Mbampin mba Mbaôron Takerada Ne Ve Pin La
Ka i ver mbatamen man udiakon ken hanma tiônnongo nena?
Sha ayange a mbaapostoli la, apostoli Paulu kaa a mbatamen mba ken tiônnongo u ken Efese la ér: ‘Kuran nen ayol a en man ikyumuile i Icighan Jijingi A ver ne mbakuran sha mi cii kpaa, sha u né koso nongo u Kristu u Aôndo, u A yem sha awambe a sha iyol i Wan Na la.’ (Aer. 20:28) Ka tom u nyi icighan jijingi ka a er sha u veren mbatamen man udiakon nyiana?
Hiihii yô, icighan jijingi yange mgbegha mbangeren Bibilo ve nger akaa a anmgbianev vea er ve vea kuma u lun mbatamen man udiakon la. I nger akaa kposo kposo 16 a i gbe u anmgbianev vea eren ve vea kuma u lun mbatamen la ken 1 Timoteu 3:1-7. Shi i nger akaa agen a i gbe u vea eren ve vea kuma u lun mbatamen la ken Titu 1:5-9 man Yakobu 3:17, 18 kpaa. I nger akaa a i gbe u anmgbianev vea eren ve vea kuma u lun udiakon la ken 1 Timoteu 3:8-10, 12, 13. Kwagh u sha uhar yô, mbatamen mba ka ve kaa ér i ver anmgbianev mbatamen shin udiakon la, kua mba ve veren ve la cii ka ve sôn Yehova jighilii ér a na ve jijingi na, sha er una wase ve u fan aluer anmgbianev mbara mba eren akaa a Ruamabera a tese ér or a eren ve nana kuma u lun ortamen shin diakon la yô. Kwagh u sha utar yô, gba u anmgbian u i kaa ér i ver nan ortamen shin diakon la nana ume ityamegh ki icighan jijingi u Aôndo ken uma u nan. (Gal. 5:22, 23) Sha nahan yô, jijingi u Aôndo ka a er tom sha u veren mbatamen man udiakon ken igbenda ne cii.
Kpa ka an jighilii ka nan ver anmgbianev mban mbatamen shin udiakono? Ken ayange a karen la, a soo u veren anmgbianev mbatamen shin udiakon yô, i tindi a ati a ve shin afishi a branci. Ati ve ne aa nyôron shin afishi a branci yô, anmgbianev mba Mbahemenev mba Shin Itine ve tsough ve la ve tôv sha u vea fa, anmgbianev mban vea kuma u a ver ve mbatamen shin udiakon yô, maa i ver ve. A veren ve yô, afishi a branci a ôr mzough u mbatamen. Mbatamen di ve gema ve pase anmgbianev mba i sember veren ve mbatamen shin udiakon la, ve pine ve aluer ve lumun u eren tom u i ne ve ne shi ve kuma u eren u yô. Aluer ve lumun yô, i yôô ken tiônnongo.
Kpa yange i veren mbatamen man udiakon sha ayange a mbaapostoli la nena? Ashighe agen yô, mbaapostoli ve ver anmgbianev mbatamen man udiakon jighilii, er shighe u yange ve ver nomsombaiorov utaankaruhar ér ve karen kasevmbacôgholov kwaghyan ayange ayange la nahan. (Aer. 6:1-6) Nahan cii kpa, alaghga nomsombaiorov mban lu vanden eren tom u mbatamen cii ve i mase seer ve tom ne ye.
Er Ruamabera a pase se vighe vighe gbenda u i veren mbatamen man udiakon sha ayange a tsuaa la ga nahan kpa, se nenge a ikyav i tesen er yange i eren kwagh ne yô. I kaa a vese ér, shighe u Paulu man Barnaba za zende ve u mishen u hiihii ve lu hiden la, ‘ve tsuwa mbatamen ve ver ve ken hanma nongo u Aer. 14:23) Anyom nga kar yô, Paulu nger Titu, u lu ikyar na ken tom u pasen kwagh la washika, kaa ér: ‘Kwagh u m undu u ken Krete yô, ka sha u sôr akaa a kwagh a shi sha mi yô, shi ver mbatamen sha agar agar er lu m kaa u nahan.’ (Titu 1:5) Kape Timoteu, u zende vea apostoli Paulu kpishi ken tom u pasen kwagh la kpa yange i na un tahav mbu veren mbatamen man udiakon je la. (1 Tim. 5:22) Sha nahan yô, kwagh ne tese wang ér, lu mbakuran mba ningir sha, yange ve veren mbatamen man udiakon ye, lu mbaapostoli man mbatamen mba ken Yerusalem ga.
