1. Ka sea nengen a akaa a se lu a nenge a mi ga la ken ishima yase yô, kwagh ne a wase se nena? (Nenge foto u a lu sha mhii u ngeren ne la.)

KA AÔNDO a ne se iyua i nengen a akaa a se lu a nenge a mi ga la ken ishima yase ye. Iyua ne ka i wase se u wan agoyol sha akaa sha inja shi veren ishima ser akaa a a va doo ken hemen. Yehova fetyô u nengen akaa a ken hemen, shi ashighe kpishi ka a vande pasen se ken Ruamabera akaa a a va er ken hemen yô. Nahan kwagh ne ka a wase se se fatyô u nengen a akaa a a va er ken hemen la ken ishima. Jighilii yô, ka sea nengen a akaa a se lu a nenge a mi ga la ken ishima yase yô, kwagh ne a wase se u nan jighjigh ser aa va er.—2 Kor. 4:18.

2, 3. (a) Kwagh u se nengen a mi ken ishima yase la, una wase se sha ci u nyi? (b) Se lu timen sha mbampin mba nyi ken ngeren nee?

² Kpa ashighe agen se fatyô u nengen a akaa agen ken ishima a mayange aa er ga yô. Ikyav i tesen yô, alaghga mnyam ma a cier wanye u cuku ér nan ngu purugh sha ijime i kokombu, kpa a lu mnyamciem di tsô. Hana, ngô u Samuel di yô, gbenda u yange nenge kwagh ken ishima na la kaha. Un zer henen sha iyange i wan na u nomso una za gema eren tom ken tabernakel vea upristi la. Kwagh ne lu mnyamciem di tsô ga. Lu kwagh u yange tsua u eren yô. Nahan er Hana lu henen sha iyange la yô, kwagh ne taver un ishima u eren  sha iceghzwa na a Yehova. (1 Sam. 1:22) Aluer se mba nengen a kwagh u Aôndo a tende zwa a mi la ken ishima yase yô, se mba henen sha kwagh u una er a bunde ga yô.—2 Pet. 1:19-21.

³ Mbajighjigh kpishi mba i er kwagh ve ken Bibilo la yange ve nengen a akaa a Aôndo tôndo sha mi la ken ishima ve. Averen a ken hemen a ior mban lu nengen a mi ken ishima ve la wase ve nena? Aluer se kpa se mba henen sha akaa a doon tsung a Aôndo a tende zwa ér una er sha ci u uumace mba ve ongo na la yô, a wase se nena?

4. Lu nyi Abel nenge a mi ken ishima na ér ia va er ken hemene?

⁴ Abel, orjighjigh u hiihii la yange “nenge” a kwagh u Yehova tôndo zwa a mi la kpa? Se fatyô u kaan ser Abel yange vande fan er ityendezwa i Aôndo er sha kwagh u iyô la ia za kure ga. I kaa ér: “Me ver ihyom hen atô wou vea kwase, man hen atô u vor wou a vor na kpaa, u ua cagh u ityough, we di kpaa ú cagh u ikishinguhar.” (Gen. 3:14, 15) Nahan cii kpa, adooga tsô Abel hen sha ityendezwa ne tsung shi kav ér a va ‘cagh orgen ikishinguhar’ sha u a wase uumace ve ar sha mlu u vough, u Adam man Ifa ve lu ker cii ve ve va mase gban ken isholibo la. Yange a lu nyi je Abel nenge a mi ken ishima na ér ia va er ken hemen kpa, a na jighjigh ér ityendezwa i Aôndo ia kure, nahan Yehova lumun naagh ku Abel na la.—Ôr Genese 4:3-5; Mbaheberu 11:4.

