Ú ôr mbamgber mba Iyoukura mba i sember duen a mi la vighe vighe kpa? Yô, nenge ase wea fatyô u nan mbamlumun sha mbampin mban yô:

Doo u a nande ikyom i Orkristuu?

Ka or nana tsua u nanden ikyom i or u nan u nan kpe la shin nanden ga ye. Shin er Bibilo i er kwagh sha ieren ne jighilii ga nahan kpa, doo u se fa ser yange i nande ikyom i Tor Saulu kua wan na Yonatan, cii ve i mase iin ve ye. (1 Sam. 31:2, 8-13)—6/15, peeji 7.

Er Nan Akaabo a Eren Ior mba Dedoo?

Aôndo ngu perapera sha igbenda Na cii. Igbenda na ngi jighilii shi ngu jighjigh shi Un ka u mimi kpaa. Un ngu ishima legh legh shi zungu mhôônom kpaa. (Dut. 32:4; Ps. 145:17; Yak. 5:11)—9/1, peeji 4.

Ka mbamtaver mba nyi nahan alaghga or u nan yem u za pasen kwagh ape kwagh a hembe gban sha mbapasenkwagh la nana tagher a mini?

Ka mbamtaver utar (1) mlu u hen ijiir la, (2) isharen i zan ken ya, man (3) u kôron azende. Mbakpishiv mba ve hembe mbamtaver mban yô, ka ve zua a averen ngôgh.—7/15, peeji 4-5.

Er nan ve utrak mbahev mbara ve doo shi ve lu ican u pasen kwagh a mi ga?

I er utrak mbahev mbara cii sha gbenda môm. Hanma trak cii ngu a ityough ki Bibilo ki i tsough i ver ér se ôr yô, shi a pine orya mpin kpaa. Mlumun u nan ne cii kpa, bugh peeji u ken atô u trak la, tese nan kwagh u Bibilo i̱ kaa yô. Shi se fatyô u pinen nan mpin u se hide se za sôr nan ve se lam sha mi yô.—8/15, peeji 13-14.

Mbamaren mba ve lu Mbakristu la vea kura mbayev vev nena?

Gba hange hange u mbamaren vea keghen ato a mbayev vev sha er vea fa ve yô. Shi doo u vea tesen ve akaa a ken jijingi tsembelee kpaa. Shi vea kôôm ve sha dooshima kpaa. U tesen ikyav yô, mbamaren ve kôôm mbayev vev shighe u i taver ve u lumun a atesen a Bibilo agen yô.—9/15, peeji 18-21.

Ka nyi man nyi ia kera lu ken Tartor u Aôndo ga?

Mnyoon man ku man m-ban u tom man ityav man m-ban u kwaghyan kua ibanave cii ia kera lu ga.—11/1, peeji 6-7.

Ka ikyuryan i ken Bibilo i nyi i bugh mbagenev gbenda u hemen vea Kristu?

Yesu yange veren iniongo i Kwaghyan u Ter u Aikighe la yô, a ya ikyur a mbahenen nav mbajighjigh mbara; mba yer ikyuryan ne ér ikyuryan i Tartor. (Luka 22:28-30) Ikyuryan la yange i na ve vangertiôr ér vea za tema tor vea Yesu sha.—10/15, peeji 16-17.

Nongoior u Yakobu ôr kwagh u ú ken Aerenakaa 15:14 ér Aôndo una dugh “nongo ken a ve sha ci u iti Na” la lu unô?

Nongoior ne lu Mbayuda mbananjighjigh man mbananjighjigh mba ve nyôr a nyôr Mbayuda, mba Aôndo tsua ve ér ve “yôô aeren a Na a ageegh,” Un u A yila ve la. (1 Pet. 2:9, 10)—11/15, peeji 24-25.