Kwaghôron u Yehova Gbe Inya Ga

“MO M ngu Aôndo, mô ugen ngu ga; Mo Aôndo je, mô ugen ngu er Mo nahan ga, u M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la.” (Yesaia 46:9, 10) Ka kwagh u Yehova, un u kwaghôron na a gbe inya mayange ga la a er je ne.

Hanma or fa er uumace ve fetyô u tsenganôron kwagh u una er ken hemen ga yô. Er se fe ser Bibilo ka takerada u akaaôron a profeti yô, doo u kwagh ne una mgbegha mba i sar ve u fan mimi cii u tôvon fan aluer mimi je ka Aôndo a lu orngeren u Bibilo yô. Yô se time nen sha akaaôron a profeti agen a ken Bibilo a a kur sha mi yô.

Akuraior a Ngise

Aôndo yange tsengaôron ér a tim Babilon man Edom man Moabi man Amon kua Tiru, vea kera lu ga gbem sha won. (Yeremia 48:42; 49:17, 18; 51:24-26; Obadia 8, 18; Sefania 2:8, 9) Mtim u i tim akuraior a duen iti tseer tseer ne sha tar kera la tese ér akaaôron a profeti a Aôndo nga gbe inya ga.

Alaghga mbagenev vea kaa ér hanma or kpa nana fatyô u tsengan ôron ér ma ikyurior ia kera va lu ga, a̱ lu i agee je kpaa. Kpa aluer or ôr nahan yô, nan kera fa er Bibilo i er kwagh u mtim u akuraior ne vighe vighe ga. U tesen ikyav yô, Bibilo pase vighe vighe er a tim Babilon kera yô. I tsengaôron ér Mbamede vea tim gar la, shi a lu Shirushi una hemen ushoja mba vea tim gar shon ye. Shi ifi u lu er ka girgar u kuran gar la kpa a uma un kera.—Yesaia 13:17-19; 44:27–45:1.

Akuraior agen kpa Bibilo yange i tsengaôron ér a tim a, kpa i kaa ér aa kera lu ga ze. Shighe u Aôndo tsengaôron ér Mbababilon vea tim Yerusalem la, a kaa ér a hide a maa gar la, shin er Mbababilon pasen ikpan ve ga nahan kpaa. (Yeremia 24:4-7; 29:10; 30:18, 19) Kwaghôron u profeti ne yange kure sha mi vough, nahan ikyurior i Mbayuda za hemen zan zan nyian.

Shi Yehova tsengaôron ér a tim tartor u Igipiti, ua kera hemba agee sha tar cii ga, “kpa ken masetyô [yô], ior shi vea tema ker.” Shighe a karen yô, tartor u u hemba agee sha tar cii ne ua “hingir tartor u gban ijime.” (Yeremia 46:25, 26; Esekiel 29:14, 15) Kwagh ne kpa kure sha mi vough. Heela tseegh ga, Yehova  shi tsengaôron ér a hemba tartor u Grika, ua kera hemen ityartor igen sha tar ga, kpa mayange je kaa ér ikyurior ne ia kera lu ga ze. Akuraior a Yehova tsengaôron ér a tim a, aa kera lu ga la kera nga ga mimi, kpa agen a yange ôr nahan ga la yô, nga her zan zan nyian; nahan kwagh ne tese se nyi? Tese se ér Mkaanem ma Aôndo ma a akaaôron a profeti a mimi.

I Tsengaôron Hanma Kwagh Vighe Vighe

Er se vande ôron nahan, Yehova yange ôr kwagh u mtim u Babilon vighe vighe. Tiru kpa, takerada u Esekiel tsengaôron kwagh u tim na vighe vighe ér a haa awen na man ikpande man alôgh na “ken atô u mnger.” (Esekiel 26:4, 5, 12) Kwaghôron u profeti ne kure ken inyom i 332 C.S.Y. (Cii man Shighe u Yesu) la. Akumautya a Alekesander u Vesen yange kura alôgh a vegher gar u Tiru u lu hen kpemnger, u i vande timin un kera la, ve haa ken atô u mnger atihi atihi hingir tsar, ve per sha mi ve za tim vegher gar u Tiru u lu ken icile la.

