1, 2. Lu nyi alaghga mbaapostoli lu henen ken ishima cii ve Yesu mough zende na u masetyô u yemen Yerusalem laa?

MBAKURAN mba ken Yerusalem yange ve nenge a bamber uwer sha aôndo. Maa i za ôr Mkohol u Mbaajiriv, ve di ve yôô ér uwer u he hii, ka uwer u Nisan je la. Ior tsar iusu sha aôndo sha u samber a loho ne, shin mbazan a loho yôô kwagh ne ior ungwa. Nahan mbaapostoli fa je ér shighe u Paseka ngu zurum. Alaghga tsô yange vea fa er Yesu soo u nyôron Yerusalem cii man Paseka yô.

² Shighe ne Yesu lu vea mbaapostoli nav cii ken Perea (u lu yande Yordan) la, lu yemen zende na u masetyô ken Yerusalem. (Mat. 19:1; 20:17, 29; Mar. 10:1, 32, 46) Yange a faan iyange i hiihii i uwer u Nisan yô, ior ve fa je ér ayange a karen 13 yô, a er Paseka, sha iyange i Nisan 14, sha iyangemiren.

3. Er nan ve kwagh a gbe Mbakristu sha kwagh u werayange u i eren Paseka laa?

³ A lu eren mkombo u Kwaghyan u Ter u Aikighe la sha iyange i Aipor 14, 2014, sha iyangemiren. Werayange ne zua vea werayange u i eren Paseka la. Iyange la ka iyange i vesen hen Mbakristu kua mba i sar ve u fan mimi la. Sha ci u nyi? Sha ci u kwagh u i nger ken 1 Mbakorinte 11:23-25 la, ér: “Ter Yesu tôô bredi hen tugh mbu i nenge Un mker la, sughun Aôndo yô, A coon A kaa er: Ngun ka iyol Yam je ne, ngi sha ci wen. Eren nen kwagh ne sha u umbur Mo. Mba ye kwaghyan kera yô, A tôô iyongo nahan vough.”

4. (a) Ka mbampin mba nyi alaghga u pine sha kwagh u M-umburu? (b) Ka i fa werayange u eren M-umbur ken hanma inyom nena? (Nenge ngeren u kiriki u a lu a itinekwagh ér “M-umbur u Inyom i 2014” la.)

⁴ Akperan nga ga, we kpa u soo wer u za mkombo u Yesu yange kaa ér mbadondon un ve eren hanma inyom sha u umbur un ne. Nahan tsengapinen iyol you wer: ‘Me wa ago sha mkombo ne nena? Ka nyi man nyi a lu eren mkombo ne a mini? Ka gbenda u nyi nahan a lu dondon  sha u eren mkombo nee? Doo u mkombo ne kua akaa a a lu eren un a mi la aa lum a inja nena?’

5. Lu nyi Yesu kaa a mbaapostoli nav ér ve er sha u wan agoyol sha Paseka u masetyô u una ya vea ve laa?

⁵ Shighe u Yesu kaa a mbaapostoli nav ér ve za sôr iyou i vea ya Paseka ker la, lu ôron kwagh u iyou i lun a ikyav mbi hweegh ker kpishi ga, kpa alaghga tsô yange soo ér iyou la i lu akuma akuma shi i lu ker tsembelee, shi i lu a ian ker i un man mbaapostoli nav vea tema yô. (Ôr Marku 14:12-16.) Lu u vea wa agoyol sha akaa a vea lu yan kwaghyan ne a mi la, kua bredi u i we kwa sha mi ga, man wan u nyian. Mba ye Paseka ne mba been yô, Yesu hide gba ôron ve kwagh sha kwagh u bredi man wain la.

6. (a) Yange mba ye Paseka kera yô, Yesu kaa ér nyi sha kwagh u bredi la? (b) Ka bredi u nyi ka i er M-umbur a mini?

⁶ Apostoli Mateu kpa yange lu hen kwaghyan ne, shi va nger kwagh sha mi kaa ér: “Yesu tôô bredi A sôn iveren i dedoo sha mi, A coon, A na mbahenen, A kaa er: Ngohol nen, ya nen.” (Mat. 26:26) Lu bredi u i wa kwa sha mi ga yô, vough er u i eren Paseka a mi la kpa lu nahan. (Eks. 12:8; Dut. 16:3) I er bredi ne sha mwem ma i hôr sha mnger, kpa i nungwa kwa shin kwaghnyohon, er bar nahan sha mi ga yô. Er i wa kwa sha bredi ne ga yô, a mor ga, kpa a lu paa paa shi a uma, nahan lu ican u coon un ker avegher avegher ga. Nyian ne, cii man M-umbur yô, alaghga mbatamen mba ken tiônnongo vea kaa a or ér nana kaa imba bredi ne sha mwem ma uwua man mngerem, nana kende an-mkure shin icenge kpuaa, nana kaa un a mi. (Aluer i zua a mwem ma uwua ga yô, a fatyô u eren bredi ne sha mwem ma cinkafa shin ikyuleke shin amine gayô agase.)

