Kanyi I Lu Tartor U Aôndo?

KANYI yange i lu itinekwagh i kwaghpasen u Yesu? Yesu iyolna kaa wener ka Tartor u Aôndo. (Luka 4:43) Yesu hemban ôron ior kwagh u Tartor. Yange una ôr ve nahan i taver ve u kaven kwagh u a lu ôron yôô? Ma shighe môm nahan ve pine un kwagh u Tartor la u lu kpa? Ei. Ityakerada i Ivangeli ngi a ijiir i môm tsô i í kaa ér ior pine un imba mpin ne ga. Nahan yô, Tartor u Aôndo lu kwagh u mba sha shighe na la vande fan kera yôô?

Sha mimi yô, Ruamabera u ngise u Mbayuda nengen ér ka icighan kwagh la pase kwagh u Tartor la u lu yô, a pase kwagh u ú vighe vighe man kwagh u ua er kpaa. Se mba sha ayange ne kpa se fatyô u seer henen kwagh u Tartor la ken Bibilo, er Mbayuda kpa hen nahan. Se time nen sha akaa a mimi ataankarahar a Bibilo i er sha kwagh u Tartor yô. Mbayuda mba sha shighe u Yesu man mba ve vande lun a na la fa mimi u hiihii la kua u sha uhar man u sha utar la kpaa. Lu Kristu gayô mbaapostoli nav pase mimi u sha unyiin zan zan ataratar la ken derianyom u hiihii la ye. U masetyô la di se fa un sha shighe wase ne.

1. Tartor u Aôndo ka gomoti kpôô kpôô, u una kar kera mayange ga yô. Kwaghôron u profeti u hiihii u ken Bibilo la tese ér Aôndo una tindi or u nana yima uumace mba jighjigh yô. I yila Or shon ér “vor.” Una bee a mbamzeyol mba ihyembeato i Adam man Ifa kua Satan i ve a mi la cica cii. (Genese 3:15) Anyom nga va kar kpishi yô, i pase Tor u jighjigh Davidi kwagh u doon tsung sha kwagh u “vor” shin Mesiya ne. Mesiya shon una hemen Tartor. Tartor ne ua lu kposo aa ityartor igen cii. Ua lu gbem sha won.—2 Samuel 7:12-14.

2. Tartor u Aôndo ua tim ityartor i uumace cii. Yange i tese profeti Daniel mpase u sha mnenge u ityartor i ageegh i ia hemen tar sha adondo adondo zan zan a ar sha shighe wase ne yô. Nenge ase kwagh u doon  tsung u i mase tesen Daniel ken mpase u sha mnenge shon ne: “Man sha ayange a utor [mba uumace mba vea mase hemen] mbara, Aôndo u Sha Una ver tartor ugen u ua gba mayange ga yô, man shi tahav mbu u kpaa mbua hingir sha ikyev i ma ikyur igen ga, kpa ua hembe ityartor igen ne cii avur avur, ua tim i, kpa u yô, ua lu gbem sha won.” Nahan a tim ityartor shin ugomoti mba tar ne gbem sha won, ityav mbi nôngon man mkighir kua anyighe una kera lu ga. Er kwaghôron u profeti u Daniel a tese nahan, ica a gba ga tsô Tartor u Aôndo ua hemen tar cii. (Daniel 2:44, 45) Tartor ne ngu kpôô kpôô shi ka u tseegh ua lu gomoti u una hemen tar ne ye. *

3. Tartor u Aôndo ua bee ityav shi ua kar a angev kera man ijen kua ku je kpaa. Akaaôron a profeti a Bibilo a doon tsung pase kwagh u Tartor u Aôndo ua er shin tar ne yô. Gomoti ne una er kwagh u mzough u uumace môm a lu a vande eren shin una fatyô u eren ga yô. Nenge ase yô, a vihi ikyav mbi utyaav cii, mbia kera lu ga zan zan gbem sha won! “A er ityav mbi bee zan zan ar hen ikighir i tar je.” (Pasalmi 46:9) Mbatwerev man ayouacii aa kera lu ga, angev kpaa ga. “Ma or u nan tem ker kpaa nana kera kaa er: Kwagh nyoon mo, ga.” (Yesaia 33:24) Mayange ijen ia kera gba shin kwaghyan una ban, ior a kpe ijen ga. “Iyiav [mbia] ngee shin tar.” (Pasalmi 72:16) Ku iin ua kera lu ga shi ior vea de u za tsan ku. Iwar man ajiir a koson mbakpenev kua mbamzeyol mbagenev mba sha kwagh u kuugh kpaa vea kera lu ga. A tim ku, orihyom wase ua memen ga la gbem sha won. Aôndo “Una tim ku sha won kera; Ter AÔNDO Una ese mliam sha ishiv mbi iorov cii.”—Yesaia 25:8.

