Seer Lun a Iwuese sha Aeren a Yehova La
“Lu nen mbakaven Aôndo er ônov mba doon ishima nahan.”—EF. 5:1.
1. (a) Ka aeren a Yehova a nyi i doo u Orkristu nana time sha mi? (b) Aluer se time sha aeren a Aôndo yô, a wase se nena?
KA WEA hen sha mlu u Yehova nahan, ka aeren a na a nyi ka a va u ken ishima? Se kpishi ka se hen kwagh u dooshima na man mimi na kua kwaghfan na man tahav nav. Nahan kpa, se fa ser Yehova ngu a aeren agen kpa kpishi, a doon tsung. Jighilii yô, Yehova ngu a aeren kposo kposo je hemba 40, a i vande timen sha a ken ityakerada yase yô. Aluer se mba timen sha aeren ne ken kwaghhenen wase u sha tseeneke shin u hen tsombor wase yô, se seer fan mimi sha kwagh u Yehova sha gbenda u doon tsung! Imba kwaghhenen ne ia wase se sha nyi igbenda? Kwagh u Ter wase u sha una seer doon se ishima. Aluer kwagh u Yehova seer doon se ishima yô, a hemba saren se u kporom ikyua a na shi kaven aeren a na kpaa.—Yos. 23:8; Ps. 73:28.
2. (a) Tese ikyav er se seer lun a iwuese sha aeren a Yehova yô. (b) Ka nyi se lu timen sha mini?
2 Nahan kpa, ka nyi i lu “u lun a iwuese” sha kwagha? Inja i ishember ne ken ngeren ne yô, ka u tesen wer kwagh ngu a inja kpishi. Alaghga or a hii u lun a iwuese sha kwagh kure kure. U tesen ikyav yô, kwaghyan ka a hii doon se shighe u se ongo ihyuma na la, sea benden ken zwa, a̱ doon se yô, se ya kpishi, shighe a karen yô, se hingir u jiir ityô kwaghyan la iyol yase. Kape ka sea fa ma ieren i Aôndo, shi sea hen sha gbenda u a tesen i̱ la, maa sea dondo i̱ ken uma wase ve, se kav er ieren shon i̱ doo tsung je la. (Ef. 5:1) Ngeren ne, kua ngeren mba uhar mba ve dondo la cii, vea wase se se seer lun a iwuese sha aeren a Aôndo a dedoo agen, a se fe timen sha mi ga yô. Hanma ieren yô, se lu timen sha mbampin mban: Inja i eren shon ér nyi? Yehova tesen i nena? Se fatyô u tesen ieren ne er Yehova nahan nena?
YEHOVA LUMUN ÉR IOR VE VA IKYUA A NA
3, 4. (a) Or u lumun ér ior ve va ikyua a nan ka nan er nena? (b) Yehova tese ér un lumun ér ior ve va ikyua a na nena?
3 De se hii timen nen sha ieren i Yehova i lumun ér ior ve va ikyua a na la. Or u lumun ér ior ve va ikyua a nan ka nan er nena? Alaghga u kaa wer, ‘Ka nan eren a ior mbagenev kundu kundu, shi wea soo u lamen a nan kpa nan na u ishigh, shi ka taver nan u lun vea mbagenev ga.’ Ashighe kpishi u fatyô u kaven or u nan lumun ér ior ve va ikyua a nan la sha kwaghôron u nan man er nan ver ashe ken ikyôr la man mlu u ishigh ki nan jimin cii, kua sha akav akav agen kpaa.
