1. Yehova nengen tom nena, man kwagh ne ka a na un a er nyi?

YEHOVA ka ortom u ka i doo un a tom na yô. (Ps. 135:6; Yoh. 5:17) Yehova soo ér mbatyomov man uumace kpa i saan ve iyol ken tom ve, nahan a na ve tom u nan ve msaanyol man mkom. Ikyav i tesen yô, yange wa Waniunda Na kpa ken tom u gban akaa la. (Ôr Mbakolose 1:15, 16.) Bibilo kaa a vese ér Yesu yange lu vea Aôndo “er or u fan tom nahan,” cii ve mase van shin tar ne ye.—Anz. 8:30.

2. Ka nyi i tese ér Yehova ne mbatyomov tom u hange hange man u nan ve mkomo?

² Hii ken Genese zan zan Mpase, Bibilo pase er Yehova a ne ônov nav mba ken jijingi mbara tom yô. Adam man Ifa yange mba eren isholibo, mba zende ve ken Paradiso u lu ya ve la kera yô, Aôndo “ver ucerubi hen sule u Eden vegher u sha ityoughkitaregh la, kua sanker u usu u jingir, sha u kuran gbenda u kon u uma la.” (Gen. 3:24) Shi Mpase 22:6 kaa ér Yehova “tindi ortyom Na sha u a̱ va tese mbatomov Nav akaa a aa er fefa keng la.”

3. Shighe u Yesu lu shin tar la, yange dondo ikyav i Ter na nena?

³ Shighe u Yesu lu or u vough shin tar la, yange er tom u  Yehova na un ér a er la. Yesu shi dondo ikyav i Ter na la, nahan a na mbahenen nav tom u hange hange ér ve er. Yange ôr ve kwagh u una na a maa ve iyol u eren tom shon yô, a kaa ér: “Mimi mimi je, M kaan ne ne, u nan nem jighjigh yô, ityom i M eren ne, nan kpaa nana er i; i i hembe ingin je kpaa nana er, sha ci u M lu yemen hen Ter yô.” (Yoh. 14:12) Yesu pase mbahenen nav er tom la u lu torough torough yô. A kaa a ve ér: “Ka u sé er ityom i Un u A tindim la keng er iyange i shi ne; tugh mbu van mbu ma or nana kera fatyô u eren tom ga yô.”—Yoh. 9:4.

4-6. (a) Se mba a iwuese ser Noa man Mose yange ve er ityom i Yehova na ve la sha ci u nyi? (b) Ka nyi i lu kwaghmôm ken ityom i Yehova a ne uumace laa?

⁴ Shighe u Yesu lu a va shin tar ga la kpa, Yehova naan uumace tom u injaa ér ve er. Shin er Adam man Ifa kanshio u eren tom u Aôndo na ve la nahan kpa, mbagenev yô er kwagh u a tese ve la. (Gen. 1:28) Aôndo yange tese Noa er una gba tso u ior vea war Mngerem ma Deemee la wang. Noa kpa er kwagh u Yehova kaa ér a er la vough. Se mba a iwuese kpishi sha kwagh u Noa er ne. Se mba uma nyian sha ci u yange er hanma kwagh u Aôndo kaa un la cii!—Gen. 6:14-16, 22; 2 Pet. 2:5.

⁵ Yehova yange tese Mose gbenda u a maa tabernakel, shi a ver upristi la wang, shi Mose kpa dondo hanma kwagh u i ôr un la vighe vighe. (Eks. 39:32; 40:12-16) Nyian je kpa, se mba zuan a iwasen sha tom u yange er vough er i tese un la. Nena yô? Apostoli Paulu pase ér gbenda u i maa tabernakel, shi i veren upristi la lu tesen “akaa a doon a a lu van” ken hemen la.—Heb. 9:1-5, 9; 10:1.