Kwaghôron u profeti u i nger ken Daniel 8:5-8, 21, 22 man 11:3, 4 la kpa tsenga pasen akaa vighe vighe sha kwagh u “tor u Grika” u ageegh la kpilighyol kpen kpen. Tor ne una kpe sha shighe u una lu a agee her kpishi la, una kpeen yô tartor na ua pav ker avegher anyiin, kpa a lu ônov nav vea hemen ityartor ne ga. Yange i nger kwaghôron u profeti ne anyom nga kar 200 yô maa a kure sha Alekesander u Vesen la, un lu tor u ageegh u Grika la. Mbatimen sha akaa a mbayiase kaa ér yange kpe ku kôugh, nahan i pav tartor na ker avegher anyiin, ukurmbautyaav nav unyiin hemen i, lu tsombor na ga.

Mbapuunakaa mbagenev kaa ér a̱ shi nan kpa kwagh ne yange er cii i mase ngeren kwaghôron u profeti ne ye. Kpa hide ôr avur a ken takerada u Daniel a i ter sha heen ne tsô u nenge. Aluer akaa a i er ken avur ne la ka kwaghôron u profeti yô, i ôr hanma kwagh vighe vighe je kpilighyol. Kpa aluer akaa ne  yange er cii ve, i mase ngeren a yô shi se fatyô u kaan ser i pase hanma kwagh vighe vighe je he? Aluer ka ma orcugh u yange nan lu uma sha ayange a Alekesander kpe kera la nan nger akaa ne sha u bumen ior ér ka kwaghôron u profeti yô, er nan ve yange nan kera nger ér Alekesander una kpeen yô, ônov nav uhar vea nôngo u veren tartor ve kpa a wua ve kera ga? Er nan ve yange nan nger ér anyom aa kar imôngo cii ve ukurmbautyaav mba unyiin mbara vea kôr cio u hemen avegher kposo kposo a zegetartor u Alekesander la ga? Heela tseegh ga, er nan ve yange nan nger iti i tor u ageegh la man ukurmbautyaav nav mba unyiin mbara ga?

Mba ve kaan ér yange i nger akaaôron a profeti a ken Bibilo zum u akaa shon er kera cii la hii u ôron kwagh ne ka hegen ga, kpa ve gema ve fatyô u tesen ér kwagh u ve lu ôron ne ka mimi ga. Ambaaior la tôv sha akaa ne ga tsô mba gbe nyiman tsô, gadia ve vande kuren ken ishima ve ér a fatyô u tsengaôron akaa a ken hemen ga. Er ve vende u lumun Bibilo ér ka Mkaanem ma Aôndo yô, mba keren u pasen hanma kwagh sha mnenge u orumace. Kpa, Aôndo yange er kwagh sha kwaghfan, gadia a na i nger akaaôron a profeti vighe vighe shi i nger a akuma akuma sha u tesen ér ka hen a na akaaôron ne a dugh ye. *

Aluer u tôô shighe u hen sha akaaôron a profeti a ken Bibilo la môm môm man er a kur sha mi yô, aa taver jighjigh wou. Yô, hen ase akaaôron a profeti a ken Bibilo la. Ngeren u a lu sha peeji 343 zan zan 346 ken takerada u “All Scriptures Is Inspired of God and Beneficial” la una wase u u eren kwagh ne. * Aluer u ngu henen a yô, hen a sha gbenda u maan a maa jighjigh wou u nan. De henen ayem ayem wer u nôngo u bee ga. Kpa gbidye kwar sha akaa a a tese ér kwagh u Yehova a tsenge ôron yô gbe inya mayange ga la.

[Footnotes]

[Picture on page 24]

AKAAWAN A TESEN SE UMA U DEDOO

Kwagh ugen kpa ngu heen u i doo u u hen sha mi yô. Ka Aôndo u a tsenge ôron kwagh u mhii u ityartor i ageegh man mtim u i vough la shi a er se akaa ken Bibilo a tesen se uma u dedoo kpaa ye. Ka akaa shon agen je a lu shin heen ne:

Ka kwagh u ú lee la, ú sunda ye.—Mbagalatia 6:7.

U nan a na kwagh hembe saan iyol a u ngohol a ngohol kwagh.—Aerenakaa 20:35.

Se lu mbaibanave ken jijingi ve a saan se iyol ye.—Mateu 5:3.

Aluer u dondo akaawan ne yô, gba fan tsô wer aa wase u ú zua a msaanyol shi u za ikyura kpaa.

[Pictures on pages 22, 23]

Mkaanem ma Aôndo tsengaôron ér a tim akuraior ne, aa kera lu ga . . .

EDOM

BABILON

. . . kpa angan yô ma ôr nahan ga

GREECE

IGIPITI

[Credit Lines]

Pictorial Archive (Near Eastern History) Est.

WHO photo by Edouard Boubat

[Picture on page 23]

Alekesander u Vesen