Kristu, ve er msen a kwaghyan u hôron, man ve wa ve sha ikyev i Ter u ve na Un jighjigh la.’ (Ikyav i se nenge a mi ken Bibilo ne na yô, Mbahemenev mba Shin Itine mba Mbashiada mba Yehova nyôôso gbenda u i veren mbatamen man udiakon la. Hii sha iyange i Setemba 1, 2014 la yem hemen, kape a gema veren mbatamen man udiakon je ne: Hanma ortamen u sôron atôônanongo cii nana tôvon sha anmgbianev mba i soo u veren ve mbatamen man udiakon ken ningir na la vighe vighe. Shighe u a ze atôônanongo inya yô, una nôngo u fan kwagh u mba i soo u veren ve mbatamen shin udiakon la, una due kwaghpasen a ve imôngo, aluer gba sha mi yô. Ortamen u sôron atôônanongo una tôvon sha kwagh u mba i soo u veren ve mbatamen man udiakon la vea mzough u mbatamen una been yô, ka tom na u veren ve mbatamen man udiakon ken atôônanongo a hen ningir na la. Gbenda u veren mbatamen man udiakon ne hemba zuan sha gbenda u i veren ve sha ayange a mbaapostoli la.
Ka unô ve eren ityom kposo kposo sha gbenda u veren mbatamen man udiakon nee? Er i vanden eren nahan, ka “wanakiriki u jighjigh man u fan kwagh” a lu a tom u vesen u nan mba ve lu ya la kwaghyan ye. (Mat. 24:45-47) Tom ne wa u timen ken Ruamabera sha iwasen i icighan jijingi, sha u tesen gbenda u a er tom a akaawan a Bibilo, a a zough sha gbenda u i kohol nongo u Yehova sha tar cii la yô. Shi wanakiriki u jighjigh la ka a ver mbatamen mba sôron atôônanongo man anmgbianev mba ve lu ken Kômatii u Nengen sha Branci la. Hanma afishi a branci di ka a wase mbatamen u dondon kwagh u wanakiriki a kaa ér i er la. Hanma mzough u mbatamen di ngu a tom u vesen u tôvon sha akaa a Ruamabera a kaa ér anmgbianev vea eren ve vea kuma u veren ve mbatamen shin udiakon ken nongo u Aôndo la vighe vighe, cii kaan ér ve kuma ye. Hanma ortamen u sôron atôônanongo di nan ngu a zegetom u eren msen shi tôvon sha anmgbianev mba mbatamen ve kaa ér ve kuma u veren ve mbatamen shin udiakon la zulee, maa veren mba ve kom la.
Aluer se kav er i veren mbatamen shin udiakon la yô, se hemba fan tom u icighan jijingi a eren sha gbaa ne yô. Nahan se hemba lun a vangertiôr ken anmgbianev mba i ver ve mbatamen shin udiakon ken nongo u Kristu la, shi se naan ve icivir kpaa.—Heb. 13:7, 17.
Mpase ityough 11 laa?
Ka unô ve lu mbashiada mba uhar, mba i er kwagh ve kenMpase 11:3 ôr kwagh u mbashiada uhar mba vea ôr kwaghôron u profeti ayange 1,260 yô. Maa ityough kira kaa ér inyam la ia “nôngo ityav a ve ia hemba ve ia wua ve kpaa.” Kpa ‘ayange a karen atar man tiôn yô,’ a nder mbashiada mba uhar mban, nahan a kpiligh mba ve lu nengen la cii iyol.—Mpa. 11:7, 11.