4 Yehova tese ér un lumun ér ior ve va ikyua a na nena? Shin er Yehova a lu Orgban u hemban agee, u a gbe sha man tar wase u u kehe kpishi ne nahan kpa, a pase se wang ér un keghen a kegh iyol u veren ato a vese shi ungwan mbamsen asev. (Ôr Pasalmi 145:18; Yesaia 30:18, 19.) Se fatyô u lamen a na shighe gôgônan, sha hanma shighe man hanma ijiir kpaa. Se fatyô u van ikyua a Yehova a ishima i gbar gbar, sha ci u se fa ser mayange una kôhô se ashe ga. (Ps. 65:2; Yak. 1:5) Bibilo pase se kwagh u Yehova sha asember a uumace ve fe yô, sha u tesen ér a soo ér se va ikyua a na. U tesen ikyav yô, orpasalmi Davidi yange nger ér ‘ashe a Yehova nga sha’ a vese shi ‘uwegh nagh ku yanegh ku suen’ se. (Ps. 34:15; 63:8) Profeti Yesaia yange tôô Yehova kar sha orkuranilev, a kaa ér: “Una kohol ônovmbaiyôngov sha uwegh Nagh, Una tôô ve Una wa sha ikyum Na.” (Yes. 40:11) Nenge imba la sha wono! Yehova soo ér se lu kôôsôô a na, er waniyôngo u a lu shin ikyum i orkuranilev u lun a ikyo i wan nahan. Nenge Ter wase u sha la a lu a dooshima sha wono! Se dondo ieren i Yehova ne nena?
IEREN I DOON TSUNG I I GBE U MBATAMEN VEA LU MI YÔ
5. Gba hange hange u mbatamen vea lumun ér mbagenev ve va ikyua a ve sha ci u nyi?
5 I sember tôvon Mbashiada mbagenev ken ityar wue wue mba ve civir Yehova sha gbashima ica i gbe yô. Hanmô ve yô, i pine nan ér, “Ka hanma ieren u hembe soon wer ortamen nana lu a mi?” Mbakpishiv ken iyenge ne kaa ér “Ve hemba soon ortamen u nan lumun ér or a va ikyua a nan la.” Gba u hanma Orkristu nana ker u lun a ieren i lumun ér ior ve va ikyua a nan la, kpa hemban cii je yô mbatamen. (Yes. 32:1, 2) Anmgbian u kwase ugen pasen er i hii ve un nenge ér gba hange hange mbatamen vea lu a ieren ne yô, a kaa ér: “Saa ortamen nana lumun ér mbagenev ve va ikyua a nan ve, aeren a nan a dedoo agen kpa a a lu se a inja ye.” U nenge a mimi ken mkaanem mara kpa? Kpa ka nyi ia na ve or a lu a ieren i lumun ér mbagenev ve va ikyua a nan la?
6. Ka nyi ia wase or ve nana lu or u lumun ér mbagenev ve va ikyua a nana?
6 Kwagh u vesen u or a er ve a doo mbagenev u van ikyua a nan yô, ka u tesen ér kwagh ve gba nan ishima sha mimi. Aluer ortamen wa mbagenev ikyo shi nan kegh iyol u wasen ve yô, anmgbianev mba ken tiônnongo, kua mbayev mba kiriki je kpa, vea nenge a ieren ne. (Mar. 10:13-16) Wankwase ugen u lun anyom 12, mba yer un ér Carlos, a kaa ér: “Ka mea nenge a mbatamen hen Iyou i Tartor vea seen shi vea lamen a ior kundu kundu nahan, i doom a ve kpishi.” Ortamen nana̱ de kaan sha zwa tso ér nan lumun mbagenev u van ikyua a nan ga, nana̱ tese sha ieren kpaa. (1 Yoh. 3:18) Nana er kwagh ne nena?
7. Er nan ashighe kpishi ka sea wa baaji u mkohol ve i lu ior ican ga u hiin iliam a vese, man ka nyi se hen ken kwagh ne?
