1, 2. (a) Ka nyi ia na ve ashe a pir se u nengen a kwagh ugene? (b) Ka nyi se ne jighjigh a mi sha kwagh u Tartor u Aôndo?

ALAGHGA u kav er kwagh ka una er ve ior ve umbur kwagh shon sha igbenda kposo kposo yô. Kape ashighe agen a lu or ican u umbur hanma kwagh u ortwer nan pase nan sha kwagh u angev mbu i zough nan a mi la je la. Shin alaghga or a lu a akii shin ajingi ikyua a nan je kpa nana hide nana lu keren a. Er nan ve kwagh ka a lu nahana? Mbatimenshaakaa kaa ér ka sea wa ityough eren akaa ahar hen shighe môm yô, ashe a pir se sha kwagh ugen. Ve kaa ér kape mhirinim asem ma eren tom je la, ma fetyô u veren ishima sha akaa ahar hen shighe môm ga.

² Kape ashe a pir ior sha akaa a a lu za hemen shin tar nyian je la. Adooga ve nenge er hii ken inyom i 1914 la je akaa a gem shin tar ne kpishi yô, kpa ve gema ve kav er i hii ve akaa ne a lu nahan ga. Er se lu mbahenen Bibilo yô, se fa ser Tartor u Aôndo la yange u va ken inyom i 1914, shighe u i ver Yesu Tor sha la. Nahan kpa, se fa, akaa a i ter ken msen ér “tartor Wou u̱ va, i̱ er ishima You shin tar kpaa vough er i eren i Sha nahan” la, mba a er a cica cii ga. (Mat. 6:10) Ka shighe u a tim botar u Satan ne kera la, akaa la cii aa er ye. Saa kwagh ne una er ve, a er  ishima i Aôndo shin tar vough er i eren i sha nahan ye.

3. Ka mtsera u nyi se zough a mi sha u henen Bibilo?

³ Er se henen Mkaanem ma Aôndo hanma shighe yô, se mba nengen er akaaôron a profeti a lu kuren sha mi hegen yô. Kpa ior kpishi mba nengen a kwagh ne er se lu nengen a mi la ga! Ve uve ityough eren akaa a ve je ve nenge a akav a a lu tesen ér Kristu hii u hemen ken inyom i 1914, shi ica a gba tsô una va tim botar ne kera la ga. Nahan kpa, pine iyol you wer: ‘Zan zan hegen kpa m na jighjigh mer mkur u tar ne mgbôghom, shi akaa a a lu eren shin tar nyian la tese ér ka nahan kpa?’ Wea sember hingir Orshiada u Yehova je kpa, ka nyi u hembe veren ishima sha mini? Wea kaa nyi sha kwagh ne kpa, de se time sha atôakyaa atar a a ne ve se fe ser ica a gba ga tsô a gema eren ishima i Aôndo shin tar la.

4, 5. (a) Hii ken inyom i 1914 la je, ka nyi Yesu a lu erene? (Nenge foto u a lu sha mhii u ngeren ne la.) (b) Mbaanyinyav mba utar mba ve dondo Yesu ijime la tile sha ityough ki nyi, man kwaghôron u profeti ne kure nena?

⁴ Ken inyom i 1914 la, i na Yesu Kristu tahav sha, inja na yô, yange hingir Tor u Tartor u Aôndo. Kwaghôron u profeti u i nger ken Mpase ityough 6 la pase kwagh u Yesu ér a henda nyinya u pupuu. Tem Tor kera yô, fese je maa a due sha u una hemba botar u Satan ne yô. (Ôr Mpase 6:1, 2.) Kwaghôron u profeti tsengapasen ér Tartor u Aôndo ua hiin u hemen yô, mlu u tar ne una vihi fele je a ngôôr ga. Ityav man ijen man ubombauangev man akaa agen a nan ior ku, aa er sha tar a hemba ave a tse. Kwaghôron u profeti la ôr kwagh u mbaanyinyav utar mba ve dondo Yesu Kristu ijime la ér ve tile sha ityough ki akaabo aa a lu eren la.—Mpa. 6:3-8.

⁵ Yange ityav “kura bem shin tar kera,” er kwaghôron u profeti la kaa nahan. Shin er uumace tôndo zwa ér vea er tom ken ijoughave shi bem una lu nahan kpa, kwagh er nahan ga. Ityav mbi Tar cii Mbi Hiihii mbira lu ityav mbi hiihii ken ityav mbi kuran bem shin tar kera, mbi mbia tim kwagh falegh a gba yô. Hii ken inyom i 1914 la zan zan nyian, uumace za ikyura ken kpenga u eren man sainsi kpishi, kpa ikyav ngi tesen ér ken hemen yô, m-ban u kwaghyan una va a ayôôso man ityav sha tar wuee. Heela tseegh ga, hanma or ngu nengen er ubombauangev man uaahe man akaabo agen a lu wuan ior umiliôn imôngo hanma inyom yô. Akaabo ne nga eren sha gbenda u hemban vihin cii, shi nga eren ciligh ciligh shi wuan ior hemban ave a tse. U kav inja i kwagh ne kpa?

