1. Ka nyi i hembe lun se kwagh u vesen ken mcivir wase?

I LU nahan u nenge i nger iti i Yehova sha ma iyou shin sha akaa a i ver ken iyou i koson akaa a mbayiase vee? Wea nenge yô, ka keng yange a doo u shi a saan we iyol kpaa. Kera ga kpa, iti i Aôndo la ngi se kwagh u vesen sha ci u se mba Mbashiada nav. Nyian ne, ma nongo môm ngu sha tar u i fe u sha iti neer se ga. Nahan cii kpa, gba u se er kwagh a hemba u yilan di sha iti i Aôndo tseegh tsô la. Er se lu a ian i icivirigh i lun Mbashiada nav yô, gba u se eren kwagh sha gbenda u van un a icivir.

2. Ian i icivirigh i se lu a mi i yilan se suur sha iti i Aôndo la gema na se tom u nyi?

² Er se yer sha iti i Yehova yô, maa a gba doon un a vese tsô ga. Gba u se kuran atindi a a we sha kwagh u aeren a wang la. Ka nahan ve Bibilo i umbur se ér gba u ior mba Yehova vea “de ifer” ye. (Ps. 34:14) Apostoli Paulu yange pase kwagh ne wang. A nger ér: “Hanma or u nan teren iti i [Yehova] yô, nana̱ pav a ifer.” (Ôr 2 Timoteu 2:19.) Er se lu Mbashiada mba Yehova yô, i fa se wuee ér se mba ior mba ve yer sha iti na yô. Kpa se pav a ifer nena?

3, 4. Ka ivur i nyi i tsum mbatimen sha akaa a ken Bibilo mbageneve, man ka sha ci u nyi?

³ Nenge ase akaa agen a Paulu a er ken 2 Timoteu 2:19 la.  Ken ivur ne, i ôr kwagh u “imagh ki Aôndo ki ki tenger ga” la, maa i ter akaa ahar a i nger a sha imagh ki shon yô. Kwagh u hiihii la kaa ér “[Yehova] fa mba Nav,” man ikyav tese wang ér lu kwagh u i nger ken Numeri 16:5 la Paulu lu ôron ye. (Nenge ngeren u a kar la.) Kwagh u sha uhar la di kaa ér, “hanma or u nan teren iti i [Yehova] yô, nana̱ pav a ifer.” Mkaanem man taver mbatimen sha akaa a ken Bibilo mbagenev u kaven kpen kpen. Sha ci u nyi?

⁴ Mkaanem ma Paulu man tese ér lu ivur Ruamabera igen lu ôron kwagh u i ye. Nahan kpa, ka inja er ngeren u ken Ruamabera u ken Zwa Heberu môm kpa zua sha kwagh u Paulu ôr la ga nahan. Sha nahan yô, lu nyi Paulu lu ôron shighe u kaa ér, “hanma or u nan teren iti i [Yehova] yô, nana̱ pav a ifer” laa? Paulu yange ôr kwagh u i nger ken Numeri ityough 16, sha kwagh u ihyembeato i Kora la, maa ôr mkaanem man. Nahan kwagh u sha uhar la kpa zua sha kwagh u ihyembeato shonoo?

5-7. Ka akaa a nyi yange er sha ayange a Mose la, a Paulu a ter ken 2 Timoteu 2:19? (Nenge foto u a lu sha mhii u ngeren ne la.)

⁵ Bibilo kaa ér Datan man Abiram, ônov mba Eliabi, yange ve kohol Koraki ve lu hendan a Mose man Aron. (Num. 16:1-5) Yange ve laha Mose ken igbar shi ve venda ér ka Aôndo a ne un tahav kpaa ga. Mbahembanato mban za hemen u lun hen atô u ior mba Yehova, ve lu nôngon u vihin mlu u ken jijingi u mbajighjigh mbagenev mbara. Ka va kom u Yehova una tese mkposo u mbacivir un sha mimi a mbahembanato yô, a pase kwagh u gba u vea er la wang.

⁶ Ngeren la kaa ér: “Nahan TER ôr kwagh a Mose kaa er: Ôr kwagh a ior kaa ve wer: Kar nen hen tenti u Koraki man Datan man Abiram kera. Tsô Mose mough za hen Datan man Abiram; mbavesen mba Iserael kpaa cir un ijime. A za ôr kwagh a ior, a kaa er: Kar nen hen utenti mba aferaior mban kera yôô; de benden nen ma kwagh ve ave ga, sha er né tim sha asorabo a ve la cii ga yô. Tsô ve kar hen utenti mba Koraki man Datan man Abiram kera.” (Num. 16:23-27) Yehova maa tim mbahembanato mbara cii kera. Kpa mbacivir un mba mimi, mba ve pav a ifer sha u karen her kera la cii yô, i tim ve ga.