4. Tartor u Aôndo ngu a Tor u Aôndo a ver yô. Mesiya ver iyolna tor ga, shi ka uumace mba ve yen ne ve ver un tor kpaa ga. Ka Yehova Aôndo iyolna a ver un tor ye. Ishember i Mesiya man i Kristu la tese er i lu Aôndo a ver un tor yô. Inja i asember ne ér “U i Shigh Un Mkurem” la. Nahan yô, ka Yehova a shigh Tor ne mkurem shin a ver un sha icighantom ne ye. Aôndo ôr kwagh na ér: “Nenge Wanakiriki Wam u M tuur Un; icuwan Wam u ishima i doom a Na yum yô; M ver Jijingi Wam sha a Na, Una va a ijirôron i mimi hen akuraior.” (Yesaia 42:1; Mateu 12:17, 18) Un u a gbe se la hemba fan or u i doo u nana hemen se a vese cii.

5. Tor u Tartor u Aôndo la tese uumace cii er un lu tor u injaa yô. Ka Yesu u Nasareti yange lu Mesiya shon u i tsengaôron ér ngu van la ye. I mar un ken tsombor u Aôndo vande kaan ér a mar un her la. (Genese 22:18; 1 Kroniku 17:11; Mateu 1:1) Zum u lu shin tar la, akaaôron a profeti sha kwagh u Mesiya, a i tsenga ngeren uderimbaanyomov imôngo la kure sha a na. Shi yange i pase kwagh na sha ér ngu Mesiya. Kwagh ne er nena? Aôndo yange lam sha, pase er a lu Wan Na yô; mbatyomov kpa pase er Yesu a lu Mesiya u i tsenge ôron ér ngu van la yô. Shi Yesu kpa er uivande mba ve tese wanger wanger ér a zua a tahav hen Aôndo yô. Ashighe kpishi Yesu yange a er uivande mban sha ashe a ior uderi shin udubu imôngo. * Yesu tese acin imôngo imba Tor u una lu yô. Lu a tahav mbu wasen ior shi soo u wasen ve kpaa. (Mateu 8:1-3) Lu or u tangen iyol ga, u zungwen mhôônom shi taver ishima shi hiden a iyol ijime kpaa. I nger akaa a yange er shin tar la ken Bibilo sha er hanma or nana fatyô u ôron yô.

6. Tartor u Aôndo ngu a iorov 144,000 mba vea tema tor a Kristu imôngo yô. Yesu yange kaa ér ior mbagenev kua mbaapostoli nav vea hemen a na imôngo sha. A yila nongoior ne ér “anikyumuile u kpeghee.” (Luka  12:32) Anyom nga kar yô, i pase apostoli Yohane ér anikyumuile u kpeghee ne una lu iorov 144,000. A na ve tom u doon sha, vea lu ator man upristi a Kristu imôngo.—Mpase 5:9, 10; 14:1, 3.

7. Tartor u Aôndo ngu hemen sha hegen, ica a gba ga tsô ua hemen tar ne kpaa. Mimi u sha utaankaruhar ne hemba doon u se hen kwagh sha mi cii. Bibilo ôr akaa kpishi a a tese ér i na Yesu tahav mbu torough sha yô. Ngu hemen sha hegen, man ica a gba ga tsô una hii u hemen tar shi una kure akaaôron a profeti a dedoo a se vande ôron kwagh sha mi la. Kpa se er nan ve se fa ser Tartor u Aôndo la ngu hemen hegene? Man ka hanma shighe ua hii u hemen tar nee?

[Footnotes]