⁶ Er awashima u Aôndo a lu geman la, ityom i a ne mbacivir un la kpa ka i geman sha ashighe ashighe. Nahan cii kpa, hanma tom u Yehova a ne ve cii yô, ka u va un a icivir shi u wase uumace mba ve lu a jighjigh u nan la. Kwagh ne ngu ôron kwagh u akaa a Yesu er shighe u lu sha, man shighe u va shin tar la. (Yoh. 4:34; 17:4) Se kpa tom u i ne se nyian ne ka u va Yehova a icivir. (Mat. 5:16; ôr 1 Mbakorinte 15:58.) Kwagh ngu nahan sha ci u nyi?

7, 8. (a) Pase tom u Mbakristu ve lu a ian i eren nyian la. (b) Aluer Yehova tese se kwagh u se er yô, doo u se er nena?

⁷ Ka se kwagh u civirigh kpishi er Yehova a lehe se uumace mba yinan mban ér se va er un tom yô. (1 Kor. 3:9) Mba ve lu eren tom u maan Ayou a Mkohol man Ayou a Tartor man iyaagh ki branci cii, mba eren imba tom i Noa man Mose yange ve er la. Wea lu eren tom u sôron Iyou i Tartor you shin iyaagh ki afishi ase a shin itine a ken Warwick, kpentar u New York la kpa, ian you i eren tom ne la i gba u kwagh. (Nenge foto u a lu sha mhii u ngeren ne, u i kper a kpela la.) Kwagh ne ka icighantom. Nahan cii kpa, tom u i kaa a Mbakristu cii ér ve eren yô, ka tom u maan kwagh ken jijingi. Tom u maan kwagh ken jijingi ne ka tom u pasen kwagh, u u ve Yehova a icivir shi u wasen uumace mba ungwan imo i Aôndo la yô. (Aer. 13:47-49) Nongo u Yehova ka u tese se gbenda u hemban doon cii u a er tom ne yô. Nahan ashighe agen ka i gba u nongo u Yehova ua musan mbagenev tom.

⁸ Hanma shighe cii yô, mbacivir Yehova sha mimi ka ve kegh iyol u dondon kwagh u Aôndo a tese la. (Ôr Mbaheberu 13:7, 17.) Sha hiihii la, alaghga se fa atôakyaa cii a a ne ve i musan se tom ga. Nahan cii kpa, se fa wang ser ka sea dondo hanma kwagh u Yehova a nenge ér doo u se gema eren la yô, se zua a averen kpishi.

9. Ka ikyav i sha kwagh u tomough i nyi mbatamen ka ve ver ken tiônnongo?

⁹ Gbenda u mbatamen ve hemen ken  tiônnongo la ka u tese ér saa ve tsung u eren ishima i Yehova. (2 Kor. 1:24; 1 Tes. 5:12, 13) Ka ve tese ér ve kegh iyol i eren tom kpoghuloo, shi akaa nga a geman yô, ve kpa ve geman. Ka ve kegh iyol u dondon igbenda i he i eren tom u pasen kwagh u Tartor u Aôndo ne. Alaghga sha hiihii la yange a doo mbagenev u pasen kwagh sha telefon shin sha ajiir a utso tilen, shin pasen kwagh ken igbar ga, kpa ica gba ga tsô ve nenge a akaa a injaa a a due ken kwagh ne yô. Ikyav i tesen yô, upania unyiin ken tar u Jamani yange ve tsua u za pasen kwagh hen haregh u eren kasua, u mbapasenkwagh zaan her ga yô. Michael kaa wener: “Er se er tom ne ga anyom imôngo yô, cier se iyol. A shi nan kpa, Yehova fa kwagh ne, shi un kpa wase se, nahan se pase kwagh sha iyange igen pepe, man kwaghpasen la doo kpishi je ka kwagh u se hungur a mi ga. Saan se iyol kpishi er se dondo kwagh u i tese ken Tom Wase ú Tartor la, shi se suur sha Yehova ser a wase se yô!” Ka i sase u iyol u dondon igbenda i he i pasen kwagh hen haregh wou kpa?