7. Lu nyi wain Yesu ôr kwagh na, man ka nyi wain i eren M-umbur a mi nyiana?

⁷ Mateu shi kaa ér: “[Yesu] tôô iyongo, sughun yô, A na ve, A kaa er: Ne cii ma nen shimi.” (Mat. 26:27, 28) Kwagh u Yesu kôr ken uwe la lu iyongo i i lu a wain u nyian shimi yô. (A̱ shi nan kpa yange a lu zar u atam a wain a ndor ga, sha ci u shighe la nahan i sunda atam a wain i bee ica i gba.) Yange i er Paseka u hiihii u ken Igipiti la a  wain ga. Kpa Yesu yange kaa ér ka kwaghbo u eren Paseka a wain ga. Un iyol na je kpa tema Kwaghyan u Ter u Aikighe la a wain. Sha nahan yô, Mbakristu ka ve er mkombo u M-umbur a wain. Er kwaghmôm yange lu u a seer sha awambe a Yesu ve aa lu a inja ga yô, wain la kpa ityôkyaa ngi i seer kwa shin ilyôghonov mbagenev sha mi ér a seer doon ga. I er M-umbur ne a wain u i nongo kwagh sha mi ga, u i er a er shin i yam ken kasua yô, er u i yer ér Beaujolais shin Burgundy shin Chianti la nahan.

8. Hii nan ve kwagh u bredi man wain la ve til sha mi la a gbe Mbakristu kwagh yumu?

⁸ Apostoli Paulu yange pase wang ér ka mbaapostoli tseegh lu u vea eren mkombo u Kwaghyan u Ter u Aikighe ne ga, kpa ka Mbakristu cica cii. Yange nger washika hen anmgbianev nav mba ken Korinte mbara kaa ér: “Mo yô, kwagh u m ngohol un hen Ter yô, m gema m na ne mer: Ter Yesu tôô bredi, . . . sughun Aôndo yô, A coon A kaa er: Ngun ka iyol Yam je ne, ngi sha ci wen. Eren nen kwagh ne sha u umbur Mo.” (1 Kor. 11:23, 24) (1 Kor. 11:23, 24) Sha nahan yô, zan zan nyian kpa Mbakristu mba eren icighan mkombo ne hanma inyom cii, shi kwagh u bredi man wain la ve til sha mi la gba ve kwagh tsung.

9. Ka mnenge u kpeegh u nyi mbagenev ve lu a mi sha kwagh u bredi u Yesu yange coon na mbaapostoli nav laa?

⁹ Mbazan adua mbagenev ka ve kaa ér Yesu yange kaa jighilii ér: ‘Ngun ka iyol yam je ne,’ nahan ve na jighjigh ér bredi la yange gema sha ivande hingir iyol na kpôô kpôô. Kpa kwagh er nahan shighe môm ga. * Yesu yange tema hen ishigh ki mbaapostoli nav a iyol na her, shi bredi u i wa kwa sha mi ga, u lu u vea ya la kpa i ver un hen ishigh vev. Kwagh ne tese wang ér, lu ikyav Yesu lu tesen ye, er ashighe kpishi ken ijime kpa a  tese ikyav sha akaa agen nahan.—Yoh. 2:19-21; 4:13, 14; 10:7; 15:1.

10. Bredi u ka i er mkombo u Kwaghyan u Ter u Aikighe a mi la tile sha ityough ki nyi?

¹⁰ Bredi u mbaapostoli mban nenge a mi, u lu u ica a gba ga tsô vea ya ne lu tesen ikyav i iyol i Yesu. Iyol na i nyi? Sha shighe ugen la, ior mba Yehova nenge ér, er Yesu yange coon bredi la, kpa i sombo kuhe na môm ga yô, tese ér bredi la tile sha ityough ki “iyol i Kristu,” i i lu mzough u nongo u mba i shigh ve mkurem la. (Ef. 4:12; Rom. 12:4, 5; 1 Kor. 10:16, 17; 12:27) Kpa shighe kar yô, i va seer tôvon sha kwagh ne kua kwagh u Ruamabera a er yô, nahan i kav ér bredi la tile sha ityough ki iyol i Yesu i inyam man awambe ne. Yesu yange “ya ican ken iyol,” je yô i mande un sha kon kpaa. Nahan bredi u ka i er mkombo u Kwaghyan u Ter u Aikighe a mi la ka a tese ikyav i iyol i Yesu i yange na nagh a mi sha ci u “asorabo ase” la.—1 Pet. 2:21-24; 4:1; Yoh. 19:33-36; Heb. 10:5-7.

