YANGE mba benden Kingsley uwegh sha kwende yô, maa a hii Bibilo i ôron. Lu asaimenti na u hiihii ken Makeranta u Henen Tom u Hemen u Aôndo ken tiônnongo je la. Yange yila hanma ishember cii vough er gba u a yila la. Kpa tile yôô! Hii nan ve lu kenger ken Bibilo na ga?

Kingsley lu or u ken tar u Sri Lanka u yange pir ashe yô. Shi ungwan taveraa shi zenden shin ikyekye i mbaawanev. Yange hen kwagh u Yehova shi kuma u nyôron Makeranta u Henen Tom u Hemen u Aôndo la nena? De m pase.

Shighe u m hii zuan a Kingsley la, doom kpishi er sar un tsung u fan kwagh u mimi u ken Bibilo la nahan. Yange vande henen Bibilo vea Mbashiada mbagenev kposo kposo, nahan kôpi u takerada na u sha kwaghngeren u mbaapirashe u Mfe u Una Va a Uma u Tsôron La, ya tsegh. * Nahan Kingsley lumun ér m hide m hii kwaghhenen a na, kpa se gema se lu a mbamtaver uhar.

Kwagh u hiihii yô, Kingsley lu vea mbabeenyol man mbaawanev mbagenev kpishi hen ya u i maa sha ci u ve yô. Er ayôôso ngee hen ya ne shi Kingsley ungwan taveraa yô, i gba u me lam taver taver a hemba er m lamen la. Er lu nahan yô, hanma or hen ya la ungwan kwaghhenen wase u ken hanma kasua la!

 Kwagh u sha uhar yô, hanma shighe u sea tema kwaghhenen yô, Kingsley a ôr takerada kpa a gema a kav cuku di tsô. Nahan i gba u Kingsley una wa iyol tsembelee sha er kwagh u injaa una due ken kwaghhenen wase yô. Yange a ôr shi a kimbir ôron ngeren u se va hen ken takerada la tsuaa, shi a ôr avur a ken ngeren shon ken Bibilo na i sha kwaghngeren u mbaapirashe la, maa a fa mbamlumun mba una na sha mbampin la ken ityou. Gbenda u se henen kwagh ne wase kpen kpen. Sea henen kwagh yô, Kingsley a shar sha kapeete u i yer ér rôôgu la, a pelegh angahar, i saan un iyol, a keman uwegh hen inya shighe u una pasen kwagh u a hen la ikyenge ikyenge yô. Ica gba ga maa se gema henen kwagh kwa har ken hanma kasua, shi hanma kwa u sea tema yô, se hen kwagh ahwa ahar!

Kingsley yange kegh iyol u zan mbamkombo hen Iyou i Tartor, kpa gema lu tom u kiriki ga. I gba u a wase un u nyôron shi hungwan ikyekye na i mbaawanev la. Shi una nyôron mato shin una hungwan, shi a gba u una nyôr ken Iyou i Tartor shin una due kpa, i gba u a wase un. Kpa mba ken tiônnongo na kpishi ve tôôn tôn u wasen un, shi doo ve tsung u eren tom ne. A eren mbamkombo yô, a ver lôôspika ikyua a tough nagh, a ungwan zulee, shi a naan mbamlumun je kpaa!

Kingsley henen kwagh shighe kar yô, a tsua ér una nyôr Makeranta u Henen Tom u Hemen u Aôndo la. Yange ka shin kasua uhar u una hii ôron Bibilo ken tiônnongo yô, m pine un sha u me fa una wa iyol yô. A ôrom vangertiôr ér, “Een, Anmgbian, m wa iyol nôngo u kuman er kwa 30 nahan.” M wuese un sha iniôngon na la, maa m kaa a na mer a ôr me ungwa. A bugh Bibilo, a ver ahôaveegh sha Bibilo na i sha kwaghngeren u mbaapirashe la, maa a hii u ôron. Nahan kpa, m gema m nenge yô, lu pendan ahôaveegh a na sha ngeren la tsembelee er i gbe u a lu la ga. Lu nahan sha ci u yange kôr avur a Bibilo a gba u una ôr la cii ken ityou!

M kenger kpiligh mo iyol saa her, mliam ivim ken ashe poo, lu ndôôr senen. M pine Kingsley kwagh u yange er ve wa iyol kwa 30 tseegh kpa kôr hanma kwagh cii ken ityou yô. A kaa ér: “Ei, hanma iyange yô, ka m hen i nôngo u kuman er kwa 30 nahan.” Kingsley yange a tema sha rôôgu na, a hen shi a hide a kimbir henen u ôron avur a Bibilo a i na un la zan zan kar kôron ken ityou. A er kwagh ne hemba uwer jimin.

Maa va ar sha iyange i una er asaimenti na ken Iyou i Tartor la. Kingsley eren asaimenti na been yô, tiônnongo cii kure ave saa her, shi mbagenev vaa sha ci u iniôngon i orhenen Bibilo u he ne. Orpasenkwagh ugen u yange de u nan akaaôron ken Makeranta u Henen Tom u Hemen u Aôndo ne, sha ci u ashe a cian yô, kaa ér un soo u hiden nyôron makeranta ne. Sha ci u nyi? Anmgbian u kwase ne kaa ér, “aluer Kingsley fatyô u eren yô, mo kpa me fatyô!”

Yange Kingsley henen Bibilo anyom atar nga kar yô, a tese ikyav i iyoltseghan na sha u eren batisema shin mnger ken uwer u Setemba 6, 2008 la. Kingsley yange civir Yehova sha mimi zan zan kar kpen ken uwer u Mei 13, 2014. Kpa cii man ku na yô, lu a vangertiôr ér ken Paradiso u shin tar la, una za hemen u civir Aôndo sha mimi a agee iyol man angev shio. (Yes. 35:5, 6)—Ka Paul McManus a pase kwagh u Kingsley ne ye.