen tsombor yô. Dustin kaa ér, “Se kpa yange se soo ser se zua a imba msaanyol la.” Zum u azende a ve a ken tar u Mexico kaa ér annongo ugen u i sember veren ken tar la ngu keren iwasen yô, Dustin man Jassa tsua ér vea za na un iwasen la. Ve de ityom i ve lu eren la, ve tee tso ve, maa ve mough ve yem ken tar u Mexico.

Dustin man Jassa mba yemen ken tar u Mexico yô, ve za haa afo hen gar u Tecomán. Gar ne kpa ngu ikyua a Ityeku i Pacific la, kpa a gema a gba ica a gar u Astora kuma er ukilomita 4,345 nahan, vegher u ken imbusutariyan la. Dustin kaa ér: “Ijiir ne tsee kpishi, shi i kaha alum yem ikyua ga; ahumbe a kundun iyol man iwo i doon kenger lu heen er pe se vande lun la nahan ga.” Sha hiihii la ve fatyô u zuan a ityom i uke i vea er ga. Kwagh ne na yô, ve lu a inyaregh kpishi ga, nahan ve yaan cinkafa sha alev kwa har ken iyange, kuma ukasua imôngo. Jassa kaa ér: “Kpa sha shighe u alev sha cinkafa lu nôngon u duen se ishima la, mba se lu tesen ve Bibilo la hii u nan se umangoo man mbaayaba man mbambuee kua aba a alum!” Shighe kar yô, makeranta ugen u tesen kwagh u zwaa, u u lu ken tar u Taiwan yô, na ve tom, u ve eren sha Intanet yô. Inyaregh ki ve lu zuan a mi ken tom la hegen ne, kuma ve u kuren ugbayol vev mba ayange ayange la gbing gbing.

Dustin man Jassa nenge mlu ve u he ne nena? Ve kaa ér: “Tom u se yem u za eren ken tar ugen ne, ka kwagh u hemban doon cii u yange er se yô. Ikyaryan yase a Yehova man mlu wase ayol a ase kpa taver hemba er yange se hen la ica je. Hanma iyange yô, ka se eren akaa kpishi imôngo, er u duen kwaghpasen, shi lamen sha gbenda u se wase mba se henen Bibilo a ve la, man u wan iyol sha mbamkombo nahan. Shi ishima kpa de u nyian se sha akaa a uma er ngise lu nahan la.” Shi ve kaa ér: “Hegen se hemba kaven kwagh u ngise se kav tsembelee ga yô. Ka mimi u ityendezwa i Aôndo a er ken Pasalmi 34:8 la; ivur la kaa ér, ‘Bende, nenge nen, TER ka u doon je.’”

Anmgbianev mba nomso man mba kasev mba hemban iorov 2,900 nahan mough yem ken tar u Mexico, mba za eren tom sha ajiir a kwagh a hembe gban sha mbampasenkwagh la. Mbagen ken anmgbianev mban ka  mba ve vese ayol a ve yô, mbagenev mba kwav, shi kpishi ken a ve mba anyom er hii 20 zan zan 30 kar nahan. Mbashiada mban cii lumun u za eren tom u taver tsung ne sha ci u nyi? Yange i pine nongo ve ugen mpin la yô, ve na atôakaa a vesen atar. Lu nyi man nyi?

Lu sha u tesen ér Yehova doo ve ishima shi ior kpa doo ve ishima. Anmgbian u kwase ugen mba yer un ér Leticia, yange er batisema shighe u lu anyom 18 la. A kaa ér: “Shighe u m tsegha iyol yam sha ci u Yehova la, m fa je mer a gba u me er un tom a ishima yam cii man a uma wam cii. Nahan m soo mer me seer nan shighe wam man agee a am u eren Yehova tom, sha er me tese er a doom ishima a ishima yam cii yô.” (Mar. 12:30) Anmgbian Hermilo, u a vese Leticia hegen la di yange yem ape kwagh hemba gban sha mbapasenkwagh u Tartor la shighe u hemba anyom 20 kpuaa yô. A kaa ér: “Yange m fa mer gbenda u hemban doon cii u me tese mbawan ndor a mo dooshima yô, ka u wasen ve u fan Yehova shi yan ikyar a na.” (Mar. 12:31) Sha nahan yô, a de tom u u lu eren ken banke ugen shi lu ken mkpeyol, hen zege geri u Monterrey la, a mough a yem hen angeri u cuku.

