Mbamzeyol ka ve na se anzughul kpen kpen. Mbamzeyol ka ve na se kera fa kwagh u se lu sha mi jim ga, shi ka i yina se iyol shi uma a due se ishima kpaa. Tôr Davidi u hemen Mbaiserael mba tsuaa mbara yange tagher a atsan kpishi. Yange nôngo a atsan shon nena? Davidi na mlumun sha mpin ne ken pasalmi u kôron ken ishima tsung ne, ér: “M vaa a TER genger genger, m zamber a TER genger genger kpaa. M ngu pasen ican yam sha ishigh Nagh, m ngu ôron Un zayol wam. Zum u jijingi wam ure ken a mo yô, We U fa gbenda wam. Sha gbenda u m zenden sha mi la.” Sha kpôô yô, Davidi yange zamber Aôndo a iyol i hiden a mi ijime ér a wase un.—Ps. 142:1-3.

Ken pasalmi ugen la, Davidi wa icam ér: “M sôn TER kwagh môm tsô, ka un me ker ye, mer: Ma m lu ken iyou i TER sha ayange am cii, sha u me nenge mkomashe u TER, man me time kwagh ken tempel Na kpaa” yô. (Ps. 27:4) Davidi lu Orlevi ga, kpa hide hen er yange una tile ken won u icighan tembe, ikyua a ijiir i civir Yehova her la yô. Yange ishima i Davidi iv a iwuese je soo u lun her ken ayange a uma na cii, ‘nengen mkomashe u Yehova.’

Ishember i ken zwa Grika i i gem ken Pasalmi 27:4 ér “mkomashe” la ngi ôron kwagh u or “lumun a mi, shin a ker nan iyol, shin a doo nan ishima shi nan henen sha mi” yô. Davidi yange timen sha kwagh u mcivir u Aôndo hanma shighe cii. Doo u se pine ayol a ase ser, ‘M timen sha kwagh u mcivir u Aôndo er Davidi nahan kpa?’

Nyian ne, ka ken imaagh ki ma iyou, Yehova a soo ér se civir un ga. Kpa ka ken zege tempel u ken jijingi, u a lu gbenda u wang, u civir Aôndo u mimi la. * Aluer se mba ‘timen’ sha kwagh u mcivir ne yô, se kpa se fatyô u ‘nengen mkomashe u Yehova.’

Hen sha kwagh u atse a nanden nagh a yange i er sha togula, i ver sha hunda u tabernakel la. (Eks. 38:1, 2; 40:6) Atse a nanden nagh la lu tesen ér Aôndo kegh iyol u ngohol nagh ku Yesu una na sha uma na, u ken mlu u orumace la. (Heb. 10:5-10) Hen ase er nagh kura ku a wase se la! Apostoli Paulu nger ér: “I hime se a Aôndo sha ku u Wan Na zum u se lu mbaihyomov la.” (Rom. 5:10) Aluer se na jighjigh a awambe a Yesu la yô, a doo Aôndo a vese shi una na se jighjigh. Nahan se hingir u nengen ser se ya “ikyar vea Yehova” kôôsôô.—Ps. 25:14, NW.

Er i ‘ese asorabo a ase kera’ yô, ‘ashighe a myôhôryol a sha ishigh ki Yehova kpaa va sha a vese.’ (Aer. 3:19) Mlu wase ngu inja er or u i wuhu nan ken purusu, u nan lu vaan afanyô sha akaa a yange nan er la, nahan nan lu geman inja keghen shighe u a va wua nan la nahan. Orjir u wasen ior nana nengen nahan yô, ishima ia mgbegha nan u esen asorabo a orkwar la sha, nahan yangen mtsaha u kuugh, u i gbe u nana ya la. Nenge er a yôhôr orkwar la iyol shi a saan nan iyol la sha wono! Yehova ka a wase uumace mba ve gem ishima la, a kar a mtsaha u kuugh sha ityough vev kera, er orjir u wasen ior la nahan.

Akaa agen a Davidi nenge i eren ken mcivir u mimi, ken iyou i Yehova yô, lu mkombo u ikpela i Mbaiserael kumban imôngo la, man Atindi a yange  i ôr shi i ta iwanger sha mi la, man kwaghhumandoon u i nanden la, kua icighantom u upristi man Mbalevi eren la. (Eks. 30:34-38; Num. 3:5-8; Dut. 31:9-12) Akaa a Mbaiserael mba tsuaa mbara eren ken mcivir u mimi la mba eren a nyian kpaa.

Nyian kpa, “aluer anmgbianev vea tema imôngo, ishima ve ia lu i môm yô, á doo yum á hôm kpaa,” er sha ayange a tsuaa la nahan. (Ps. 133:1) Ior seer van ken mzough wase u “anmgbianev” mba sha tar cii ne kpishi. (1 Pet. 2:17) Ka i ôr Mkaanem ma Aôndo ken mbamkombo asev shi i ta iwanger sha mi. Yehova ngu nan se ityesen mgbeghaa sha ikyev i nongo na. Shi ngu nan se kwaghyan u ken jijingi yôughyôugh ken ityakerada sha u se henen vea icombor yase man sha tseeneke wase kpaa yô. Anmgbian ugen ken Mbahemenev mba Shin Itine kaa ér: “Hanma pepe yô, ka m gbidye kwar sha Mkaanem ma Aôndo, shi m hen sha inja i ma, shi m ker mkav sha mi, nahan m zua a akaa a injaa shi i saan mo iyol kpishi.” Sha kpôô yô, ‘mfe una fatyô u doon se ken uma wase.’—Anz. 2:10.

Nyian ne, Yehova ongo mbamsen mba mbacivir un ve eren a ishima i môm ayange ayange la. Mbamsen mbara ka ve lu sha ishigh ki Yehova er ka nagh ku humandoon nahan. (Ps. 141:2) Er se fe ser ka sea kporom hen Yehova Aôndo ken msen a iyol i hiden a mi ijime i doo un a vese kpishi yô, saan se iyol kpen kpen!

Mose yange er msen ér: “Mdoom ma [Yehova] Aôndo wase, ma̱ lu a vese; taver tom u ave ase.” (Ps. 90:17) Er se lu eren tom wase u pasen kwagh la sha gbashima yô, Yehova ngu veren u doo doo. (Anz. 10:22) Alaghga se wase mbagenev fa mimi. Adooga ken tom wase u pasen kwagh la, se wa ishima a angev man mbamzeyol mba ken ishima man tôvaican kua ior mba kwagh a gbe ve sha loho wase ga la anyom imôngo. (1 Tes. 2:2) Nahan kpa, kwagh ne wase se u nengen a “mkomashe u [Yehova]” shi kaven er iniôngon yase la i doo Ter wase u sha la ga he?

Davidi yange wa icam ér: ‘Yehova ka kwar u dyako wam man u iyongo yam kpaa. Kwar u i kar i nem yô, u doom kpishi, dyako wam doom je zua ga.’ (Ps. 16:5, 6) Er Yehova lumun a ikyar i Davidi ya vea na la shi Davidi lu sha ian i civir Yehova yô, a nenge ér ka “kwar” na je la, nahan a wuese kpishi. Alaghga se lu yan atsan er Davidi nahan, kpa se mba a averen kpishi! Sha nahan yô, mcivir u Yehova a̱ za hemen u doon se ishima shi se ‘timen’ nen sha kwagh u tempel u Yehova u ken jijingi la hanma shighe cii.