Mpin u Mbaôron Takerada Ne

A Nôngo Ityav Mbi Armagedon Hana?

I ver ma agirigi uitya u a nôngo ityav mbi Armagedon her ga. A nôngo ityav mbin sha tar jimin cii. Sha ci u nyi? Sha ci u akumautya ahar a aa nôngo ityav mbin ngee gande u aa kohol hen ijiir i môm tseegh.

Shi mba yer ityav mbi Armagedon ér “ityav mbi iyange i vesen i Aôndo, Uhembanagee.” Yehova una tindi Wan na Yesu Kristu ér a kohol akum a mbatyomov mba shaav a ta num sha akumautya a mbahemenev mba aferev mba shin tar cica cii.—Mpase 16:14; 19:11-16.

Akumautya a Satan mee akuraior a shin tar ér a kohol ve ken ityav mbin. Bibilo kaa ér “ujijingi mba diabolo mba ve eren uivande la” due za hen “utor [mbahemenev] mba sha tar sha won cii sha u kohol ve ijiir i môm . . . hen ijiir i i yer ken zwa u Heberu ér Armagedon la.”—Mpase 16:14-16.

Ken Bibilo cii ka takerada u Mpase u hembe ôron akaa a kpiligh mba ôron Bibilo kpishi iyol ye. Mba ôron Bibilo mba ve ne jighjigh ér akaa a i nger ken takerada u Mpase la ka akaa a kpôô kpôô yô, tsua ijiir i ve hen ér ityav mbi Armagedon mbia hii her yô, nahan ve ver ashe zulee mba nengen akaa a a lu eren hen ijiir shon yô. Ka ngeren u ken zwa Grika u orgen u i yilan un ér Oeconomus nger sha kwagh u takerada u Mpase ken derianyom u sha puetaratar la yange ôr kwagh u Armagedon ér ka ijiir kpôô kpôô ye.

Orvesen John F. Walvoord, u vande lun pesiden u makeranta u kwaghaôndo u i yer ér Dallas Theological Seminary la kimbir mkaanem ma orhemen adua ugen yange ôr yô ér, Armagedon ka “ityav mbi masetyô mbi tar cii ua nôngo a bee ishima yô, man a nôngo mbi ken veghertar u i yer ér Middle East la.” Walvoord ôr ijiir i a va nôngo zegeutya ne yô, ér ka hen alôgh a gar u Megido u tsuaa, henpe uwo u lu u tav u kom angahar 70, shi pev kpa a lu her ikyua la.

Nahan kpa takerada u Mpase ngu ôron kwagh u ma ijiir kpôô kpôô i í yer ér Armagedon ga. A lu u nenge ivur i hiihii i takerada u Mpase ken zwa Grika u yange i hii ngeren takerada ne ker la yô, ivur la kaa ér i nger akaa a a lu ken Mpase la sha ikyav. Sha nahan yô, ngise Mbashiada mba Yehova ôr ken takerada ve u i yer ér Studies in the Scriptures, Tihi u sha utaan la ér: “Se mba veren ashe ser se va nenge a kohol ior kpôô kpôô sha Uwo i Megido ga.”

Akaa a yange er hen Megido la ka ikyav i tesen ér mwar una lu sha ci u mbaihyomov mba Aôndo ga. Nahan hanma ijiir i anyighe man iferkwagh i lu sha tar cii yô, Armagedon una bee a mi vindi vindi.—Mpase 21:8.

Ior mba Yehova man Wan na Yesu Kristu a doo ve ishima yô, mba a ityôkyaa i cian Armagedon ga. Ka mbaaferev mba Aôndo a nenge ér ve venda u geman asema la tseegh ityav mbi Aôndo mbia tim ve ye. Ityav nav mbin mbia gba wuan hanma or tsô ga, mbia sange a sange. Bibilo kaa ér: “Mba ve civir Aôndo la Ter fa u yiman ve.” (2 Peteru 2:8, 9) I er ityendezwa i doon tsung ken Pasalmi 37:34 ér: “Ver ashe hen TER, wa ikyo sha gbenda Na, tsô Una kende u sha, ú ya dyako u tar, ú nenge mtim u á tim mbaaferev kera yô.”