11, 12. (a) Ka nyi Yesu yange ôr sha kwagh u wain la? (b) Wain u ka i er mkombo u Kwaghyan u Ter u Aikighe a mi la tile sha ityough ki nyi?

¹¹ Kwagh la wase se u kaven kwagh u Yesu yange ôr sha kwagh u wain la kpaa. I nger ér: “Mba ye kwaghyan kera yô, A tôô iyongo nahan vough A kaa er: Iyongo ne yô, ka Ikyuryan i he i sha awambe Am.” (1 Kor. 11:25) Lu iyongo i Yesu kôr sha uwe la i lu Ikyuryan i he la yee? Ei. Yesu lu ôron kwagh u wain u lu shin iyongo shon la. Yesu yange kaa ér wain la tese ikyav shin tile sha ityough ki nyi? A kaa ér a tile sha ityough ki awambe a na a lu u a haa a inya la.

¹² Yesu kaa ken Takerada u Ivangeli u Marku ér: “Ka awambe Am a ikuryan i he je ne, a i hee a sha ci u ior kpishi” yô. (Mar. 14:24) Sha kpôô yô, lu u a haa awambe a Yesu “sha ci u ior kpishi sha u den asorabo.” (Mat. 26:28) Sha nahan yô, wain u nyian la tile sha ityough ki awambe a Yesu kpôô kpôô. A fatyô u zuan a mpaa sha awambe a Yesu la, man “mde u gbev mbu nôngon.”—Ôr Mbaefese 1:7.

13. Pase er ka i er mkombo u umbur ku u Kristu hanma inyom yô.

¹³ Wea lu va zan mkombo u M-umbur vea Mbashiada mba Yehova sha kwa u hiihii yô, ka nyi u fatyô u veren ashe a mini? A er mkombo ne hen ijiir i doon ashe, i lun wang ape hanma or nana tema kundu kundu, shi mkombo ne una doo nan kpaa yô. Alaghga u nenge a ufaluwa kpuaa hen ijiir ne, kpa u ngu wer a wuha ijiir ne iyol sha akaa kumba kumba ga, shi a lu her er mba eren ma iniongo kpaa ga. Ortamen u nan kom yô, nana pase kwagh u Bibilo i er sha kwagh u mkombo ne la, sha gbenda u civirigh man sha gbenda u a wanger hanma or yô. Nana wase hanma or u lun a iwuese sha kwagh u Kristu a er sha ci wase la. A paa se sha ku na la, sha er se fatyô u lun uma yô.—Ôr Mbaromanu 5:8-10.

14. Shighe u a lu nan kwaghôron u M-umbur la, a pase ishimaverenkeghen i nyi, i Mbakristu ve lu a mi igbenda ihiar laa?

¹⁴ Ornankwaghôron la shi una pase kwagh u Bibilo i er sha kwagh u ishimaverenkeghen i Mbakristu ve lu a mi igbenda ihiar la. Hiihii yô, ka ishimaverenkeghen i za teman tor a Kristu imôngo sha. Ka mbadondon mba Kristu kpuaa tseegh ve lu a ishimaverenkeghen ne ye, er mbaapostoli mba jighjigh mbara nahan. (Luka 12:32; 22:19, 20; Mpa. 14:1) Sha uhar yô, ka ishimaverenkeghen i Mbakristu kpishi mba ve lu civir Aôndo sha mimi hen shighe wase ne ve lu a mi la. Mba veren ishima u va lun uma gbem sha won shin tar, zum u a gema u ua hingir paradiso la. Hen shighe ne a gema eren ishima i Aôndo shin tar, vough er i eren i sha nahan; man ka kwagh u Mbakristu ve er msen sha mi ica i gbe je ne. (Mat. 6:10) Shi Ruamabera pase mlu u doon tsung, u vea lu ker gbem sha won yô.—Yes. 11:6-9; 35:5, 6; 65:21-23.

15, 16. Shighe u i lu umbur ku u Yesu yô, ka nyi ka i er a bredi u i ze a mi her laa?

