BIBILO kaa ér: “Ônov mba nomso ka dyako u TER A ne yô, man kwagh u a dugh ken sagh kpaa ka injar i A ne yô.” (Ps. 127:3) Ka nahan ve mbamaren mba ken Kristu ka vea mar wanikyundan ve i doo ve yum ye.

Shin er ka sea mar wan i doo se nahan kpa, kwagh ne ngu a gema a na se tom u vesen. Cii man wanye a gande kera, shi a lu gbong gbong yô, ka i gba u a koson nan sha kwaghyan u injaa. Nahan mbamaren mba ve soo u wasen wan ve ér a taver ken mimi la kpa, gba u vea naan nan kwaghyan u ken jijingi u injaa, shi vea tesen nan atindi a Aôndo. (Anz. 1:8) Ka hanma shighe i doo u a hii u tesen wanye akaa a Aôndo, man doo u ityesen ne ia wa nyi man nyi kere?

Nenge ase kwagh u orgen ken kwe u Dan, u i yilan iti na ér Manoa la. Yange lu hen angar u Sora ken Iserael u tsuaa la. Ortyom u Yehova yange kaa a kwase u Manoa u lu ikyômkwase la ér una mar wannomso. (Mbaj. 13:2, 3) Kwagh ne yange doo Manoa man kwase na kpen kpen je. Nahan cii kpa, ishima gema nyian ve sha akaa agen. Nahan Manoa sôn Yehova kaa ér: “Tere, shi na or u Aôndo u U tindi un la, a̱ shi a̱ va her a vese, a̱ va ôr se kwagh u sé er a wanakiriki u á mar la.” (Mbaj. 13:8) Yange gba Manoa man kwase na u fan er vea er ve vea yese wan ve la yô. Yange ve tese wan ve Semson atindi a Aôndo je ka u henen a hen ga, shi ikyav tese ér iniôngon ve la saa gbirin ga. Bibilo kaa ér, shighe kar yô, “jijingi u TER hii u toron [Semson] ityô.” Nahan Semson va hingir orjir ken Iserael, u yange er ityom i agee kpishi yô.—Mbaj. 13:25; 14:5, 6; 15:14, 15.

Doo u a hii u tesen wanye hanma shighe? Ngô u Timoteu, Unise, man ngô na u tamen Loisi yange ve tese un “icighanruamabera” “hii iyev je.” (2 Tim. 1:5; 3:15) Nahan lu shighe u Timoteu lu yev la je i hii u tesen un Ruamabera ye.

Doo u mbamaren mba ve lu Mbakristu la vea sôn Yehova ér a wase ve shi vea wa ago iyol tsuaa sha er vea hii u tesen wan ve “hii yev je” yô. Anzaakaa 21:5 kaa ér: “Mbamhen mba ortseenshima, ka sha u kwagh ma a ngee yô.” Cii man mbamaren ve mar wan yô, ka ve vande wan iyol tsembelee je ka u henen a hen ga. Alaghga vea fa akaa a vea yam sha ci u wanikyundan ve la je kpaa. Shi ka hange hange u vea wa ago iyol u va nengen sha mbamgbe mba ken jijingi mba wan ve la kpaa. Awashima ve a̱ lu u hiin u tsaase wan ve ken jijingi shighe u nan lu iyev la je.

Takerada ugen u i nger sha kwagh u tsaase mbayev shighe u ve lu iyev la kaa ér: “Shighe u i mar wan ica i lu a gba ga la, ka lu nan ican u kôron kwagh ken ityou ga. Hen shighe la, ityough ki nan ka ki bugh ker, nahan i lu nan ican ga u fan akaa kpishi hen shighe môm.” Aluer mbamaren hii u tesen wan ve kwagh u Yehova man atindi a na hen shighe ne yô, a doo kpishi.

Ngô ugen u a eren tom u pania u keke yô ôr kwagh u wan na u kwase u kiriki nahan ér: “Er lu uwer môm la je tsô m hii u duen kwaghpasen a na. Shin er yange a kav kwagh u lu zan hemen la ga nahan kpa, m na jighjigh mer mdugh u m hii u duen kwaghpasen a na tsuaa ne wase un kpen kpen. Va kom anyom ahar yô, hii u nan ior utrak ken kwaghpasen a mciem shio.”

