1, 2. (a) Aluer se mba henen sha kwagh u or wase shi lamen a mbagenev sha kwagh u nan yô, ka nyi ia due kere? (Nenge foto u a lu sha mhii u ngeren ne la.) (b) Ka mbampin mba nyi se lu timen sha mini?

KA SEA henen sha kwagh u or wase shi sea ôron kwagh u nan yô, ikyar i se ye a nan la i seer taver. Kape ikyar i se ye a Yehova Aôndo la kpa i lu je la. Shighe u Davidi kuran ilev la, a shi kenger asan a sha kwavaôndo tugh, gbidyen kwar sha kwagh u Orgban na u a hembe cii la. A nger wener: “Er m veren ishima sha akaa a sha aôndo a a lu tom u u ahôaveegh Ou, ka uwer man asan a U ver a yô, or ngu nyi ve U umbur nana? man wan u or kpaa er U we nan ikyo yô?” (Ps. 8:3, 4) Apostoli Paulu yange gbidi kwar sha gbenda u kpilighyol u Yehova lu kuren awashima na u lu a mi sha kwagh u Iserael u ken jijingi la been yô, a ôr sha iyol kpiligh ér: “Kpash! Mze u ikpelaakaa man mfe man kwaghfan u Aôndo ve za kweng ne!”—Rom. 11:17-26, 33.

² Shighe u se lu pasen kwagh yô, ka se lamen a mbagenev sha kwagh u Yehova shi se henen sha kwagh na kpaa. Kwagh ne ka a wase se kpishi. Ior kpishi mba ve seer eren tom u pasen kwagh u Tartor hanma shighe la kav ér tom ne na Aôndo seer doon ve ishima. Aluer wea lu eren tom u pasen kwagh hanma shighe la zan a mi ave shin wea wa ishima u va eren u ken hemen kpa, time sha mpin ne: Tom u pasen kwagh hanma shighe la ua taver ikyar i u ye vea Yehova la nena? Aluer u ngu pania yô, pine iyol you wer, ‘Ka nyi ia wasem ve me za hemen u eren tom u injaa nee?’ Aluer u ngu a hii pania u eren ga yô, pine iyol you wer, ‘Me er nan ve me hii pania u erene?’ De se time sha igbenda i tom u pasen kwagh hanma shighe la ua wase se se taver ikyar i se ye a Aôndo la yô.

3. Ka sea due kwaghpasen man sea ôron kwagh u averen a Tartor ua va a mi la yô, kwagh ne a wase se nena?

³ Ka sea pasen mbagenev averen a Tartor ua va a mi la yô, kwagh ne a na se kporom ikyua a Yehova. Ka wea pasen kwagh sha uya uya nahan, ka ivur i han ka i hemba doon we u ôron ioro? Ka Pasalmi 37:10, 11; shin ka Daniel 2:44; shin ka Yohane 5:28, 29; shin ka Mpase 21:3, 4? Hanma shighe u ka sea lam a mbagenev sha kwagh u uityendezwa mban yô, kwagh ne a umbur se er “hanma nagh ku dedoo man hanma iyua i vough” cii i dugh hen Aôndo wase u a ne kwagh wuee la yô. Kwagh ne ka a na se kporom ikyua a na.—Yak. 1:17.

4. Ka sea pase mbagenev kwagh yô, se seer lun a iwuese sha erdoo u Yehova a tese se la sha ci u nyi?

⁴ Ka sea nenge er ior mba se pasen ve kwagh la ve lu ken ibanave ken jijingi nahan, i doo se kpishi er se fe mimi yô. Ior mba ken tar fa kwagh u una wase ve ve vea za ikyura shi a saan ve iyol ga. Ve kpishi ishima ka i nyian ve sha kwagh u ken hemen, shi mba a ishimaverenkeghen kpaa ga. Ve fa kwagh u vea er jighilii ve uma ve una doo ga. Ior kpishi mba ve civir Aôndo la je kpa, mba a mfe u Ruamabera cuku tsô. Kwagh ve ngu er ior i Ninive nahan. (Ôr Yona 4:11.) Ka sea seer eren tom u pasen kwagh yô, se nenge a mkposo u a lu hen atô u mbacivir Yehova man mba se pasen ve kwagh la wang. (Yes. 65:13) Kwagh ne ka a umbur se kwagh u erdoo u Yehova, er a kur ugbayol asev mba ken jijingi tseegh tsô ga, kpa a ne hanma or cii ian i zuan a ishimasurun shi lun a ishimaverenkeghen i mimi yô.—Mpa. 22:17.

