PETERU yange nyiman ér un fa Yesu ga. Been cii yô, a hide a vaa tsung. Shin er apostoli ne yange una lu nôngon ér i hide i zôôm un ken jijingi nahan kpa, Yesu soo u nan un tom u wasen mbagenev. Nahan Yesu kaa a na ér: “Shighe u ú gema ishima yô, taver anmgbianev ou asema.” (Luka 22:32, 54-62) Peteru yange va hingir môm ken mba ve lu mtuunummbaiorom ken nongo u Kristu, sha shighe u mbaapostoli la. (Gal. 2:9) Kape or u yange nan vande eren tom u ortamen nan va de kpa nana fatyô u hiden eren tom ne, nahan zuan a iember ken tom u taver mba ve civir Aôndo a nan imôngo je la.

Mbagenev yange ve lu mbatamen, kpa i va dugh ve sha, man alaghga kwagh ne na ve hen ér kwagh hemba ve a hemba je. Anmgbian ugen ken veghertar u South America, u yange er tom u ortamen hemba anyom 20 yô, mba yer un ér Julio, * a kaa ér: “U wan iyol sha akaaôron, man u za sôron anmgbianev, man u eren tom u wasen anmgbianev av mba ken tiônnongo la yange hingir ikye yam! Er m kera lu ortamen ga yô, hingir mo dang. Kohol cii yô, uma yange taver mo hen shighe la kpishi.” Nyian ne, Julio hide ngu eren tom u ortamen.

Orhenen Yakobu yange nger ér: “Anmgbianev av, i̱ lu ne kwagh u iember tseegh shighe u ameen atô kposo kposo aa va tser ne yô.” (Yak. 1:2) Yakobu lu ôron kwagh u ameen a se tagher a mi sha ci u tôvacan man myen wase la. A ter kwagh u asaren a iyolough man msange u sha dooshima, man ambaakaa la nahan. (Yak. 1:14; 2:1; 4:1, 2, 11) Shighe u Yehova a kôôm se yô, a fatyô u vihi se tsung. (Heb. 12:11) Kpa gba u ameen ne aa wundugh se ga.

Aluer i dugh se ave sha ityom i yange i na se ken tiônnongo la sha je kpa, se mba a ian i karen jighjigh wase fan er a lu la, shi tesen Yehova ser a doo se ishima. Shi se fatyô u henen sha ityôkyaa i yange i na ve  se lumun u eren ityom shon yô. Lu sha ci u mtsera wasee, shin ishima yange mgbegha se u eren tom ne sha ci u Aôndo doo se ishima shi se na jighjigh ser tiônnongo ka u na, shi gba u a koso tiônnongo shono? (Aer. 20:28-30) Mba yange ve vande lun mbatamen ve i va dugh ve, kpa ve ze hemen u civir Aôndo her cii tese hanma or, kua Satan ér, Yehova doo ve ishima ka sha mimi je.

Shigh u i tsaha Tor Davidi ér a er asorabo a vesen la, a ngohol mtsaha la, nahan i de un asorabo na. Davidi wa icam kaa ér: “Saan or u i de nan kwaghbo u nan la iyol, man i cir isholibo i nan kpaa yô. Saan or u TER A ne nan ibo sha ifer i nan ga la, iyol; shi nan lu a icugh ken ishima i nan kpaa ga yô.” (Ps. 32:1, 2) Tsaha yange u wase Davidi sôr inja je ka u henen a hen ga, nahan a hingir orkuran u dedoo u ior mba Aôndo.

Ashighe kpishi anmgbianev mba ve hide ve hingir mbatamen sha kwa har la ka ve hemba fan u u kuran ikyumuile i Aôndo cii. Ortamen u un kpa kwagh na a lu nahan yô, kaa ér: “Hegen m hemba fan u nengen sha kwagh u mba ve er isholibo la cii.” Ugen di kaa ér: “Ian i icivirigh i eren anmgbianev av tom ne hemba gban mo kwagh hegen cii.”

