SHIGHE u ior mba Aôndo undu tar u Babilon ken inyom i 537 cii man shighe u Kristu la, kwagh yange gba Yehova tsung sha gbenda u lu u vea kar sha mi u hiden yemen Yerusalem la. A kaa a ve ér: “Sôr nen ior gbenda, haa nen inya guree, haa nen inya sha igbudu guree, kohol awen kera.” (Yes. 62:10) Hen ase sha gbenda u Mbayuda mbagenev yange vea er kwagh ne yô. Alaghga Mbayuda mba ve vande duen la, yange vea er gbenda, vea cir agber shi vea sôr u, ua hingir vaanaa. Yange vea̱ er nahan yô, kwagh ne una wase anmgbianev vev mba ve lu van ken ijime, mba ve kpa ve tôô gbenda shon u hiden yemen Yerusalem la.

Se kpa gbenda ngu u ka se dondo shighe u se lu eren ityom i i ne se ken mcivir u Yehova yô. Yehova soo ér mbacivir un cii ve zenden sha gbenda ne, a kwagh u tagher ve shio. Mkaanem nam taver se ishima ér: “Sôr gbenda u angahar a ou u̱ lu vaanaa, man igbenda you cii kpaa i̱ lu taveraa.” (Anz. 4:26) Wea lu gumor shin wea wa zan gighir kpa, u fatyô u nengen a kwaghfan u a lu ken kwaghwan u Aôndo ne.

Alaghga u ungwa ior ôr kwagh u ma gumor shin gumkwase ér: ‘Gumkwase ne una za ikyura kpishi’ shin, ‘Gumor ne una er gwaikyaa.’ Agumaior cii ka ve nôngo u lun a gbong gbong iyol shi ve henen kwagh tsang tsang, shi i sar ve tsung u ma ve ze ikyura. Ka nahan ve Bibilo i kaa vough nahan ér: “Icivir i ikyaior ka agee a ve” ye. (Anz. 20:29) Gumor shin gumkwase u nan er tom a mfe man agee a nan u civir Yehova yô, ka nan kôrcio u eren akaa a ken jijingi a nan we ishima la, shi nan zua a msaanyol u mimi kpaa.

Nahan kpa, er u fe nahan, kwagh gba tar ne kpishi sha mfe u agumaior a ase a lu a mi sha akaa la. Gumor shin gumkwase u nan lu Orshiada ka nana fa takerada tsembelee ken makeranta yô, or u wan nan kwagh shin tica u nan gayô wanye ugen u ve ze makeranta ijiir i môm yô, nan tuur nan ken ityô ér nana yem yunivasiti sha er nana za ikyura ken tar ne yô. Gayô alaghga ior mbagenev vea mee gumor shin gumkwase u civir  Yehova, u nan fe anumbe a eren yô ér nana tsua anumbe a eren ken uma u nan. I lu nahan u tagher a imbakwagh ne vee, shin u fa or u nan tagher a imba mkighir laa? Ka nyi ia wase Orkristu ve nana tsua akaa sha kwaghfana?

Atesen a Bibilo aa fatyô u wasen or wan agoyol u zan sha gbenda u uma u hemban doon cii la. Orpasenkwagh 12:1 kaa ér: “Umbur u A gbe u la sha ayange a iyev ou.” U er nan ve we shin orkwar wou ne ‘umbur u a gbe ne la’ sha gbenda u hemban doon ciili?

Hen ase sha kwagh u yange er Eric * u a dugh hen ijiir igen shin Ityôtar i Afrika la. Un yange soo bor u gbidyen tsung. Shighe u Eric lu anyom 15 la, i tsua un hingir môm ken nongo u gbidyen bor sha ci u tar na. Lu u alaghga tsô a za tese un bor sha gbenda u hemban doon cii hen veghertar u Yuropa, nahan una gema gbidyen bor ngohol inyaregh. Kpa una er nan ve una dondo kwagh u i we ér “umbur u A gbe u la”? Shi ka nyi we shin gumor ugen ne fatyô u henen ken kwagh ne?

Shighe u Eric lu zan makeranta la, Mbashiada mba Yehova hii u henen Bibilo a na. Nahan a hii u kaven er Orgban na una va bee a mbamzeyol mba uumace gbem sha won yô. Eric va hingir u nenge ér gba hange hange u una er tom a shighe man agee a na sha u eren ishima i Yehova. Mkav ne na yô, Eric kera tsua ér una nôngo a hingir or u gbidyen bor ngohol inyaregh ga. Kpa a tsua u eren batisema, nahan lun kôôsôô a Aôndo. Shighe kar yô, i ver un diakon shi i va lôhô un ér a za Makeranta u Henen Bibilo Ú Anmgbianev mba Nomso mba Lun Kwav la.

Luun er Eric yange una yem bor u gbidyen yô, ma lu yôughyôugh shi ma due iti kpaa. Kpa a er nahan ga, a gema a nenge a mimi u a lu ken kwaghwan u Bibilo ne: “Inyaregh ki ornyar ka gar u nan u taver je, man ka er kpekpe u taven nahan, sha mnenge u nan.” (Anz. 18:11) Mimi yô, mkor u alaghga or a nenge ér inyaregh ki ne la, ka u mimi ga. Heela tseegh ga, mba ve de akaa cii ve lu zendan inyaregh la, ashighe kpishi ka ve “kuma ayol a ve sha atsan atô kposo kposo.”—1 Tim. 6:9, 10.

