Anmgbian u kwase ugen u a lu kwav shi a hembe anyom 30 yô, mba yer un ér Angela. * Gba u mbatamen vea va un inya, nahan ngu keghen ve. Kpa a gema a fa kwagh u ve soo u va ôron un ga. Mimi yô, a bunde mbamkombo kpuaa nahan, kpa ka una nenge sha mbabeenyol iyange jimin una kur yô, a vôr gbeda gbeda. Heela tseegh ga, dugh mbamzeyol nav mba ayange ayange mbara kera yô, ishima ka i zaan un iyol kpoghuloo sha angev mbu ngô na a gbe la.

Aluer ka we i gbe u u za Angela inya nahan, u taver ‘or u vôron’ ne ishima nena? (Yer. 31:25) Kpa ka nyi i doo u u vande wan ago iyol sha mi cii ve u mase zan or inya, za taver nan ishima?

Se cii ashighe agen ka sea er tom u uke shin ityom i ken tiônnongo sea bee yô, se vôr. Ikyav i tesen yô, shighe u profeti Daniel ngohol mpase u sha mnenge, kpa fa inja na ga la, a “hume” shin a vôr. (Dan. 8:27) Lu ortyom Gaberiel va na un iwasen ye. Ortyom u Aôndo ne na un kav mpase u sha mnenge la, shi pase un wang ér Yehova ungwa mbamsen nav, shi a kaa a na ér a “doo ior ishima kpishi.” (Dan. 9:21-23) Ayange nga kar yô, ortyom ugen kpa va taver profeti ne ishima sha mkaanem ma dedoo.—Dan. 10:19.

Nahan we kpa, cii man u za anmgbian u nomso shin u kwase u nan vôr shin iyol i kpe nan la inya yô, vande tôôn shighe henen sha mbamlu mba nan. Ka mbamzeyol mba nyi nan lu tagher a mini? Mbamzeyol mban mba  nan nan ivôron nena? Ka aeren a dedoo a nyi nan lu a mini? Anmgbian ugen u a er tom u ortamen i hembe anyom 20 yô, iti na ér Richard, a kaa ér: “Ka m hemba veren ishima sha avegher a anmgbianev av ve lu eren i lu doon la.” Shi a kaa ér: “Ka mea vande henen sha kwagh ve zulee yô, i hemba lun mo zange u taver ve ishima sha gbenda u a wase ve yô.” Aluer gba u u za vea ortamen ugen ne za sôr ma anmgbian yô, er nan ne vande timen sha mlu u nan ga?

Alaghga tsô u fa er kunya ka u kor or kpishi u pasen mbagenev kwagh u nan yô. Ikyav i tesen yô, alaghga a taver ma anmgbian kpishi u pasen mbatamen mba ve ve nan inya la zayol u nan. Nahan, u er nan ve nana pase u we? Aluer u ngu sha ishi saan saan shi u ôr kwagh a nan kundu kundu cuku tseegh kpa, kwagh u injaa una due ker. Ashighe kpishi, anmgbian Michael, u a er tom u ortamen i hembe anyom 40 la, ka una za mbagenev inya yô, a hii iliam sha mkaanem man: “U fa, ian i hemban doon cii i ortamen nan lu a mi yô, ka u zan anmgbianev inya hen uyaav vev, nahan seer fan kwagh ve. Doom kpishi er se ve u va nengen a we nyian nahan.”

Shighe u u ze anmgbian wou inya yô, u fatyô u eren msen cii ve hii kwaghôron ye. Zum u u lu eren imba msen ne yô, u fatyô u teren aeren a anmgbian wou la, er jighjigh man dooshima man ishimawan i nan nahan. Ka kwagh u Apostoli Paulu kpa er shighe lu eren msen sha ci u anmgbianev je la. (1 Tes. 1:2, 3) Aluer u er msen a anmgbian wou nahan yô, we man un cii ne hemba lun a mnenge u vough sha mve u u ve nan inya la. Nahan, kwaghôron wou una sur nan ishima. Anmgbian ugen u a er tom u ortamen ica i gbe yô, iti na ér Ray, a kaa ér: “Ashighe kpishi kwagh u dedoo u se eren la ngu a hungur se. Nahan or ka nana umbur se yô, ishima i taver se kpen kpen.”