Ka unô ve lu mbashiada mba uhar mbanaa? Kwagh u i pase vighe vighe ken ityough ki shon la wase se u fan ve. Hiihii yô, i kaa a vese ér, “Mban yô, ka ikyon i olev ihiar man shi udaarmbaamenger uhar.” (Mpa. 11:4) Kwagh ne umbur se kwagh u daaimenger man ikyon i olev ihiar i i pase kwagh u i ken kwaghôron u profeti Sekaria la. Yange i pase ér ikyon i olev la tile sha ityough ki “mba uhar mba i shigh ve mkurem” la, inja na yô, ka Gomna Serubabel man Zegepristi Yosua, mba ve “til sha ishigh ki Ter u taregh cii” la. (Sek. 4:1-3, 14) Kwagh u sha uhar yô, i ôr kwagh u mbashiada mba uhar mbara ér ve er akaa a kpilighyol a Mose man Eliya er la.—Tôô Mpase 11:5, 6 kar sha Numeri 16:1-7, 28-35 man 1 Utor 17:1; 18:41-45.
Kwagh u i ôr ken takerada u Mpase man takerada u Sekaria la gba zua nena? Hanma ityough cii ôr kwagh u ior mba Aôndo a shigh ve mkurem, mba ve hemen ior mba Aôndo hen ashighe a taver la. Kwagh ne tese ér kwaghôron u profeti u i er ken Mpase ityough 11 la yange kure shighe u anmgbianev mba i shigh ve mkurem, mba ve lu hemen ior mba Yehova sha shighe u i ver Tartor u Aôndo sha, ken inyom i 1914 la, “haa abaasôhô iyol,” pase kwagh ken atô u anyom atar man tiôn.
Shighe u mba i shigh ve mkurem mban pase kwagh a abaasôhô iyol bee yô, i wua ve sha injakwagh sha shighe u i wuhe ve ken purusu sha anshighe kpuaa, u a til sha ityough ki ayange atar man tiôn la. Sha mnenge u mbaihyomov mba ior mba Aôndo yô, i wua tom ve kera, nahan saan mbaahendanev iyol kpishi.—Mpa. 11:8-10.
Nahan cii kpa, yange i nder mbashiada mba uhar mbara shighe u ayange atar man tiôn kar kera la, vough er kwaghôron u profeti la a er nahan. Yange i dugh mba i shigh ve mkurem mban ken purusu kera tseegh ga, kpa Aôndo na mba ve za hemen u tilen sha jighjigh la ityom i vesen sha ikyev i Ter, Yesu Kristu. Ken inyom i 1919 la, ve lu ken mba i tsua ve ér ve er tom u “wanakiriki u jighjigh man u fan kwagh” la, sha er vea kure mbamgbe mba ken jijingi mba ior mba Aôndo, ken ayange a masejime ne yô.—Mat. 24:45-47; Mpa. 11:11, 12.
Kwagh ka a er i doo yô, Mpase 11:1, 2 tese er akaa ne a zough sha shighe u karen shin sôron tempel u ken jijingi la. Malaki ityough 3 kpa ôr kwagh u shighe u a sôr tempel u ken jijingi, shi a wanger un la. (Mal. 3:1-4) Shighe u i sôr tempel shi i wanger un la yange kuma shighe nena? Yange hii ken inyom i 1914 zan zan mhii u inyom i 1919 la. Shighe ne wa ayange 1,260 (ka iwer 42 je la), man ayange atar man tiôn, a i er kwagh u a ken Mpase ityough 11 sha injakwagh la ker.
Saan se iyol kpishi er Yehova yange sôr ian ver i eren tom u wanger ior sha u ve er akaa a dedoo yô! (Titu 2:14) Kwagh u seer yô, se wuese ikyav i dedoo i mbajighjigh mba i shigh ve mkurem, mba ve hemen sha shighe u taver, shi ve er tom u mbashiada uhar mba sha injakwagh la. *
^ par. 18 Wea soo u seer zuan a mkav yô, ôr Iyoukura i Julai 15, 2013, peeji 22, ikyumhiange i sha 12 la.