6. Ka unô yange ve nenge a ikyav i tesen mkur u kwaghôron u profeti u ken Bibilo la, man yange ve nenge nahan ve er nena?

⁶ Shighe u Ityav mbi Tar cii Mbi Hiihii mbira pev ken inyom i 1914, shi angev mbu haan ahenga lu wuan ior kpoghuloo la, asema nyian ior kpishi. Kpa Mbakristu mba i shigh ve mkurem la yô, girim ve iyol u va nengen er “shighe u atôatyev” una bee ken inyom i 1914 la yô. (Luka 21:24) Yange ve fa kwagh u una er ken inyom la jighilii ga. Kpa ve fa tsô ér ken inyom i 1914 la, kwagh u vesen una er sha Tartor u Aôndo. Nahan yange mba nengen a ikyav i tesen mkur u kwaghôron u profeti u ken Bibilo ne tsembelee je maa, ve pase mbagenev gbar gbar ér Tartor u Aôndo hii u hemen. Iniôngon ve i yôôn kwagh u Tartor la na yô, i tôv ve a ican tsung. Mtev u sha ican ne kpa lu mkur u kwaghôron u profeti u ken Bibilo. Shighe la kar yô, mbaihyomov mba Tartor za hemen u ‘eren ior mba Aôndo ifer geman suur sha tindi’ ken atô u anyom  kpishi. Shi ve gema gbidyen anmgbianev asev mban tsusee, shi wuhen mbagenev ken purusu, shi wuan mbagenev sha gbuuka shin senden ve, shin gberen ve ityough je kpaa.—Ps. 94:20; Mpa. 12:15.

7. Hii nan ve ior kpishi ve kav inja i akaa a a lu eren shin tar la jighilii ga?

⁷ Aluer akav nga kpishi a a tese ér Tartor u Aôndo ngu hemen sha hegen yô, er nan ve ior kpishi ve nenge a akav ne ga? Er nan ve ve nenge ér akaa a a lu eren shin tar hegen la nga kuren akaaôron a profeti a ken Bibilo jighilii, a ior mba Aôndo ve ndera ôron kwagh u a anyom imôngo la ga? Ior kpishi mba hemban veren ishima sha kwagh u ashe a ve a nenge a mi la tseegh tsô shinii? (2 Kor. 5:7) Ve uve ityough ken akaa a ve, nahan ve kera nenge a kwagh u Aôndo a lu eren la gaa? (Mat. 24:37-39) Mbagenev de mbamhen kua asaren a ior i tar u Satan ve lu a mi la dan ve shinii? (2 Kor. 4:4) Saa se lu a jighjigh u nan shi se nengen sha ashe a ishima ve, se kôrcio u nengen a kwagh u Tartor u Aôndo u lu eren la ye. Doo se kpishi er ashe a pir se sha kwagh u a lu zan hemen la ga nahan!

8-10. (a) Kwagh u i er ken 2 Timoteu 3:1-5 la ngu kuren sha mi nyian nena? (b) Se fatyô u kaan ser ior mba hemban eren afer hegen cii sha ci u nyi?

⁸ Ityôkyaa i sha uhar ngi i i ne ve se fe ser ica i gba ga tsô Tartor u Aôndo ua hii u hemen tar yô: Iferkwagh ngi seer a seer ken tar ne. Kwagh u i tsengeôron ken 2 Timoteu 3:1-5 la er nôngo u kuman anyom deri hegen. Hanma ijiir sha tar yô, ior mba a aeren a i ter kwagh u a hen avur ne la. We u nenge a mi nahan ga he? De se time sha akav kpuaa a a tese mimi u kwagh ne yô.—Ôr 2 Timoteu 3:1, 13.

⁹ Tôô ase kwagh u yange or a er ken kwavanyom u 1940 shin u 1950 la ve i kunda mbagenev iyol u nengen la, kar sha kwagh u ka a za hemen nyian hen ijiirtom man ijiir i keren msaanyol, kua ken anumbe man hwe u eren la. Ior kpishi mba eren ipila man idya hegen kpoghuloo. Ior ka ve gba gesa u tesen ér ve hemba wan ipila shin tswam shin ijimba a hanma orgen  cii. Akaa a ngise a tese sha televishen ken kwavanyom u 1950 la ve, ior ve nenge ér ka a bo la cii, mba nengen a nyian ér ka kwagh u dedoo u nan tsombor msaanyol. Ior kpishi nenge er ieren i nomsoor yaven a nomsoor shin kwase yaven a kwase la i de ishar ken ufiim kua ken hwe u eren yô. Mba ve lu a aeren ne la ka ve tesen a ken igbar je. Doo se kpishi er se fe mnenge u Aôndo sha kwagh u aeren ne nahan!—Ôr Yuda 14, 15.

