Tor u Shiria yange lu keren Elisha, profeti u Aôndo, er una kôr. A ungwa ér ngu ken Dotan, gar ugen sha igyungu u i wa un gir yô. Nahan tugh mbu il yô, tor u Shiria tindi anyinya kua akeke man ikyumutya i vesen ken Dotan. Sev mbu aven yô, akumautya na kase gar la wa atô.—2 Utor 6:13, 14.

Zum u wanakiriki u Elisha mough due ken won yô, a nenge a akumautya a a va u kôron profeti ne la. Nahan cier un iyol, a kaa ér: “Kpei, terem! Sé er nena?” Elisha kaa a na ér: “De cie ga; gadia mba ve lu a vese, hemba mba ve lu a ve la iyenge.” Tsô profeti ne sôn Yehova kaa ér: “TERE, shi bugh un ashe, a̱ nenge.” Bibilo kaa ér: “Tsô TER bugh wanye la ashe; yô, nenge, anyinya kua akeke a usu mgbough sha uwo la, kase Elisha.” (2 Utor 6:15-17) Ka nyi se fatyô u henen ken kwagh ne, kua akaa agen a yange er Elisha laa?

Elisha yange kundu ishima shighe u akumautya a Mbashiria kase un la sha ci u yange suur sha Yehova shi nenge er Yehova lu kuran un yô. Se ver ishima ser Yehova a er uivande sha ci wase nyian ga, kpa se kav er a lu kuran ior nav yô. Ka inja er anyinya kua akeke a usu kase se nahan. Aluer se na jighjigh ser Yehova ngu kuran ior nav shi se mba suur sha a na hanma shighe yô, se lu ken mkpeyol, shi se zua a averen a Yehova. (Ps. 4:8) De se time nen sha akaa agen a yange er Elisha, a aa fatyô u wasen se yô.

Iyange igen la Elisha lu kahan sule, nahan profeti Eliya va kohol un her, gema ikyondo na i profeti la haa un iyol. Elisha kav inja i kwagh ne. Nahan a er iniongo, a lôhô ter na man ngô na ayem, maa a mough a yem, a za hingir wanakiriki u Eliya. (1 Utor 19:16, 19-21) Er Elisha vande wan iyol u eren Aôndo tom sha afatyô na cii yô, a hingir Yehova ikyagh ki tomough ki dedoo, shi ken masejime va hingir profeti sha ityough ki Eliya.

Elisha er Eliya tom nôngo u kuman anyom ataratar. Sha shighe la cii lu Elisha “haan Eliya mngerem  sha ave” ye. (2 Utor 3:11) Sha ayange la ior yaan kwagh sha ave. Yange or a ya kwaghyan nana bee yô, wanakiriki u nan a ker nan mngerem nan ôô ave. Nahan ityom igen i Elisha eren la nôngo u lun i ikyoogh keng ga. Nahan cii kpa, ian i eren Eliya tom ne lu un kwagh u civirigh kpishi.

Nyian kpa, Mbakristu kpishi tsua u eren tom u pasen kwagh hanma shighe ne sha igbenda wue wue. Sha ci u nyi? Sha ci u ve na Yehova jighjigh shi sar ve u eren un tom sha afatyô ve cii. Mbagenev undu uya vev mba za eren tom shin Betel shin mba maan ayou a nongo u Yehova, gayô mba eren ityom igen, man alaghga ior kpishi vea nenge ityom ne ér ka i ikyoogh ga. Orkristu môm nana de nengen ityom ne ér ka i ikyoogh ga ze, gadia i gba Yehova kwagh kpishi je.—Heb. 6:10.

Cii man Aôndo ‘tôô Eliya sha hiar, yem a na sha’ la, a kaa a profeti ne ér a mough ken Gilgal a yem hen Betel. Eliya kaa ér wanakiriki na ne ér a de ve a na ityô ga, kpa Elisha kaa a na ér: “Me undu u ga.” Er ve mough u yemen sha gbenda la, Eliya kaa a Elisha acin ahar ér a hide kpa a venda u hiden. (2 Utor 2:1-6) Elisha yange var a Eliya vough er Rutu yange var a Naomi nahan. (Rutu 1:8, 16, 17) Sha ci u nyi? Ikyav tese ér lu sha ci u tom u Aôndo na un u wasen Eliya la gba un kwagh.

Elisha ver se ikyav i dedoo kpen kpen. Aluer i na se tom ken nongo u Yehova man se tôô ken ishima ser ka Yehova se lu civir yô, ua gba se kwagh tsung. Ma ian i civirigh igen kuma sha ingin ga.—Ps. 65:4; 84:10.

Mba ngur yemen sha gbenda yô, Eliya kaa a Elisha ér: “Kaam kwagh u m̱ er u yô, er m lu a pav a we ga ne.” Elisha sôn kwagh u una wase un una hemba civir Yehova tsembelee yô, vough er Solomon yange vande sônon ayom imôngo ken ijime nahan. A kaa ér: “Shi lumun ikwar ihiar i jijingi wou i̱ gba sha a mo.” (1 Utor 3:5, 9; 2 Utor 2:9) Ken Iserael yô, yange or a karen ônov mba nan kwar u dyako yô, nan na waniunda u nan u nomso kwar kwa har. (Dut. 21:15-17) Nahan Elisha lu sônon ér ma un lu or u yan dyako u Eliya u ken jijingi. Heela tseegh ga, Eliya yange lu a ‘ishimatseen tsung sha kwagh u Yehova,’ nahan ikyav tese ér Elisha kpa soo u lun a imba ishimatseen la.—1 Utor 19:13, 14.

