Ú ôr mbamgber mba Iyoukura mba i sember duen a mi la vighe vighe kpa? Yô, nenge ase wea fatyô u nan mlumun sha mbampin mban yô:

Shighe u mkur una va la, ka akaa agen a nyi a a kar kera?

Akaa agen a a kar kera yô, ka ugomoti mba uumace mba ve kanshio u hemen sha inja la, man ityav man ijirôron i mimi ga, man ukwaghaôndo mba ve vihi Aôndo iti shi ve tsum a uumace la, man mbacivir Aôndo ga.—7/1, peeji 3-5.

Ka an lu Gogi u Magogi u i ter kwagh na ken takerada u Esekiel laa?

Ka Satan ga, kpa ikyav tese ér Gogi u Magogi ka mzough u akuraior cii a a va nôngo ér a a tim ior mba Aôndo kera sha shighe u zegecan una hii la.—5/15, peeji 29-30.

Uivande mba Yesu er la tese er a ne kwagh wuee nena?

Shighe u Yesu za ivese igen hen gar u Kana la, a gema ugalôn mbamngerev 100 (shin ulita 380) hingir wain. Sha shighe ugen la, a koso iorov 5,000 sha ivande. (Mat. 14:14-21; Yoh. 2:6-11) Sha ashighe la cii, lu dondon ikyav i Ter na i nan kwagh wuee la.—6/15, peeji 4-5.

Shighe u a va tim ukwaghaôndo mba ken Zegebabilon la, a tim mba yange ve zaan ukwaghaôndo mbara cica cii shinii?

Ka nahan keng ga. Sekaria 13:4-6 pase ér mbahemenev mba aduaav mbagenev je kpa vea undu ukwaghaôndo vev mbara shi vea venda ér shighe môm kpa ve nyôr nongo a ukwaghaôndo mba aiegh mbara ga.—7/15, peeji 15-16.

Ka akaa agen a nyi Orkristu nana fatyô u gbidyen kwar sha mini?

Akaa agen a se fatyô u gbidyen kwar sha mi yô, ka akaa a Yehova a gbe la, man mluainja u Mkaanem nam ma yange na i nger la, man ian i civirigh i se lu a mi i eren msen hen a na la, kua iyua injaa i a ne wan na sha u paan se la.—8/15, peeji 10-13.

Ieren i palegh ujende mba bov la wa kwagh u ishiôr kpa ker nena?

Kwagh u mba ve fe mimi ga la vihi se ishima ga. Nahan cii kpa, aluer se mba sôôr or u nan tsegh iyol i nan sha ci u Aôndo ga, shi nan lu dondon atindi a na ga yô, se mba eren ishima na ga. (1 Kor. 15:33)—8/15, peeji 25.

Peteru yange vôr ken jijingi, kpa hide taver her nena?

Yange lu jighjigh u nan u Peteru la wase un gba zenden sha mnger zan hen Yesu ye. (Mat. 14:24-32) Kpa Peteru gem kenger zegeahumbe yô, cier un iyol. Maa a hide a kenger sha Yesu, shi a lumun iwasen na.—9/15, peeji 16-17.

Aerenakaa 28:4 kaa ér, ior mba hen Melita yange ve hen ér apostoli Paulu ka orwuanor. Er nan ve ve hen nahana?

Shighe u bo iyô ugen nyima un la, alaghga tsô yange ve kure ikyaa sha lan ér ka Dike, inmgbianaôndo u ijirôron i mimi la, a lu tsahan un ye.—11/1, peeji 9.

Marta yange de akaa kpishi dan un nahan, kwagh la tese se nyi?

Shighe ugen la Marta yem yôron zege iwer, nahan kwagh la dan un. Yesu kaa a na ér anngô na u kwase tsua ci u dedoo, sha u keghen ato a ityesen Na. Gba u se wa ikyo sha er akaa a a lu hange hange ga la, aa dan se u eren akaa a ken jijingi ga yô.—10/15, peeji 18-20.