⁷ Yehova fe kwagh u a lu or ken ishima la! Ngu a nenge a jighjigh u nan, u mba ve lu mba nav la. Nahan kpa, yange gba u mba ve tile sha mimi la vea er kwagh, man kwagh shon yô, lu u paven a mbaaferev mbara. Sha nahan yô, a fatyô u lun kwagh u i nger ken Numeri 16:5, 23-27 la Paulu lu ôron kwagh na, shighe u nger ér: “Hanma or u nan teren iti i [Yehova] yô, nana̱ pav a ifer” la ye. Kwagh ne zua sha mkaanem ma Paulu ma ma kaa ér: “[Yehova] fa mba Nav” la.—2 Tim. 2:19.

8. Er nan ve u yilan sha iti i Yehova shin lun ken tiônnongo u Kristu tseegh tsô la i kom ga?

⁸ Er Paulu lu teren akaa a yange er sha ayange a Mose la yô, lu umbur Timoteu er i gbe u una er kwagh u una wase un u kuran ikyaryan na vea Yehova yô. U lun ken tiônnongo tseegh kuma ga, vough er sha ayange a Mose la kpa u yilan sha iti i Yehova tseegh la kuma ga nahan. Gba kpee u mbacivir Yehova sha mimi vea pav a ifer. Nahan lu u Timoteu una er nan sha kwagh nee? Man ka nyi ior mba Yehova nyian vea fatyô u henen ken kwagh u jijingi yange mgbegha Paulu wa laa?

9. “Anyimanakaa a ibume a injaa ga” la yange va a zayol ken nongo u Kristu sha ayange a mbaapostoli la nena?

 ⁹ Mkaanem ma Aôndo ka ma wa se kwagh jighilii sha kwagh u aferakaa a i gbe u Mbakristu vea pav a a shin vea nyagh la. U tesen ikyav yô, Paulu wa Timoteu kwagh ken avur a a kase ivur i 2 Timoteu 2:19 la ér, a “de sendegh kwaghôron sha asemberakaa a ôron ga” shi a “palegh ayôôso a gbilinigh.” (Ôr 2 Timoteu 2:14, 16, 23.) Mbagenev ken nongo u Kristu yange ve lu samber a atesen a mbavendan mimi. Shi ikyav tese ér mbagenev lu tesen akaa a van a anyiman. Atesen ne yange aa kaha a atesen a Ruamabera ga je kpa, lu a van a mpav. Atesen ne va a zwa zôhôn man anyimanakaa, nahan lu nôngon u vihin mlu u anmgbianev ken nongo u Kristu. Nahan Paulu pase var var er i gbe u a “nyagh anyimanakaa a ibume a injaa ga la” yô.

10. Shighe u se tagher a mvende u vendan mimi yô, doo u se er nena?

¹⁰ Nyian ne, ior mba Yehova mba fe tagher a mvende u vendan mimi la ken tiônnongo ga. Nahan cii kpa, shighe u se tagher a atesen a a zough sha Ruamabera ga yô, a gba u se venda a shar shar, a̱ lu han a dugh je kpaa. Aluer se mba nyiman kwagh a mba vendan mimi ishigh a ishigh shin sha u tindin ve a loho sha ma kwagh u ve nger sha Intanet, shin sha ma gbenda ugen yô, se lu eren kwagh sha kwaghfan ga. Awashima wase una lu u wasen imba or la je kpa, iliam yase a nan ia lu ieren i hendan a ityesen i Ruamabera i se sember timen sha mi la. Nahan er se lu ior mba Yehova yô, gba u se venda atesen a mbavendan mimi la elegh elegh.

11. Ka nyi ia fatyô u van a “anyimanakaa a ibume,” man Mbakristu mba ve lu mbatamen la vea ver ikyav i dedoo nena?

¹¹ Dugh mvende u vendan mimi la sha yô, akaa agen kpa nga a aa fatyô u vihin bem u tiônnongo yô. Ikyav i tesen yô, mbamnenge mba se lu a mi kposo kposo sha kwagh u iemberyolough la una fatyô u va duen ken “anyimanakaa a ibume a injaa ga la.” Shighe u ior ve lu eren iemberyolough i i hendan a atindi a Yehova a wang la yô, Mbatamen mba ken tiônnongo ve̱ de ongo ato tsô ér mba palegh anyimanakaa ga. (Ps. 11:5; Ef. 5:3-5) Nahan cii kpa, mbatamen ka ve wa ikyo sha er vea samber a mbamnenge vev sha gbaa ne ga yô. Ka ve dondo kwagh u Ruamabera a we ve mbakuran mba ken tiônnongo ne, ér: “Kura nen ikyumuile i Aôndo i i lu hen ven la, . . . i̱ de lu er ne mba eren tahav sha kwagh u i we ne sha ikyev ga, kpa lu nen ikyumuile la ikyav.”—1 Pet. 5:2, 3; ôr 2 Mbakorinte 1:24.