5. Ka sea wasen mbagenev ken jijingi yô, kwagh ne a na se nenge mbamzeyol asev nena?

⁵ Ka sea wasen mbagenev ken jijingi yô, kwagh ne a na se kera zer henen sha mbamzeyol asev ga. Pania u keke ugen u i yer un ér Trisha la, lumun a kwagh ne. Shighe u mbamaren nav pav ivaa la doo un ga. A kaa ér: “Kwagh ne yange lu kwagh u hemban vihin mo ken uma wam cii.” Iyange igen la ure kpishi shi soo u duen ken won ga, nahan kpa a kighir a mough a za hen Bibilo a mbayev mbagenev utar, mba ve lu ken mlu u vihin tsung hen ya ve yô. Ter u mbayev mban yange undu ve, nahan anmgbian ve u vesen lu eren ve ican kpoghuloo. Trisha kaa ér: “Zayol wam môm kpa yange vihi kuma sha u mbayev mban ga. Nahan kpa, sea nguren henen kwagh yô, i saan ve iyol kpishi shi ve seen kpaa. Mbayev mban lu iyua i Yehova, hemban je yô, sha iyange la.”

6, 7. (a) Ka sea tese ior akaa a mimi a ken Bibilo la yô, jighjigh u nan wase a taver nena? (b) Ka sea nenge er atindi a Bibilo a wase mba se lu henen kwagh a ve la u sôron uuma vev nahan, se nenge kwaghfan u Aôndo la nena?

⁶ Ka sea tesen mbagenev akaa a mimi a ken Bibilo la yô, kwagh ne a taver jighjigh wase u nan. Apostoli Paulu yange nger kwagh sha kwagh u Mbayuda mbagenev mba ve venda u eren kwagh u ve lu pasen ior la, ér: “We u u tesen mbagenev ne u kera tese iyol you gaa?” (Rom. 2:21) Upania mba sha ayange a ase ne mba eren nahan ga cii! Upania kpishi ka ve zua a aan imôngo a tesen mbagenev mimi shi henen Bibilo a ve. Kpa cii man ve er nahan tsembelee yô, gba u vea waan ago iyol sha hanma kwaghhenen, shi alaghga je yô, vea tôvon sha mbampin zulee cii ve vea naan ior mbamlumun sha mi ye. Pania ugen u i yer un ér Janeen yô, pase ér: “Hanma shighe u m zough a ian i pasen mbagenev mimi cii yô, ka m nenge mer mo iyol yam kpa m fa mimi shon viam. Sha nahan yô, jighjigh wam u nan ngu vesen seer a seer.”

⁷ Ka sea nenge er atindi a Bibilo a wase mba se lu henen kwagh a ve la u sôron uuma vev nahan, kwaghfan u Aôndo la a hemba gban se kwagh cii. (Yes. 48:17, 18) Se kpa, kwagh ne ka a wase se se kange  ishima ser se za hemen u kuran atindi ne ken uma wase. Pania ugen, mba yer un ér Adrianna, a kaa ér: “Aluer ior suur sha kwaghfan ve tseegh yô, uma ve una hingir caveraa. Kpa ka vea hii u suur sha kwaghfan u Yehova yô, ve hii u zuan a mbamtsera her ave ave je.” Pania ugen u i yer un er Phil la kpa kaa ér: “Ka u nenge er Yehova a kercio u geman uma u ior mba yange ve nôngo sha tahav vev ér vea gema kpa ve kanshio la yô.”

