Tartor U Aôndo Ua Va Hanma Shighe?

“TERE, ka hen shighe ne man Ú hide Mbaiserael a tahav mbu veren tor ve ayol a ve yee?” (Aerenakaa 1:6) Yange hange mbaapostoli u fan shighe u Yesu una ver Tartor na yô. Zan zan hegen u anyom a kar er 2,000 ne kpa, ior mba pinen di tsô ér: Tartor u Aôndo ua va hanma shighe?

Er Tartor lu itinekwagh i kwaghpasen u Yesu yô, alaghga u na jighjigh wer Yesu yange na mlumun sha mpin ne. Man kape i lu je la! Yange ôr kwagh u shighe u “mve” na acin imôngo. (Mateu 24:37) Mve na ne zua vea shighe u a ver Tartor u Mesiya la. Kanyi i lu mve na laa? De se time sha akaa a mimi anyiin a Bibilo i pase sha kwagh u mve u Kristu yô.

1. Lu u Yesu una kpe shighe a kar gôgônan cii ve mve na una hii ye. Yesu yange ôr injakwagh igen, tôô iyolna kar sha orgen u yange “yem ken tar u icaa sha u una za ya tor” yô. (Luka 19:12) Injakwagh i profeti ne kure sha mi nena? Yesu kpe, i nder un shin ku, maa yem ken “tar u icaa,” inja na yô a yem sha. Yesu shi ôr injakwagh igen i í lu kwaghmôm a ingin yô ér, ‘a tsaan gbang yô’ una hide, una lu tor hen shighe la.—Mateu 25:19.

Yesu yange kôndo yem sha anyom nga kar yô, apostoli Paulu nger wener: “Un [Yesu] yô, A va na nagh môm tseegh sha ci u asorabo, maa A za tema sha uwegh ku yanegh ku  Aôndo gbem. Ngu masen keghen zan zan á va gema mbaihyomov Nav vea hingir Un kwagh u pendan angahar a Na sha mi.” (Mbaheberu 10:12, 13) Nahan yô, shighe u Yesu yem sha la lu u una kegh shighe gôgônan cii ve una mase hingir tor ye. Shighe u keghen la kure zum u Yehova Aôndo ver Wan na Tor u Tartor u Mesiya u yange i tsengaôron ér ngu van la. Lu shighe ne mve u Kristu la hii ye. Lu u uumace vea nenge mve na u doon tsung nee?

2. Uumace vea nenge mve na la ga. Umbur wer, Yesu yange ôr kwagh u ikyav i sha mve na la. (Mateu 24:3) A gbe u uumace vea nenge mve na la sha ashe ve yô, shi ityôkyaa ma i lu i tesen ve ikyav i mve shon kpa? U tesen ikyav yô: Tôô ase wer u nyôr mato wer u za nenge ityeku ijiir igen. Alaghga er u lu yemen la u nenge a akav a tesen we gbenda, kpa u za sôôn hen kpe ityeku, u nengen a mngerem zan zan aa ikighir shio yô, u hen wer shi u nenge a ikyav, a nger sha mi ér ka “Ityeku” je nee? Ei, u nenge a mi ga! Aluer u nenge a kwagh u fa kwagh shon yô, ityôkyaa shi ia lu i veren ikyav i tesen wer kwagh shon ga.

Yesu pase ikyav i mve na sha u tesen uumace kwagh u vea va nenge a mi sha ashe ve ga, kpa lu sha u wasen ve ér ve fa kwagh u una er sha, vea nenge a mi ga yô. Sha nahan yô, Yesu kaa ér: “Ka sha mnenge u sha ashe man tartor u Aôndo u ve ga.” (Luka 17:20) Nahan yô, ikyav la ia wase mba ve lu shin tar la u fan er mve u Kristu una hii nena?

