1, 2. Ka unô vea fatyô u zuan a mtsera sha u timen ken takerada u Icam i Hembana, man ka sha ci u nyi? (Nenge foto u a lu sha mhii u ngeren ne la.)

ORTAMEN ugen yange lu henen sha kwagh u anmgbian u nomso man u kwase ugen, mba sember zuan ve ivaa yô. Lu kaan ken ishima na ér: ‘Nenge imba er ve lu kenger ayol a ve shi kuven ayol a ve la sha wono! Or u nyiman ér ve soo ayol a ve tsung je kpa nan ngu ga!’ Er ortamen ne nenge anmgbianev mba ve sember eren ivese ne due tembe, lu vinen amar hen iniongo i ivesegh ve yô, a pine iyol na ér: ‘Ivese ne ia tsa gbem kpa? Shighe a kar nahan, dooshima ve ne una seer taver, shin una bee?’ Sha mimi yô, aluer dooshima u hen atô u nomsoor man kwase la ka u una tenger ga shi una lu gbem yô, ka i doo kpen kpen. Kpa kwagh er vihi yô, ior mba ve er ivese kpishi ka i va kera saan ve iyol ga, nahan ve pav ivaa. Nahan alaghga u pine wer, ‘Dooshima una fatyô u lun gbem je he?’

² Sha ayange a Tor Solomon u Iserael la je kpa, dooshima u mimi za ihyen. Solomon yange ngur ôron kwagh u aeren a ior mba sha ayange na la yô, a nger ér: “Or môm ken ior dubu m zua a mi, kpa kwase yô, môm kpaa m zua a mi ker ga. Nenge, ka kwagh ne  tseegh m zough a mi ye: Aôndo er or dedoo, kpa mba keren u eren akaa sha ayom yum.” (Orpa. 7:26-29) Yange kasev mba wan dang mba ken atôatyev mba ve civir Baal yô, lu a Mbaiserael imôngo. Kwagh ne na yô, nomso man kasev mba ken Mbaiserael kpishi nyôr dang u eren. Sha shighe u Solomon la je kpa taver u zuan a nomsoor shin kwase u injaa. * Nahan cii kpa, Solomon vande ngeren icam igen, anyom kar er 20 nahan, i i tese ér dooshima u hen atô u nomsoor man kwase una fatyô u lun gbem yô. Icam la shi tese kwagh u a lu dooshima la man er ka i tese un la kpaa. Nahan yô, sea er ivaa shin sea lu kwav kpa, takerada u Icam i Hemban la, ua fatyô u wasen se u kaven kwagh u a lu dooshima u mimi la, man er se tese un yô.

3. Er nan se fe ser dooshima u mimi una fatyô u lun hen atô u nomsoor man kwase?

³ Ôr Icam i Hemban 8:6. Kwagh u i kaa ér dooshima ka ‘nomborusu u Yehova’ la, inja na ér nyi? Inja na yô, ka Yehova yange hii kwagh u dooshima u mimi la ye. Yange gba or sha ibeen na, sha gbenda u nana fatyô u tesen dooshima yô. (Gen. 1:26, 27) Shighe u Aôndo gba Ifa, kwase u hiihii va na Adam, or u hiihii la, Adam wa icam ember. Ifa kpa lu a Adam kôôsôô je ka u henen a hen ga, gadia “i dugh un ken” Adam. (Gen. 2:21-23) Er Yehova a gbe se sha gbenda u se fatyô u tesen mbagenev dooshima yô, nomsoor man kwase vea fatyô u tesen ayol a ve dooshima u been mayange ga la.

4, 5. Pase kwagh u i nger ken takerada u Icam i Hemban la tiônôô.

⁴ Dugh kwagh u dooshima u been mayange ga la kera yô, akaa agen kpa nga a ka a er hen atô u nomsoor man kwase mba ve soo ayol a ve la yô. Takerada u Icam i Hemban la pase akaa ne agen sha gbenda u doon tsung. Icam la ôr kwagh u dooshima u lu hen atô u wankwase ugen u ken gar u Shunem man wanye u kuran ilev ugen u doo un ishima kpishi yô. Kwagh u dooshima ve la lu nahan: Wankwase ne lu eren tom ken sule u ikyon i wain u anngô na, ikyua ape Tor Solomon man ushoja nav haa afo yô. Solomon nenge a wankwase ne doo un, nahan a na zwa ér i za va a na. Nahan cii kpa, ikyav tese ér ken mhii la je, wankwase la pase wang er wan u kuran ilev la a doo un ishima yô. Solomon nôngo kpoghuloo ér una ngohol wankwase ne ishima, a wuese un mdoom tsung, shi na un uiyua kpishi, kpa ishima i wankwase ne cii lu sha u za kohol wan u kuran ilev na, u doo un ishima yum la. (Icam 1:4-14) Wannomso u kuran ilev la ker un za nyôr ken afo ape lu la, zough a na yô, ve ôr akaa a doon, a tesen er ve soo ayol a ve tsung yô.—Icam 1:15-17.

