ANMGBIAN u kwase u i yer un ér Katherine yô, yange vese ken tar u Amerika. Shighe u lu anyom 16 la, i er un batisema hingir kwase u civir Yehova. Yange pasen kwagh kpoghuloo, kpa gema lu ior kpuaa tseegh ungwan loho u Tartor hen haregh u pasen kwagh her la ye. A kaa ér: “M ôr kwagh u ior mba yange ve sôn Aôndo ér a tindi or nana va wase ve vea fa un la. Ashighe kpishi yange m tôm mer ma m zough a imbaor la, kpa mayange m zua a nan ga.”

Katherine yange pasen kwagh hen haregh ne anyom imôngo yô, hii u henen sha kwagh u moughon yemen hen ijiir i ior vea hemba ungwan loho u Tartor yô. Kpa gema lu henen ér una fatyô u eren kwagh ne ga. Ken uma na cii, lu kwa môm tseegh undu tsombor na ye. Yange undu tsombor na kasua uhar tseegh, kpa hanma iyange yô, ya a sar un. Nahan cii kpa, hemba saren un u zuan a msaanyol u or ka nana wase mbakeren Yehova ve nan zua a mi la. Yange henen sha ajiir kposo kposo a una fatyô u za pasen kwagh her la been yô, a nger a pine afishi a branci a ken tar u Guam, nahan afishi ne pase un kwagh u soo u fan la. Ken uwer u Julai 2007 la, Katherine mough yem ken tar u Saipan, icile i ken Ityeku i Pacific. Mough hen ya na yem hen icile ne gba ica kuma er ukilomita 10,000 nahan. Hen shighe ne Katherine lu anyom 26. Yange yem nahan nyi i ere?

Katherine yange za nyôr hen tiônnongo u he la ica i gba ga maa zua a kwase u i yer un ér Doris, u hemba anyom 40, shi lumun ér a hen Bibilo a na yô. Ve hen kwagh ken takerada u Bibilo Tese la mba been mtom ma mtar ma hiihii mara yô, ishima hii u zan Katherine iyol. A kaa ér: “Doris lu tsev tsev kpishi, nahan m soo mer mfe na la a de saan ishe ga. Er m lu a vande henen Bibilo a or hanma shighe ga yô, m nenge mer anmgbian u kwase u nan fe u henen Bibilo a or i hembem, shi nan lu kwav u Doris yô, nana hen kwagh a na.” Katherine sôn Yehova ér a wase un una zua a anmgbian u kwase u una na nan Doris nana hen Bibilo a na yô. Sha iyange igen yô, a kaa ér una pase Doris er un soo ér anmgbian u kwase ugen nana hen kwagh a na yô.

Katherine kaa ér: “M lu a ôr Doris kwagh ne ga tsô maa a kaa a mo ér un ngu a zayol ugen u un soo u teren mo kwagh sha mi yô. M ongo cii yô, m pase un er Yehova yange wasem u sôron imba zayol u a lu a mi la yô. Nahan a sughum.” Doris maa kaa a Katherine ér: “Yehova tindi u ér u va wasem. Sha iyange i u hii van hen ya wam la, m lu ôron Bibilo zan a mi ave, m ôr i ahwa imôngo je. M lu vaan, sônon Aôndo mer a tindi or nana va wasem u kaven Bibilo. Lu shighe la je u va kemam  uwegh sha hunda ye. Yehova ungwa msen wam!” Shighe u Katherine lu ôron kwagh ne la, doo un je er una vaa a vaa nahan. A kaa ér: “Mkaanem ma Doris mara tese ér Aôndo ungwa msen wam. Yehova tesem ér m kuma u me za hemen a kwaghhenen la.”

Yange i er Doris batisema ken inyom i 2010 la, man ngu henen Bibilo a ior kpishi nyian. Katherine kaa ér: “Doom kpishi er m kur isharen yam i zuan a or u me wase nan nana civir Yehova la yô!” Nyian ne, Katherine ngu eren tom u ikpur pania ken tar u Kosrae, icile igen ken Ityeku i Pacific.

