1, 2. Shighe u i gba Adam man Ifa la, uma yange lu nena, man ka mbampin mba nyi ve gem ve dughu?

SHIGHE u i gba Adam man Ifa la, ve lu a mbaihyomov ga. Yange ve lu vough, shi ve lu ken paradiso. Yange ve ya ikyar kangenaan vea Orgban ve, vough er ter a wan nahan. (Gen. 2:7-9; Luka 3:38) Aôndo yange na ve tom u hange hange. (Ôr Genesis 1:28.) A tôô Adam man Ifa shighe nena u kuren tom u Aôndo na ve nee? A gba u vea lu uma gbem sha won ve vea mar a ‘iv tar, vea gema u, ua lu sha ikyev ve’ ga, kpa a gba u vea lu uma gbem sha won keng ve vea fatyô u nengen sha “hanma kwagh u uma u a zenden sha tar cii” ye. Shi yange ma ve fatyô u eren tom ne gbem sha won.

² Tsô er nan ve kwagh a lu nahan hegen ga? Er nan ve uumace ve lu a mbaihyomov kpishi, man orihyom u vesen yô, i lu ku? Aôndo una tim mbaihyomov mban kera sha nyi gbenda? Se zua a mbamlumun sha mbampin mban ken Bibilo. De se time sha avur ne agen hegen.

3, 4. (a) Ka tindi u nyi Aôndo yange wa Adam man Ifa? (b) Yange gba hange hange u vea kura tindi la sha ci u nyi?

³ Shin er Adam man Ifa lu sha ian i lun uma gbem sha won nahan kpa, ve lu a uma u kpen ga la ga. Yange gba u vea ôôn shi vea maan mngerem shi vea yaven shi vea yaan kwagh ve vea lu uma ye. Kpa u ve lu uma yô, yange hemba lun hange hange u vea ya ikyar kangenaan vea Yehova, un u a lu Imbor i uma la. (Dut. 8:3) Yange lu u saa vea lumun hemen u Yehova keng ve, vea za hemen u lun uma shi a saan ve iyol ye. Yehova yange ôr Adam kwagh ne wang cii ve mase gban Ifa kpaa ye. Yange er kwagh ne nena? “TER Aôndo wa or kwagh kaa er: Hanma kon u ken sule ne, gbaa yan u tsô, kpa kon u mfe u fan kwagh u dedoo man kwagh u bo la, de ye u ga, gadia iyange i ú ya u la, ú kpe je.”—Gen. 2:16, 17.

⁴ “Kon u mfe u fan kwagh u dedoo man kwagh u bo la” tese ér ka Aôndo a lu a ian i tesen ve kwagh u dedoo man kwagh u bo ye. Adam vande fan u paven kwagh u dedoo a kwagh u bo, sha ci u Aôndo gba un sha ibeen na, nahan lu a imoshima. Kon la yange ua umbur Adam man Ifa er i gbe u a lu Yehova una tesen ve kwagh u vea er la hanma shighe cii yô. Aluer ve ya kon la yô, vea lu kaan a Aôndo ér, “Se soo hemen wou ga.” Kpa vea er nahan yô, ve kua ônov vev cii vea kpe, vough er Aôndo vande tan ve icin nahan.

5. Er nan ve Adam man Ifa yange ve hingir u hemban ato?

⁵ Yange mba gbe Ifa kera yô, Adam pase un tindi u Aôndo wa la. Ifa yange fa tindi ne tsembelee je er una gber a gber icam a mi nahan. (Gen. 3:1-3) Yange kimbir tindi ne shighe u Satan lu lamen a na sha ikyev i iyô la. Satan yange de isharen i zuan a tahav shi lun sha tseeneke la i vese ken a na. (Nenge Yakobu 1:14, 15.) Satan yange kaa a Ifa ér Aôndo ka or aie, man aluer a hemba Aôndo ato yô una kpe ga, kpa una hingir er Aôndo nahan. (Gen. 3:4, 5) Ifa na un jighjigh, nahan er kwagh sha tseeneke na, nahan a ya ityamegh ki kon shon, shi na Adam, un kpaa ya. (Gen. 3:6, 17) Diabolo yange er aie. (Ôr 1 Timoteu 2:14.) Shin er Adam fa ér ka sha mi u hemban Aôndo ato ga nahan kpa, a ‘ungwa imo i kwase na.’ Shin er lu inja er iyô la lu ijende nahan kpa, jighilii yô, Satan Diabolo lu orihyom, u vihin tu, u fa er aie u un er Ifa la una va Ifa a kwagh u vihin tsung yô.