8. Aluer se mba pasen kwagh vea anmgbianev asev imôngo yô, kwagh ne una wase se nena?

⁸ Ka sea pasen kwagh vea anmgbianev asev mba ken tiônnongo imôngo yô, ve maa se ken jijingi. (Anz. 13:20) Upania kpishi ka ve pase kwagh vea upania mbagenev shighe gôgônan. Kwagh ne ka a na yô, ve zua a aan kpishi a ‘taver ayol a ve asema.’ (Rom. 1:12; ôr Anzaakaa 27:17.) Pania ugen u i yer un ér Lisa yô, kaa ér: “Ashighe kpishi mba u eren tom a ve imôngo la ka ve lu a ieren i gban gesa man iyuhwe. Hanma iyange yô, ka u tagher a angereke man iliam i dang. Ve shi sha u nôngon ér vea hemba mbagenev tseegh. Ashighe agen ka i kaa u tar shin i laha u sha ci u ú ngu a ieren i Orkristu yum. Nahan kpa, ka mea er tom u pasen kwagh vea Mbakristu mbagenev yô, kwagh ne a maam ken jijingi kpen kpen. Nahan ka mea hide kwaghpasen mea vôr nan nan je kpa, i kundum iyol.”

9. Ka sea eren tom pania vea or u se vese nan la imôngo yô, kwagh ne a wase ivese yase nena?

⁹ Ka sea pasen kwagh vea or u se vese nan la imôngo yô, ivese yase i taver. (Orpa. 4:12) Anmgbian u kwase ugen u i yer un ér Madeline, a eren tom pania vea nom na yô, pase ér: “Mo vea nomom ka se fatyô u lamen sha akaa a se zough a mi ken kwaghpasen la, shin se lam sha ma kwagh u se er ken Bibilo, u se fatyô u eren tom a mi ken kwaghpasen yô. Hanma inyom i se er pania imôngo cii yô, ka se hemba lun kôôsôô.”  Trisha kpa kaa ér: “Se cii ka se nôngon ser se nyôr ken injô ga, nahan se mba woo iyol sha kwagh u inyar ga. Se mba dugh kwaghpasen shighe môm, nahan ka se sôron shi se henen Bibilo a mba se pase ve kwagh la imôngo. Kwagh ne wase ivaa yase taver kpen kpen.”

10. Ka sea ver kwagh u Tartor hiihii shi sea nenge er Aôndo a lu suen se yô, kwagh ne a bende a jighjigh u se ne Yehova la nena?

¹⁰ Ka sea ver kwagh u Tartor hiihii shi sea nenge er Yehova a lu suen se shi ungwan mbamsen asev yô, se hemba suur sha a na. Mimi yô, Mbakristu mba ve civir Yehova sha mimi la cii mba suur sha a na. Nahan kpa, mba ve eren tom u pasen kwagh hanma shighe la kav ér, ka vea suur sha Yehova yô, kwagh ne a wase ve ve za hemen u eren tom pania. (Ôr Mateu 6:30-34.) Anmgbian ugen u i yer un ér Curt yô, ngu eren tom pania shi wasen ortamen u sôron atôônanongo tom. Yange lumun u za sôron tiônnongo ugen, u lu ica a ya na kuma ahwa ahar man tiôn yô. Un vea kwase na, u un kpa lu pania la, ve lu a mkurem ken mato kuma u vea naha a za a hide ga, shi lu u kasua a kar môm cii ve a kimbi un sha uwer ye. Curt kaa ér: “M hii u nengen mer me fatyô u zan zende la ga.” Mba eren msen sha kwagh ne yô, ve kure ikyaa ér vea za zende ne, ve lu a vangertiôr ér Aôndo una nenge sha ugbayol vev. Er ve lu wan iyol i yemen la, anmgbian u kwase ugen yila ve kaa a ve ér un ngu a iyua i un soo u nan ve yô. Anmgbian u kwase ne yange na ve inyaregh ki ki kuma u vea er zende ne la vough. Curt kaa wener, “Ambaakaa ne nga a eren we kwa kimbir kimbir yô, tese ér Yehova ngu a we.”