¹⁰ Shi tôô ieren i hembanato i ngise agumaior lu a mi la kar sha ieren i agumaior a lu a mi nyian la. U tesen ikyav yô, ken kwavanyom u 1950 la, wanye yange nana maan taav shin nana hunden msôrom shin nana vinen amar a dang yô, ishima i za mbamaren mba nan iyol kpishi. Kpa nyian ne, ashighe kpishi ka se ungwa abaver a kundan se iyol, er amba ne nahan: Wanyemakeranta ugen u lun anyom 15 ta mbayevmakeranta mba ken kelase na gbuuka côu côu, wua ve 2, vihi 13 iyol. Agumaior a a me kwagh imôngo yô, wua wanyekwase ugen u lun anyom ataankaranyiin, shi ve gbidye ter na kua anmgbian na ve kighir sha mi. Abaver agen di kaa ér, agumaior nga ave ken afer kpishi a i er ken tar u Ashia ken atô u anyom pue a a kar ne yô. Ka an je nana nyiman ér tar ngu vihin gban a gba kera ga?

11. Tar ngu vihin gban kera kpa ior kpishi fa ga sha ci u nyi?

¹¹ Apostoli Peteru yange pase vough nahan ér: “Ken ayange a masejime mbanahantar vea due a tarnahan, vea zende sha asaren a ve ayol a ve. Vea kaa er ityendezwa i m-ande Na ngi hana? Gadia hii sha shighe u uter kpe kera la akaa cii nga her di er a lu sha mhii u igbetar la nahan.” (2 Pet. 3:3, 4) Ka nyi i na ve ior mbagenev ka ve ôr kwagh nahana? Ikyav tese ér ior ka vea hoghor a kwagh yô, mba kera fe veren ishima sha mi ga. Aluer ijende yase i se lu a nan kôôsôô nan gema inja kpoo yô, a kpiligh se iyol kpishi. Kpa aluer aeren a ior nga geman kure kure yô, alaghga se fa ga. Imba mgem ne ia kpiligh se iyol kpishi ga, kpa gba u se nenge kwagh ne beelee ga. Kwaghbo ngu ken imba mgem ne.

12, 13. (a) Doo u akaa a a lu eren shin tar ne la aa na se iyolkpen ga sha ci u nyi? (b) Ka nyi ia wase se u nôngon a “ashighe a ican” nee?

¹² Apostoli Paulu ta se icin ér: “Fa kwagh ne. Ken ayange a masejime yô, ashighe a ican aa va.” (2 Tim. 3:1) Kpa ashighe a ican ne aa hemba se u nôngon a mi ga, nahan se fatyô u lun ken botar ne kpa zan hemen u civir Yehova her. Sha iwasen i Yehova man jijingi na, kua tiônnongo u Kristu yô, se kôrcio u hemban nyityôkwagh i nan se iyolkpen shin mciem cii. Se za hemen u tilen sha mimi. “Agee a hemban la ka a Aôndo, ka ken vese a dugh ga.”—2 Kor. 4:7-10.

¹³ Doo u se umbur ser Paulu hii kwaghôron u profeti na u sha kwagh u ayange a masejime la sha mkaanem man nahan ér “fa kwagh ne.” Mkaanem man tese ér kwagh u i soo u ôron la ka kwagh u una er kpee yô. Se fa dedoo ser tar ne ua za hemen u vihin zan zan Yehova una kar timin u kera. Yiase wase se u fan ér aeren a ior ka aa vihi hen ityô shin hen ma tar yô, ityô la shin tar la u gba. I gbe je aeren a ior nga a vihi sha tar jimin cii er a vihi nyian nahan ga. Alaghga ior kpishi vea wa ikyo sha kwagh u akaa ne a lu tesen la ga, kpa akaa a a lu eren sha gbenda u kpilighyol, hii ken inyom i 1914 la, a̱ wase se u nan jighjigh ser ica a gba ga tsô Tartor u Aôndo ua kar a iferkwagh cii kera.

14-16. Ka ityôkyaa i sha utar i han i ne ve se ne jighjigh ser Tartor u Aôndo ngu sôôn ‘vana’?