7 Nenge ase ikyav ne: Semberee ne, anmgbian ugen wa baaji u mkohol sha vanger, shighe u za mkohol u vesen ken tar u ken won, lu hiden sha igirgi yô. Tsô or u eren tom shin igirgi la nenge a itinekwagh i sha baaji ne, i nger ér “Tartor u Aôndo u̱ Va!” maa kende kaa a anmgbian la ér “Sha mimi yô, u̱ va di je. Se va lam sha kwagh ne.” Ka va kom yô, ve lam shi or u eren tom shin igirgi shon ngohol umagazin asev saan saan. Se kpishi imba kwagh ne vande eren se. Nahan er nan ve ka i lu ior zange u hiin iliam a vese shighe u se we baaji u mkoholo? Sha ci u kwagh ne ka a na i sar ior u fan pe se lu zan yô, shi a tese ér se kegh iyol u lamen sha kwagh u jighjigh wase u nan. Mbatamen kpa gba u vea tese akav a anmgbianev vea nenge a mi, vea fa je ér mbatamen kegh iyol ér ior ve va ikyua a ve yô. Akav ne agen ka nyi?
8. Mbatamen ka ve tese ér kwagh u mbagenev gba ve ishima sha mimi nena, man kwagh ne ngu a wase tiônnongo nena?
8 Gbenda u ior ve eren kwagh la kaha sha ajiir kposo kposo, nahan kpa, ashighe kpishi ka sea saan sha ishi a anmgbianev asev shin sea zua uwegh a ve shin sea sugh ve kundu kundu yô, se tese ser se soo kwagh ve. Ka an i gbe u nana hii eren kwagh ne? Nenge ikyav i Yesu yange ver ne. Takerada u Mateu kaa ér yange gba u Yesu una zua vea mbahenen nav yô, lu Yesu “va va ôr kwagh a ve” ye. (Mat. 28:18) Nyian kpa ka mbatamen ka ve za kohol anmgbianev, ve lam a ve ye. Kwagh ne ngu a wase tiônnongo nena? Anmgbian u kwase ugen u lun anyom 88, u a lu pania yô, kaa ér: “Ka mea za nyôr ken Iyou i Tartor ve mbatamen vea sughum saan saan, shi vea ôr kwagh u taver mo ishima nahan, i doom a ve kpen kpen.” Anmgbian u kwase ugen kaa ér: “Alaghga mbagen vea nenge ér ka kwagh u ikyoogh ga, kpa mo yô, ortamen ka nana sughum za van ken mkombo saan saan nahan, i doom kpen kpen.”
LUUN A SHIGHE SHA CI U MBAGENEV
9, 10. (a) Ka ikyav i dedoo i nyi Yehova a ver se? (b) Mbatamen vea na shighe ve u lun vea mbagenev nena?
9 Aluer se mba zuan a shighe u lun vea mbagenev ga yô, a taver ve u van ikyua a vese. Yehova ver se ikyav i dedoo sha gbaa ne. Ngu “ica a hanmô wase ga.” (Aer. 17:27) Gbenda môm u mbatamen vea lumun ér ior ve va ikyua a ve yô, ka u tôôn shighe lamen a anmgbianev mba nomso man mba kasev, mbayev man mbaganden cii, zum u i dugh mkombo shin i lu a nyôr mkombo ga la. Anmgbian ugen u a lu pania yô, kaa ér: “Ortamen ka nana pinem ér mo m ngu nena, maa nana tile a kegh ato a mo nahan, i doom a nan kpishi.” Anmgbian u kwase ugen u a civir Yehova i zurum anyom 50 yô, kaa ér: “Mbatamen ka vea na shighe ve u lamen a mo zum u i dugh mkombo yô, m fa je mer m gba kwagh.”
10 Shin er ka i gba u mbakuran mba ken Kristu mban vea er ityom igen nahan kpa, shighe u i ve mkombo yô, ve̱ hii veren ishima sha iyôngo i i we ve sha ikyev la.
YEHOVA SANGEN A SANGE GA
11, 12. (a) Ka nyi i lu ieren i sangen a sange ga laa? (b) Bibilo tese ér Yehova sangen a sange ior ga nena?