Anmgbianev mba nomso man mba kasev (mba hii anyom 19 zan zan 79 nahan) mba hemban iorov 100, mba eren tom hen haregh u Micronesia, ape kwagh a hembe gban sha mbapasenkwagh yô. Anmgbian u kwase u i yer un ér Erica, u yange mough yem ken tar u Guam ken inyom i 2006, shighe u lu anyom 19 la, pase mnenge u anmgbianev mba pasen kwagh sha gbashima mban cii ve lu a mi yô. A kaa ér: “U eren tom u pania hen haregh u i sar ior tsung u fan mimi la ka kwagh u doon kpen kpen. Doom kpishi er Yehova a wasem u eren tom ne nahan. Ka kwagh u or a er a uma u nan ve a hemba saan nan iyol je ne!” Nyian ne, saan Erica iyol kpishi u eren tom u ikpur pania hen geri u Ebeye, ken uicile mba i yer ér Marshall la. Nahan kpa, mbamtaver mba ken tom u yemen za pasen kwagh ken tar ugen la. De se time sha mbamtaver mban utar, nahan se nenge er mba ve yem hen haregh u Micronesia la ve lu wan ishima a ve yô.

Mlu u hen ijiir la. Anmgbian u a lu anyom 22, i yer un ér Simon yô, yange za nyôr hen icile i Palau ken inyom i 2007 la, ica i gba ga je tsô a kav er una fatyô u zuan a inyaregh kpishi er shighe u lu ken tar na, ken Ingila vezuan a mi la ga yô. A kaa ér: “Yange gba u me kera yamen hanma kwagh u m soo cii ga. Hegen ne, ka m tsua akaayan a me yam la sha kwaghfan, shi m ker akaa a m soo u yamen la ken ushoopu kposo kposo sha er me za yam ape i taver ishe ga yô. Ma kwagh wam ka una vihi kpa m ker ikyav mbi tsev, shi m ker or u nana wasem u sôron yô.” Er va gba u Simon una gema eren akaa akuma akuma yô, a er nena? A kaa ér: “Kwagh ne wasem m fa ugbayol av mba ve hembe lun hange hange yô, shi m kav er me lu a akaa cuku tseegh kpa a kumam yô. Yehova tesem wang sha ashighe kpishi ér un wam ikyo. Ken anyom ataankarahar a m er tom u pasen kwagh heen ne cii, shighe môm kpa kwaghyan ngu a banem ga, kua ijiir i tsan kpaa.” Sha kpôô yô, Yehova suen mba ve eren akaa ken uma ve akuma akuma sha ci u ve soo u vanden keren Tartor na la.—Mat. 6:32, 33.

Isharen i zan ken ya. Erica u se vande ôron kwagh na la kaa ér: “M undun tsombor wam ga, nahan ishima lu zan mo iyol er ya a va sarem, me kera ver ishima sha tom wam u pasen kwagh la ga nahan.” Yange wa agoyol nena? A kaa ér: “Cii man m yem yô, m ôr ngeren mbagen ken Iyoukura sha kwagh u isharen i zan ken ya la. Kwagh ne wam agoyol u va wan ishima a isharen la. Ken ngeren ugen la, ngô ugen taver wan na u kwase ishima, pase un er Yehova una kende un ga yô, a kaa a na ér, ‘Yehova una nenge sha a we a hemba er m nengen sha a we la.’ Kwagh ne taver mo ishima kpishi.”  Anmgbian u kwase ugen u i yer un ér Hannah yô, ngu eren tom u pasen kwagh la vea nom na patrick hen geri u Majuro, hen uicile mba ken tar u Micronesia, mba i yer ér Marshall la. Ya ka una sar Hannah yô, a wa ishima sha u veren ishima sha kwagh u anmgbianev mba ken tiônnongo na la. A kaa ér: “M gbe uwer u sughun Yehova sha ci u mzough wase u anmgbianev u sha tar cii la ga, gadia mba ve lu ken mzough shon la kpa ka tsombor wam. Vea tesem dooshima ga yô, ma m fetyô u eren tom ape kwagh a hembe gban sha mbapasenkwagh ne ga.”