Lu sha u vea zua a msaanyol u mimi man u tsôron yô. Leticia yange eren batisema shighe kar kpuaa yô, a za kohol anmgbian u kwase ugen u lu pania shi er tom ne shighe kar yô, ve mough ve yem hen ijiir igen ken toho hiinii, ve za pase kwagh her uwer môm. Leticia kaa ér: “Kwagh u yange er la kpiligh mo iyol. Er ior lu ungwan loho u Tartor u se lu pasen la tsembelee yô, saan mo iyol je zua ga. Nahan uwer la ngu been yô, m kaa a iyol yam mer, ‘Ka kwagh u m soo u eren ken uma wam je ne!’” Gumkwase ugen u lun kwav, u a poso anyom 20 kpuaa yô, iti na ér Essly, yange nenge a msaanyol u za eren tom ape kwagh a hembe gban sha mbapasenkwagh la, nahan un kpa sar un. Shighe u lu zan kôleeji her la, a zua a Mbashiada mbagenev kpishi mba ve lu eren tom ape kwagh hemba gban sha mbapasenkwagh yô. A kaa ér, “Yange m nengen er saan anmgbianev mba nomso man mba kasev mban iyol yô, mo kpa m soo mer i saan mo iyol er ve nahan.” Anmgbianev mba kasev mbagenev kpishi kpa er kwagh u Essly a er ne. Je yô, anmgbianev mba kasev mba lun kwav, mba ve lu pasen kwagh ape kwagh a hembe gban sha mbapasenkwagh ken tar u Mexico la hemba 680. Ve ver agumaior man mbaganden ikyav i dedoo kpen kpen!

Lu sha u vea zua a mkom ken uma yô. Essly yange been kôleeji yô, i na un iwasen i zan yunivasiti gbilin. Mbakov na kaa a na ér a lumun iwasen la sha er una zua a digirii, una er tom a yam mato, shi una ker shighe a zenden sha yô. Nahan kpa, a ungwa kwaghwan ve la ga. Essly kaa ér: “Azende a am a ken mimi kpishi er akaa ne, nahan m nenge kera lu akaa a a gbe a zough sha mcivir wase la hemba gban kwagh ken uma ve ga. Shi m nenge ve tagher a mbamzeyol kpishi mba nan ve ishimayinan, er ve lu zendan akaa a tar ne seer a seer la. Yange m soo mer me er Yehova tom kpoghuloo er m lu gumkwase ne.”

Essly maa za seer henen akaa agen kpuaa ken makeranta, a a wase un zua a tom u lu eren zuan a inyaregh  ki kuren mbamgbe nav shighe u lu eren pania la yô. Nahan shi va mough yem hen ape kwagh a gbe sha mbapasenkwagh hange hange yô. Shi yange nôngo kpoghuloo hen zwa u ior i Otomi man u ior i Tlapaneco lamen la, sha er una pase ve kwagh yô. Hegen anmgbian u kwase ne hide gbidye kwar sha anyom atar a a er tom sha ajiir a icaa la, nahan a kaa ér: “Tom u m er ape kwagh a hembe gban sha mbapasenkwagh ne nam mkom u mimi ken uma. U hemban cii yô, tom ne na m hemba ngun a Yehova kôôsôô.” Anmgbian ugen ken tar u Amerika, u i yer iti na ér Phillip yô vea kwase na Racquel kpa lumun a kwagh u Essly a kaa ne; ve cii ve hemba anyom 30 kpuaa. Ve kaa ér: “Tar ngu geman fele fele je yô, ior kpishi nenge ér uuma vev mba sha zongo. Kpa er se lu eren tom ape ior kpishi ve lu ungwan loho u Bibilo yô, kwagh ne na uuma asev doo je gande. Se zua a mkom ken uma kpen kpen!”

Nahan cii kpa, u eren tom ape kwagh a hembe gban sha mbapasenkwagh la ban a mbamtaver ga. Mtaver môm yô, ka u zuan a kwagh u ú eren ve u kuren ugbayol ou la. Kwagh u u er ve a wase u yô, a gba u ú gema eren kwagh er mbamlu mba hen ijiir i u lu eren tom her ve lu la. Verónica, u a er tom pania ica i gbe la, pase ér: “Yange m jiidi kwaghyan m teen sha ishe i taver ga hen ijiir igen i m lu za pasen kwagh her yô. Hen ijiir igen di, m teen akondo shi m hondon ior ityough. Hegen yô, m esen iyou igen, shi m nyer kelase a mba ve mar ônov ica i lu a gba ga yô, m tesen ve er vea lamen a ônov vev yô.”