11. Ka averen agen a nyi upania ka ve zua a mini?

¹¹ Upania ka ve kaa ér ka vea lu kôôsôô a Aôndo shi vea seer eren un tom yô, ve seer zuan a averen. (Dut. 28:2) Nahan cii kpa, mbamtaver ban ken tom u pania ga. Or u civir Aôndo môm u nan lu tagher a mbamzeyol mba ihyembeato i Adam i ve a mi la ga je kpa nan ngu ga. Mbamzeyol mbagenev vea fatyô u nan upania mbagenev u den tom shon sha anshighe kpuaa. Kpa ashighe kpishi mbamzeyol mban ka i lu mba vea fatyô u nôngon a mi shin palegh je kpaa yô. Ka nyi ia wase upania ve vea za hemen u zuan a msaanyol ken tom ve u pasen kwagh hanma shighe ne?

12, 13. (a) Aluer ka taver ma pania u ivin ahwa a nan yô, doo u nana er nyi? (b) Gba u se ver shighe u ôron Bibilo shi henen kwagh sha tseeneke wase shi gbidyen kwar sha mi sha ci u nyi?

¹² Upania kpishi ka ve lu a akaa gbing a eren. Ka i lu ican kpishi u eren hanma kwagh, nahan gba hange hange u vea sôr akaa vea ver vough vough. (1 Kor. 14:33, 40) Aluer ka taver ma pania u ivin ahwa a nan yô, alaghga a gba u nana hide nana nenge sha gbenda u nan eren tom a shighe u nan la. (Ef. 5:15, 16) Nana fatyô u pinen iyol i nan ér: ‘Ka m vihi shighe kpishi u eren iemberyolough shin man ahumbee? Gba u me seer lun a iyolkôrontsaha shinii? Gba u me gema shighe u m eren tom wam laa?’ Hanma Orkristu cii fa er or a ver ishima ga ve nana lu a akaa kpishi ave u eren yô; nahan gba u upania vea gbidyen kwar sha akaa a ve eren la hanma shighe, shi a gba sha mi yô, vea de u eren agen.

¹³ Gba u pania nana sôr ian nana ver i ôron Bibilo shi henen kwagh sha tseeneke u nan shi gbidyen kwar sha mi hanma shighe cii. Sha nahan yô, gba u pania nana kôr iyol i nan tsaha, nana tume ityou eren akaa a kiriki ga, sha er nana zua a shighe u eren akaa a a hembe lun a inja la yô. (Fil. 1:10) U tesen ikyav yô, tôô ase wer pania ugen due kwaghpasen va hide aikighe. A wa ishima u wan iyol sha mkombo aikighe la. Kpa a hii ôron washika u i tindi un a mi yô. Been yô, a bugh kômputa na, a gba ôron ilyoho ior ve tindi un a mi sha Intanet la, shi tindin ve di kpa a ilyoho. Maa a za bugh ijiir  igen sha Intanet sha u una fa kwagh ugen u un soo u yamen la, una hide ishe yô. Va cian iyol yô, a vihi shighe je nôngo u kuman ahwa ahar, kpa ngu a hii u henen kwagh u a we ishima u henen aikighe la ga. Er nan ve kwagh ne a lu zayolo? Aluer or u eren anumbe soo u zan hemen a anumbe a eren yô, a gba u nana yaan kwaghyan u dedoo hanma shighe cii. Pania kpa gba u nana henen kwagh hanma shighe ve nana za hemen a tom u pania ye.—1 Tim. 4:16.

14, 15. (a) Doo u upania vea lu a uma u akuma akuma sha ci u nyi? (b) Aluer pania tagher a mbamtaver yô, doo u nana er nyi?