11 Ieren i sangen a sange ga la kpa ka môm ken aeren a Yehova a doon tsung. Ka nyi i lu ieren i sangen a sange ga laa? Ka u eren kwagh u vough, tan ikyaa ken ma or sha anyighe ga. Ieren ne ngi ker avegher ahar: ka mhen wase man aeren a ase. Cii man se̱ er kwagh a mbagenev sha msange ga yô, saa se vande lun a mhen u sangen a sange ga la ken a vese. Ken Ruamabera u Mbakristu u ken Zwa Grika la, i pase inja i u “sangen a sange ior ga” la ér ka “u tsuan ishiv mbi iorov” ga, inja na yô, ka u hemban soon ishigh ki or môm a ki orgen ga. (Aer. 10:34) Nahan mba ve sangen a sange ior ga yô, kwagh gbe ve sha mluashe u or ga, kpa ka inja i nan kwagh a gbe ve a mi ye.
12 Yehova ver se ikyav i hemban cii sha kwagh u sangen a sange ior ga la. Mkaanem nam kaa ér un “sangen a sange ior ga.” (Ôr Aerenakaa 10:34, 35; Duteronomi 10:17.) Kwagh ugen yange er sha ayange a Mose la, u a tese mimi u kwagh ne yô.
Ônov mba Selofehadi yange ve nenge er Aôndo a sangen a sange ga yô (Nenge ikyumhiange i sha 13, 14 la)
13, 14. (a) Ônov mba Selofehadi mba kasev mba utaan mbara yange ve tagher a nyi zayolo? (b) Yehova yange tese ér un sangen a sange ga nena?
13 Er va shi zolough zolough u Mbaiserael vea nyôr ken Tar u Ityendezwa la, ônov mba Selofehadi mba kasev utaan mba ve lu a er noov ga yô, tagher a zayol ugen. Lu nyi zayolo? Yange ve lu veren ishima ér, a na tsombor ve kwar u dyako u inyaagh, u̱ yange i na ter ve la, er icombor igen ken Iserael kpa i na i nahan. (Num. 26:52-55) Nahan kpa, ter ve Selofehadi, or u ken kwe u Manase la va saa ku, a wan u nomso shio. Man tindi gema kaa ér saa wan u nomso tseegh nana ya dyako u inyaagh u ter u nan ye. (Num. 26:33) Er wan u nomso lu hen tsombor la u nana ngohol dyako u inyaagh la ga yô, tese ér dyako la una kar a yem hen anterev vev, mbayevkasev mbara vea kera lu a dyako hen tsombor ve ga shinii?
14 Mbayevkasev mba utaan mban za kohol Mose, pine un ér: “Inja na nan iti i ter wase i̱ gba saan ken nongo na kera, sha ci u a lu a wannomso ga nahana?” Shi ve zamber a na ér: “Yô, na se dyako a anngôôv mba ter wase mba nomso imôngo.” Mose yange kaa ér ‘Kape tindi a kaa je la, kwagh ngu u me er sha mi ga’ shinii? Ei, kpa a gema a ‘va a kwagh ve la hen Yehova.’ (Num. 27:2-5) Nahan Yehova kaa a Mose ér nyi? A kaa a na ér: “Ônov mba kasev mba Selofehadi kaa sha mi, na ve kwar a anngôôv mba ter ve imôngo kpee; gema dyako u ter ve la na ve.” Heela tseegh ga, Yehova gema kwagh la hingir tindi. A kaa a Mose ér: “Aluer or á kpe man nana lu a wannomso ga yô, i̱ gema dyako u nan i̱ na wan u nan u kwase.” (Num. 27:6-8; Yos. 17:1-6) Hii shighe la je, hanma kwase u ken Iserael u yange nana nyôr ken mlu la yô, i na nan dyako la.
15. (a) Yehova eren kwagh a ior nav, kua mba ve lu a orwasen ve ga la nena? (b) Ka akaa agen a i nger ken Bibilo a nyi a tese ér Yehova ka Aôndo u sangen a sange ior ga?
15 Sha mimi yô, kwagh u Yehova na zwa ér i er ne tese ér sangen a sange ior ga! Yange er kwagh a ônkasev mba ve lu a orwasen ve ga mban sha icivir, vough er Mbaiserael mbagenev nahan. (Ps. 68:5) Kwagh ne ka môm ken akaa kpishi a i nger ken Bibilo, a a tese ér Yehova eren kwagh a ior nav sha msange u sha dooshima ga yô.—1 Sam. 16:1-13; Aer. 10:30-35, 44-48.
