KWAGH ne yange er ken inyom i 1931 la, sha shighe u fam. Hunda u nyôron ken agirigi ugen u i kuhwan amar her, u i fa un wuee yô, iv a ior poo, mba ve mough ken ityar kposo kposo i kuman 23 nahan, ve va hen gar u Paris yô. Mato mba vesen mba tôôn ior ningir a mi ken geri lu kuran ior va haan hen hunda u agirigi ne. Ica gba ga maa agirigi ne iv a ior nôngo u kuman er 3,000 nahan. Ior mban va lu amar ga, kpa ve va sha u va ungwan akaaôron a Anmgbian Joseph F. Rutherford, u lu hemen tom u pasen kwagh hen shighe ne la. Yange i lu geman akaaôron a na a a lu nan sagher sagher la ken zwa u French man Jamani man Polish. Zege ikyenge i Anmgbian Rutherford la yange i kume hen agirigi la cii.

Mkohol u vesen u i er hen gar u Paris ne, va a mgem u doon tsung sha kwagh u tom u pasen kwagh u Tartor la ken tar u France. Anmgbian Rutherford yange taver anmgbianev mba ve mough sha tar cii ve va mkohol ne la ishima, hemban je yô, agumaior ér ve er tom pania ken tar u France. Anmgbian John Cooke, u yina anyom 20 yô, mough ken tar u Ingila va mkohol ne. Mayange gumor ne hungur mkaanem ma sagher iyol, ma taver un ishima ne ga, ér: “Kwaghmôm sha won a de yangen ne agumaior u eren tom pania ga!” *

Dugh Anmgbian John Cooke, u va hingir ormishen la sha yô, mbagenev kpa vengese myer u i yila ve la, er Paulu kpa ngise lumun u yemen Masedonia nahan. (Aer. 16:9, 10) Jighilii yô, upania 27 mba ve lu ken tar u France ken inyom i 1930 la, seer iyenge hingir 104 ken inyom i 1931. Kwagh ne lu mvese u va ken atô u inyom i môm tseegh yô. Er upania mba sha ayange a tsuaa mban kpishi lamen zwa French ga yô, vea er nan ve vea pase ior kwagh ken zwa French shi vea nôngo a ibanave man mtsweneme?

Upania mba ken ityar igen yange ve eren tom a ukaade mba pasen kwagh a mi sha u lamen a ior sha kwagh u ishimaverenkeghen i Tartor la. Anmgbian ugen u lu marnya u tar u Jamani, u yange pase kwagh vangertiôr hen gar u Paris yô, kaa ér: “Yange se fa ser Aôndo wase ka u ageegh. Shighe u sea due kwaghpasen man ishima ia taan se kwe er ia pav yô, i lu sha ci u se mba cian or ga, kpa i lu sha ci u alaghga se va hungur ishemberkwaghôron i ken zwa French i ‘U fatyô u ôron kaade ne je he?’ la. Yange se na jighjigh ser tom wase la lu u hange hange.”

Upania yange vea pasen kwagh sha uzegembaayough yô, ashighe kpishi mbanengen sha ayou la ve zenda ve kera. Iyange igen yô, upania mba kasev uhar mba ve lu marnya u tar u Ingila, mba ve fa zwa French cuku tseegh yô, za tagher a or u nengen sha zegeyou ugen, u ishima vihi un a ve tsung, lu pinen ve or u ve soo u nengen a nan la. Môm ken anmgbianev mba kasev mban lu nôngon ér una er kwagh u or la a de u vihin ishima yô, nahan a gema ashe a nenge a kwagh u cuku ugen u i nger ken zwa French i wa sha hunda ér, “Gbidye imemegh” la. Lu henen ér ka iti i orya je la, nahan a ôr a  ahan zwa ér: “Se va ser se va nenge a Madam ‘Gbidye imemegh.’” Er upania mba tseen ishima mban fa u hômon kwagh kpishi yô, kwagh ne wase ve kpen kpen!

Ken kwavanyom u 1930 la, ior kpishi ken tar u France gba ican, man ican ne bende a anmgbianev mba ve lu za eren tom pania ken tar u France la kpaa. Anmgbian u kwase u lamen zwa Buter, u i yilan un ér Mona Brzoska, vea anmgbian u kwase ugen u ve eren pania imôngo yô, yange ve ya ican kpishi. Brzoska pase ican ve ne kaa ér: “Ajiir a ase a tsan yange doo kuma ga, man zayol wase u vesen yô, ayou a ase a ndôhôr kpishi sha shighe u hir, nahan i lu ican kpishi u nôngon ér i tsee ker. Nahan ashighe kpishi se gba tsan ken aruum a ase a a ndôhôr a gbe akpo la tsô. Shi sev mbua av yô, i gba u se hembe akpo a a gbe sha mngerem ma ken jôôgu yase la cii ve se ôr ishigh ye.” Upania mban yange ve yina ishima sha ci u ican ve nee? Mayange ga! Môm ken upania mban pase er lu ve ken ishima yô, ér: “Yange se lu a kwagh ga, kpa shi kwagh môm ban se ga.”—Mat. 6:33.

Shi yange gba u upania mbatseen ishima mban vea nôngo a mtswenem. Ken mhii u kwavanyom u 1930 la, mbapasenkwagh mba ken tar u France hemba 700 ga, shi ve kpishi ve lu sarem sarem ken tar la. Lu nyi i wase upania mban u lun saan saana? Mona u yange nôngo a mtswenem vea anmgbian u kwase ugen u ve eren pania imôngo la kaa ér: “Yange se nôngo a mtswenem man sha u henen ityakerada i nongo wase imôngo hanma shighe. Er sha ayange la se hiden se za sôron ior shi se henen Bibilo a ve ga yô, se luun a ian aikighe i ngeren tsombor wase uwashika, hemban je yô upania mbagenev, pasen ve akaa a se lu zuan a mi ken tom u pasen kwagh la, shi taver ayol ase asema.”—1 Tes. 5:11.

Er upania mba tangen iyol ga mban tagher a mbamtaver nahan kpa, ve za hemen u lun a mnenge u vough. Se nenge a kwagh ne ken uwashika mba yange ve tindi a mi shin afishi a branci, mba ashighe agen je yô, ve nger shighe u ve er pania ken tar u France anyom a kar imôngo la. Anmgbian u kwase Annie Cregeen, u i shigh un mkurem, u zende tar u France vea nom na tser, ken inyom i 1931 zan zan inyom i 1935 la, umbur kwagh u anyom a yange ve er tom ne la, nahan a nger wener: “Yange saan se iyol shi uma wase doo je gande! Er se lu eren pania imôngo yô, se hingir kôôsôô. Er apostoli Paulu yange kaa nahan, ‘Mo m môôr. Apolo gema ur mngerem, kpa ka Aôndo A ne mvese ye.’ Doo se mba yange ian bugh se i wasen ior anyom kpishi ken ijime la tsung.”—1 Kor. 3:6.

Upania mba tsuaa mban ver mba ve soo u seer eren tom u pasen kwagh la ikyav i ishimawan man ishimatseen i vea fatyô u dondon yô. Nyian ne, upania mba keke mba kuman er 14,000 nahan, mba pasen kwagh ken tar u France. Ve kpishi mba ken iniongo shin atôônanongo a a eren mkombo ken ijô i ken ityar i ken won yô. * Ve lumun ér kwaghmôm a yange ve u eren tom u pasen kwagh la ga, er upania mba tsuaa mbara nahan!—Ngeren u pasen yiase yase i ken tar u France.