5. Enoki yange una zua a ishimataver sha u nengen a kwagh u una va er ken hemen la ken ishima na sha ci u nyi?

⁵ Orjighjigh Enoki kpa yange tese jighjigh u nan, shin er lu hen atô u ior mba ve lu ôron akaa a vihin tsung sha iyol i Aôndo nahan kpaa. Aôndo yange mgbegha Enoki ôr kwaghôron u profeti kaa ér, Yehova una va “a uicighan Nav udubu udubu, sha u Una ôr ior cii ijir; mba ve vende Aôndo la cii Una na ve ibo sha aeren a ve a vendan Aôndo la cii, a ve er ve venda Aôndo la man shi sha akaaôron a vihin cii a mbaasorabo mba ve vende Aôndo la ve lu ôron sha a Na yô.” (Yuda 14, 15) Er Enoki lu orjighjigh yô, yange una fatyô u nengen a shighe u tar ua kera lu a ior mbavendan Aôndo ga la ken ishima na.—Ôr Mbaheberu 11:5, 6.

6. Lu nyi Noa yange una za hemen u henen sha mi ken ishima na shighe u Mngerem ma Deemee bee kera laa?

⁶ Noa yange war Mngerem ma Deemee sha ci u jighjigh na u nan. (Heb. 11:7) Mngerem ma Deemee ma been yô, jighjigh u nan na la mgbegha un na Aôndo naagh sha uzendenya. (Gen. 8:20) Akperan nga ga, Noa na jighjigh ér a va sagh uumace ken mlu u isholibo man ku kera, er Abel nahan. Noa lu a jighjigh u nan man ishimaverenkeghen ér akaa a a va doo ken hemen, shin er tar vihi shi Nimrodi lu hendan kwagh a Aôndo kpoghuloo shighe u Mngerem ma Deemee bee la nahan kpaa. (Gen. 10:8-12) Alaghga tsô, yange zua a msurshima sha u henen sha shighe u uumace vea kera lu sha ikyev i hemen u bo ga, shi isholibo man ku u ve ye dyako na la kpa ua kera lu ga la. Se kpa se fatyô u ‘nengen’ a shighe u doon tsung ne ken ishima yase, shi ngu ica a vese kpaa ga!—Rom. 6:23.

7. Ka mlu u ken hemen u nyi nahan Aberaham man Isaka kua Yakob yange vea fatyô u ‘nengen’ a mi ken ishima ve?

⁷ Aberaham man Isaka man Yakob yange vea fatyô u nengen a kwagh u dedoo u una va er ken hemen la ken ishima sha ci u Aôndo yange tôndo zwa ér akuraior a shin tar cii aa zua a iveren ken tsombor ve la. (Gen. 22:18; 26:4; 28:14) Lu u ônov mba uter mba tamen mban vea va hingir kweior shi vea lu ken tar u Aôndo tôndo zwa ér una na ve la.  (Gen. 15:5-7) Mbacian Aôndo mban fatyô u ‘nengen’ a ônov vev ken tar la ken ishima ve sha ci u jighjigh ve unan. Jighilii yô, hii shighe Adam man Ifa ve gba ken isholibo la je, Yehova wase uumace mba ve civir un sha mimi la sha u ve fa ér iyange igen vea hide a lu vough, er ngise nahan.

8. Lu nyi i wase Aberaham tese jighjigh u nan u kpiligh iyolo?

⁸ Alaghga tsô er Aberaham lu nengen a kwagh u Yehova tôndo zwa a mi la ken ishima na yô, kwagh ne wase un er akaa a tesen jighjigh u nan sha igbenda i kpiligh iyol. Ruamabera tese ér shin er Aberaham man mbacivir Aôndo sha mimi mbagenev ve “ngohol uityendezwa” sha ayange a uma ve “ga” nahan kpa, ve “nenge a ve ken ica, ve ember ve.” (Ôr Mbaheberu 11:8-13.) Aberaham nenge a ikyav i tese un wang ér kwagh u lu veren ishima sha mi la ka u mimi yô, je yô lu inja er a nenge kwagh shon kpôô kpôô nahan!

