Ityôkyaa ngi i lun a ishimanyian sha kwagh u ijiir i or u i dugh nan kera la nan tem ken Iyou i Tartor ga. Magazin ne nôngo sha hanma gbenda cii u taver mbamaren mba ve lu Mbakristu la ishima ér ve wasen wan ve u i dugh nan kera, u nan lu tsan hen ya ve la ken jijingi, aluer doo u vea er nahan yô. Er i pase ken Iyoukura i ken zwa Buter, i Novemba 15, 1988, peeji 19 man 20 la nahan, mbamaren vea fatyô u henen Bibilo a wanye u i dugh nan kera, u nan lu tsan hen ya ve her la je kpaa. Se mba a ishimaveren ser vea er nahan yô, vea fatyô u wasen wan ve la u kôôm gbenda na.

Ka a va sha kwagh u teman ken Iyou i Tartor la yô, doo u se kaa ser wanye u i dugh nan kera la nana fatyô u teman vea mbamaren mba nan ving ken Iyou i Tartor. I yange wanye u i dugh nan kera la u teman vea mbamaren mba nan ape ve tem cii la ga sha ci u i ver ikyagh ki teman shin ijime i Iyou i Tartor ér or u i dugh nan kera la nana tema sha mi ga. Er mbamaren ve nengen sha mlu u ken jijingi u wan ve yô, ve soo u fan ér ngu veren ishima zulee sha kwagh u i lu tesen ken mbamkombo la. Aluer mbamaren de wan ve u kiriki ne yem za tema kwagh na ikyanger ga yô, kwagh ne una wase kpen kpen.

Nahan kpa, aluer wanye u i dugh nan kera la kera ngu hen ya vea mbamaren mba nan ga di ye? Nana kera tema vea mbamaren mba nan gaa? Ngise la magazin ne pase gbenda u i doo u Orkristu nana eren kwagh a anngô u nan u i dugh nan kera, u nan lu hen ya u nan kposo la wang. * Nahan cii kpa, u lumun ér wanye u i dugh nan kera la nana tema ving sha igbur ikyua a mba hen tsombor u nan shighe u i lu eren ma mkombo la, ngu kposo a u ve keren u lun imôngo a nan a ityôkyaa i injaa shio la. Aluer mba hen tsombor, mba ve lu civir Yehova sha mimi la, mba a mnenge u vough sha kwagh u or ve u i dugh nan kera la, shi mba dondon kwagh u Ruamabera a we sha kwagh u lun imôngo a nan la yô, ityôkyaa ia kera i lun a ishimanyian sha kwagh ne keng ga. —1 Kor. 5:11, 13; 2 Yoh. 11.

Nahan or u i dugh nan kera la nana tema ikyua a anngô u nan shin ma anmgbian ugen ken tiônnongo kpa, ishima i de ze or iyol sha kwagh ne ga, aluer nan tema ving yô. Aluer i ver a ver ijiir i or a tema yô, kwagh ne una fatyô u van a mbamzeyol sha igbenda kposo kposo. Aluer mbazan mkombo man anngôôv mba or u i dugh nan kera, mba ve lu civir Yehova sha mimi la cii mba dondon akaa a Bibilo i we sha kwagh u or u i dugh nan kera la, shi mba eren kwagh u nan mbagenev gbev mbu nôngon ga yô, ityôkyaa ngi i ishima ia nyian se sha kwagh u ijiir i or u i dugh nan kera la nan tem shighe u i ze mbamkombo mba Mbakristu la ga. *