⁵ Solomon mough a wankwase ne va a na ken Yerusalem; wan u kuran ilev la kpa dondo wankwase na ijime. (Icam 4:1-5, 8, 9) Solomon nôngo sha afatyô na cii ér una ngohol wankwase ne ishima, kpa a kanshio. (Icam 6:4-7; 7:1-10) Ken masejime yô, tor na wankwase la ian ér a hide hen ya na. Icam la mase kuren sha u pasen er sar wankwase la tsung ér wannomso u doon un ishima la ma a ‘ze ayem er morya’ nahan, ma a za kohol un yô.—Icam 8:14.

6. Er nan i lu kwagh u ican u fan ior mba ve lam ken takerada u Icam i Hemban laa?

⁶ Takerada u Icam i Hemban la ka icam i doon tsung je yô, i yila i ér “icam i hemban atsam cii.” (Icam 1:1) Nahan kpa, Solomon ter ati a ior mba ve lam ken icam ne ga. Yange soo ér icam i doon tsung ne i due tseer tseer, nahan a kera yem teren hanma kwagh vighe vighe ga. Er i ter ati a ior ken icam ne ga nahan kpa, i nger icam ne sha gbenda u a lu ican u fan or u nan lu lamen la ga.

7, 8. Wan u kuran ilev man wankwase la yange ve tese ayol a ve dooshima nena? Tese akav.

⁷ Gumkwase man wannomso u kuran ilev la ôr akaa a doon sha ayol a ve sha u tesen dooshima u lu hen atô a ve la. Akaa a “dooshima” a ve ôr ne agen se fa a nyian ga sha ci u yange i nger a anyom kar hemba 3,000 hegen. Er aeren a ityôô a ve kaha a ase nyian nahan kpa, se fatyô u kaven er yange ve soo ayol a ve kpishi yô. U tesen ikyav yô, wan u kuran ilev la, yange wuese ashe a wankwase la kaa ér, “nga er [ashe a] atii” nahan, sha ci u ashe na doo un asenge bee. (Icam 1:15) Wankwase la di kpa kaa ér ashe a wan u kuran ilev la nga er “atii” nahan. (Ôr Icam i Hemban 5:12.) Wankwase ne nenge ér ashe a wan u kuran ilev la kungu segh segh er atii gba iyol shin atumba nahan.

⁸ Wan u kuran ilev ne man gumkwase la ve wuese ayol a ve er ve doo ashe yô, kpa ka cii la ga. Ikyav i tesen yô, wannomso la soo gbenda u wankwase la lamen a mbagenev la. (Ôr Icam i Hemban 4:7, 11.) A kaa a wankwase la ér: “Zwa wou ngu nôndon zaryoughough, kwasehe, iyough ngi shin ijime i nombor wou kua atumba kpaa.” Wan u kuran ilev la kaa ér kwaghôron u wankwase la nyoho shi doo er atumba shin iyough i hemban nyohon cii nahan. Shighe u wannomso la kaa a wankwase la ér “u doo ashe tsembelee” shi “ma kwagh u vihin ngu sha iyol you ga” la, lu ôron kwagh u mdoom nam ma sha iyol tseegh tsô ga, lu ôron kwagh u aeren a na a doon tsung la kpaa.

9. (a) Dooshima u kwase a nom la wa nyi man nyi kere? (b) Gba u noov man kasev vea tesen ayol a ve dooshima sha ci u nyi?

⁹ Gba u dooshima una lu ken ivese. Ivese ka di kwagh u nomsoor man kwase za ngohol takerada ér vea lu imôngo tseegh tsô ga. Jighilii yô, dooshima ka kwagh u vesen u i gbe u una lu ken ivese i Mbakristu yô. Kpa ka dooshima u nyi i gbe u vea lu a mini? Ka dooshima u a har sha atindi a ken Bibilo yôô? (1 Yoh. 4:8) Ka dooshima u sha gbaaôndo, u ka a lu hen atô u mba ve lu tsombor môm laa? Ka dooshima u azende a mimi nga a tesen ayol a ve laa? (Yoh. 11:3) Shin ka dooshima u nomsoor a kwase laa? (Anz. 5:15-20) Jighilii yô, dooshima u nomsoor a kwase la wa hanma inja i dooshima i se ter heen ne cii ker. Saa a tese or dooshima ve nana nenge a mi ye. Sha nahan yô, gba hange hange u noov man kasev vea de ér akaa a ve eren ayange ayange la a yange ve u tesen ayol a ve dooshima ga. Imba dooshima ne ngu a kura ivese shi a na msaanyol a lu hen atô u nom man kwase. Sha ajiir a ashighe kpishi i tsuan nom shin kwase sha ci u mba ve soo u eren ivese la, nomsoor shin kwase ka ve vande fan ayol a ve tsembelee cii iyange ivesegh la ga. Kpa zum u ve er ivese kera yô, gba u nom shin kwase la nana ôr ikyar u nan jighilii ér a doo nan ishima. Aluer mba eren nahan yô, vea seer soon ayol a ve shi ivese ve ia taver kpaa.