¹⁴ Ityôkyaa i sha utar kpa ngi i i ne ve se lu a vangertiôr yô. Akaa a a lu eren hen atô u ior mba Aôndo la tese ér mkur mgbôghom.  U tesen ikyav yô, cii man i ver Tartor u Aôndo sha yô, yange annongo u mba i shigh ve mkurem la lu civir Aôndo sha mimi. Akaa agen yange va er ken inyom i 1914 la er ve lu veren shima ér aa er la ga, nahan ve er nena? Ve mbagenev kpishi yange ve tile sha mimi her, ve za hemen u civir Yehova, er ve tagher atsan man mtev u sha ican nahan kpaa. Mba i shigh ve mkurem mban kpishi, shin ve cii, ve tile sha mimi zan zan ve kar kuren tom ve shin tar ne.

¹⁵ Ken kwaghôron u profeti u Yesu ôr vighe vighe sha kwagh u mkurtar la, a kaa ér: “Kov ne ua lu a kar kera ga saa akaa ne cii aa er ve.” (Ôr Mateu 24:33-35.) Se kav ser shighe u Yesu ter ishember i “kov ne” la, lu ôron kwagh iniongo ihiar i Mbakristu mba i shigh ve mkurem la. Ka Mbakristu mba yange ve nenge a ikyav i m-ande u Kristu sha, ken inyom i 1914 la ve lu nongo u hiihii la ye. Mbakristu mbara yange ve lu di uma ken inyom i 1914 la tseegh tsô ga, kpa i shighe ve mkurem, ve hingir ônov mba Aôndo ken inyom la, shin cii man inyom la ye.—Rom. 8:14-17.

¹⁶ Nongo u sha uhar u “kov ne” la ka Mbakristu mba yange i mar ve ve kohol asande agen ken nongo u hiihii la uma, shi i shighe ve mkurem cii asande a ken nongo u hiihii shon mase kpen been la. Sha nahan yô, ka hanma or u i shigh nan mkurem nyian ne cii nan lu ken “kov” u Yesu lu ôron kwagh u u ne ga. Nyian ne, Mbakristu mba i shigh ve mkurem, mba ve lu nongo u sha uhar ne la mba been iyol. Nahan kpa, mkaanem ma Yesu ma i er ken Mateu 24:34 la na se vangertiôr ér, a lu nan kpa, mbagenev ken “kov ne [vea] lu a kar kera ga” tsô zegecan la una hii. Kwagh ne a̱ seer nan se ityôkyaa i lun a vangertiôr ser shi kpuaa tsô Tor u Tartor u Aôndo una tim mbaaferev, una va a tar u he u perapera la.—2 Pet. 3:13.

17. Akaaôron a profeti atar a se tim sha mi ne wase se u kuren ikyaa ser nyi?

¹⁷ Er se tim sha akaaôron a profeti a atar ne nahan, se fatyô u kuren ikyaa ser nyi? Se fa iyange man ihwa i mkurtar una va la jighilii ga, er Yesu yange kaa nahan. (Mat. 24:36; 25:13) Kpa se gema se fa “shighe” la, er Paulu yange kaa nahan. (Ôr Mbaromanu 13:11.) Ka shighe shon je ne, ayange a masejime a se lu ker ne. Aluer se ver ishima sha akaaôron a profeti a ken Bibilo la kua kwagh u Yehova man Yesu Kristu ve lu eren hegen la yô, se kôrcio u nengen a akav a a lu tesen ér mimi je, se mgbôghom a mkurtar la.

18. Ka nyi ia er mba ve vende ér Yesu ka Tor ve ga laa?

¹⁸ Ica ia kera gba ga tsô, mba ve vende ér Yesu Kristu u a hende nyinya u pupuu la ngu Tor ve ga la cii vea kav er ve tsugh ayol a ve yô. Vea zua a pe waren ga. Hen shighe la, a cier ior kpishi iyol, vea vaa, vea kaa ér: “Ka an je nana fatyô u tilen sha?” (Mpa. 6:15-17) Nahan kpa, Mpase ityough 7 na mlumun. Mba i shigh ve mkuren la man mba ve lu a ishimaverenkeghen i zuan a uma u tsôron shin tar la cii, Aôndo una lumun ve sha iyange la, vea ‘tile sha.’ Nahan iyôngo igen i ia war zegecan la ia lu “zegeikpelaior.”—Mpa. 7:9, 13-15.

19. Er u ne jighjigh wer mkur mgbôghom nahan, ka nyi u lu veren ashe a mini?

¹⁹ Aluer se za hemen u veren ishima nengen er akaaôron a profeti a ken Bibilo la a lu kuren sha ayange a ase ne yô, tar u Satan ne ua kera dan se ga. Se kav inja i akaa a a lu eren shin tar hegen la jighilii. Ica ia gba ga tsô, Kristu una hemba gburu gburu shi una tim tar u ifer ne sha shighe u ityav mbi perapera mbi i yer ér Armagedon la. (Mpa. 19:11, 19-21) Nenge imba er ityav mbira mbia bee ve a saan se iyol hen shighe la sha won yô!—Mpa. 20:1-3, 6; 21:3, 4.