10. Ka akaa a nyi i nyôôso ken nongo u Yehova semberee nee?

¹⁰ Ashighe agen ka i gba u nongo wase ua nyôôso akaa agen. Ken anyom a a sember karen ne, i magh afishi a branci agen sha agen. Kwagh ne ka a bende a mba ve lu eren tom hen ubranci mban la cii. Ka i gba u vea nyôôso akaa ken uma ve, kpa shighe a karen yô, ve nenge a iwasen i i lu ken kwagh shon la. (Orpa. 7:8) Saan mba ve lu eren Aôndo tom sha asema a ve ne iyol kpen kpen er ve lu uwegh sha akaa a a lu zan hemen ken nongo u Yehova nyian ne yô!

11-13. Ka mbamtaver mba nyi mbagenev ve tagher a mi sha ci u akaa a nongo wase u nyôôso laa?

¹¹ Se fatyô u henen kwagh u injaa hen mba ve lu hen ubranci mba i magh ve sha mbagen la. Ve mbagenev yange ve er tom hen ubranci mba ngise ve lu her la anyom imôngo. Anmgbian ugen yange eren tom shin Betel ugen hen haregh u Central America vea kwase na, kpa i va yem a ve shin Betel u ken tar u Mexico, ape iyenge i mba shin Betel la i hembe i Betel u yange ve vande lun her la i nôngo u kuman kwa 30 yô. Rogelio kaa ér: “Yange taver se kpishi u undun tsombor wase man azende a ase.” Anmgbian ugen u un kpa yange i kaa a na ér a yem shin Betel u ken Mexico, i yer un ér Juan yô, kaa ér: “Yange lum er mba hiden maren mo hegh nahan; gba u me kôr azende a he. Gba u me hen aeren a ityôô agen shi me gema henen kwagh sha igbenda igen kposo kpaa.”

¹² Anmgbianev mba ken ityar igen hen veghertar u Yuropa mba yange i kaa a ve ér ve yem hen afishi a branci a ken tar u Jamani la kpa tagher a mbamtaver. Yange taver anmgbianev mba shin Betel u ken Switzerland la kpishi u moughon undun iwo i doon kenger la yemen ijiir igen. Shi sha hiihii la, wa taver mba shin Betel u ken tar u Austria la u moughon yemen hen Betel ugen u ior hemba ngeen her la.

¹³ Mba yange ve lu moughon yemen ken tar ugen yô, gba u vea za hoghor a ajiir a tsan a he, shi vea gema eren tom vea anmgbianev mba nomso man mba kasev, mba ve vande fan ve ga yô, man alaghga je yô, a gba u vea hen u eren tom ugen u ve fe u ga kpaa. Yange gba u vea hoghor a tiônnongo u he man haregh u pasen kwagh u he, shi alaghga je yô, vea hen zwa ugen kpaa. Ka i taver kpishi u geman sha igbenda ne. Nahan kpa, mba shin Betel kpishi lumun mgem ne. Ve er nahan sha ci u nyi?

14, 15. (a) Mbagenev kpishi tese ér ian i eren tom vea Yehova hanma ijiir i i gbe u vea za er u cii la gba ve kwagh nena? (b) Ka sha gbenda u nyi nahan ve lu se cii ikyav i dedoo?

¹⁴ Anmgbian u kwase Grethel kaa ér:  “Yange m lumun u moughon yemen ijiir igen sha ci u m soo u tesen Yehova mer ka un a hembe doon mo ishima ye, ka tar shin imaagh, shin ma iantom ga.” Anmgbian u kwase Dayska kpa kaa ér: “Yange m fe mer ka Yehova a kaa ér m mough m yem yô, m lumun saan saan.” Anmgbian André vea kwase na Gabriela di kaa ér: “Yange se nenge ser kwagh ne ka ian i civirigh i se seer eren Yehova tom, se ker u kuren asaren a ase ga yô. Nahan se kaa ser, ‘Shighe u Yehova a ve a mgem yô, hemba doon u se lumun mgem na la, se venda ga.’”