U fatyô u nan anmgbian wou “iyua i mlumun u sha mhôôn” sha u ôron nan kwagh ken Ruamabera, er Paulu nahan. A lu ivur i  môm tseegh je kpa ia wase nan. (Rom. 1:11) Ikyav i tesen yô, alaghga anmgbian u ishima i yen nan yô, nana nenge ér nan gba kwagh ga, er orpasalmi kpa yange nenge iyol na ér un gba kwagh ga, un ngu er “ikpa i sha mnyi” nahan. (Ps. 119:83, 176) U pasen nan inja i mkaanem mara u been yô, shi u fatyô u kaan a nan wer u ngu a vangertiôr je wer nan “hungur” atindi a Aôndo “ga.”

Shi injakwagh i gbenger sule u saan la kpa, ia fatyô u wasen anmgbian u kwase u nan undu tiônnongo shin nan vôr yô. (Luka 15:8-10) Alaghga tsô gbenger sule la lu sha isha i injaa i i er i a agbenger a azurfa kpishi yô. Aluer u time sha injakwagh ne vea nan yô, u fatyô u wasen nan u fan er nan gbe kwagh ken nongo u Kristu yô. U been yô, alaghga u shiishi pasen nan wer nan ngu môm ken iyôngo i Yehova, nahan a wa nan ikyo kpishi.

Ashighe kpishi anmgbianev asev ka ve soo ér vea pase mnenge ve sha kwagh u Bibilo i er yô. Nahan de lamen we tseegh ga! Zum u u er ma ivur i i zough sha mlu ve la u bee yô, u fatyô u tsuan ishemberti shin mkaanem ken ivur shon pinen ve mnenge ve sha mi. Ikyav i tesen yô, ortamen nana ôron 2 Mbakorinte 4:16 nana been yô, nana fatyô u pinen ér, “We iyol you u nenge a igbenda i Yehova a gem u u hingir hegh yôô?” U er nahan yô, ne fatyô u ‘taver ayol a en ishima’ sha mimi.—Rom. 1:12.

Shi u fatyô u taver anmgbian wou ishima sha u lamen sha kwagh u or u i er kwagh u nan ken Bibilo, u mlu u nan a zough sha u anmgbian wou ne yô. Or u nan ure kpishi nana fatyô u zuan a ishimasurun ken kwagh u yange er Hana shin Epafroditu la. Er ashighe agen ve ure kpishi nahan kpa, ve gba kwagh sha ishigh ki Yehova. (1 Sam. 1:9-11, 20; Fil. 2:25-30) Aluer shighe ngu yô, u fatyô u timen sha kwagh u ior mbagenev ken Bibilo mba yange ve ver ikyav i dedoo la.

Zum u u ze anmbianev ou mba nomso man mba kasev inya sha kwa u hiihii la kera yô, za hemen u tesen ve wer kwagh ve gba u ishima sha mimi. (Aer. 15:36) Aluer u sôr ma anmgbian u bee yô, sôr ian ver i duen kwaghpasen vea nan imôngo. Anmgbian ugen u a er tom u ortamen ica i gbe hegen la, ka una hide a zua ishigh a anmgbian u nomso shin kwase u a sember za sôron nan yô, a pine nan sha kwaghfan sha ér “Ôrom ase yôô, kwagh la za doo kpa?” sha er una fa aluer kwagh u yange un wa nan la er tom yô. Aluer u er nahan yô, u fatyô u fan a gba u u seer nan anmgbian wou iwasen yô.

Ka hegen i hembe gban u se waan anmgbianev asev mba nomso man mba kasev ikyo, shi se faan mlu ve shi tesen ve dooshima cii ye. (1 Tes. 5:11) Sha nahan yô, cii man u za anmgbian wou inya yô, tôô shighe time sha mlu u nan. Er msen sha kwagh ne. Tsua avur a Bibilo a u wase nan a mi la sha kwaghfan. Aluer u er nahan yô, u fatyô u zuan a mkaanem ma injaav ma u taver ‘or u nan vôr’ la ishima a mi yô.