10. Aluer nom man kwase mba umbur akaa a ve ôr sha u tesen ayol a ve dooshima la yô, ka nyi ia due kere?

¹⁰ Kwagh u dedoo ugen kpa ngu ken dooshima u noov man kasev ve tesen ayol a ve la. Tor Solomon yange kaa ér una tume wankwase u ken Shulam la “mshirim ma zenaria a anzôr a azurfa sha mi.” Solomon yange wuese wankwase la kpishi kaa ér a “doo ashe er uwer, wang er iyange” nahan. (Icam 1:9-11; 6:10) Kpa gumkwase ne var a wan u kuran ilev u doo un ishima tsung la her. Shighe u ve lu imôngo ga la, lu nyi i taver wankwase ne shi i sur un ishima? Bibilo pase se kwagh u yange wase un la. (Ôr Icam i Hemban 1:2, 3.) Yange umbur akaa a wan u kuran ilev la ôr sha u tesen un “dooshima” la. A nenge ér dooshima ve la “hemba wain” u nan or msaanyol, shi iti i wannomso la ngi er “mkurem ma human doon ma i hee” sha ityou yô. (Ps. 23:5; 104:15) Mimi yô, aluer nom man kwase mba umbur  akaa a ve er sha u tesen ayol a ve dooshima la yô, kwagh ne una na dooshima ve la una seer taver. Sha nahan yô, gba hange hange u nom man kwase vea tesen ayol a ve dooshima hanma shighe cii!

11. Mbakristu mba lun kwav vea fatyô u henen nyi ken kwagh u wankwase u Shulam wa ônkasev mbagenev ér ve de nôngon ér vea kpoghol dooshima ga laa?

¹¹ Icam i Hemban la shi ôr akaa agen a Mbakristu mba lun kwav, hemban je yô, mba ve lu keren nom shin kwase la, vea hen kwagh ker yô. Solomon yange doo gumkwase la ishima ga. Sha nahan yô, gumkwase ne wa ônkasev mba Yerusalem kwagh, a kaa ér: “De kpoghol nen dooshima ga, man shi de nderen nen un kpaa ga, saa á kuma un ve.” (Icam 2:7; 3:5) Sha ci u nyi? Sha ci u ka hanma kwase cii i doo u nomsoor nana ta ishiôr sha mi ga, kwase di kpa ka hanma or cii nana lumun ga. Sha nahan yô, doo u Orkristu u nan soo u eren ivaa la nana wa ishima, a kegh zan zan nana kar zuan a or u nan doo nan ishima sha mimi yô.

12. Wan u kuran ilev la yange doo Wankwase u Shulam la ishima sha ci u nyi?

¹² Wankwase u Shulam yange soo wan u kuran ilev la sha ci u nyi? Mimi yô, wannomso la yange doo or je lu er “morya” nahan; ave a na taver er “atôôn a zenaria a vingir vingir” yô; shi angahar a na taver shi doo er “mtôm ma mabel” nahan. Kpa yange taver iyol shi doo tseegh tsô ga. Wankwase la ôr kwagh u wannomso la kaa ér: “Er kon u apel u lu ken ikyon i ikyôô nahan, kape u a doom ishima la a lu ken ônnomso la.” Cii ve wankwase u civir Yehova sha mimi ne a soo kwagh u wannomso la imba la nahan yô, tese ér wannomso la kpa yange civir Yehova kpoghuloo.—Icam 2:3, 9; 5:14, 15.