6, 7. Yehova yange ôr Adam man Ifa ijir nena?

⁶ Adam man Ifa yange ve hemba Yehova ato, un u na ve uma man hanma kwagh u dedoo u ve lu a mi cii la. Yehova yange fa hanma kwagh u za hemen la cii. (1 Kron. 28:9; ôr Anzaakaa 15:3.) Nahan kpa de ér Adam man Ifa kua Satan cii ve tese er ve nengen un la. Er Yehova a lu Ter yô, ieren ve ne yange ia vihi un kpishi je ka u henen a hen ga. (Nenge Genese 6:6.) Kwagh ne na yô gba u una er tom u Orjir, nahan una tsaha mbaasorabo mbara vough er vande tan ve icin nahan.

⁷ Aôndo yange kaa a Adam ér: “Iyange i ú ya [kon u mfe u fan kwagh u dedoo man kwagh u bo] la, ú kpe je.” Alaghga Adam yange una hen ér “iyange” i Aôndo ôr kwagh u i̱ ne, lu iyange i lun a ahwa 24. Shighe u Adam per tindi u Aôndo kera la, adooga yange una hen ér Yehova una tsaha un cii iyange ia mire ye. Nahan kpa, sha “shighe u  kundun iyol u aikighe la,” Yehova ande hen Adam man Ifa. (Gen. 3:8) Er Yehova a lu orjir u perapera yô, yange hii keghen ato ungwan kwagh u Adam man Ifa lu a mi u ôron un la. (Gen. 3:9-13) Been cii yô, a kure ve ijir i kuu. (Gen. 3:14-19) Luun er yange una woo ve ave ave yô, awashima u lu a mi sha ci u uumace la ma bunde. (Yes. 55:11) Shin er Adam man Ifa hingir uumace mba lun a myen ave ave nahan kpa, Yehova de ér ve mar ônov mba una va yima ve ken hemen yô. Sha nahan yô, Yehova nenge Adam man Ifa ér ve kpe sha iyange i ve er isholibo la je, sha ci u anyom 1,000 nga hen Yehova er ka “iyange” i môm nahan.—2 Pet. 3:8.

8, 9. Isholibo i Adam la bende a ônov nav cica cii nena? (Nenge foto u a lu sha mhii u ngeren ne la.)

⁸ Kwagh u Adam man Ifa er la yange bende a ônov vevee? Een. Mbaromanu 5:12 kaa ér: “Nahan yô er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô.” Or u yange nan hii kpen yô, lu Abel. (Gen. 4:8) Ônov mba Adam mbagenev kpa va bee iyol shi ve kpe. Yange ve ya dyako i isholibo man kuu? Apostoli Paulu na mlumun ér: “Ior kpishi ve hingir mbaasorabo sha ihyembeato i or môm” la. (Rom. 5:19) Uumace ya dyako i isholibo man ku hen Adam. Isholibo man ku ka mbaihyomov uhar mba uumace vea fatyô u palegh ga yô. Se fa er isholibo man ku u samber sha ônov mba Adam kua ônov mba ônov nav la jighiliii ga, kpa se mba nengen a kwagh u a dugh ker la.

⁹ Bibilo ôr kwagh u isholibo man ku vough nahan ér, ka “ikyondo i cirin kera, i i cir sha ior cii la, kua ikyondo i yisan i i samber i sha akuraior cii la.” (Yes. 25:7) Ikyondo i cirin, i i samber i, i̱ yisa hanma or cii ne, or môm u waren i̱ nan ngu ga. Ka nahan ve Bibilo i kaa ér ka “ken Adam man ior cii ve lu kpen” ye. (1 Kor. 15:22) Sha nahan yô, Paulu kaa ér: “Ka an nana shi yimam sha ikyev i iyol i kuugh nee?” Ma or yange nan lu u yiman Paulu kpa? *—Rom. 7:24.