Eliya gema kaa ér nyi sha kwagh u wanakiriki na sôn un ne? Profeti la kaa ér: “U sôn kwagh u ican tsô; nahan kpaa, aluer wea nengen a mo zum u á tsuwem her a we kera la yô, á lu nahan; kpa aluer ka nahan ga yô, á lu nahan je ga.” (2 Utor 2:10) Mlumun u Eliya ne lu a akaa ker ahar. Hiihii yô, yange lu u ka Aôndo tseegh una tsua u nan Elisha kwagh u sôn la shin nan un ga ye. Kwagh u sha uhar yô, lu u Elisha una kange ishima una lu a Eliya biishii ve, una zua a kwagh u lu sônon la ye.

Aôndo yange nenge kwagh u Elisha pine ér ikwar ihiar i jijingi u Eliya i gba sha a na la nena? Bibilo ôr hen ijiir la ér: “Tsô er ve lu ôron kwagh yemen la, nenge, ikyekye i usu kua anyinya a usu va ande, pav ve; tsô Eliya kôndo sha hiar yem Sha. Elisha nenge.” * Lu msen u Elisha la Yehova ungwa ye. Elisha nenge i tôô Eliya her a na kera, shi a ngohol kwar u jijingi u Eliya la kwa har, a hingir profeti sha ityough nagh.—2 Utor 2:11-14.

Elisha tôô riga u tom u Eliya u osough un gba la huwa. Ikyondo la tese ér Elisha hingir profeti u Aôndo. Ikyav igen i i seer tesen ér i na un tom u profeti yô, lu shighe u va er ivande tôndo mngerem ma shin Ifi u Yordan la.

Akperan nga ga, kwagh u Elisha nenge a mi shighe u Eliya kôndo sha hiar yem sha la yange una hungur un mayange ga. Or u nana nenge a ikyekye i usu man anyinya a usu ve a kpiligh nan iyol ga je kpa nan ngu ga! Kwagh ne tese wang ér Yehova yange ungwa msen u Elisha la. Nyian ne, se mba nengen a ikyekye utya i usu shin anyinya a usu ken mpase u sha mnenge sha u tesen ér Aôndo ungwa mbamsen asev ga. Kpa se fatyô u kaven er Aôndo ngu a er tom a tahav mbu vesen sha u kuren ishima na yô. Shi ka sea nenge er Yehova a lu veren vegher u nongo na u̱ shin tar ne doo doo yô, i lu inja  er se mba nengen a ikyekyeutya na, er i lu yemen hemen hemen la nahan.—Esek. 10:9-13.

Elisha yange nenge a akaa kpishi a a wase un u nan jighjigh ér Yehova ngu a tahav kpishi yô. Sha kpôô yô, jijingi u Aôndo yange wase profeti ne er uivande kuma 16, hemba mba Eliya er la kuma kwa har. * Kwa u sha uhar u Elisha shi nenge a anyinya man akekeautya a usu yô, lu shighe u i kase ve sha utya ken Dotan, pe se ter sha mhii u ngeren ne la.

Shin er mbaihyomov kase Elisha ken Dotan nahan kpa, mciem gba un iyol ga. Sha ci u nyi? Sha ci u a na Yehova jighjigh taveraa. Se kpa gba u se lu a imba jighjigh u nan la. Yô, se sôn nen Aôndo a na se icighan jijingi na sha er se lu a jighjigh kua avegher a ityamegh ki jijingi agen kpaa yô.—Luka 11:13; Gal. 5:22, 23.

Kwagh u yange er ken Dotan la kpa na Elisha ityôkyaa i vesen i suur sha Yehova kua akum a mbatyomov nav a a kuran mbacivir un la. Profeti ne yange kav er Aôndo tindi akum a mbatyomov nav ve va kase gar la kua mba ve himbir un sha utya la kpaa yô. Aôndo yange pir mbaihyomov mbara ashe sha ivande, nahan yima Elisha kua wanakiriki na cii. (2 Utor 6:17-23) Er lu shighe u taver nahan kpa, Elisha na Yehova jighjigh shi suur sha a na kpaa, vough er ashighe agen nahan.

Yô, se suur nen sha Yehova Aôndo er Elisha nahan. (Anz. 3:5, 6) Aluer se er nahan yô, “Aôndo [una] zungwe se mhôônom, [una] ver se doo doo.” (Ps. 67:1) Ka mimi, i kase se aa akekeautya man anyinya a usu sha u kuran se ga. Nahan kpa, shighe u “zegecan” una va la, Yehova una kura se kua anmgbianev asev tar sha won cii. (Mat. 24:21; Mpa. 7:9, 14) Kpa cii man shighe la yô, doo u se umbur nen hanma shighe ser “Aôndo ka ijiir yase i yeren je.”—Ps. 62:8.