12, 13. (a) Mbashiada mba Yehova mba tsough iemberyolough i vea er la nena, man ka akaawan a Bibilo a nyi a zough sha kwagh ne? (b) Akaawan a i er ken ikyumhiange i sha 12 la zua sha akaa kposo kposo a or ka nan tsua u eren iyol i nan la nena?

¹² Nongo wase pase ufiim man anumbe man ityakerada kua atsam a i gbe u se palegh, shighe u se eren iemberyolough la jighilii ga. Sha ci u nyi? Sha ci u Bibilo taver hanma or ishima ér nana eren tom a “mkav u ken ishima . . . u paven kwagh u dedoo a kwagh u bo.” (Heb. 5:14) Ruamabera ngu a akaawan a vesen a Orkristu nana fatyô u dondon shighe u nan lu tsuan iemberyolough i nana er yô. Hanma kwagh u se eren ken uma wase cii, awashima wase i lu u ‘karen fan kwagh u a doo Ter ishima la.’ (Ef. 5:10) Bibilo tese ér mbayaav mba a tahav, nahan vea fatyô u vendan ér i de eren iemberyolough igen hen ya ve ga.—1 Kor. 11:3; Ef. 6:1-4.

¹³ Akaawan a Bibilo a i pase sha heen ne ka a sha kwagh u iemberyolough tseegh ga. Mbamnenge mba se lu a mi  sha kwagh u iyolwuhan man hwe, kua twersôron man kwaghyan, man akaa agen kpaa la, aa fatyô u van a anyiman. Nahan, ka a per atindiakaa a Ruamabera sha akaa ne ga yô, ior mba Yehova ve palegh u gban anyiman sha ambaakaa ne, gadia “kpan u Ter yô, ka u nana̱ lu or u ayongo ga keng, kpa nana̱ lu sar sar a ior cii.”—2 Tim. 2:24.

14. Ka ikyav i nyi Paulu yange tese sha u pasen er i gbe u se palegh ujende mba bovo?

¹⁴ Ka sha gbenda ugen u nyi nahan mba ‘ve teren iti i Yehova la ve paven a ifere’? Ka sha u lun paleghaa a mba ve eren aferakaa la. Umbur wer Paulu yange tesen ikyav sha kwagh u “imagh ki Aôndo ki ki tenger ga” la been yô, shi tese ikyav igen kpaa. A nger ér: “Ken ya u vesen yô, ka ikyav mbi sha zenaria man azurfa tseegh mbi lu ker ga, kpa mbi sha kon man mbi sha inyatyuu kpaa mbi. Mbigenev ka mbi eren akaa a icivirigh a mi, mbigenev yô, ka u eren akaa a a lu a icivir ga la a min.” (2 Tim. 2:20, 21) Been yô, a taver Mbakristu asema ér ve ‘dugh’ shin ve palegh ikyav mbi mbi “lu a icivir ga” la.

15, 16. Ka nyi se fatyô u henen ken ikyav i Paulu tese sha kwagh u “ya u vesen” laa?

¹⁵ Injakwagh ne ngi ôron ér nyi? Paulu tôô tiônnongo u Kristu kar sha “ya u vesen,” a gema a kar mba ken tiônnongo di sha “ikyav” mbi ken ya. Ikyav mbi ken ya mbia fatyô u ilen shin tan nduran, aluer i ver mbi hen ijiir i wang ga yô. Orya la nana pav mbi nana ver kposo a ikyav mbi mbi lu wang la, er ikyav mbi yôron iwer a mi nahan.

¹⁶ Kape nyian kpa i gbe u ior mba Yehova mba ve nôngon tsung ér vea lu a aeren a wang la vea palegh u lun kôôsôô a mbagenev ken tiônnongo mba ve vende u dondon akaawan a Yehova hanma shighe je la. (Ôr 1 Mbakorinte 15:33.) Aluer gba u se palegh u lun kôôsôô vea mbagenev ken tiônnongo yô, nenge er i hembe gban u se “nyagh” u lun  kôôsôô a mba ken inya, mba ve kpishi ve lu ‘mba inyaregh ki doo ve ishima man mbahemban mbamaren vev ato man mbalun wang ga, man mbaerenangereke man anomaior a bo man mba kwagh u dedoo a doo ve ga man mbapasen ior aker man mba iember i iyolough i hembe doon ve a Aôndo la’ yô!—2 Tim. 3:1-5.