10. (a) Ka avur a Bibilo a han a tese ér Yehova una tim ku kera? (b) Avur ne tese se nyi sha kwagh u Yehova man Wan naa?

¹⁰ Yehova una fatyô u yiman Paulu sha ikyev i ku. Yesaia yange er kwagh u “ikyondo i cirin” been cii yô, a kaa ér: “Una tim ku sha won kera; Ter AÔNDO Una ese mliam sha ishiv mbi iorov cii.” (Yes. 25:8) Er ter u nan kar a kwagh u a ne ônov mba nan ve lu yan ican la kera shi nan ese ve mliam sha ashe kera nahan, doo Yehova kpishi u timin ku kera! Man Yesu ngu ken ijoughave vea Yehova sha kwagh ne. I kaa ken 1 Mbakorinte 15:22 ér: “Er i lu ken Adam man ior cii ve lu kpen yô, kape ken Kristu kpaa, á gema ior cii vea hingir mbaumav la.” Paulu kpa, shighe u pine ér “Ka an nana shi yimam” la, a hide a na mlumun a kaa ér: “I̱ wuese Aôndo sha Yesu Kristu Ter wase!” (Rom. 7:25) Kwagh ne tese wang ér, mdoo u uumace ve doo Yehova ishima la yange bee shighe u Adam man Ifa er isholibo la ga. Yesu u yange wase Ter na, Yehova u gban Adam man Ifa la kpa uumace doo un ishima her. (Anz. 8: 30, 31) Kpa á yima uumace sha ikyev i isholibo man ku nena?

11. Ka nyi Yehova a er sha u wasen uumacee?

¹¹ Shighe u Adam man Ifa yange ve er isholibo la Yehova wua ve. Sha nahan yô, uumace cii ya injar i isholibo i ve a mi la. (Rom. 5:12, 16) Bibilo kaa ér: “Lu sha tindi u peren u or môm man i za a ior cii ken ijir i nan ibo” ye. (Rom. 5:18) Nahan lu u Yehova una yima uumace, kpa una per atindi a na a wang la ga nena? Mkaanem ma Yesu man na mlumun sha mpin ne. Ma kaa ér: ‘Wan u or va sha u Una na uma Na a̱ hingir ipaan sha ci u ior kpishi.’ (Mat. 20:28) Yesu u Yehova hii gban un ken jijingi la pase wang ér, er i va mar un shin tar, un lu or u vough yô, una fatyô u nan nagh sha iyol Na hingir ipaa sha ci u ior cii. Nagh ku ipaan kun kua kure ijirôron i mimi nena?—1 Tim. 2:5, 6.

12. Ka nagh ku vough ku nyi yange ku kure ijirôron i mimi?

¹² Er Yesu lu or u vough yô, un kpa lu a ian i lun uma gbem sha won, vough er Adam kpa lu a mi cii man er isholibo la nahan. Yehova yange wa ishima ér Adam a mar ônov mba vough ve iv tar cii. Nahan er Yesu soo Ter na kua ônov mba Adam kpishi yô, a na nagh sha uma na u vough la, sha er una hide a kwagh u Adam ta kera la yô. Shighe kar yô, Yehova nder Wan na shin ku, na un uma u ken jijingi sha. (1 Pet. 3:18) Yehova yange lumun nagh ku ipaan ku Yesu na sha uma na u vough, sha u hiden yamen uma u vough u Adam ta kera la, nahan shi hiden nan tsombor u Adam ian i zuan a uma u tsôron. Sha nahan yô, Yesu kar tile sha ityough ki Adam. Paulu kaa ér: “Kape i nger kpaa la er: Or u hiihii la, Adam, hingir or u uma. Adam u masetyô la hingir jijingi u nan a na uma.”—1 Kor. 15:45.

13. “Adam u masetyô” la una wase mbakpenev nena?

¹³ Ica a gba ga tsô “Adam u masetyô” la una na uumace cii uma u tsôron. Ônov mba Adam kpishi mba yange ve kpe la kpa vea hide a lu uma. A nder ve vea hide a lu uma shin tar.—Yoh. 5:28, 29.