13. Wankwase u Shulam la yange doo wannomso u kuran ilev la ishima sha ci u nyi?

¹³ Hide Wankwase u Shulam la di ye? Shin er doo ashe je Tor Solomon u lu a ‘utormbakasev akunduatar, kasev mba sha uikya akunduanyiin, mbayevkasev gande u ôron’ la yange nenge a na fatyô u karen ga nahan kpa, wankwase la iyol na yô, a nenge ér un ngu “er ishohough ki Sharon, imondon i ityombo i shin ijande” la nahan. Mimi yô, wankwase ne hiden a iyol ijime shi eren kwagh akuma akuma. Ka nahan ve lu “er imondon i ityombo i ken atô u usaa” ye! Kpa wannomso u kuran ilev la yô, gema gba un kwagh. Yange civir Yehova sha mimi.—Icam 2:1, 2; 6:8.

14. Kwagh u dooshima u i pase ken Icam i Hemban la tese Mbakristu mba ve soo u eren nom shin kwase la nyi?

 ¹⁴ Ruamabera wa Mbakristu kwagh taveraa ér ve vôson noov shin kasev “ken Ter tseegh.” (1 Kor. 7:39) Orkristu u nan soo u vôson kwase shin eren nom cii yô, gba u nana palegh u za sôôr or u nan civir Aôndo ga la cii, gba u nana ker nom shin kwase ken mba ve civir Yehova sha mimi la tseegh. Heela tseegh ga, cii ve noov man kasev ve lu ken bem shi ve civir Yehova ken mzough yô, gba u vea na Aôndo jighjigh taveraa shi vea civir un kpoghuloo. Ka akaa a i doo u u ver ishima sha mi shighe u lu keren nom shin kwase u u vôso je la. Ka akaa a wan u kuran ilev la man gumkwase la nenge a mi ken hanmô ve je la.

15. Wankwase u Shulam ver nomso man kasev mba ve civir Aôndo, mbalun kwav la ikyav i dedoo nena?

¹⁵ Ôr Icam i Hemban 4:12. Wan u kuran ilev la kaa ér wankwase la ngu er “sule u i kase u igyar” nahan sha ci u nyi? Sule u i we u igyar yô, orgen a fatyô u nyôron ker ga. Saa nana kar sha hunda u igyar la ve nana fatyô u nyôron ye. Wankwase u Shulam la lu er sule u i we u igyar nahan sha ci u dooshima na lu sha wan u kuran ilev, u una va vôso un la tseegh. Er wankwase la lumun u nan Tor Solomon ishigh ga yô, a tese ér un ngu “kpekpe,” un ngu “hunda” u i bugh i ver ivegher feng ga. (Icam 8:8-10) Kape nomso man kasev mba ve civir Aôndo la kpa ka ve kegh zan zan ve va tese or u vese la dooshima tseegh je la.

16. Ka nyi Icam i Hemban la i tese sha kwagh u ishiôro?

¹⁶ Shighe u wan u kuran ilev la kaa a wankwase u Shulam ér vea za ma ahumbe sha shighe u wangernyom la, anmgbianev mba wankwase la lumun ér a za ga. Kpa ve gema ve wa un tom u kuran ishule ikyon i wain. Sha ci u nyi? Ve na un jighjigh ga shinii, ve hen ér alaghga a wa ishima u za eren ijimba? Jighilii yô, yange ve lu kuran a kura anngô ve u kwase ne sha er una za lu ape una fatyô u gban ken imeen ga yô. (Icam 1:6; 2:10-15) Ka kwagh u Mbakristu mba lun kwav vea fatyô u henen ken kwagh ne je ne: Shighe u ve lu sôôr ayol a ve yô, gba hange hange u vea kura ikyar ve la sha er vea er hôngor ga yô. Palegh u zan sha ajiir mbagenev vea nenge a ven ga la. Ne fatyô u tesen ayol a en dooshima, kpa i lu sha gbenda u wang.

17, 18. U zua a iwasen ken kwagh u u hen ken takerada u Icam i Hemban la nena?

¹⁷ Ashighe kpishi noov man kasev ka vea sember eren ivese yô, ve soo ayol a ve tsung. Er i lu Yehova a hii kwagh u ivesegh shi a soo ér i lu kwagh u tsôron yô, gba hange hange u noov man kasev vea nôngo dooshima ve la una yeghen a yegh, shi vea eren akaa a a na ve vea lu soon ayol a ve seer a seer la.—Mar. 10:6-9.

¹⁸ Shighe u u lu keren nom shin kwase yô, doo u u ker or u u soo nan sha mimi yô. U zuan a nan yô, er kwagh u dooshima shon una za hemen u taver shi yeghen a yegh yô, er i tese ken Icam i Hemban i Solomon la nahan. Wea lu keren a ker nom shin kwase u u er, gayô wea vande vôson nom shin kwase kpa, se mba sônon ser nôngo lu nen ken dooshima u mimi, u a lu ‘nomborusu u Yehova’ la.—Icam 8:6.