SHIGHE u orgen u i yilan un ér Pascal la lu vesen hen ijiir igen ken tar u Côte d’Ivoire, i ior gba ican her kpishi la, sar un tsung u eren kwagh u una na uma na una hemba doon yô. Er lu henen a hen iju i keren la, a pine ér, ‘Ka han me za ve me due iti ken iju i keren shi me hingir orinyara?’ Shighe u lu anyom 25 la, a kure ikyaa ér ka ken veghertar u Yuropa la je una za ve, a wase un ye. Kpa er lu a ityakerada i nan un ian i nyôron ken tar ugen ga yô, lu u saa un nyôr ken veghertar u Yuropa la sha tindi ga.

Ken inyom i 1998, shighe u Pascal lu anyom 27 la, a hii zende na ne. A per ijoortar i tar u Ghana, a er zende a yem ken tar u Togo, a za per tar u Benin, maa a yem zan zan a za nyôr hen angeri u i yer ér Birni Nkonni, ken tar u Niger la. Nahan kpa, lu shighe u una hii u tagher a ican kpôô kpôô ken zende ne je la. Cii man a er zende a yem ken imbusutarimese yô, lu u una zer keremi sha mato, zan zan una per Deserti u Sahara la. Maa una za nyôron hen Zegemnger u Mediterenia la yô, una nyôr tso u yemen veghertar u Yuropa. Lu kwagh u wa ishima u eren je ne. Kpa akaa ahar gema er ken tar u Niger a yange un u eren nahan yô.

Kwagh u hiihii yô, inyaregh va bee un. Kwagh u sha uhar yô, a zua a pania ugen, u i yilan un ér Noé yô. Pania ne maa hii u henen Bibilo a na. Kwagh u hen la doo un tsung, shi gema mnenge na u lu a mi sha kwagh u uma la kpaa. A kera wa ishima u keren uyôughyôughmbaakaav ga; a na ishima na sha akaa a ken jijingi. Ken inyom i 1999 la, i er Pascal batisema. Er a soo u tesen Yehova ér un ngu a iwuese sha kwagh u a er a na la yô, a tôô pania ken inyom i 2001, ken tar u Niger, hen angeri shon u yange hen mimi her la. A nenge tom u a lu eren Yehova ne nena? A kaa ér: “M ngu zuan a kwagh u hemban doon cii ken uma!”

Anmgbian Pascal man mbagenev kpishi nenge ér kwagh u or a er ve nana seer zuan a mkom ken uma yô, ka u veren ishima sha akaa a ken jijingi. Mbagenev er nahan, sha u moughon ken Yuropa van ken Afrika, va pasen kwagh ape kwagh a hembe gban sha mbapasenkwagh u Tartor la. Jighilii yô, Mbashiada mba kuman er iorov 65, mba hiin anyom 17 zan zan 70 nahan, mough ken veghertar u Yuropa va ken ityar i i lu shin Ityôtar i Afrika, ape kwagh a hembe gban sha mbapasenkwagh la. Ityar shon yô, ka Benin man Burkina Faso man Niger kua Togo. * Ka nyi yange i mgbegha ve u eren zegekwagh ne, man ka nyi i dugh kere?

Anmgbian u kwase ugen ken tar u Denmark, u i yer un ér Anne-Rakel yô, kaa ér: “Mbamaren av yange ve eren tom u mishen ken tar u Senegal. Yange ve shi ôron kwagh u uma u ken tom u mishen sagher sagher, nahan mo kpa tom shon va sarem.” Anyom 15 ken ijime, shighe u Anne-Rakel poso anyom 20 la, a mough a yem ken Togo, ape a lu eren tom u pasen kwagh vea tiônnongo  u eren mkomo ken iliam i sha ave la. Kwagh u er ne taver mbagenev ishima nena? A kaa wener: “Shighe kar yô, anngôm u kwase u kiriki man u nomso u kiriki kpa va kohol mo ken Togo.”

Anmgbian ugen ken tar u Frans u lun anyom 70, u a lu a kwase yô, mba yer un ér Aurele, a kaa wener: “Anyom ataan ken ijime, shighe u m de tom, m hii u ngohol penshen la, lu u me tsua kwagh môm ken akaa ahar, u m soo u eren yô: me tsua u lun ayagh kwagh wam girgir ken Frans keghen Paradiso, shin me tsua u eren kwagh u una na me seer eren tom u pasen kwagh yô.” Aurele yange tsua kwagh u sha uhar la. Un vea kwase na Albert-Fayette, ve yem ken tar u Benin, ve za pase kwagh nôngo u kuman anyom atar hegen. Aurele kaa wener: “Kwagh môm hemba kwagh u se ne ayol a ase u va eren Yehova tom heen la ga.” Shi a ôr a ahan zwa a kaa ér: “Kwagh er doo yô, vegher u haregh wase u a mase shin kpemnger la ngu a umbur mo kwagh u Paradiso.”