Kwagh er doo yô, agumaior kpishi zua a msaanyol man mkor u mimi sha u eren tom u pasen kwagh la hanma shighe. Eric kaa ér: “M kohol zege ‘nongo’ u mbacivir Yehova, mba ve eren un tom hanma shighe la. Ka nongo u hemban doon cii u me kohol u je la, shi m sugh Yehova er a tesem gbenda u u lu gbenda môm tseegh u zuan a msaanyol u mimi shi zan ikyura ken uma yô.”

We di ye? A u we tsuan akaa a taregh a u er la yô, er nan u ser “igbenda you” i zan hen Yehova la i hingir jighilii, sha u eren tom u pania ga?—Nenge ngeren u kiriki u a lu a itinekwagh ér “ Zua a Mbamtsera Mba Or a Fatyô u Zuan a Mi ken Yunivasiti Ga Yô” la.

Shighe u orgen vea kwase na ve za shin afishi a branci a ken tar u Amerika la, ve nenge er saan mba shin Betel mba ve lu eren Yehova tom her la iyol kpishi yô. Kwase na la va nger kwagh kaa ér: “Yange se tume ityough eren akaa ase a ayange ayange la je i ngee i gande.” Kwase ne vea nom na maa ve tsua ér vea hemba nan shighe man agee a ve sha ci u seer eren ityom ken mcivir u Aôndo.

Shighe ugen la, va lu inja er kwagh u or ne vea kwase na soo ér vea gema eren ne una gande ve nahan. Kpa iyange igen ve gbidye kwar sha ivur Ruamabera igen i sha iyange shon. Ivur ne lu Yohane 8:31, ape Yesu a kaa ér, “Aluer nea lu ken kwaghôron Wam zan zan yô, ne mba mbahenen Av mimi je” la. Mba kaven kwagh u ivur ne i er yô, ve kaa a ishima ve ér: “A̱ lu nyi je sea de ia kar se sha u se lu a akaa akuma akuma kpa, ka kwagh u i doo u se er je la.” Yange ve tee zege ya u ve lu a mi la, shi ve de akaa agen a ve lu eren la, maa ve mough ve yem hen tiônnongo ugen u lu keren iwasen yô. Mba eren tom pania hegen, shi ka ve na ayol a ve sha mbamkohol mba vesen sha u wasen tom, shi ve wase u maan Ayou a Tartor kpaa. Ve nenge kwagh ne cii nena? “Kpiligh se iyol kpishi er se zough a msaanyol sha u lun a akaa akuma akuma shi eren kwagh u nongo u Yehova u kaa ér se er la yô.”

Solomon yange nger wener: “Ashe ou a̱ nengen sha hemen jighilii, akurashee ou kpaa a̱ za nôô sha ishigh yough.” (Anz. 4:25) Er deraba u a ver ashe a na jighilii sha gbenda nahan, gba u se palegh akaa a danen se, a a fatyô u yangen se u tsuan akaa a ken jijingi shi eren a la.

Ka akaa a ken jijingi a nyi u fatyô u tsuan shi erene? Kwagh môm u dedoo u se fatyô u tsuan u eren yô, ka tom u pasen kwagh hanma shighe la. Kwagh ugen yô, se fatyô u za eren tom vea ma tiônnongo u a lu ikyua a vese, u a soo ér mba ve fe kwaghpasen tsema tsema ve  za wase un u pasen kwagh tseren zege haregh na yô. Shin alaghga tiônnongo ugen una lu a mbapasenkwagh kpishi, kpa una gema a lu a mbatamen man udiakon kpishi ga. U fatyô u wasen sha gbenda môm ken igbenda ne kpa? Er nan u lam a ortamen u sôron atôônanongo, u fa aluer ka u u fatyô u za nan iwasen ga? Aluer sar u u yemen ijiir icaa za nan iwasen yô, u fatyô u pinen wer i pase u atôônanongo a a lu ica a we, a i gbe u a wase a yô. *

De se hide sha kwagh u i pase ken Yesaia 62:10 la. Alaghga Mbayuda mbagenev yange vea er tom kpoghuloo sha u sôron gbenda u hiden yemen ken tar ve la ér u lu vaanaa, ior mba Aôndo ve kar sha mi, ve za nyôr ape ve lu zan la. Aluer we kpa u ngu nôngon wer u er akaa a u we ishima u eren ken mcivir u Yehova la yô, de gbe uwer ga. Sha iwasen i Aôndo yô, we kpa u er akaa a u we ishima u eren ken mcivir na la. Za hemen u sônon Yehova wer a na u kwaghfan, er u lu nôngon wer u hemba akaa a a lu tagher we u eren akaa a u we ishima u eren la yô. Shighe a karen yô, u nenge er una wase u u “sôr gbenda u angahar a ou [ua] lu vaanaa” yô.—Anz. 4:26.