9. Jighjigh u Aberaham na ér uityendezwa mba Aôndo vea kure la wase un nena?

⁹ Er Aberaham na uityendezwa mba Aôndo jighjigh yô, kwagh ne wase un za hemen u eren ishima i Aôndo. Yange er kwagh u tesen ér ngu a jighjigh u nan sha u moughon undun gar u Ur, shi a venda u teman twev ken ma gar u Mbakanaan sha ayange a uma na cii. A fa ér agar a Mbakanaan cii aa war ga sha ci u utor vev civir Yehova ga, er gar u Ur nahan. (Yos. 24:2) Sha ayange a uma u Aberaham cii, “lu keghen gar u a lu a imaagh, u Aôndo A lu Orkaren man Ormaan un la.” (Heb. 11:10) Aberaham “nenge” a iyol na ken gar u or môm nana fatyô u timin un ga, u Yehova tema tor sha mi yô. Abel man Enoki man Noa man Aberaham, kua mbajighjigh mbagenev er ve nahan, yange ve na jighjigh a mnder u shin ku shi ve lu keghen shighe u vea lu uma shin tar ken Tartor u Aôndo, u u lu “gar u a lu a imaagh” ki taver la. Er ve lu gbidyen kwar sha averen ne yô, kwagh ne taver jighjigh u ve na Yehova la.—Ôr Mbaheberu 11:15, 16.

10. Mnenge u Sara lu a mi sha kwagh u ken hemen la yange una wase un nena?

¹⁰ Time ase sha kwagh u Sara, kwase u Aberaham la kpaa. Mnenge u vough u lu a mi sha kwagh u ken hemen la, wase un er kwagh u tesen ér ngu a jighjigh u nan, shin er lu anyom 90, kpa lu a mar wan ga nahan kpaa. Yange nenge a wan na ken ishima, lu ngohol averen a Yehova tôndo zwa a mi la. (Heb. 11:11, 12) Lu nyi i wase un ve lu a imba ishimaverenkeghen laa? Yehova yange kaa a nom na Aberaham ér: “Me ver un doo doo man Me na u wan ken a na kpaa; Me ver un doo doo una hingir akuraior, utor mba iorov kpaa vea due ken a na.” (Gen. 17:16) Sara va maren Isaka kera yô, a zua a ityôkyaa i dedoo i veren ashe keghen shighe u ityendezwa i Aôndo a Aberaham la ia mase kuren la. Se kpa se fatyô u taver jighjigh wase u nan sha u nengen a akaa a injaa a Aôndo a tende a mi shi i lu aa er kpee a bunde ga la ken ishima yase!

11, 12. Mose yange er nan ve Yehova doo un ishima?

¹¹ Orgen u yange nan tese jighjigh u nan yô, ka Mose. Yehova yange doo un ishima tsung. Shighe u Mose lu gumor shi lu ken ya u tor ken Igipiti la, yange una we ikyo ga yô, ma ngôôr soon tahav man inyaregh ga. Nahan kpa, ikyav tese wang ér mbamaren mba Mose yange ve tese un kwagh u Yehova man awashima Na u duen a Mbaheberu ken kpan sha shi nan ve Tar u Ityendezwa la. (Gen. 13:14, 15; Eks. 2:5-10) Luun er Mose zeren henen sha averen aa lu keghen ior mba Aôndo la yô, u hen wer yange ma lu nyi ma i hemba lun kwagh u vesen ken uma naa? Ma lu gwa keren shinii, Yehova ma hemba doo un ishima?

¹² Ruamabera kaa a vese ér: “Ka sha jighjigh u nan man Mose er a vese a kera lumun u i̱ yila un er wan u Wanfarao ga ye. Lu un guda u i̱ er a na dang a nongoior u Aôndo imôngo a u una lu ken mdoom ma isholibo ma ma lu sha anyangem kpeghee la. A nenge  iheen i Kristu hemba lun un a inja a akaa a injaagh a Igipiti cii, gadia a ver ashe sha injar.”—Heb. 11:24-26.