Anyom 16 ken ijime la, anmgbian Clodomir vea kwase na Lysiane, yange ve mough ve yem ken tar u Benin. Sha hiihii la, i sar ve u nengen a mba hen tsombor ve man azende a ve kpishi, shi ve nenge ér vea fatyô u hoghor a mlu u ken tar la ga. Nahan kpa, ityôkyaa lu i vea cia ga. Ve zua a msaanyol kpishi. Clodomir kaa ér: “Ken anyom 16 a a kar ne cii, hanma inyom yô, yange a hemba kpa, or môm di tsô yô, se wase nan nan fa mimi.”

Anmgbian ugen ken tar u Frans, mba yer un ér Sébastien vea kwase na Johanna, yange ve mough ve yem ken tar u Benin ken inyom i 2010 la. Sébastien kaa ér: “Akaa nga kpishi a eren ken tiônnongo. Tom u se lu eren heen ne ngu inja er ka u zan makeranta, za ngohol ityesen kpoghuloo sha anshighe kpeghee nahan!” Ka nyi i lu duen ken tom ve u pasen kwagh nee? Johanna kaa ér: “Sar ior u fan mimi hen ijiir ne kpen kpen. Yange a lu shighe u se lu pasen kwagh ga je kpa, ior ve kôr se sha godobi, ve pine se mbampin mba ken Bibilo shi ve sôn ityakerada yase kpaa.” Tom ne bende a ivese ve nena? Sébastien kaa ér: “Kwagh ne taver ivaa yase kpen kpen. Ka i doom kpishi u pasen kwagh vea kwase wam imôngo ken iyange jimin.”

Anmgbian Eric vea kwase na Katy, mba eren tom pania ken imbusutarimese i tar u Benin, ape ior ve ngee ga yô. Anyom pue ken ijime, shighe u ve lu ken tar u Frans la, ve hii u ôron ngeren mba ve er kwagh sha kwagh u za eren tom ape kwagh a hembe gban sha mbapasenkwagh la, shi ve lam a mba ve pasen kwagh hanma shighe la. Kwagh ne na yô, ve lu a isharen i yemen ken tar u ken won za pasen kwagh. Ve va yem ken inyom i 2005 la. Mvese va ken tom ve ne kpishi je. Eric kaa ér: “Anyom ahar ken ijime la, annongo wase u a lu hen angar u Tanguiéta la, lu a mbapasenkwagh iorov 9. Hegen se kuma iorov 30. Ka a lu sha iyange i Laha yô, iorov 50 shin 80 ve va mkombo. Mvese ne ka a na se iember kpishi!”

Ka mbamtaver mba nyi mbagenev mba ve yem u za eren tom ape kwagh a hembe gban sha mbapasenkwagh la ve tagher a mini? Benjamin, u a lu anmgbian u Anne-Rakel la, ngu anyom 33. Ken inyom i 2000 la, a zua a ormishen ugen ken Denmark, u yange er tom ken tar u Togo yô. Benjamin kaa ér: “Zum u m kaa a ormishen la mer m soo u lun pania yô, a kaa ér: ‘U fa er u fatyô u za eren tom ken tar u Togo kpa?’” Benjamin hen sha kwagh ne. A kaa ér: “M lu a kuma anyom 20 shighe ne kpaa ga, kpa anmgbianev av mba kasev uhar lu vanden eren tom ken Togo. Kwagh ne na yô, hemba lun mo zange u yemen ken tar la.” Nahan a mough a yem. Nahan cii kpa, mtaver ugen gema lu. Benjamin pase wener: “Yange m fa ishemberti môm ken zwa French ga. Yange yinam ken iwer ataratar i hiihii la ga, sha ci u m lu fantyô u lamen a or ga.” Kpa shighe kar yô, a za ikyura. Hegen ne, Benjamin ngu eren tom shin Betel u ken tar u Benin la. Ngu eren tom u tindin a ityakerada sha atôônanongo shi wasen gbaatom u nengen sha ukômputa.

Eric man Katy, mba se vande teren kwagh ve la, yange ve er tom hen haregh ugen u lamen zwa French cii ve, ve mough ve yem ken tar u Benin ye. Mlu u shin Ityôtar i Afrika ne kaha nena? Katy kaa ér: “Yange lu zange u zuan a ijiir i injaa i tsan ga. Se tsa ken iyou i lun a usu u latriki man mngerem shio iwer imôngo.” Eric kpa kaa ér: “Mba wan ndor a vese yange ve kuhwa ityogholough jang jang zan zan atôutu. Yange i gba u se wa ishima a ambaakaa la nahan, shi se kegh iyol u den ser a hoghor se.” Ve cii ve lumun nahan ér: “Msaanyol u or ka nan zua a mi sha u eren tom hen haregh u i lu a vande pasen kwagh her ga la, hemba nyityô mtaver cii.”