Or ka nana za lu vea mbaior ken ica hiinii yô, i lu nan ican kpishi u dondon aeren a ityôô a ve. Ka kwagh u yange er Phillip man Racquel shighe u ve lu pasen kwagh hen ijiir igen i i lamen zwa Nahuatl je la. Phillip kaa ér, “Ior mba lamen zwa ne la lu a aeren a ityôô kpishi a a kaha a a ase yô.” Lu nyi i wase ve ve, ve hoghor a aeren a hen ijiir laa? Phillip kaa ér: “Yange se ver ishima sha akaa a injaa a se nenge a mi ken ior i Nahuatl la; gadia icombor ve lu kôôsôô, shi ve eren kwagh a mbagenev sha mimi, shi ve wa nagh kpishi kpaa.” Racquel di kaa ér: “Mlu wase hen ijiir ne tese se akaa kpishi, shi se hen akaa kpishi sha ikyev i anmgbianev asev mba nomso man mba kasev mba lu marnya, mba se pasen kwagh a ve imôngo la kpaa.”

Aluer u soo u za eren tom u pasen kwagh hen ijiir i i gbe ica a we, ape i gbe u a wase ior nahan, u fatyô wan iyol hegen nena? Anmgbianev mba nomso man mba kasev mba ve vande eren imba tom ne ve kaa ér: Cii man u mough u yem yô, hii u eren akaa ken uma wou akuma akuma, shi kwagh a kuman we. (Fil. 4:11, 12) Ka nyi igen kpa u fatyô u erene? Leticia kaa ér: “Yange m palegh ityom i uke i a gba u me er sha shighe gôgônan, shi me lu hen ijiir i môm la. Yange m soo mer hanma shighe u i gbe u me mough cii, m kar a kar.” Hermilo kaa ér: “Yange m hen u yôron iwer, kiren akondo shi kôôn a.” Verónica di kaa ér: “Shighe u m lu hen ya vea mbamaren av man anmgbianev av la, m hen u kiren kwagh shi yôron iwer i i taver ishe ga, kpa i wasen ken iyol yô. Shi m hen inyaregh ki koson kpaa.”

Anmgbian ugen mba yer iti na ér Levi, iti i kwase na ér Amelia, mba marnya u tar u Amerika. Ve vôso ayol a ve hegen kuma anyom anigheni. Ve pase er yange ve eren msen ve sônon Yehova kwagh u gba ve la jighilii ve kwagh ne wase ve u wan ago iyol u za eren pasen kwagh ken tar u Mexico yô. Levi kaa ér: “Yange se tôv se fa inyaregh ki a tôô se u za eren tom ken tar ugen inyom i môm yô, nahan se sôn Yehova ken msen ser a wase se zua a inyaregh kira vough.” Iwer ngi kar kpuaa yô, ve kohol iyenge inyar i ve sôn ken msen la, nahan ve kera vihi shighe ga je maa ve mough ve yem. Levi kaa ér: “Yehova yange na se kwagh u se sôn un la, nahan se di kpa gba u se kure ityendezwa yase.” Amelia di kaa ér: “Yange se hen ser se tsa inyom i môm tseegh, kpa se gema se tsa hen ijiir ne kuma anyom ataankarahar hegen, shi se mba henen u hiden yemen kpaa ga! Mlu wase heen ne wase se u nengen a iwasen i Yehova kpôô kpôô. Hanma iyange ka se nenge a ikyav i erdoo na.”

Anmgbian ugen di ken tar u Amerika mba yer un ér Adam, iti i kwase na ér Jennifer. Mba pasen kwagh ken tar u Mexico hen ijiir i i lamen zwa Buter her yô. Ve kpa ve nenge ér msen ka kwagh u hange hange. Ve kaa ér: “De henen wer hanma kwagh una za lueneen ga. Aluer sar u u̱ za pasen kwagh ken tar ugen yô, er msen sha kwagh ne shi dondo kwagh u ú sen ken msen la kpaa. De we akaa ave kumba kumba ga, shi nger afishi a branci a ken tar u u soo u za pasen kwagh la, shi u faan kwagh u i gbe u u vihi cii, kua mbamtaver mba u za tagher a mi la yô, kura ikyav yem!” * Aluer u er nahan yô, uma u ken jijingi u yôugh yôugh una lu keghen we.