Davidi yange nger wener un ngu a “nenge i ta orperapera kera ga, shin tsombor u nan kpaa u sônon kwaghyan ga.” Sha nahan yô, lu ôron kwagh u un iyol na yange nenge ér ka kwagh u a nôngon u eren hanma shighe yô. Yange fa wang er Aôndo a te ior nav kera ga yô. (Ps. 37:25) Nahan kpa, mkaanem ma Davidi man ma tese ér kwagh yange ban or u civir Aôndo shighe môm ga ze, shin a tsa kpa kwagh a ban nan ga ze.

Davidi iyol na kpa ashighe nga a yange ya ican tsung yô. Ikyav i tesen yô, sha shighe ugen la, Davidi lu yevese Saulu. Kwaghyan za been un yô, a sôn kwaghyan sha ci na man mba ve lu vea na la. (1 Sam. 21:1-6) Nahan hen shighe ne yô, Davidi lu “sônon kwaghyan.” Er a lu ken ican tsung hen shighe ne nahan kpa, a kav ér Yehova kende un ga. Jighilii yô, se mba a ôr ijiir i môm ken Bibilo ape i kaa ér Davidi yange zamber ior kwaghyan sha u una lu uma ga.

Ken Mateu 6:33, Yesu na se ibumun ér Aôndo una kure mbamgbe mba mbacivir un sha mimi, mba ve lu veren kwagh u Tartor hiihii ken uma ve la. Yesu wa se kwagh kaa ér: “Kpa vande keren nen tartor Na man perapera Na, man akaa ne cii [kua kwaghyan man kwaghman man akondo] á seer ne a ye.” Nahan cii kpa, Yesu shi pase ér sha ci u mtev u sha ican yô, alaghga “anmgbianev” nav vea lu ijen. (Mat. 25:35, 37, 40) Lu imbakwagh u er apostoli Paulu je ne. Ashighe agen luun ijen shi imura kpa kôron un.—2 Kor. 11:27.

Yehova kaa a vese ér a tôv se a ican sha igbenda kposo kposo. Aôndo una fatyô u den ér se lu ijen, sha er se na a kaa Diabolo imo sha mbaaie nav yô. (Yobu 2:3-5) Ikyav i tesen yô, anmgbianev asev mba ken Kristu mbagenev, er mba yange i wuhe ve ken afo a mbakwarev a Mbanazi la nahan, nyôr ken mlu u taver tsung sha ci u mtev u sha ican. Gbenda u bo u Diabolo er tom a mi u yangen Mbashiada mbara u tilen sha mimi yô, lu kwaghyan u i lu nan ve sha inja ga la. Er Mbashiada mba jighjigh mban za hemen u ungwan imo Yehova yô, un kpa kende ve ga. Yange de ér ve ya ican ne, vough er ka a de Mbakristu cii ér ve tagher a atsan kposo kposo nahan. Nahan cii kpa, ikyav tese wang ér mba ve lu yan ican sha ci u iti i Yehova la cii, te ve kera ga. (1 Kor. 10:13) Doo u se umbur kwagh u i nger ken Mbafilipi 1:29 la, ér: “Ne yô, i lumun ne sha mhôôn er sha kwagh u Kristu yô, ka jighjigh tseegh né na Un ga, kpa né ya ican sha ci Na kpaa.”

Yehova tôndo zwa ér una luun a mbacivir un. Ikyav i tesen yô, Yesaia 54:17 kaa ér: “Hanma ityumugh ki i var sha ci u vihin we iyol, ikyôr ia lagh ki ga.” Ityendezwa ne man uityendezwa mbagenev mba lun er i nahan cii ka ibumun i tesen ér Aôndo una nenge sha kwagh u mkpeyol u nongoior na. Nahan cii kpa, alaghga ma Orkristu nana tagher a atsan zan zan a ar ken ku je kpaa.