Hen Mbaôron Takerada Ne

DOO se u pasen ne ser, se gema gbenda u se ngeren Iyoukura la. Mgem ne hii sha Iyoukura ngin je. Cii man se ôr ne akaa a se gem ker yô, de se vande ôron ne aa se gem ga la.

Se yilan magazin ne ser Iyoukura u Yôôn Tartor u Yehova er se vanden yilan nahan. Nahan yô, Iyoukura ia za hemen u nan Yehova icivir, gadia ka un a lu Aôndo u mimi ye shi ia za hemen u surun mbaôron magazin ne asema sha loho u dedoo u Tartor. Ngeren mba sha peeji u sha 5 zan zan 9 u mgber ne la ve pase kwagh u Tartor shon u lu yô man shighe u ua va la kpaa. Heela tseegh ga, Iyoukura ia za hemen u taver ior asema ér ve na Yesu Kristu jighjigh shi ia pasen ior mimi shi ia tôvon sha akaaôron a profeti a ken Bibilo la sha u pasen inja i akaa a á lu eren shin tar la er i̱ vanden eren i hembe anyom deri môm hegen nahan.

Nahan ka nyi jighilii i gem kere? De se pase ne akaa a he a doon tsung a aa gema lun ken mgber u magazin ne u ken zwa Tiv, u a gberen kwa inyiin ken inyom la. *

Se ngeren akaa kposo kposo ken mgber u Iyoukura i se naan ior ser ve ôr ne; ungeren mban vea wase ior u gbidyen kwar sha akaa kposo kposo. Ngeren u una luun a itinekwagh ér “U Fa Kpa?” la una pasen ior akaa a doon, a a te iwanger sha akaa a ken Bibilo yô. Ngeren u “Kporom hen Aôndo” la di una tesen se akaa a se fatyô u henen sha kwagh u Yehova ken avur a Bibilo kposo kposo yô. Ngeren u una luun a itinekwagh ér “Mpin u Mbaôron Takerada Ne” la una naan mbamlumun sha mbampin mba ken Bibilo mba ior ve pinen hanma shighe yô. U tesen ikyav yô, ior kpishi soo u fan aluer ‘Tartor u Aôndo ka kwagh u ken ishima i or’ yô. U zua a mlumun sha mpin ne sha peeji 13.

I nger akaa agen ken mgber u Iyoukura ne ér a̱ wase icombor. Se gberen ngeren u una luun a itinekwagh ér, “Akaa a Van a Msaanyol hen Tsombor” la, una pase mbamzeyol mba ior ve tagher a mi hen icombor ve yô, man er akaawan a Bibilo aa wase u sôron mbamzeyol mba shonov yô. Mgber u Iyoukura ne shi una luun a ngeren u a lu a itinekwagh ér “Tese Ônov Ou” la. Doo u mbamaren vea ôron ônov vev mbakiriki ngeren ne. Ngeren u “Sha ci u Agumaior” la kpa ka ngeren u dedoo u se gberen ken Iyoukura ne yô. Una luun a mbampin mba vea wase agumaior u henen Bibilo yô.

Se gberen ngeren mbagenev kpuaa ken Iyoukura ne. Ngeren u una luun a itinekwagh ér “Kav Jighjigh Ve u Nan La” una taver se ishima u dondon ikyav i ior mba i er kwagh ve ken Bibilo la. U tesen ikyav yô, u fatyô u ôron kwagh u profeti Eliya sha peeji 18 zan zan 21 ken Iyoukura ne shi henen sha gbenda u se fatyô u dondon jighjigh na u nan la kpaa. Ngeren u una luun a itinekwagh ér “Washika u . . .” la di a lu washika u mbamishen mba sha ajiir kposo kposo sha tar ve nger sha u pasen kwagh u ve lu eren yô. Kwaghngeren u a lu a itinekwagh ér “Kwagh u Se Hen hen Yesu” la una pase atesen a Bibilo sha gbenda u a wanger hanma or yô.

Se mba a vangertiôr ser hanma or u nan er Iyoukura, u nan nengen Bibilo ér ka icighan takerada, shi i sar nan u fan kwagh u takerada ne u tese cii yô Iyoukura ia za hemen u doon nan ishima. Se na jighjigh ser magazin ne una wase u ú fa mimi u ken Bibilo, u i sar u ú fan yum la.

MBANGEREN

[Footnote]