U kôron azende. Anmgbian Simon kaa ér: “Ka wea za nyôr ken tar ugen yô, sha hiihii la hanma kwagh a nôngo u kahan we. Ashighe agen ka i sarem u eren asenge a mba vea fa ér ka asenge yô.” Erica di kaa ér: “Sha hiihii la, lum er or môm kpa kwagh gba nan a mo ga nahan, kpa kwagh la gema wasem u henen sha awashima wam u yemen ijiir igen la. M yem ijiir igen u za keren mbamtsera av ga, kpa ka u za seer eren Yehova tom.” Shi a kaa ér: “Shighe kar yô, m kôr azende a injaa, a doom mo ishima kpishi.” Simon yange nôngo kpoghuloo hen zwa Palau, u u lu wasen un u ‘bughun ishima na’ hen anmgbianev mba nomso man mba kasev mba hen haregh la yô. (2 Kor. 6:13) Iniôngon na i henen zwa Palau la na yô, anmgbianev soo un kpishi. Sha kpôô yô, anmgbianev mba ve sember van hen ijiir man mba ve vande lun her la, ka vea eren kwagh ken mzough yô, ve cii ve zua a mtsera u lun kôôsôô ken tiônnongo. Ka mbamtsera mbagenev mba nyi mba ve lu za pasen kwagh ape kwagh a hembe gban sha mbapasenkwagh la ka ve zua a mini?

Apostoli Paulu yange kaa ér: “Or u nan lee wuee yô, nana sunda di wuee je.” (2 Kor. 9:6) Kwaghwan u a lu ken mkaanem man la ngu sha ci u mba ve lu seer shighe ve u eren tom u pasen kwagh la jighilii. Ka mbamtsera mba nyi ve lu ‘sundan wuee’ ken tar u Micronesia?

Aan shi her kpishi ken tar u Micronesia, a hiin Bibilo i henen a ior shi nengen er vea fa mimi u ken Mkaanem ma Aôndo, shi vea dondo un ve vea za ikyura ken jijingi yô. Shi Patrick vea Hannah pase kwagh ken ancile ugen u i yer ér Angaur la. Ior mba hen ancile ne kuma er iorov 320 nahan tseegh. Yange mba pasen kwagh her iwer ihiar yô, ve za zua a kwase ugen u a lu yesen ônov tswen yô. Yange ngôôr ga je maa lumun ér i hen Bibilo a na, shi a ngohol mimi saan saan, shi a gema uma na sha gbenda u vesen kpaa. Hannah kaa ér: “Hanma kwa u yange sea hen kwagh a na sea mough u yemen sha akeke ase yô, mo vea nomom se kenger ayol a ase, maa se kaa ser: ‘Se sugh u Yehova!’” Hannah shi kaa ér: “M fa, Yehova ma a urugh kwase ne sha ma gbenda ugen ér a fa un, kpa ka er yange se yem ape kwagh a hembe gban sha mbapasenkwagh nahan ve se zua a na shi se wase un fa Yehova ye. Kwagh ne ka môm ken akaa a hemban doon, a a er se ken uma wase yô!” Erica kaa ér, “Ka wea wase or nana fa Yehova yô, i saan we iyol kpen kpen!”

Ken ityar kpishi, kwagh gba sha mbapasenkwagh u Tartor hemba ave a tse. U fatyô u za pasen kwagh hen ma ijiir a i gbe u a na iwasen la kpa? Sôn Yehova a wase u seer lun a isharen i yemen hen ijiir igen za pasen kwagh la. Lam a mbatamen, gayô ortamen u sôron atôônanongo shin mba ve vande pasen kwagh ken tar u kwagh a hembe gban sha mbapasenkwagh yô. U nguren wan iyol yô, nger afishi a branci a a nengen sha haregh u u soo u za eren tom her la, wer a seer tan we iwanger. * U er nahan yô, alaghga we kpa u kohol anmgbianev mba nomso man mba kasev (agumaior man mbabeenyol, mbaukwaav shin noov man kasev) udubu imôngo, mba ve ne ayol a ve shi ve lu zuan a msaanyol u ‘sundan wuee’ la.