17. Mbaiserael mba tilen sha mimi yange ve tese wang ér ve pav a iferkwagh nena?

¹⁷ Bibilo pase se kwagh u Mbaiserael mba mbajighjigh mbara yange ve er zum u i kaa a ve ér, “kar nen hen tenti u Koraki man Datan man Abiram kera” la. Ngeren la kaa ér “[fese je, NW] ve kar” kera. (Num. 16:24, 27) Ve ta akperan shin ve er zôzô ga. Ivur la shi pase er yange ve er kwagh ne ve shi uwegh ga yô. Ve “kar . . . kera, [hanma ijiir cii, NW].” Mba tilen sha mimi mban wa iyol u eren hanma kwagh u i kaa ve cii. Ve lumun u eren kwagh a ishima i gbar gbar. Yange ve tese wang ér ve ta ikyaa a Yehova, ve gema ve pav a iferkwagh. Ieren ve ne tese se nyi?

18. Lu ieren i nyi Paulu lu ôron kwagh u i, shighe u a wa Timoteu kwagh ér a “yevese asaren a sha inja i mbayevikyaior” laa?

¹⁸ Shighe u i lu u se er kwagh u una kura ikyaryan yase vea Yehova yô, gba u se er un fese a atimbir shio. Lu ieren i Paulu lu ôron kwagh u i, shighe u a wa Timoteu kwagh ér a “yevese asaren a sha inja i mbayevikyaior la” je la. (2 Tim. 2:22) Shighe la Timoteu wa ikyondo, alaghga hemba anyom 30. Nahan cii kpa, “asaren [a ibume] a sha inja i mbayevikyaior la” nga fe been sha anyom ga. Lu u shighe u Timoteu a tagher a asaren la yô, a “yevese.” Inja na yô, lu u Timoteu una “pav a ifer.” Yesu kpa yange ôr imbakwagh ne, ér: “Aluer ishe you ia na u gbev mbu nôngon yô, dugh i, ta kera.” (Mat. 18:9) Nyian ne, Mbakristu mba ve lu a kwaghwan ne ken ishima yô, mba haan iyol inya sha akaa a aa fatyô u vihin mlu ve vea Yehova la ga, ka ve er kwagh sha mi fese, mba te akperan ga, shi mba we a wa ahô ga.

19. Ka nyi mbagenev ve tsough u eren nyian sha u kuran ikyaryan ve a Yehova?

¹⁹ Mbagenev mba yange ve vanden hunden msôrom cii ve va hingir Mbashiada la tsua a ishima ve ér vea kera ma a ma msôrom ga kuaa. Mbagenev ka ve palegh igbenda i eren iemberyolough igen i i lu i bo ga, kpa ia fatyô u moughon isharen i dang ken a ve la. (Ps. 101:3) U tesen ikyav yô, cii man anmgbian ugen hingir Orshiada yô, i doo un u zan upati mba i vinen amar a idyar her la kpishi. Kpa va fe mimi yô, a tswer amar a vinen kuaa, ka a lu hen iniongo i i lu Mbashiada ve er je kpaa, sha er kwagh ne una nder asaren a dang ken a na, shin una umbur un amar a tse la ga yô. Sha mimi yô, gba u Mbakristu vea twer msôrom shin amar a vinen shin akaa agen a a lu a bo ga la elegh elegh ga. Nahan cii kpa, gba u se cii se wa ikyo shi se kura ikyar i se ye a Yehova la.

20. Er alaghga a lu se ican u ‘paven a ifer’ nahan kpa, ka nyi i ne se vangertiôr man msurshima?

²⁰ Er i yilan se ér Mbashiada mba Yehova yô, ka se kwagh u icivirigh kpen kpen! Kpa kwagh gema ngu u se er ve se kuma sha iti la yô. Gba kpee u se “pav a ifer” shi se “de ifer” kpaa. (Ps. 34:14) Sha kpôô yô, ka hanma shighe i lun zange u eren nahan ga. Kpa er se fe ser hanma shighe yô, Yehova una za hemen u soon mba ve lu “mba Nav” shi ve dondon igbenda na la yô, se zua a msurshima.—2 Tim. 2:19; ôr 2 Kroniku 16:9a.