¹⁴ Upania mba ve eren kwagh ken uma ve akuma akuma la ka ve za ikyura ken tom ve u pania la kpishi. Yesu yange wa mbahenen nav kwagh ér ve ver ishe ve jighilii. (Mat. 6:22) Yange eren akaa akuma akuma, nahan fatyô u eren tom na a kuren doo doo, a lumun ér kwagh a dan un ga. Yange kaa ér: “Atsôngo nga a ijô, inyon i sha ngi a aya, kpa Wan u or yô, ngu ape suur ityough ga.” (Mat. 8:20) Pania u nan soo u henen kwagh ken ikyav i Yesu la yô, nana̱ fa ér aluer nan ombo akaa a iyolough kpishi yô, nana zer nengen sha a shin sôron a shin musan a kpii.

¹⁵ Upania fa ér tom ve la ka u civirigh, kpa i na ve u ka sha ci u ve hemba ior mbagenev ga. Kpa ve fa ér ka iyua i sha mlumun u sha mhôôn u Aôndo. Sha nahan yô, aluer ve soo ér vea za hemen a tom ve u pania la yô, gba u hanmô ve nana suur sha Yehova. (Fil. 4:13) Vea tagher a mbamtaver man atsan. (Ps. 34:19) Zum u mbamtaver mban ve ve yô, upania ve̱ ker kwaghwan hen Yehova shi ve kegh un, ve̱ de yinan ishima fele ve deen tom shon ga. (Ôr Pasalmi 37:5.) Zum u vea nenge er Yehova a we ve ikyo sha dooshima yô, ikyar i ve ye vea Ter ve u sha la ia seer taver.—Yes. 41:10.

16. Aluer u soo u lun pania yô, a gba u ú er nyi?

¹⁶ Aluer u soo u zuan a averen a mba ve eren tom u pasen kwagh hanma shighe ve zuan a mi la yô, pase Yehova isharen you. (1 Yoh. 5:14, 15) Shi lam a mba ve lu eren pania zan a mi a ve la kpaa. Tsua u eren akaa a aa wase ú u hingir pania yô. Ka kwagh u Keith vea kwase na Erika yange ve er je la. Yange ve eren tom uke hanma shighe, nahan mba eren ivese fese je maa, ve maa ya shi ve yam mato u he, vough er noov man kasev mba sha kwav ve mbagenev kpa eren nahan. Ve kaa ér: “Yange se hen ser se er akaa la yô, se zua a mkom, kpa se zua a mi ga.” Yange mba de Keith tom yô, a tôô ishuen pania. A umbur kwagh u yange er yô, a kaa ér: “Tom u pania la yange u wasem u fan er tom u kwaghpasen u ve a iember kpishi yô.” Yange ve kôr ijende a pania ugen vea kwase na, nahan upania mban wase ve u nengen er u eren kwagh ken uma akuma akuma la a ve a msaanyol kpishi yô. Nahan Keith man kwase na Erika er nena? Ve kaa ér: “Yange se nger akaa a se we ishima u eren ken mcivir u Yehova yô, sha kwatakerada, se var sha friiji wase, nahan hanma u se kôrcio u eren cii yô, se kpile biro sha mi.” Shighe kar yô, ve hingir upania.

17. Er nan i doo u ú pande akaa a u we ave u eren la shi u sôr uma wou sha er u er tom paniaa?

¹⁷ U fatyô u tôôn pania kpa? Aluer ian ngi a due u i eren kwagh ne ga kpa, nôngo sha afatyô wou cii seer kporom ikyua a Yehova sha u pasen kwagh kpoghuloo. A lu u er msen shi u gbidye kwar sha kwagh ne yô, alaghga u nenge wer aluer u pande akaa a u we ave u eren la shi u sôr uma wou yô, u fatyô u eren pania. Aluer u kôrcio u eren pania yô, iember i u zua a mi la ia hemba akaa a u de a kar ú la ica je. Aluer u ver kwagh u Tartor hiihii ken uma wou, ka akaa a ou a hembe gban we ishima ga yô, u seer zuan a mkom. (Mat. 6:33) Shi u seer zuan a msaanyol sha kwagh u u lu nan mbagenev mgbeghaa la. Heela tseegh ga, u seer zuan a aan a henen sha kwagh u Yehova shi ôron mbagenev kwagh na, nahan una seer doon we ishima shi u na a saan un iyol kpaa.