Ruamabera ôr kwagh u tesen ér i vande ieren i nanden ikyom i or la ga.

Ngeren mba ken Bibilo mbagenev pase ér yange i nande ikyom shin akuhe a mbakpenev. (Yos. 7:25; 2 Kron. 34:4, 5) Alaghga kwagh ne lu u tesen ér ior mba shon yange ve kuma mba a ii ve sha icivir ga. Kpa ashighe agen yô, yange a nande or nahan kpa i lu sha u tesen ér nan kuma u a ii nan sha icivir ga ze.

Se fatyô u nengen a kwagh ne ken kwagh u i er sha kwagh u ku u Tor Saulu man ônov nav mba utar mbara. Ve mba unyiin mban cii yange ve kpe shighe u ve lu nôngon ityav a Mbafiliti la. Môm ken ônov mba Saulu mban lu Yonatan, u lu ijende i Davidi i mimi, shi wasen un yô. Zum u anomaior a ken Iserael a a lu hen Yabeshi-gileadi la ungwa kwagh u er la yô, ve za tôô akom a ve a anyiin la, ve nande a, maa ve gema akuhe la ve ii. Davidi va wuese Mbaiserael mbara sha kwagh u ve er la.—1 Sam. 31:2, 8-13; 2 Sam. 2:4-6.

Ishimaverenkeghen i Ruamabera a ne se sha kwagh u mbakpenev yô, ka mnder u shin ku; inja na yô, Aôndo una na or u nan kpe la nana hide a lu uma. A̱ nande ikyom i or shin a nande ga kpa, Yehova una kanshio u nderen or shon a iyol i he ga. Agumaior a jighjigh atar a ken Heberu, a Tor Nebukadinesar na zwa ér i kende ve ken usu la kpa yange ve cia ga, gadia lu u a nande ve ken usu kpa Aôndo una kanshio u nderen ve ga. (Dan. 3:16-18) Kape mbacivir Yehova mbajighjigh mba i wua ve ken afo a mbakwarev a Mbanazi, maa i nande ve ken usu la kpa kwagh ve lu je la. Mbacivir Aôndo mba mimi kpishi hia ken usu shin ve kpe sha igbenda igen i a fatyô u nengen a ikyom ve tsô kpaa ga yô. Nahan cii kpa, mba va nderen ve shin ku kpee je.—Mpa. 20:13.

Saa Yehova una hide or a iyol i nan i tse la ve, una nder nan ga. Gbenda u Aôndo a lu nderen Mbakristu mba i shigh ve mkurem shin ku, yemen a ve sha Tartor la kpa tese nahan. Ka i nder Mbakristu mba i shigh ve mkurem la shin ku a mlu ve la gedee, kpa i na ve iyol i ken jijingi, vough er Yesu kpa yange i nder un “i na Un uma sha Jijingi” nahan. Mba yemen a iyol i inyam man awambe i yange ve lu a mi la sha ga.—1 Pet. 3:18; 1 Kor. 15:42-53; 1 Yoh. 3:2.

Ishimaverenkeghen yase i sha kwagh u mnder u shin ku la i har sha kwagh u a er a ikyom yase la ga, kpa i har sha jighjigh u se ne ser Aôndo ngu a tahav mbu kuren uityendezwa nav la. (Aer. 24:15) Sha kpôô yô, se fatyô u kaven gbenda u Aôndo yange er ivande i nderen ior shin ku sha ayange a tsuaa la tsembelee ga, shin gbenda u una va er i̱ ken hemen la kpaa ga. Nahan cii kpa, se na Yehova jighjigh. A na ior cii “ikyav i mimi” sha mnder u a nder Yesu shin mbakpenev la.—Aer. 17:31; Luka 24:2, 3.

Gba u Mbakristu vea wa ikyo sha aeren man mnenge u ior kua atindi a i we hen ijiir ve sha kwagh u gbenda u eren a ikyom i mbakpenev la. (2 Kor. 6:3, 4) Sha nahan yô, aluer ka u a nande ikyom i or shin a nande ga kpa, ka or la iyol i nan shin tsombor u nan ua tsua ye.