SE FATYÔ U KAVEN YEHOVA
16. Se er nan ve se gema eren kwagh a ior cii sha msange u sha dooshima ga er Yehova nahana?
16 Se kav ieren i Yehova i sange a sange ga la nena? Umbur wer ieren ne ngi ker avegher ahar. Saa se vande lun a mhen u sangen a sange ior ga la keng ve, se er kwagh a mbagenev sha msange ga ye. Alaghga se cii se lu henen ser se mba eren kwagh sha mimi shi se mba sangen a sange ga. Nahan kpa, ashighe agen ka se fatyô u fan er se henen kwagh u mbagenev la jighilii ga. Nahan aluer mbagenev mba nengen se ér se mba sangen a sange ior ga yô, se fa sha nyi? Yange sar Yesu u fan kwagh u ior ve kaan ér un ngu la, nahan a pine mba ve lu azende na a mimi la ér: “Ior mba kaan er, Wan u or, ka ana?” (Mat. 16:13, 14) Er nan u er kwagh er Yesu nahan ga? U fatyô u pinen ijende you i̱ i̱ ôron we kwagh u mimi yô, wer nana̱ pase u aluer u ngu a ieren i sangen sange ga yô. Aluer nan pase u ér ashighe agen ka u pande u nyagh mbagenev sha ci u zwa ve shin ityô i ve dugh her la, shin u hemba varen a mbagenev sha ci u ve hen makeranta shi mba a inyaregh nahan, u er nena? Sôn Yehova sha mimi, zamber un a wase u u̱ kôôm mbamnenge ou mbara, sha er u gema eren kwagh a ior cii sha msange u sha dooshima ga, er un nahan yô.—Mat. 7:7; Kol. 3:10, 11.
17. Ka sha igbenda i nyi nahan se fatyô u eren kwagh a ior a msange u sha dooshima shio?
17 Ken tiônnongo u Kristu kpa, se tese ser sar se u dondon ieren i Yehova i eren kwagh a ior sha msange u sha dooshima ga la, sha u eren kwagh a anmgbianev asev cica cii sha icivir man sar sar kpaa. U tesen ikyav yô, shighe u se lu lôhôn anmgbianev iwer yô, se fatyô u lôhôn ior wue wue mba ve civir Yehova a vese imôngo la, kua mbagen ken ve, mba aeren a ve a ityôô a kaha a a ase la kpaa, man mbaibanave man anicôgholov kua kasev mba icôgholov cii. (Ôr Mbagalatia 2:10; Yakobu 1:27.) Shi zum u se lu pasen kwagh u Tartor yô, se sangen a sange ior mba pasen ve loho u dedoo ga, se pase atôatyev cii kwagh, kua mba ve dugh ken ityar i ken won la kpaa. Doo se kpishi er se lu a ityakerada i pasen ior Bibilo a mi ken ijô i kuman er 600 nahan yô. Ngun kpa ka tamenkwagh u a tese ér se mba a msange u sha dooshima ga yô!
18. U tese wer ieren i Yehova i lumun ér ior ve va ikyua a na shi sangen a sange ga la doo u tsung nena?
18 Sha kpôô yô, aluer se mba tôôn shighe timen sha ieren i Yehova i lumun ér ior ve va ikyua a na la, kua ieren na i sangen a sange ga la yô, una seer doon se ishima. Man aluer Yehova doo se ishima yô, kwagh ne una mgbegha se u dondon aeren a na ne, eren kwagh a anmgbianev asev kua mba se pasen ve kwagh la sha inja.
‘Yehova ngu ikyua a mba ve yer Un cii.’—Ps. 145:18 (Nenge ikyumhiange i sha 9 la)
‘Yehova Aôndo sangen a sange ga.’—Dut. 10:17 (Nenge ikyumhiange i sha 17 la)
