Sha marami wase je, or ka nana kpe se yô, se vaa sha ci u nan undu se yô. Shin er Lasaru doo Yesu ishima nahan kpa, yange vaa sha ci u Lasaru kpe yum ga. Yange vaa sha ci u tsombor u Lasaru man azende a Lasaru kpe undu la, er kwagh u i er ken takerada u Yohane la a tese nahan.—Yoh. 11:36.

Shighe u Yesu ungwa ér Lasaru gba angev la, a torough zan ér una za bee un angev ga. Ngeren la kaa ér: “Zum u [Yesu] ungwa er [Lasaru] gba angev nahan yô, A shi A tsa her ape A lu la ayange ahar.” (Yoh. 11:6) Er nan ve Yesu timbir u vana? Yange er nahan sha ityôkyaa. A kaa ér: “Angev mbun ka mbu kuugh ga, kpa mbu sha ci u icivir i Aôndo, sha er i̱ civir Wan u Aôndo sha mbu yô.” (Yoh. 11:4) Sha nahan yô, Yesu wa ishima u ‘nan Aôndo icivir’ sha ku u Lasaru la. Sha nyi gbenda? Yesu yange soo u eren ivande i kpilighyol sha u nderen ijende na i ishima ishima la shin ku.

Zum u Yesu lu lamen a mbahenen nav hen shighe shon la, a tôô ku a kar sha mnya. Ka nahan ve yange kaa a ve ér “huror wase Lasaru ngu yaven, kpa Me za me za nder un” ye. (Yoh. 11:11) Yesu yange nenge kwagh u nderen Lasaru shin ku la er ter ka nan nder wan u a lu yaven nahan. Nahan ityôkyaa lu i ku u Lasaru la ua vihi Yesu ga.

Nahan yô, ka nyi yange i na ve Yesu vaa? Ngeren la môm môm shi na mlumun sha mpin ne. Zum u Yesu va zua a Maria, anngô u Lasaru u kwase la, shi nengen un kua mbagenev vaan yô, “sôô Un ken ishima, ishima ta Un kwe kpaa.” Yesu nengen er vihi ve ken ishima tsung yô, ishima vihi un je “sôô un ken ishima.” Ka kwagh u yange na ve “Yesu vaa” je la. Er Yesu nenge azende na a ishima ishima la nyôr ken ijungwen tsung yô, ishima vihi un kpishi.—Yoh. 11:33, 35.

Kwagh ne tese er Yesu a lu a tahav mbu nderen ior asev mba ve kpe la shin ku shi been a angev ken tar u he u u lu van la sha yô. Shi kwagh ne tese se ér mhôônom ka ma kôr Yesu a mba or ve nan kpe ku u Adam a ve a mi la. Kwagh ugen u se fatyô u henen ken kwagh ne yô, doo u mhôônom ma a kôron se a mba ve lu zungwen ku u or ve u nan kpe la.

Yesu yange fa er un lu nderen Lasaru shin ku yô. Nahan cii kpa, er azende a Yesu doo un ishima shi mhôônom kôr un a ve yum yô, a vaa. Se kpa mhôônom ma a na se ‘vaa a mba ve vaan la imôngo.’ (Rom. 12:15) Aluer se er nahan yô, tese ér se mba a ishimaverenkeghen sha kwagh u mnder u shin ku la ga ze. Ka nahan ve Yesu yange ver ikyav i dedoo i zungwen a mba ve lu zungwen la imôngo sha u vaan ye, shin er a fa er un lu nderen Lasaru shin ku nahan kpaa.