13. Mose yange lu henen sha kwagh u Aôndo tôndo zwa a mi la zulee nahan, kwagh ne wase un nena?

¹³ Er Mose hen zulee sha kwagh u Yehova tôndo zwa u eren sha ci u Mbaiserael la yô, kwagh ne wase jighjigh u nan kua dooshima u lu a mi sha Aôndo la seer taver. A shi nan kpa a hen sha shighe u Yehova una sagh uumace ken ikyangenev mba kuugh kera la, er uumace mba cian Aôndo mbagenev kpa er nahan. (Yobu 14:14, 15; Heb. 11:17-19) Nahan kwagh ne na yô, Aôndo doo Mose ishima tsung sha ci u a nenge a mhôônom ma Aôndo zungwe Mbaheberu man uumace cii la. Sha ayange a uma u Mose cii, a tese ér Yehova doo un ishima, shi a na un jighjigh kpaa. (Dut. 6:4, 5) Shighe u Farao lu keren Mose a ku la je kpa, jighjigh u nan u Mose la, man mdoo u Aôndo doo un ishima la, shi alaghga tsô er Mose lu nengen a kwagh u injaa u lu keghen un ken hemen la ken ishima na yô, kwagh ne wase un tagher a zayol la sha ishimataver.—Eks. 10:28, 29.

14. Ka mnenge u mimi ga u nyi mbagenev ve lu a mi sha kwagh u ken hemene?

¹⁴ Ior kpishi nyian ka ve henen sha akaa ken hemen a a tsa kpa aa er ga yô. Ikyav i tesen yô, shin er ve lu a kwagh ave kpishi ga nahan kpa, mnyam ka ma cier ve ér vea va lu a inyaregh vôôr shi vea tema ken mkpeyol, kpa hegen uma u or gema iv a “zayol man ishima i vihin.” (Ps. 90:10) Ka ve hen ér gomoti u uumace ne una bee a mbamzeyol vev, kpa Bibilo tese ér ka Tartor u Aôndo tseegh ua fatyô u eren kwagh ne ye. (Dan. 2:44) Ior kpishi nenge ér Aôndo una tim botar ne ga, kpa ka kwagh u Bibilo i tese la ga. (Sef. 1:18; 1 Yoh. 2:15-17) Mba ve lu henen sha akaa a a kaha a kwagh u Yehova a kaa la cii vea ahenge.

15. (a) Aluer Mbakristu mba nengen a akaa a a lu keghen ve ken hemen la ken ishima yô, a wase ve nena? (b) Ka nyi u lu veren ashe u va eren shighe u Aôndo una er akaa a a tende zwa a mi la?

¹⁵ Kpa se Mbakristu yô, ka se zua a ishimataver sha u henen sha ishimaverenkeghen yase i yemen sha, shin lun shin tar ne la. U fatyô u nengen a akaa a Aôndo tende zwa a mi la sha ashe a ken ishima, nahan tôôn wer u ngu zuan a akaa shon kpa? Aluer u ngu gbidyen kwar sha kwagh u u fatyô u va eren shighe u Aôndo una kure akaa a tende zwa a mi la yô, a saan we iyol je ka u henen ga. “Nenge” a iyol you ken tar u he, nahan tôô wer u ngu ember uma ker gbem sha won. Hen er we vea mbagenev ne lu eren akaa imôngo sha u geman tar ne hingir paradiso yô. Yehova doo mba ve we ndor a we la ishima, er we nahan. U ngu uange ga, shi taver we iyol, shi akaa a injaa nga keghen we. Mba vea lu hemen ken tom u geman tar cii hingir u he la vea na a saan we iyol, sha ci u vea wa u ikyô sha mimi. Shi a saan we iyol u eren tom a mfetom wou, sha ci u hanma kwagh u u lu eren cii ngu mbagenev a iwasen shi ngu van God kpa a icivir. Ikyav i tesen yô, tôô wer u ngu wasen mbakpenev mba i sember nderen ve la, wer ve va fa Yehova. (Yoh. 17:3; Aer. 24:15) Kwagh ne ka mnyamciem ga. Ka kwagh u doon tsung u Ruamabera a tese ér una va er ken hemen, u se fatyô u gbidyen kwar sha mi yô.—Yes. 11:9; 25:8; 33:24; 35:5-7; 65:22.

