HII ken inyom i 1992 la je, Mbahemenev mba Shin Itine hii u tsuan mbatamen mba ve vie ken jijingi yô, sha u ve wasen ukômatii vev tom. * Mbawasen mba ve lu ken iyôngo igen ne la, ka ve er ityom injaa kpishi sha u suen Mbahemenev mba Shin Itine. (Yoh. 10:16) Hanma kasua yô, ka ve nyôr mkombo u kômatii u ve eren tom her la, ve lam sha akaa a i gbe u a er la, shi ve due a mbamhen. Kpa ka Mbahemenev mba Shin Itine ka ve mase tsuan kwagh u a er ye, nahan mbawasen mban di ve gema ve nenge ér i dondo kwagh u kômatii la a kaa la shi ve er hanma tom u i ne ve cii. Mbawasen mban ka ve za mbamkombo mba vesen kua mbamkohol mba ityar i ityar vea Mbahemenev mba Shin Itine. Shi afishi a shin itine ka a tindi mbagenev ken ve ér ve za sôr ubranci asev.

Anmgbian ugen u a lu môm ken mbawasen u a er tom ne hii shighe u i hii u tsuan ve la yô, kaa ér: “Ka mea eren ityom u i nem yô, kwagh la a wase Mbahemenev mba Shin Itine ve hemba veren ishima sha akaa a ken jijingi.” Ugen di u a er tom ne i hembe anyom 20 yô, kaa ér: “M zua a ian i civirigh i hemban cii, i yange m ver ishima mer me zua a mi ga yô.”

Mbahemenev mba Shin Itine ka ve na mbawasen ve mban ityom kpishi, shi ka ve lu a iwuese kpishi sha tom u dedoo u anmgbianev mba jighjigh mban ve lu eren sha mimi kpoghuloo la. Yô, se cii se “waan nen ambaaior la ikyo.”—Fil. 2:29.