Shighe u kwav anyom u 1900 la gba ken atô la, ior kpishi nenge fiim igen, i lun a iov ga. Yange i yilan fiim ne ér A Trip Down Market Street. Fiim ne tese akaa a yange ior eren ayange ayange ken gar u San Francisco, ken tar u Amerika sha ayange la yô. Mbaeren fiim ne yange ve wa anar u kuran tser u vidio a mi sha anar ugen ve zer sha ikyor, ve ver un ishigh sha ugodobi mba sha hemen, mba ior lu karen sha mi kpishi yô, ve lu urugh yemen a mi. Akaa a i tese ken fiim la yô, lu ikyekye i kpelan a kpela, i i er sha anyinya yô, man umato mba sha ayange la, man mbayamen kasua kua mbayev mba teen upipambaabaver.

Kwagh u a ne ve or ka nana nenge fiim la hegen ishima i doo nan ker ga yô, ka sha ci u a̱ shi nan kpa yange i er i ken uwer u Aipor 1906, ica lu a gba ga maa tar tenger ken uwer u Aipor 18 shi gar la gba usu, ior udubu imôngo kpe, shi vegher u gar la nôngo u vihin cica cii. Ior mba i tese ve ken fiim la cii, adooga shighe la ve mase shin a ayange kpuaa tseegh tsô vea kpe. Wan u orgen ken mbaeren fiim ne, mba yer un ér Scott Miles, a kaa ér: “M nenge a ior ken fiim ne, mba ve fe kwagh u una va tser ve ga yô. Kunya kôrom a ve je.”

Aluer se tôô kwagh u yange er ne se kar sha mlu u sha ayange a ase ne yô, kwagh la una na se hen kwagh kpishi je. Se kpa kunya a kôr se a mbawanndor a vese. Ve tume ityough ken akaa a ve eren ayange ayange la, cuku tsô kpa ve fa er ve sôôn tagher a ikyaatseren ga, ka mtim u botar ne je la. Nahan kpa, mtim ne ngu er tartenger u ka u va abur abur la nahan ga, ian shi her i tan mbawanndor a vese icin sha kwagh u iyange i ijirigh i Yehova la. Alaghga u ver shighe ken hanma kasua, u duen za pasen ior kwagh sha uya uya, nahan kpa, u fatyô u seer eren kwagh ne sha u tan mbagenev icin kpa?

Ikyav i dedoo i Yesu yange ver se yô, ma shighe môm kpa nenge ér doo u una hôr u pasen ior kwagh ga. Hanma or u yange una zua a nan cii yô a pase nan kwagh, a̱ lu orngoholkpandegh una zua a nan sha gbenda shin una zua a kwase shin ijôr atetan shighe u a lu memen kpa a pase nan kwagh. (Luka 19:1-5; Yoh. 4:5-10, 21-24) Yange a gba u Yesu una mem je kpa, a kegh iyol u tôôn shighe na u memen la tesen mbagenev. Er mhôônom kôr un a mbawanndor a na yô, yange a nôngo sha afatyô na cii a pase ve kwagh. (Mar. 6:30-34) Nyian ne, mbapasenkwagh mba dondon ikyav i Yesu i wan iyol hanma shighe keghen a kegh u pasen loho u i gbe torough torough u a pase la nena?

Anmgbian u kwase ugen u i yer un ér Melika yô, tse hen ya u i kuran un kpoghuloo, u ka i lu ican nyôron her yô. Ior kpishi mba ve tse hen ya shon vea na la ka mbayevmakeranta mba ve dugh ken ityar igen yô. I nger unamba mba telefon vev ma ijiir igen ga, shi i nger ati a ve ken antakerada i ver hen hunda u nyôron hen ya ve la kpaa ga. Ka i saan un iyol u hiin iliam a mba a zough a ve hen hunda u nyôron la ken Bibilo sha hanma shighe u ian i dugh cii. A kaa wener: “Ya ne ngum er ka haregh wam u pasen kwagh her nahan.” Melika ka a tôô ityakerada ken ijô kposo kposo, shi mbawanndor a na mban kpishi ka ve ngohol utrak man umagazin. Shi ka a tese ve u zan hen ijiir yase i sha Intanet i jw.org la kpaa. A hii Bibilo i henen a iorov imôngo.

Anmgbian u kwase Sonia kpa ka a kegh iyol u pasen hanma or u a fetyô cii kwagh. Yange i tôô un tom hen iyouci igen, nahan wa ishima ér una pase hanma or u nan eren tom a na imôngo cii kwagh. A hii tôôn shighe a fa mgbe u hanmô ve kua kwagh u a saren nan kpaa. Nahan ka a tôô shighe na u zan ahumbe atetan la a lam a ve asange asange ken Bibilo. Kwagh ne na yô, Sonia hii Bibilo i henen a iorov uhar. Shi ngu wan ago iyol er una gema tôôn shighe na u ahumbe la, lamen a mba va teman keghen tswer mbara kpaa.

Orgen u yange war tartenger u ken inyom i 1906 la yô, kaa ér “i gba je aahe u vihin er hen gar shin kpentar imba la ga.” Nahan kpa, iyange i tsahan “mba ve fe Aôndo ga,” i i sôôn van la ia hemba vihin a uaahe mbagen cii. (2 Tes. 1:8) Sar Yehova tsung u ior ve ungwa icin i Mbashiada nav ve lu tan la, nahan ve gema asema.—2 Pet. 3:9; Mpa. 14:6, 7.

U ngu a ian i civirigh i wasen ior u fan er se lu ken ashighe a ican yô. Gba u vea de u keren mbamtsera vev, vea gema a ker Yehova. (Sef. 2:2, 3) U fatyô u pasen mba u eren tom a ve la kwagh, man mbawanndor a we, kua mba u zough a ve ayange ayange la sha hanma ian i i dugh cii kpa? U fatyô u seer tan mbagenev icin kpa?