¹⁵ Ka a magh ubranci mbagenev sha mbagen yô, i hide i na mba shin Betel mbagenev tom u pania la. Imbakwagh ne yange i er mba shin Betel shighe u i magh branci u ken tar u Denmark man Norway man Sweden, i gem yilan ér branci u Scandinavia la. Anmgbian Florian vea kwase na Anja kpa yange i na ve tom u pania. Ve kaa ér: “Se nenge tom u he u i ne se ne ser ka u taver, kpa u saan iyol. Se yô, ka se kwagh u civirigh kpishi er Yehova a lu eren tom a vese yô, hanma ijiir i se lu cii. Se fatyô u ôron sha mimi ser se nenge ser Yehova haa se iveren mgbeghaa!” Shin er alaghga a gba u se mbagenev kpishi se nyôôso akaa ken uma wase sha igbenda ne mayange ga nahan kpa, se fatyô u dondon ikyav i anmgbianev asev mba nomso man mba kasev, mba ve lu veren akaa a Tartor hiihii ken uma ve ne ga he? (Yes. 6:8) Yehova veren mba ian ve i eren tom vea na i gbe ve kwagh la hanma shighe cii, ape ve lu eren u cii.

16. (a) Mbagalatia 6:4 kaa ér se er nyi? (b) Ka iantom i vesen i nyi hanmô orumace nan lu a mini?

¹⁶ Uumace mba yinan ka ve soo u tôôn mlu u mbagenev karen sha u mbagen. Kpa Mkaanem ma Aôndo kaa a vese ér se ver ishima sha akaa a se ayol ase se fatyô u eren la. (Ôr Mbagalatia 6:4.) Se kpishi se mba mbatamen ken nongo u Yehova ga. Shi ka se cii se fatyô u lun upania shin mbamishen shin eren tom shin Betel ga.  Sha kpôô yô, ityom ne ka injaa! Nahan kpa, gba u mayange se hungur iantom i hemban cii, i hanmô wase nan lu a mi la ga, ka ian i eren tom a Yehova imôngo ken tom wase u pasen kwagh la je la. Gba u iantom ne ia gba se kwagh!

17. Er se lu shin tar u Satan her ne, ka nyi ia za hemen u erene, kpa gba u se ure ga sha ci u nyi?

¹⁷ Er se lu shin tar u Satan her yô, se fatyô u eren Yehova tom er i sar se la ga. Alaghga ityom i hen tsombor wase shin mnyoon gayô mbamlu mbagenev vea yange se u eren ityom igen ken nongo u Yehova. Kpa ityôkyaa ngi i se ure sha kwagh ne ga. Mayange de nengen ian i u lu a mi i eren tom vea Yehova la wer ka beerkwagh ga. Tese kwagh ne sha u eren shiada sha kwagh u iti na shi pasen ior kwagh u Tartor na hanma shighe u ian i dugh cii. Kwagh u a hembe lun kwagh u vesen yô, u ngu eren tom vea na sha afatyô wou cii, shi u ngu sônon un wer a ver mba ve fetyô u eren un tom hemban we la doo doo. Umbur wer, hanma or u nan wuese iti i Yehova cii yô, nan gba un kwagh!

18. Ka nyi i doo u se kegh iyol ser i kar se, man ka sha ci u nyi?

¹⁸ Er se yen nahan kpa, doo Yehova u eren tom a vese imôngo. Nahan ian i se lu a mi i eren tom vea Aôndo la gba se kwagh ken ayange a masejime ne kpen kpen! Sha nahan yô, doo u se kegh iyol ser akaa a a sar se la a kar se, shi se umbur ser ken tar u he u Yehova una va a mi la, se lu sha ian i ember “uma u a lu uma jim la,” ka uma u tsôron, u se lu ken msaanyol man bem je la.—1 Tim. 6:18, 19.

19. Ka nyi Yehova a ver sha ci wase ken hemene?

¹⁹ Er se kera lu ica a tar u he la ga ne, hen ase sha kwagh u Mose yange kaa a Mbaiserael ér ve er ne, shighe u ve zulum u nyôron ken Tar u Ityendezwa la. A kaa a ve ér: “TER, Aôndo wou, Una na u akaadoon wuee, sha tom u ave ou cii.” (Dut. 30:9) Armagedon una karen yô, mba ve tum ityou eren tom vea Aôndo la vea ya dyako u tar u a tende zwa u nan ve la. Hen shighe la, se gema ishima yase se ver sha tom u he u a na se la, ka tom u geman tar hingir paradiso u doonashe je la!