Orpasalmi yange nger ér: “[Yehova] zehe gbem ga.” (Ps. 103:9) Sha nahan yô, doo u se hen se mayange Aôndo una kera na or u yange nan er isholibo i vesen la jighjigh ga ze. Anmgbian ugen u i yer un ér Ricardo yô, yange er tom u ortamen anyom imôngo, kpa va kera lu sha tom ne ga, nahan a kaa ér: “Yange ishima vihim tsung sha ci u isholibo yam la. Er m gema nengen mer m kera kuma ga yô, kwagh ne yangem u hiden eren anmgbianev av tom sha ian i ortamen la. Yange m hen mer m kera kuma u or a nam jighjigh ga. Kpa er doon mo u wasen mbagenev yô, m kôrcio u henen Bibilo a ior, shi taver anmgbianev ishima ken mbamkombo, shi duen kwaghpasen vea ve. Kwagh ne wasem m hide m lu a vangertiôr, man m hide m ngu eren tom u ortamen hegen.”

Aluer anmgbian ngu wan kwagh ishima a mbagenev yô, kwagh ne una yange nan u eren tom u ortamen. Hemba doon u se lu er Davidi, u yange yevese Tor Saulu u lu gban un iyuhwe la nahan! Davidi yange  venda u oron Saulu iyev, shin er zua a ian i wuan un ashighe agen nahan kpaa. (1 Sam. 24:4-7; 26:8-12) Shighe u Saulu kpe ken uitya la, Davidi zungwe ku na, a yila un man wan na Yonatan ér ka “mbadoonshima man mbasarenior.” (2 Sam. 1:21-23) Davidi yange waan kwagh ishima ga.

Aluer u nenge wer i kav er i lu u ga, shin i er kwagh a we sha mimi ga yô, de deen wer kwagh ne a zer nan we ishimavihin man iuren ga. U tesen ikyav yô, yange i de William tom u ortamen shighe u er tom ne ken tar u Ingila kuma anyom er 30 nahan yô, nahan ishima vihi un a mbatamen mbagenev je mem ga. Lu nyi i wase William u hiden tilen voughlo? A kaa ér: “Yange m ôr takerada u Yobu, nahan kwagh ne taver mo ishima. Nahan m kaa mer, aluer Yehova yange wase Yobu man akar a na a atar la u himen iyongo yô, mo kpa una wasem u himen iyongo vea mbatamen mba ken nongo u Kristu!”—Yobu 42:7-9.

Aluer u de tom u kuran iyôngo i Aôndo yô, doo u ú gbidye kwar sha ityôkyaa i i ne ve yange u er nahan la. Yange lu sha ci u mbamzeyol ou nenger wee? Lu sha ci u akaa agen hemba gban we kwagh ken umaa? Ieren i shami ga i mbagenev yange i na u iyolkpene? A lu nyi je kpa, umbur wer shighe u ú lu ortamen la, u hemba zuan a ian i wasen mbagenev sha igbenda kpishi. Akaaôron ou a ken igbar yange taver ve ken jijingi, ikyav you i dedoo la yange i taver ve ishima, shi mze u ú zaan ve inya la wasen ve u wan ishima a atsan. Tom u ortamen u yange u eren sha mimi la yange u na Yehova msaanyol, er we kpa yange u na u nahan.—Anz. 27:11.

Yehova wase nomso kpishi hide mba a msaanyol kua isharen i lun mbakuran mba ken tiônnongo. Aluer u de tom u ortamen shin i dugh u ortamen kera je kpa, u fatyô u hiden “keren u lun orkuran.” (1 Tim. 3:1) Paulu yange “mem u eren msen . . . ga” ér ma i iv Mbakristu mba ken Kolose a mfe u fan ishima i Aôndo ‘sha u ve̱ zende zende u u kom Ter, ve̱ doon Un ken akaa cii’ yô. (Kol. 1:9, 10) Aluer i hide i tsua u ér u er tom u ortamen yô, suur sha Yehova a̱ na u agee, man ishimawan man iember. Ken ayange a masejime ne, kwagh gba ior mba Aôndo sha iwasen i ken jijingi i mbatamen ve ne sha dooshima la. U fatyô u taver anmgbianev ou asema shi u kegh iyol u eren nahan kpa?