3. Mve u Yesu la una lu shighe u mbamzeyol vea ngee shin tar kpishi yô. Yesu kaa ér shighe u a ver un Tor sha la ityav man ijen man ityartenger man ubombauangev man mvende u vendan atindi una ngee shin tar kpishi. (Mateu 24:7-12; Luka 21:10, 11) Kanyi ia va a mbamzeyol mbanaa? Bibilo pase ér ishima vihi Satan “tor u tar” ne tsung, gadia a fa ér hegen u Kristu a tem Tor ne, shighe na kera vese ga. (Yohane 12:31; Mpase 12:9, 12) Akaa a tesen ishimavihin i Satan man mve u Kristu la dumbur hen shighe wase ne. Akaa ne hii u eren shin tar kpishi, hii ken inyom i 1914, inyom shon i mbatôvon akaa a mbayiase ve kaa ér hanma kwagh yange kôr gema shin tar la.

Ka inja er kwagh ne ka loho u bo nahan, kpa ka loho u bo ga. Inja na yô Tartor u Mesiya la ngu hemen sha hegen je. Ica a gba tsô gomoti u sha ne una hii u hemen tar ne kpaa. Nahan yô, ior vea fa kwagh u Tartor ne sha er vea lumun hemen u ú shi vea lu sha ikyev i ú nena?

4. Mve u Yesu la ka shighe u á pase kwagh sha tar jimin cii yô. Yesu yange kaa ér mve na la una lu er “ayange a Noa” nahan. * (Mateu 24:37-39) Noa lu or u gban tso tseegh ga; lu or u “yôôn kwagh u perapera” kpaa. (2 Peteru 2:5) Noa yange ta ior icin ér Aôndo sôôn timin tar. Yesu yange kaa wener sha shighe  u mve na la kpa mbadondon un mba shin tar vea lu tan ior icin er Noa nahan. Yange tsenga kaan ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”—Mateu 24:14.

Er se vande ôron ken ngeren u ken ijime la nahan, Tartor u Aôndo ua tim ugomoti mba tar ne cica cii. Tom u pasen kwagh u Tartor la wase ior u fan ér ica a gba ga tsô gomoti u sha ne una hemen tar, nahan ior mba zuan a ian i vea va war mtim u a lu van la, vea lu sha ikyev i Tartor la yô. Nahan mpin u hange hange u a lu sha kwagh ne yô ka un ne, A ôr u loho ne nahan u vengese je he?

Mve u Tartor u Aôndo Ka U Loho u Dedoo Kpa?

Loho u Yesu pasen ior la lu u nan ior ishimaverenkeghen i hemban cii. Shighe u Adam hemba Yehova Aôndo ato kera ngise ngise la, Yehova wa ishima ér una ver gomoti u una sôr mzeyol u ihyembeato la va a mi la, gomoti u una hide a uumace mba jighjigh ken mlu u Aôndo yange soo sha ci ve sha hiihii la; ka u lun uma gbem sha won ken paradiso shin tar je la. Er se fe ser gomoti u yange i tôndo zwa a mi ngise ne hii u hemen sha hegen nahan doo se je gande ga he? Gomoti ne ngu kpôô kpôô, ka kwagh u ken mhen u or u a cimin u kaven ga!

Un u Aôndo a ver un Tor la ngu hemen ken atô u mbaihyomov nav hegen ne je. (Pasalmi 110:2) Mesiya ngu eren kwagh u Ter na a soo la ken tar u ú saa ishe shi u gbe ica a Aôndo ne; Ter na soo ér i ker hanma or u i sar nan u fan Aôndo kpôô kpôô shi civir un ken “jijingi kua ken mimi” la. (Yohane 4:24) Ishimaverenkeghen i lun uma gbem sha won sha ikyev i Tartor u Aôndo la ngi sha ci u ior mba ken akuraior cii man mbaganden man mbayev man atsanaior kua mbainyarev kpaa. (Aerenakaa 10:34, 35) Se mba taver we ishima ser lumun ian i doon tsung, i lun uma ken Tartor u Aôndo i í lu u sha ishi ne. Hen kwagh u Tartor u Aôndo hegen sha er u va lu uma gbem sha won sha shighe u hemen u perapera u Tartor ne la!—1 Yohane 2:17.

[Footnotes]

[Pictures on pages 8, 9]

Akaa a bo a se ongo hanma iyange ne tese ér akaa a dedoo nga sôôn van

[Credit Line]

Antiaircraft gun: U.S. Army photo