Ken inyom i 1985 la, mlu anyom pue. Shighe la, mbayev mba ken tar u Cambodia va nyôr makeranta ape m lu henen makeranta hen gar u Columbus ken kpentar u Ohio, tar u Amerika la. Môm ken mbayev mban fa asember kpuaa ken zwa Buter. A tesem ken ufoto er i lu nan ior ican ken tar u Cambodia kpoghuloo, i lu wuan mbagenev, mbagen di lu yevese sha u vea war ku yô. Mea hen kwagh u mbayev mban shighe u m nyer tugh yô, m haa mliam ashe. M soo u ôron ve kwagh u Paradiso man mnder u shin ku, kpa ve ungwan zwa wam ga. Shin er m lu wanye her nahan kpa, m tsua mer me hen zwa u Cambodia sha er me ôr mbayev mba ken makeranta wam kwagh u Yehova yô. Cuku tsô kpa m fa er kwagh u m tsua u eren ne una va gema mlu wam ken hemen ga.

Yange lum zange u henen zwa Cambodia ga. M nôngo u yinan ishima kuma acin ahar, kpa Yehova mgbegha mbamaren av taver mo ishima. Shighe kar yô, atica a am man mbayev mba ken makeranta wam gba kumbur a mo ér m tsua kwagh u me hen ve me va er tom me zua a inyaregh kpishi yô. Kpa yange m soo u hingir pania, nahan m tsua u henen kwagh u una wasem u eren tom u uke sha ashighe ashighe, sha er me er kwagh u m wa ishima ne yô. Mea due makeranta yô, m kohol upania mbagenev se due kwaghpasen imôngo. Shi m tsua iyol yam u tesen mbayevmakeranta mbagenev zwa Buter. Kwagh ne va wasem ken hemen kpishi.

Shighe u m lu anyom 16 la, m ungwa kwagh u annongo ugen u lamen zwa Cambodia, u lu hen gar u Long Beach, kpentar u California, ken tar u Amerika yô. M za annongo shon inya, m za hen u ôron zwa Cambodia. M been a bee makeranta nahan, maa m tôô pania, shi m za hemen u pasen ior i Cambodia mba ve lu ikyua a ya wam la kwagh. M va kom anyom 18 yô, m lu henen sha kwagh u moughon yemen ken tar u Cambodia la. Mciem lu a bee ken tar ne ga, nahan kpa, m fa er lu ior kpuaa ken iorov miliôn pue mba ve lu ken tar u Cambodia la tseegh ve ungwa loho u dedoo u Tartor yô. Sha shighe la, tar la jimin cii lu a tiônnongo môm u lun a mbapasenkwagh 13 tseegh. Yange m hii zan ken tar u Cambodia shighe u m lu anyom 19 la. Anyom nga kar ahar yô, m yem m za lu ker. M lu eren tom u geman kwagh shi tesen ior zwa Buter sha ashighe ashighe, nengen sha iyol yam, nahan zan hemen a tom u pasen kwagh la. Shighe kar yô, m zua a kwase u lumun u eren akaa a mo kpa m soo u eren ken uma wam la. Mo vea na se wase ior i Cambodia kpishi u tseghan ayol a ve sha ci u Aôndo.

Yehova nam ‘asaren a ken ishima yam.’ (Ps. 37:4) Tom u geman ior hingir mbahenen la ka u van or a mkom hemba ityom igen cii. Ken anyom 16 a m lu ken tar u Cambodia ne, annongo u yange lu a mbacivir Yehova 13 tseegh la vese hingir atôônanongo 12 man iniongo 4 i i lu ica a atôônanongo ne yô!—Kwaghôron u Jason Blackwell.