Anmgbian Michel vea kwase na Marie-Agnès ken tar u Frans; ve zurum anyom 60. Anyom ataan ken ijime la, ve mough ve yem ken tar u Benin. Sha hiihii la cier ve iyol. Michel kaa ér: “Mbagenev tôô kwagh u se tsua u eren ne kar sha or u nan lu tuur se shin wiibalo, zenden a mi sha kor u i te sha aôndo nahan! Aluer u fa wer or u nan lu zenden sha kor ne la ka Yehova ga yô, a cier we iyol tsô. Nahan se yem u za eren Yehova tom, shi un kpa ta se kera ga.”

Mba ve vande za eren tom ape kwagh a hembe gban sha mbapasenkwagh la pase igbenda i hange hange i wan agoyol cii moughon la. Ve kaa ér: Wa ago tsuaa. Hen fa u hoghor a ijiir i he. De vihin inyaregh hemban er u we ishima la ga. Suur sha Yehova.—Luka 14:28-30.

Anmgbian Sébastien, u se vande teren kwagh na la, kaa ér: “Cii man mo vea kwase wam Johanna se mough yô, se vande koson inyaregh anyom ahar. Se er kwagh ne sha u panden inyaregh ki se vihin u eren akaa a nan se msaanyol la, shi se de u yamen akaa a a lu hange hange ga la.”

Marie-Thérèse kpa ngu môm ken anmgbianev mba kasev mbalun kwav, mba kuman er 20 nahan, mba ve  mough ve yem u za eren tom shin Ityôtar i Afrika, ape kwagh a hembe gban sha mbapasenkwagh la yô. Un nahan bôôsu ken tar u Frans. Nahan kpa, ken inyom i 2006 la, a tôô memyol inyom i môm a yem ken tar u Niger u za eren tom pania. Ica gba ga je maa, a kav ér ka tom u un soo u eren ken uma na jim je la. Marie-Thérèse kaa ér: “Yange m hidi ken tar u Frans yô, m za lam a or u yange tôôm tom la mer m soo u panden shighe wam u tomough, nahan un kpa lumun. Hegen ne, ka m er tom u nahan bôôsu ken uwer u Mei zan zan uwer u Agusutu ken Frans, maa m hide m yem ken tar u Niger, m za er tom pania ken uwer u Setemba zan zan i kôr uwer u Aipor, inyom igen.”

Mba ve ‘vande keren tartor’ yô, vea fatyô u nan jighjigh ér Yehova una seer ve ‘akaa a hange hange agen la cii.’ (Mat. 6:33) Ikyav i tesen yô, nenge ase kwagh u yange er Saphira, anmgbian u kwase ugen ken Frans, u lun kwav, u a zurum anyom 30 la. Un kpa ngu eren pania ken tar u Benin. Ken inyom i 2011 la, a hide a yem ken tar u Frans sha u una za er tom a ker inyaregh ki una nenge sha iyol na shighe u una hide a yem ken Afrika u za pasen kwagh sha inyom i sha ataratar la yô. Saphira kaa ér: “Yange m er tom zan zan Tomataan, u lu u ijodo yam ia bee la, kpa m shi a ayange pue a keren inyaregh sha ci u inyom i ia kôr la. M shi a kasua uhar tseegh mba eren tom ken tar u Frans. Nahan m er msen hen Yehova, m pase un mlu wam. Ica i gbe ga yô, kômpeni ugen gbidyem waya, pinem aluer me fatyô u za eren tom kasua uhar sha ityough ki orgen u nan lu her ga yô.” Ka ker Hiitom yô, Saphira za hen kômpeni la sha u or u lu u una er tom sha ityough ki nan la, nana tsaase un sha tom shon yô. A kaa ér: “Yange m za nyer yô, kwagh u kpiligh mo iyol er. M kav mer, or shon lu anmgbian wase u kwase u ken Kristu, u soo u undun tom ayange pue, zan Makeranta u Henen Tom Pania yô! Or u yange tôô un tom la venda u nan un memyol ér saa una va a orgen nana va tile sha ityough nagh. Anmgbian u kwase ne er msen hen Yehova ér a wase un, vough er mo kpa m er nahan.”

Anmgbianev mba nomso man mba kasev mbagenev sha ajiir agen ve er tom u pasen kwagh shin Ityôtar i Afrika anyom imôngo, je ve gema veghertar ne hingir ya ve. Mbagenev yô, ve kôrcio u eren tom ne anyom kpuaa, maa ve hide ve yem ken tar u i mar ve ker la. Zan zan nyian je kpa, mba yange ve er tom u pasen kwagh ape kwagh a hembe gban sha mbapasenkwagh la mba zuan a mtsera sha tom u ngise ve er anyom kpishi ken tar u ken won la. Ve kav ér ka u eren Yehova tom la a ne or mkom u mimi ken uma ye.