Kwagh u dedoo ka a due ken tom u tsaase wanye shighe u nan lu iyev la. Nahan cii kpa, mbamaren kav er tom u tesen ônov vev ken jijingi la u lu a mbamtaver ker yô.

Mtem u mbayev ve fetyô u teman gir gir ga shin ve fetyô u veren ishima sha kwagh môm shighe gôgônan ga la ka mtaver u vesen u mbamaren ka ve tagher a mi yô. Ishima ngôôr yemen wanye sha kwagh ugen ga. Kera kpa, ka i sase ve iyol u fan akaa a a lu zan hemen ape ve lu la. Ka nyi mbamaren vea er ve vea fatyô u wasen wan ve u veren ishima sha kwagh u ve lu nôngon ér vea tese nan laa?

Nenge ase kwagh u yange Mose ôr yô. Duteronomi 6:6, 7 kaa ér: “Akaaôron a m kaan we nyian ne, a̱ lu u ken ishima, tesen ônov ou a sha gbashima je, ôron kwagh u a, zum u wea tema hen ya wou man zum u wea zenden sha gbenda man zum u wea yav inya man zum u wea moughon sha.” Ivur ne tese ér doo u mbamaren vea tesen ônov vev kwa kimbir kimbir. Wanye u kiriki ngu er kon u kiriki u i môôr ve i gbe u a urun u fele fele nahan. Er kwagh-kimbir a wasen mbaganden u umbur akaa a hange hange nahan, mbayev kpa kape i lu je la.

Aluer mbamaren soo u tesen mbayev vev mimi u Aôndo yô, gba u vea vihin shighe a ve. Ka i taver u zuan a imba shighe ne ken tar u ior ve ngee a akaa a eren ave yum ne. Nahan kpa, apostoli Paulu wa se kwagh ér se ‘waan ian yase ikyo’ sha er se zua a shighe u eren akaa a hange hange yô. (Ef. 5:15, 16) Se er kwagh ne nena? Tom u tsaase mbayev shi nengen sha akaa a ken jijingi la yange lu Orkristu ugen vea kwase na zange ga. Or ne ngu ortamen shi eren tom u uke, kwase na di eren tom u pania u keke. Nahan ve er nan ve ve zough a shighe u tesen wan ve u kwase u ve mar laa? Ter la kaa ér: “Cii man m̱  yar tom pepe yô, mo vea kwase wam ka se ôr un Takerada Wam ú Akaaôron a Bibilo la shin antakerada u U Timen ken Ruamabera Ayange Ayange la. A̱ luun aikighe yô, se nenge ser se ôr un takerada a ungwa cii a mase yaven ye, shi zum u se lu duen kwaghpasen yô, se due a na. Se soo ser ian i se zough a mi u tesen un ken inyom na i hiihii ne la i kar se ga.”

Se soo ser ônov asev ve vese ve hingir ior mbalun a inja i dedoo. Nahan cii kpa, ityôkyaa i vesen i i ne ve se tsaase ve yô, ka u Yehova a doo ve ishima a ishima ve cii.—Mar. 12:28-30.

Pasalmi 127:4 kaa ér: “Er avaan ka a lu sha uwegh ku orageegh nahan, kape ônov mba nomso mba i mar ve, mbamaren vev ve lu iyev her, ve lu la.” Sha nahan yô, i kar ônov sha avaan a ka i gba u a una tsembelee a ta kwagh yô. Or ka nana wa ivaan sha ada yô nan ngôôr a mi ga, shi ka nana ker yô, ngi yemen ngi hide ga. Nahan kape shighe u mbamaren ve lu a mi u tesen ônov vev la kpa a vese ga je la. Doo u vea er tom a shighe la sha u tesen mbayev vev atindi a Aôndo sha gbenda u aa kôr ve ken ishima yô.

Shighe u apostoli Yohane lu ôron kwagh u ônov nav mba ken jijingi la, a nger ér: “Aluer m ungwa mer, mbayev av mba zenden sha mimi yô, kam iember je hemba akaa agen cii.” (3 Yoh. 4) Shighe u mbamaren mba ve lu Mbakristu la ve nenge mbayev vev ve lu “zenden sha mimi” yô, ve kpa vea lu a imba iwuese la.