KEN inyom i 1923 la, ior iv ken iyou i kuhwan ityogholough shi eren derama igen hen gar u São Paulo poo! Anmgbian George Young lu nan kwaghôron her, i lu geman ken zwa Portuguese. Iorov mba kuman 585 mba ve lu her la cii lu keghen ato a na zulee. I lu tesen avur a Bibilo a ken zwa Portuguese la sha televishen. Kwaghôron ne kur yô, i na ior ukôpi mba antakerada u lu a itinekwagh ér Millions Now Living Will Never Die! la deri môm, ukôpi mbagenev lu ken zwa Buter, mbagen ken zwa Jamani man zwa Italia. Kwagh u injaa due ken kwaghôron u i na ne! Gwa yange za kpuun, nahan mbaaikighe mba karen uhar yô, shi ior va iv ken iyou ne poo u ungwan kwaghôron ugen. Kpa yange hii nan ve kwagh va lu nahana?

Ken inyom i 1867 la, kwase ugen u i yilan un ér Sarah Bellona Ferguson yô, mough ken tar u Amerika yem ken tar u Brazil vea tsombor na. Mba ker ken inyom i 1899 yô, Sarah ôr ityakerada i pasen Bibilo igen i anmgbian na u nomso u kiriki tôô ken tar u Amerika va a mi ken tar u Brazil yô, nahan a kav ér un zua a mimi. Er takerada u ôron maan un iyol kpishi yô, a kaa ér i va naan un Iyoukura i ken zwa Buter. Er loho u Bibilo ne doo un saa her yô, a nger Anmgbian C. T. Russell washika a pase wener, un ngu “ikyav i kpôô kpôô i tesen ér or môm kpa nan gba ica gande u mimi a ar a nan ga.”

Sarah Ferguson yange pase mbagenev mimi u ken Bibilo la sha afatyô na cii, kpa ashighe kpishi a shi henen or u nana va wase un vea tsombor na kua ior mba dedoo mba ken tar u Brazil u seer fan mimi yô. Ken inyom i 1912 la, anmgbianev mba shin Betel u ken Brooklyn la kaa a na ér or ngu van hen gar u São Paulo a utrak imôngo mba ken zwa Portuguese, mba ve lu a itinekwagh ér Where Are the Dead? yô. Ken inyom i 1915 la, a kaa ér hanma shighe cii i kpiligh un iyol er Mbahenen Bibilo kpishi lu veren ishima ér ica a gba ga tsô vea yem sha yô. Nahan a nger kwagh a pase mnenge na a kaa ér: “Nahan tar u Brazil kua veghertar u South America jimin cii di ye? . . . Alu u nenge er veghertar u South America a kehe kpishi nahan yô, a lu u ican ga u nengen er sunda u shi her i vese yô.” Sha kpôô yô, sunda yange u shi her vese!

 Ken inyom i 1920 la, mbatsoov mbagenev anigheni ken tar u Brazil mba ve lu agumaior yô, za mbamkombo mba tiônnongo mbagenev hen gar u New York, shighe u i lu sôron ve tso u nôngon ityav a mi la. Mba hidi hen gar u Rio de Janeiro yô, ve va ôr mbagenev kwagh u ishimaverenkeghen i ken Bibilo, i ve sember henen kwagh u i la. Kwagh ne er ica lu a gba ga maa anmgbian George Young, u lu orkuran u ningir sha la va nyôr hen gar u Rio de Janeiro, ape a zua a mbagenev mba sar ve u fan mimi la. Kwagh ne er ken uwer u Maaci 1923. A ker gbenda sha er a gema ityakerada imôngo ken zwa Portuguese yô. Anmgbian Young kera ngôôr ga je maa yem hen gar u São Paulo; shighe ne ior lu hen gar ne kuma iorov 600,000. A za na kwaghôron shi a na ior antakerada u Millions Now Living Will Never Die! la heregh, er i vande teren sha mhii u ngeren ne nahan. A kaa wener: “Er yange m lu tswen yô, lu ken upipambaabaver m hemban yôôn akaaôron a am ye.” Shi a kaa ér: “Lu akaaôron a ken igbar a i hii yôôn ken abaver ér nongo u i yer ér I.B.S.A. la ua na ken tar u Brazil je la. *

Ngeren u Iyoukura i Disemba 15, 1923 yange ôr kwagh sha kwagh u ibaver i tom u ken Brazil la kaa ér: “Ka sea nenge er tom u pasen kwagh yange u hii ker ken Jun 1, shi ityakerada kpa se lu a mi hen shighe la ga nahan, se kav er Ter a haa iveren sha tom ne ngôgh yô.” Ibaver la za hemen kaa ér, akaaôron a Anmgbian Young yange na hen gar u São Paulo la lu akaaôron 2 ken atô u akaaôron 21 a i na, hii ken Jun 1 zan zan Setemba 30 yô. Zom cii yô, ingyegh ki mba yange ve va u ungwan akaaôron ne kuma iorov 3,600. Loho u Tartor ne yange u lu samber ken gar u Rio de Janeiro kure kure. Ken iwer kpuaa tseegh, i na ior ityakerada yase ken zwa Portuguese hemba ukôpi 7,000! Heela tseegh ga, yange i hii u gberen Iyoukura ken zwa Portuguese, sha mgber u Novemba-Disemba 1923 la je.

Anmgbian George Young yange za hen ya u Sarah Ferguson. Ngeren u Iyoukura pase ér: “Anmgbian u kwase ne yange va nyer sha palo yô, kunda un iyol, a tile jikii shighe wa karen. Maa a kôr Anmgbian Young uwegh, a kenger un sha ishi zulee, maa a kaa ér: ‘U ngu orkuran u zenden sha mimii?’” Ica i gba ga maa i er un batisema vea mbayev nav mbagenev. Jighilii yô, yange kegh batisema ne kuma anyom 25 je! Ken uwer u Agusutu 1, 1924 la, Iyoukura kaa ér yange i er ior batisema ken Brazil iorov 50, mba hemban iyenge ken ve lu hen gar u Rio de Janeiro la.

Er anyom a kar i kom er 90 hegen ne, ityôkyaa kera ngi i se pine ser ‘tar u Brazil kua veghertar u South America jimin cii la di ye’ ga. Mbashiada mba Yehova mba hemban iorov 760,000 mba pasen loho u dedoo ken tar u Brazil hegen. Shi hegen mba pasen ior loho u Tartor hen veghertar u South America la jimin cii, ken zwa u Portuguese man Spanish kua ijô igen kpishi i i lamen her yô. Kwagh u Sarah Ferguson ôr ken inyom i 1915 ér ‘Sunda shi her vese’ la yange lu mimi.—I zua a ngeren u pasen yiase yase ne ken tar u Brazil.