14. Uumace vea er nan ve vea due ken mlu u vough ga, u ve ye dyakô na nee?

¹⁴ Uumace vea er nan ve vea due ken mlu u vough ga, u ve ye dyakô na nee? Yehova ver gomoti u una er kwagh ne yô. Man mba vea hemen gomoti ne yô, ka Yesu man mba 144,000 mba i tsough ve shin tar ne la. (Ôr Mpase 5:9, 10.) Er mba 144,000 mba vea za hemen vea Yesu sha la kpa yange ve lu uumace mba yinan yô, ve fa er mlu u vough ga la a lu yô. Ken atô u anyom 1,000 a Yesu kua mba vea lu hemen vea na la, vea wase ior u hiden lun vough, kwagh u a tsa kpa vea fatyô u eren ayol a ve ga la.—Mpase 20:6.

15, 16. (a) Inja i kwagh u Bibilo i yer ku ér “orihyom u masetyô” la ér nyi, man ka hanma shighe a va tim u kera? (b) Kwagh u i nger ken 1 Mbakorinte 15:28 la tese ér Yesu una va er nyi ken hemene?

¹⁵ Shighe u anyom 1,000 a hemen u Tartor ua bee la, uumace mba ungwan tindi cii vea due ken ikyangenev mbi isholibo i Adam i ve a mi la man ku. Bibilo kaa ér: “Er i lu ken Adam man ior cii ve lu kpen yô, kape ken Kristu kpaa, á gema ior cii vea hingir mbaumav la. Kpa hanma or nana lu sha nongo u nan. Iyiagh ki tsutswaagh yô, ka Kristu; kwagh u a dondon yô, ka mba ve lu ior i Kristu sha m-ande Na la, u cirin yô, ka mkur zum u Una gema tartor Una na Aôndo Ter, er A vande timin tarkuran cii kera man tahav kua agee cii kpaa.  Gadia ka u Una ya tor keng, zan zan Una gema mbaihyomov Nav cii, vea lu shin angahar a Na. Orihyom u masetyô u á tim un kera yô, ka ku.” (1 Kor. 15:22-26) Ken masejime yô, a tim ku u se ye dyako u ú hen Adam la kera. Hen shighe la, a kar a “ikyondo i cirin” i i cir i sha tsombor u uumace cica cii la kera.—Yes. 25:7, 8.

¹⁶ Apostoli Paulu mase kuren kwaghôron na la ér: “Zum u á va gema akaa cii á hingir sha ikyev Na yô, Wan kpaa Una gema iyol Na Una wa sha ikyev i Un u A gem akaa cii A wa sha ikyev Na la, sha er Aôndo Una hoghom cii ken hanma or cii yô.” (1 Kor. 15:28) Nahan awashima u hemen u Yesu la una kure hen shighe la. A doo un kpishi u hiden a tahav hen shighe la nan Yehova shi nan un tsombor u uumace mba lun vough la kpaa.

17. A va mase eren a Satan nena?

¹⁷ Ka nyi ia va er Satan, u a ve uumace a hanma inja i ican i yan cii laa? I na mlumun sha mpin ne ken Mpase 20:7-15. Shighe u anyom dubu aa bee la, a na Satan ian ér a tsugh uumace mba vough shighe u una kar ve ikyaren i masetyô la. A tim Diabolo kua mba vea dondo un ijime la cii gbem sha won ken “ku u sha uhar” la. (Mpa. 21:8) A tim ku u sha uhar la ga, sha ci u mba vea kpe ku u sha uhar la cii, mayange a kera nder ve ga. Nahan cii kpa, “ku u sha uhar” la ngu orihyom u uumace mba vea civir Orgban ve la ga.

18. A va kure tom u Aôndo yange na Adam la nena?

¹⁸ A been cii yô, uumace mba lun vough vea tile sha ishigh ki Yehova, una lumun ér ve kuma u zuan a uma u tsôron. Orihyom môm u tagher ve u zuan a msaanyol nana kera lu ga. Er Adam una kera lu ga nahan kpa, a kure tom u Aôndo yange na un la. A doo ônov nav kpishi u nengen sha tar kua annyamev cii. Doo se kpishi u fan ser, ica a gba ga tsô Yehova una tim ku, orihyom u masetyô la kera gbem sha won!