 ¹⁵ A zurum u ornankwaghôron una kure kwaghôron na yô, una kaa ér shighe kuma u eren kwagh u Yesu yange kaa a mbaapostoli nav ér ve eren la ve. Er i vande ôron sha heen nahan, a er kwagh ne a bredi u i we kwa sha mi ga yô, kua wain u nyian. A ver bredi man wain ne sha tebul ikyua a ornankwaghôron. Una ôr Bibilo ape i pase kwagh u Yesu yange ôr shi er shighe u a hii eren mkombo ne la. U tesen ikyav yô, takerada u Mateu kaa ér: “Yesu tôô bredi A sôn iveren i dedoo sha mi, A coon, A na mbahenen, A kaa er: Ngohol nen, ya nen, ka iyol Yam je ne.” (Mat. 26:26) Yesu yange coon bredi u i wa kwa sha mi ga la sha er una gema a na mbaapostoli mba ve tema a na keen man keen la yô. Sha mkombo u a lu nyôron sha iyange i Aipor 14 la, u nenge a bredi u i we kwa sha mi ga, u i vande coon haan shin agbande a ningir a mi sha yô.

¹⁶ Agbande ne aa lu kpishi sha er a fatyô u ningir a mi sha tseren sha shighe yô. A er kwagh ne inja er ka ma zegeiniongo i tesen aeren a kwaghaôndo her kpete kpete ga. A eren msen tiônôô a been yô, a ningir a agbande ne sha, sha inja sha inja, er i doo u a er hen ijiir i i lu eren mkombo ne la. Iorov kpuaa vea ya bredi ne shin alaghga or môm kpa nana ya ga, er yange lu sha atôônanongo kpishi zum u i umbur ku u Yesu ken inyom i 2013 la nahan.

17. Ka a eren M-umbur yô, i dondo kwagh u Yesu yange kaa ér i er sha kwagh u wain la nena?

¹⁷ A been yô, ornankwaghôron la una ôr kwagh u Mateu yange za hemen u pasen ne, ér: “[Yesu] tôô iyongo, sughun yô, A na ve, A kaa er: Ne cii ma nen shimi; gadia ka awambe Am a ikuryan je ne, a i hee a sha ci u ior kpishi sha u den asorabo” yô. (Mat. 26:27, 28) Nahan a lu dondon kwagh u Yesu yange er la, sha u eren msen ugen, maa tôôn ‘ayongo’ a i hee wain u nyian shimi la ningir a mi sha.

18. Aluer ior kpuaa ya bredi shi ma wain la, shin or môm nan ya shi nan ma ga je kpa, er nan ve i gbe hange hange u hanma or nana zaa?

¹⁸ Ior kpishi mba vea za mkombo ne la vea ya bredi shi vea man wain la ga, sha ci u Yesu yange kaa ér ka mba vea za hemen a na sha Tartor u sha la tseegh vea ya shi vea ma ye. (Ôr Luka 22:28-30; 2 Tim. 4:18) Mbagenev mba ve ve mkombo ne la cii vea lu mba va teman nengen kwagh u a lu zan hemen la. Nahan cii kpa, gba hange hange u vea za M-umbur ne, sha ci u mve ve la tese ér nagh ku Yesu kura gba ve kwagh tsung. Shighe u a lu eren M-umbur ne la, vea fatyô u gbidyen kwar sha averen a vea fatyô u zuan a mi sha ci u nagh ku ipaan ku Yesu yange na la. Mba a ishimaverenkeghen i va lu ken “zegeikpelaior” i ia war “zegecan” i i lu van la. Mbacivir Aôndo mban vea “ôô uriga vev ken awambe a Waniyôngo, [vea] kungu ve.”—Mpa. 7:9, 14-17.

19. Ka nyi u fatyô u eren sha u wan agoyol sha M-umbur shi zuan a iwasen kere?

¹⁹ Mbashiada mba Yehova tar sha won cii wa agoyol sha mkombo u injaa ne. A shiin ukasua kpuaa u a er M-umbur ne yô, se na ior kpishi kwatakerada u lôhô ve un, er se fetyô la cii. Heela tseegh ga, a shiin ayange kpuaa a eren M-umbur yô, se kpishi se lu ôron akaa a Bibilo i er sha kwagh u Yesu yange er kua kwagh u yange za hemen cii man Kwaghyan u Ter u Aikighe u ken inyom i 33 la. Se sôr akaa a ase cii se ver sha er se za mkombo ne yô. Doo u se za tsuaa cii ve a wa icam i hiin man msen u hiin la ye, sha er se ngohol mbavannya, maa se tema se ungwa hanma kwagh u a lu ôron la yô. Se mba ken tiônnongo man mbavannya cica cii, se zua a iwasen kpishi sha u nengen ken Ubibilo asev, er a lu ôron Bibilo shi tan iwanger sha mi la. U hemban cii je yô, aluer se za hen M-umbur la yô, a tese ér se mba a iwuese kpishi sha nagh ku Yesu la, shi se mba kuran tindi u yange wa ér: “Eren nen kwagh ne sha u umbur Mo” la.—1 Kor. 11:24.