16, 17. Aluer se mba lamen vea mbagenev sha kwagh u ishimaverenkeghen yase la yô, a wase se nena?

¹⁶ Aluer se mba lamen vea Mbakristu mbagenev sha kwagh u se soo u va eren, er Yehova una lu kuren uityendezwa nav la yô, se hemba nengen a kwagh u una va er ken hemen la ken ishima yase wang. Shin er mô wase nan fe er kwagh wase una va lu ken tar  u he la ga nahan kpa, aluer se mba lamen sha akaa a se va fatyô u eren la yô, se lu taver ayol a ase asema, shi se tese ser se na kwagh u Aôndo a tende zwa a mi la jighjigh ser una bende ga. Aluer se mba eren nahan yô, se fatyô u taver ayol a ase asema, nahan se za hemen u civir Aôndo ken ashighe a ican ne, er apostoli Paulu vea anmgbianev nav mba ken Roma la kpa yange ve er nahan.—Rom. 1:11, 12.

¹⁷ Shi aluer se mba henen sha mlu wase u ken hemen la yô, se kera yem henen sha mbamtaver asev ga. Alaghga tsô apostoli Peteru kpa tagher a mbamtaver mban sha ci u yange kaa a Yesu ér: “Nenge ase, se undu akaa cii, se dondo U, nahan ka nyi je sé va zua a mini?” Yesu maa wase Peteru man mbahenen mbagenev u henen sha averen a a lu keghen ve ken hemen la. A kaa ér: “Mimi je M ngu kaan ne, ne mba ne dondo sha a Mo ne, sha mgbe u he, zum u Wan u or Una tema sha ikyônough Nagh ki torough ki engem la yô, ne kpaa, né tema sha mkônom ma torom pue kar m har, né ôr ikwe i Iserael i pue kar ihiar la ijir. Man shi hanmô u nan undu uya shin anmgbianev mba nomso, shin mba kasev, shin ter, shin ngô, shin ônov, shin ishule sha ci u iti Yam yô, nana shi á zua a mi kwa akunduatar shi nana zua a uma u tsôron kpaa.” (Mat. 19:27-29) Nahan lu u Peteru man mbahenen mbagenev vea fatyô u henen sha tom u ve lu a mi ken gomoti u una hemen tar cii shi una va a averen a doon tsung sha ci u uumace mba ve ongo imo i Aôndo la.

18. Aluer se mba henen sha shighe u akaa a Aôndo a tende zwa a mi la aa kure la yô, a wase se nyian nena?

¹⁸ Mbacivir Aôndo mba shin tar ne ka vea henen sha shighe u akaa a Aôndo a tende zwa a mi la aa kure la yô, i wase ve. Abel yange fa mbaawashima mba Aôndo tsembelee ve, hingir u lun a mnenge u dedoo sha kwagh u ken hemen ye. Kwagh ne wase un lu a jighjigh u nan man ishimaverenkeghen i mimi. Aberaham yange fatyô u tesen jighjigh u nan u kpiligh iyol sha ci u a “nenge” a kwagh ken ishima na u tese un ér kwaghôron u profeti u Aôndo ôr sha kwagh u “vor” u ityendezwa la una kure kpee yô. (Gen. 3:15) Mose di yange “ver ashe sha injar,” shi tese jighjigh u nan shi Yehova za hemen u doon un ishima. (Heb. 11:26) Aluer se mba nengen a kwagh u Yehova a tende zwa u va eren sha ci wase ken hemen la ken ishima yase yô, jighjigh u se ne Aôndo la una taver shi Yehova una seer doon se ishima. Ngeren u dondon ne una wase se se fa gbenda u hemban doon cii u se er kwagh ne yô.