GUY HOLLIS PIERCE, u lu môm ken Mbahemenev mba Shin Itine mba Mbashiada mba Yehova la kure tom na shin tar sha iyange i Tomahar, Maaci 18, 2014 la. Er Guy Pierce a lu anmgbian u Kristu yô, ishimaverenkeghen i lu a mi ér a va nder un shin ku, una yem sha la kure shami vough, shighe u lu anyom 79 la.—Heb. 2:10-12; 1 Pet. 3:18.

I mar Anmgbian Guy Pierce hen geri u Auburn, kpentar u California, ken tar Amerika, sha iyange i Novemba 6, 1934, shi i er un batisema ken inyom i 1955 la. Yange vôso kwase na u i yer un ér Penny la ken inyom i 1977 la, shi ve mar ônov kpaa. Er lu ormaren yô, kwagh la wase un u eren kwagh a mbagenev er ter ka nan er kwagh a mbayev mba nan nahan. Un vea kwase na Penny, yange ve hii u eren tom pania ken inyom i 1982 la, ka ker ken inyom i 1986 la yô, a hii u eren tom u ortamen u sôron atôônanongo ken tar u Amerika, er tom ne je kuma anyom 11.

Ken inyom i 1997 la, Anmgbian Guy Pierce vea kwase na Penny, hii u eren tom shin Betel u ken tar u Amerika la. Anmgbian Pierce er tom vea Gbaatom u Nengen sha Tomshiren la. Ka ker ken inyom i 1998 la yô, i tsua un ér a er tom u wasen Kômatii u Nengen sha Tsombor u Betel, u Mbahemenev mba Shin Itine la. Sha iyange i Oktoba 2, 1999 la, i yôô ken mkombo u sha inyom, u Watch Tower Bible and Tract Society of Pennsylvania la ér, i tsua Anmgbian Pierce ér a lu môm ken Mbahemenev mba Shin Itine. Ken anyom a karen ne, a er tom vea Kômatii u Nengen sha Tsombor u Betel man u Nengen sha Kwaghngeren man u Gberen Ityakerada kua u Hemen Ukômatii Cii la.

Ior mba sha ajiir kposo man mba mbamlu vev ve lu kposo kposo cii soo kwagh u Anmgbian Pierce, sha ci u yange wa saaka kpishi shi luun a ior saan saan. Nahan kpa, kwagh u yange na ve ior ve hemba soon kwagh na yô, lu mdoo u ior doo un ishima, man iyol i hiden a mi ijime na man mwe u wa atindi a perapera ikyô la, kua jighjigh u na Yehova a ishima na cii la. Hanma shighe yô, Guy Pierce a ôron a ior ér, u uityendezwa mba Yehova ve bunde yô, guda iyange ia kera due ga, man soo ér tar cii u fa kwagh ne.

Anmgbian Pierce vôron a mcivir u Yehova mayange ga. Yange a nder tugh tugh maa a hii tom, zan zan a kur tugh. Anmgbian Pierce zende sha tar cii sha u taver anmgbianev nav mba nomso man mba kasev mba ken Kristu ishima. Nahan kpa shighe u a za ser ma afishi a branci yô, a ker shighe a lam a anmgbianev mba shin Betel kua mbagenev mba ve pin un ér a na ve iwasen shin a wa ve kwagh la cii. Yange una sôr afishi a branci una yem anyom a kar imôngo je kpa, mbacivir Yehova a na imôngo ve zer umbur erdoo na, man mlu na u sar sar la, kua ishima i a taver ve ken Bibilo la kpaa.

Anngô wase man ijende yase u doon se ishima ne kpe undu kwase man mbayev ataratar, kua ônov mba ônov nav man mbayev mba ônov mba ônov nav. Shi ngu a ônov mba ken jijingi kpa kpishi. Lu Anmgbian Mark Sanderson, u a lu môm ken Mbahemenev mba Shin Itine la yange na kwaghôron u kuugh, u Anmgbian Pierce la ken Betel u ken Brooklyn la, sha iyange i Sati, Maaci 22, 2014 ye. Môm ken akaa a yange ôr sha ku u Anmgbian Pierce yô, lu kwagh u ishimaverenkeghen i lu a mi ér un ngu yemen sha la, maa a ôr mkaanem ma Yesu man, ér: “Ken ya u Terem ayou nga kpishi . . . Me yem sha u Me za sôr ne ijiir. Me yem Me za sôr ne ijiir yô, Me shi Me hide, Me va kua a ven sha er ne kpaa né lu hen ape M lu yô. Hen ape M lu zan kpaa, ne fa gbenda.”—Yoh. 14:2-4.

Sha mimi yô, vihi se kpishi er se kera nenge a Anmgbian Pierce ga nahan. Nahan kpa, saan se iyol kpishi sha ci u a “fa gbenda” u nyôron ken “ayou” a una za lu ker gbem sha won la.